Vho Ḓikumedza Nga U Ḓifunela—Ngei Ecuador

WAHASHU wa tshinnani ane a kha ḓi vha muswa wa ngei Italy o vha e nga fhasi ha mutsiko. O vha a tshi kha ḓi bva u fhedza tshikolo tsha murole wa nṱha, o phasa zwavhuḓi vhukuma, nahone mashaka na vhadededzi vho mu ṱuṱuwedza uri a tovhole pfunzo ya nṱha. Naho zwo ralo, Bruno o ḓiṋekedza kha Yehova miṅwahani i si gathi nga phanḓa ha zwenezwo, nahone a ita muano wa uri zwine zwa ḓo ḓa u thoma vhutshiloni hawe ndi u ita zwine Mudzimu a zwi funa. O sedzana hani na mutsiko wa mashaka na vhadededzi? A tshi ṱalutshedza o ri: “Ndo vhudza Yehova nga thabelo uri ndi ḓo tshila u tendelana na u ḓiṋekedza hanga, nga u ita uri a ḓe u thoma vhutshiloni hanga. Fhedzi ndo dovha nda mu vhudza nga u fulufhedzea thabeloni yanga uri a thi ṱoḓi vhutshilo vhu no bora, fhedzi ndi ṱoḓa vhutshilo vhu takadzaho vhune ha katela mishumo yo fhamba-fhambanaho tshumeloni yawe.”

 Nga murahu ha miṅwaha i si gathi, Bruno o ḓiwana e ngei Ecuador, Amerika Tshipembe. O ri: “Yehova o fhindula thabelo yanga nga nḓila ye nda vha ndi songo i lavhelela.” Zwe zwa mu mangadza ndi uri musi a tshi swika ngei Ecuador, o wana hu na vhaswa vhanzhi vhe na vhone vha pfulutshela henefho u itela u shumela Yehova nga ho engedzeaho.

VHASWA VHANE VHA ‘LINGA YEHOVA’

Bruno, o ita zwe zwa itwa nga vhaswa vhanzhi-vhanzhi shangoni ḽoṱhe vhe vha tenda musi Yehova a tshi vha ramba a ri: “Ni dzou ndinga nga u ita zwenezwo. . . . Ngangoho ndi hone ndi tshi ḓo ni vulela mabuli a makoleni, nda ni tevhulela phaṱhutshedzo dza tou ni hulela.” (Mal. 3:10) Nga nṱhani ha u funa havho Mudzimu, vho ita phetho ya u ‘linga Yehova’ nga u ṋekedza nga u ḓifunela tshifhinga tshavho, maanḓa na thundu u itela u tikedza mulaedza wawe wa Muvhuso shangoni ḽi re na ṱhoḓea khulwane ya vhahuweleli.

Nga u ṱavhanya musi vhenevha vhashumi vha u ḓifunela vha tshi swika mushumoni wavho muswa, vho ṱhogomela uri “khaṋo ndi khulu, [fhedzi] vhakaṋi vhone a si vhanzhi.” (Mat. 9:37) Sa tsumbo, Jaqueline ane a bva ngei Dzheremane o ṅwalela davhi ḽa Ecuador nga u fhisea a ri: “Ndo no fhedza miṅwaha mivhili ndi tshi khou shuma fhano Ecuador, nahone ndo no vha na pfunzo dza Bivhili dza 13, nahone vhaṋa kha vhenevho vha ḓa miṱanganoni tshifhinga tshoṱhe. Zwi a ntakadza vhukuma zwenezwi.” Chantal ane a bva ngei Canada o ri: “Nga 2008, ndo pfulutshela kha phendelashango ngei Ecuador he ha vha hu na tshivhidzo tshithihi fhedzi. Zwino hu na zwivhidzo zwiraru, na vhavulanḓila vha fhiraho 30. U vhona vhathu vhaswa vha tshi ita mvelaphanḓa zwi a takadza vhukuma!” O  dovha a ri: “Ndi kha ḓi bva u pfulutshela ḓoroboni i re nṱha ha Thavha dza Andes nga mithara dza 2 743. Hu na vhathu vha fhiraho 75 000 vhane vha dzula ḓoroboni yeneyi, fhedzi hu na tshivhidzo tshithihi. Ndi tsimu ine khayo vhathu vha aravha zwavhuḓi vhukuma! Ndi khou ḓiphina vhukuma nga vhuḓinḓa hanga.”

KHAEDU DZI RE HONE

Ndi ngoho uri u nga sedzana na khaedu khulwane musi u tshi khou shuma kha ḽiṅwe shango. Zwi re zwone ndi uri vhaṅwe vhaswa vho sedzana na khaedu dzenedzo na musi vha sa athu pfulutshela kha ḽiṅwe shango. Kayla wa ngei United States, o ri: “Muthu a nga kulea nungo nga nṱhani ha mavhonele a si avhuḓi a vhaṅwe vhahashu. Vhaṅwe a vha pfesesi uri ndi ngani ndi tshi fanela u pfulutshela kha ḽiṅwe shango u itela u vula nḓila. Nga zwiṅwe zwifhinga ndo vha ndi tshi ḓivhudzisa uri, ‘Naa ndi khou ita phetho ya vhuṱali?’” Naho zwo ralo, Kayla o ita phetho ya u pfulutshela henengei. Musi a tshi ṱalutshedza o ri: “U rabela Yehova lunzhi-lunzhi na u fhedza tshifhinga tshilapfu ndi tshi khou haseledza na vhahashu vha tshinnani na vha tshisadzini vho vhibvaho zwo nthusa u ṱhogomela uri Yehova u fhaṱutshedza vha re na muya wa u ḓikumedza.”

