“Muloro Wanga Wo Ḓadzea”

Miṅwahani ya 15 yo fhiraho, Emilia o vha e muvulanḓila wa tshifhinga tshoṱhe. Naho zwo ralo, o litsha u vula nḓila a si tsha vha tshumeloni ya tshifhinga tsho ḓalaho. Miṅwahani ya zwenezwino, o vha a tshi dzulela u elekanya nga ha tshenetsho tshifhinga tshi takadzaho vhukuma vhutshiloni hawe, nahone o vha a tshi ṱoḓa u engedza vhuḓinḓa hawe.

Naho zwo ralo, mushumo wa Emilia wa u ḓitshidza wo vha u tshi mu dzhiela tshifhinga tshinzhi, nahone zwenezwi zwo vha zwi tshi ita uri a si takale. Nga ḽiṅwe ḓuvha o gungula phanḓa ha vhathu vhane a shuma navho a ri: “Ndi tama ngavhe ndi tshi shuma awara dzi si gathi fhedzi!” Mulanguli wawe o pfa mafhungo eneo nahone a mu vhudzisa arali e ngoho. Emilia o tenda uri ndi ngoho. Naho zwo ralo, u itela uri zwi konadzee uri a shume awara dzi si gathi, mulanguli muhulwane ndi ene we a vha a tshi tea u mu tendela u ita zwenezwo ngauri khamphani yo vha i na mulayo u ṱoḓaho uri vhashumi vha ḓikumedze tshoṱhe mushumoni wavho. Onoyu wahashu wa tshisadzini o lugiselela muṱangano we wa vha u tshi ḓo farwa na mulanguli muhulwane, nahone a rabela uri a vhe na mulalo na tshivhindi.

Musi vhe muṱanganoni wonoyo, Emilia o vha na tshivhindi na vhuṱali musi a tshi humbela uri a fhungudzelwe awara dzine a dzi shuma. O ṱalutshedza uri u ṱoḓa u shumisa tshifhinga tshine a ḓo vha a si khou shuma ngatsho u itela u thusa vhaṅwe u ḓivha Mudzimu. O ri: “Ndi muṅwe wa Ṱhanzi dza Yehova, nahone ndi thusa vhathu u vhumba vhushaka nae. Musalauno vhathu vhanzhi a vha tsha vha na matshilele o kunaho. Vha ṱoḓa vhulivhisi vhu pfalaho na zwilinganyo zwine zwa nga vha thusa, nahone vhuṱali vhu bvaho Bivhilini vhune nda ḓo vha gudisa hone vhu ḓo vha vhuyedza vhukuma. A thi ṱoḓi uri nḓila ine nda shuma ngayo fhano i thithiswe nga mishumo ine nda i ita musi ndo no tshaisa, nahone u itela u thusa vhathu hu ḓo ṱoḓea tshifhinga tsho engedzeaho. Ndi ngazwo ndi tshi khou humbela u fhungudzelwa awara dzine nda dzi shuma fhano.”

Mulanguli muhulwane o thetshelesa nga vhuronwane nahone a amba uri o no vhuya a humbula nga ha u ita mushumo wa u ḓifunela wa u thusa tshitshavha. A mbo ḓi ri: “Nga nṱhani ha zwiitisi zwe na nṋea zwone, ndi vhona zwo tea uri ri ni fhungudzele awara dzine na dzi shuma fhano. Fhedzi, naa ni a zwi ṱhogomela uri na muholo waṋu u ḓo fhungudzea?” Emilia o amba uri u a zwi ḓivha uri u ḓo fhungudzea, nahone arali zwi tshi ṱoḓea u ḓo leludza vhutshilo hawe. O dovha a ri: “Tshipikwa tshanga tshihulwane ndi u ita zwithu zwine zwa ḓo vhuyedza vhathu zwa vhukuma.” Mulanguli muhulwane o ri khae: “Ndi dzhiela nṱha nga maanḓa vhathu vhane vha kumedza tshifhinga tshavho nga u ḓifunela u itela u thusa vhaṅwe.”

A hu na na muthu na muthihi ane a shuma kha khamphani yeneyo we a vhuya a fhungudzelwa awara dzine a tea u shuma dzone. Zwa zwino Emilia o tendelwa u shuma maḓuvha maṋa fhedzi nga vhege. O mangala vhukuma musi a tshi engedzelwa muholo wawe, nahone u hola tshelede i fanaho na ye a vha a tshi hola yone! O ri: “Muloro wanga wo ḓadzea, ngauri zwino ndi ḓo dovha nda vha muvulanḓila wa tshifhinga tshoṱhe!”

Naa no no vhuya na humbula nga ha u shandula zwiimo zwaṋu u itela u dzhenela tshumelo ya vhuvulanḓila?

[Maipfi o ṱumbulwaho kha siaṱari 32]

Mulanguli muhulwane o ri khae: “Ndi dzhiela nṱha nga maanḓa vhathu vhane vha kumedza tshifhinga tshavho nga u ḓifunela u itela u thusa vhaṅwe”