Vhaṅwe vha wana zwi khaedu u guda luambo luswa. Siobhan wa ngei Ireland, o ri: “U sa kona u amba vhuḓipfi hanga zwavhuḓi zwo ita uri ndi wane zwiimo zwi tshi nkonḓela vhukuma. Ndo vha ndo tea u guda u sa fhela mbilu, u ḓiimisela u guda luambo, na u ḓisea musi ndi tshi ita vhukhakhi.” Anna wa ngei Estonia, o ri: “U guda Lupania zwo vha zwi tshi konḓa nga maanḓa u fhira u ḓowela mufhiso wa henefho, mabuse, na u sa vha na shawara. Nga zwiṅwe zwifhinga ndo vha ndi tshi ṱoḓa u laṱela thaula. Ndo guda u livhisa ṱhogomelo kha mvelaphanḓa ye nda vha ndi tshi khou i ita, hu si kha vhukhakhi hanga.”

Iṅwe khaedu khulwane ine na nga sedzana nayo, ndi u ṱuvha hayani. Jonathan wa ngei United States, o ri: “Musi ndo no vha fhano, ndo ḓipfa ndo kulea nungo nga nṱhani ha u vha kule na khonani dzanga na muṱa wahashu. Fhedzi ndo kunda maḓipfele eneo nga u livhisa ṱhogomelo kha ngudo ya Bivhili ya muthu nga eṱhe na kha vhuḓinḓa hanga. Hu sa athu fhela tshifhinga tshilapfu, tshenzhelo dzi takadzaho dze nda vha nadzo na khonani dzanga ntswa dza tshivhidzoni dzo ita uri ndi dovhe ndi takale.”

Iṅwe khaedu ndi zwiimo zwa fhethu hune na ḓo dzula hone. Kanzhi zwi nga si fane na zwe na zwi ḓowela. Beau, wa ngei Canada, o ri: “Musi ni shangoni ḽa haṋu, a ni dzhieli nṱha tshumelo dza mutheo dzi ngaho muḓagasi, na bommbi dza maḓi. Fhedzi fhano, zwenezwi  zwithu a zwi wanali nga hu leluwaho.” Mashangoni ane a kha ḓi bvela phanḓa zwo ḓowelea uri hu ande zwithu zwi ngaho vhushai, u shayea ha zwiṋamelo na u sa funzea. Ines, wa ngei Austria, o sedzana na zwiimo zwo raloho, nahone zwo itaho uri a bvelele ndi u livhisa ṱhogomelo nga maanḓa kha pfaneleo dzavhuḓi dza vhathu vha henefho. O ri: “Vha na muya wa u ṱanganedza vhaeni, vha na vhulenda, vha a thusa vhaṅwe nahone vha a ḓiṱukufhadza. Zwa ndeme vhukuma ndi uri vha na dzangalelo ḽihulwane ḽa u guda zwo engedzeaho nga ha Mudzimu.”

‘PHAṰHUTSHEDZO DZE DZA TOU VHA HULELA’

Samusi vhenevha vhaswa vhoṱhe vhane vha khou shuma ngei Ecuador hu na zwe vha ḓidzima zwone, vho zwi ṱhogomela uri Yehova o vha ṋea “zwiné zwa fhira” zwe vha vha vho zwi lavhelela. (Vha-Ef. 3:20) Vhukuma, vha ḓipfa vho wana ‘phaṱhutshedzo dze dza tou vha hulela.’ (Mal. 3:10) Vha ḓipfa nga nḓila i tevhelaho malugana na vhuḓinḓa havho:

Bruno: “Ndo thoma tshumelo yanga fhano Ecuador ngei dzinguni ḽavhuḓi vhukuma ḽa Amazon. Nga murahu, ndo mbo ḓi ya u thusa musi hu tshi engedzwa ofisi ya davhi ya Ecuador. Zwino ndi khou shuma Bethele. Musi ndi tshi kha ḓi vha shangoni ḽa hashu ngei Italy, ndo ita phetho ya uri Yehova a ḓe u thoma vhutshiloni hanga, nahone u khou ḓadzisa lutamo lwanga lwa u vha na vhutshilo vhu takadzaho vhune ha katela mishumo yo fhamba-fhambanaho tshumeloni yawe.”

Beau: “Ndo no vha na vhushaka ha tsini-tsini na Yehova nga nṱhani ha uri fhano Ecuador ndi fhedza tshifhinga tshanga tshoṱhe mishumoni ya lwa muya. Zwiṅwe hafhu, ndo dovha nda wana phaṱhutshedzo ya u kona u endela fhethu hu takadzaho hunzhi—nahone ndi zwe nda vha ndi tshi tama u zwi ita vhutshiloni hanga.”

Anna: “Ndo vha ndi sa humbuli uri zwi ḓo konadzea uri wahashu wa tshisadzini a songo vhingwaho a ḓiphine nga vhutshilo vhu fanaho na ha vharumiwa. Fhedzi zwino ndi a zwi ḓivha uri zwi a konadzea. Ndi livhuha phaṱhutshedzo ya Yehova, ngauri ndi takalela vhukuma u ita vhafunziwa, u fhaṱa Holo dza Muvhuso, na u vhumba vhukonani na vhathu vhaswa.”

Elke: “Musi ndi shangoni ḽa hashu ngei Austria, ndo vha ndi tshi anzela u rabela ndi tshi humbela pfunzo ya Bivhili nthihi fhedzi. Fhano ndi na pfunzo dza Bivhili dza 15! U vhona zwifhaṱuwo zwo takalaho zwa vhagudiswa vhane vha khou ita mvelaphanḓa zwi ita uri ndi ḓipfe ndo fushea.”

Joel: “Zwi a takadza vhukuma u ya fhethu hune na si hu ḓivhe nga nṱhani ha u ṱoḓa u shumela Yehova. Ni guda u ḓitika ngae nga ho engedzeaho, nahone zwi a takadza u vhona a tshi fhaṱutshedza vhuḓidini haṋu! Nga ṅwaha wanga wa u thoma ndi fhano ndi tshi bva ngei United States, tshigwada tshee nda vha ndi tshi khou shuma khatsho tsho vha tshi na vhahuweleli vha 6 fhedzi, zwino tsho no vha na vhahuweleli vha 21. Ho vha na vhathu vha 110 vhe vha ḓa Tshihumbudzoni.”

INWI NO ḒIIMISELA U ITA MINI?

Vhoiwe vhahashu vha tshinnani na vha tshisadzini vhaswa, naa zwiimo zwaṋu zwi a ni tendela u ya u shuma shangoni ḽi re na ṱhoḓea khulwane ya vhahuweleli vha Muvhuso? Ndi ngoho uri u ita tshanduko khulwane nga u rali zwi ṱoḓa uri ni thome ni dzudzanye zwiimo nga nḓila yavhuḓi. Zwa ndeme vhukuma, ni fanela u pfulutshela kha ḽiṅwe shango nga nṱhani ha u funa Yehova na vhahura vhaṋu. Arali ni tshi vha funa, nahone ni tshi fanelea, rabelani Yehova nga ha mafhungo enea a u ya u shuma kha ḽiṅwe shango. Zwiṅwe hafhu, ambani na vhabebi vhaṋu vha Vhakriste na vhahulwane vha tshivhidzo nga ha zwine na zwi tama. Na inwi ni nga swikelela phetho ya u ṱanganela kha ḽeneḽi sia ḽa tshumelo khethwa ḽi takadzaho na ḽi fushaho.

[Maipfi o ṱumbulwaho kha siaṱari 3]

“U rabela Yehova lunzhi-lunzhi na u fhedza tshifhinga tshilapfu ndi tshi khou haseledza na vhahashu vha tshinnani na vha tshisadzini vho vhibvaho zwo nthusa u ṱhogomela uri Yehova u fhaṱutshedza vha re na muya wa u ḓikumedza.”—Kayla wa United States

[Bogisi/Tshifanyiso kha siaṱari 6]

Nḓila ine na nga lugiselela ngayo u yo shuma kha ḽiṅwe shango

• Ṱahulelani mukhuvha wavhuḓi wa u vha na ngudo ya muthu nga eṱhe

• Vusulusani Vhuḓinḓa Hashu ha Muvhuso, ha August 2011, masiaṱari 4-6

• Ambani na vhaṅwe vhathu vhe vha vhuya vha shuma kha ḽiṅwe shango

• Itani ṱhoḓisiso nga ha mvelele na sialala zwa shango ḽeneḽo

• Gudani luambo lune lwa ambiwa kha ḽeneḽo shango

[Bogisi/Tshifanyiso kha siaṱari 6]

Vhaṅwe vhe vha shuma kha maṅwe mashango vho ḓitikedza nga zwa dzitshelede nga . . .

• u ḓiṋea tshifhinga tsha u yo shuma shangoni ḽa havho miṅwedzi i si gathi ṅwaha muṅwe na muṅwe

• u hirisa nnḓu yavho, fulethe kana bindu ḽavho

• u ita mushumo kha Inthanethe

[Zwifanyiso kha masiaṱari 4, 5]

1 Jaqueline wa Dzheremane

2 Bruno wa Italy

3 Beau wa Canada

4 Siobhan wa Ireland

5 Joel wa United States

6 Jonathan wa United States

7 Anna wa Estonia

8 Elke wa Austria

9 Chantal wa Canada

10 Ines wa Austria