“Yehova” U Kuvhanganya Muṱa Wawe
“Yehova” U Kuvhanganya Muṱa Wawe
‘Ndi a ni fhembeledza-ha, uri ni dzule ni vhathihi nga Muya.’—VHA-EF. 4:1, 3.
NI NGA ṰALUTSHEDZA HANI?
Maitele a Mudzimu a na ndivho ifhio?
Ri ‘dzula rí vhathihi nga Muya’ nga nḓila-ḓe?
Ndi mini zwine zwa ḓo ri thusa uri ‘tshashu hu vhe u itelana vhuhwavho, na vhulenda’?
1, 2. Yehova u na ndivho ifhio nga ha ḽifhasi na vhathu?
MUṰA. Ḽeneḽi ipfi ḽi ita uri ni humbule nga ha mini? Naa ni humbula nga ha lufuno kana dakalo? U shuma nga vhuthihi ni na tshipikwa tshi fanaho? Fhethu ho tsireledzeaho hune ra nga aluwa hone, ra guda hone, na hune ra nga amba hone zwine ra zwi humbula? Arali muṱa wa haṋu u na lufuno, a zwi timatimisi uri ni a tshenzhela zwithu zwenezwi. Yehova ndi ene Muthomi wa muṱa. (Vha-Ef. 3:14, 15) Ndivho yawe ndi uri zwivhumbiwa zwawe zwoṱhe zwi re ngei ṱaḓulu na kha ḽifhasi zwi ḓipfe zwo tsireledzea, zwi tshi fulufhelana, na u vha na vhuthihi ha vhukuma.
2 Musi Adamu na Eva vho no ita tshivhi, a vho ngo tsha vha tshipiḓa tsha muṱa wa Mudzimu wa fhethu hoṱhe, fhedzi ndivho ya Yehova a yo ngo shanduka. U ḓo ita vhungoho ha uri ḽifhasi ḽa Paradiso ḽi a ḓadzwa nga vhana vha Adamu na Eva. (Gen. 1:28; Yes. 45:18) O ita ndugiselelo dzoṱhe u itela uri ndivho yawe i ḓadzee. Dziṅwe dza ndugiselelo dzenedzi dzo ṅwalwa Bivhilini kha bugu ya Vha-Efesa. Thero ya yeneyi bugu ndi vhuthihi. Kha ri haseledze dziṅwe ndimana dza bugu yeneyi, ri vhone nḓila ine ra nga shumisana ngayo u tendelana na ndivho ya Yehova ya u ita uri tsiko yawe i vhe na vhuthihi.
MAITELE NA ZWINE A ZWI KHUNYELEDZA
3. Ndi afhio maitele a Mudzimu ane ha ambiwa nga hao kha Vha-Efesa 1:10, nahone o thoma lini u vha hone?
3 Mushe o vhudza Vhaisiralele a ri: “Yehova Mudzimu wau ndi Yehova é eṱhe.” (Doit. 6:4) Zwine Yehova a zwi ita zwi a tshimbidzana na ndivho yawe. Nga zwenezwo, “musi zwifhinga zwó khunyelela,” Mudzimu o vhea “maitele”—zwine zwa amba uri, o dzudzanya zwithu zwine zwa ita uri zwivhumbiwa zwawe zwoṱhe zwo ṱalifhaho zwi vhe na vhuthihi. (Vhalani Vha-Efesa 1:8-10.) Hu na nḓila mbili dzine enea maitele a ḓo swikelela ngadzo tshipikwa tshao. Nḓila ya u thoma, ndi u lugiselela tshivhidzo tsha vhaḓodzwa vhane vha ḓo tshila ngei ṱaḓulu nga fhasi ha vhuṱoho ha Yesu Kristo. Yeneyi nḓila yo thoma nga Pentekoste ya 33 C.E. musi Yehova a tshi thoma u kuvhanganya vhane vha ḓo vhusa na Kristo ngei ṱaḓulu. (Mish. 2:1-4) Samusi vhaḓodzwa vha tshi vhidzwa uri vho luga kha mutheo wa tshiṱhavhelo tsha Kristo tshi rengululaho, vha a zwi ḓivha uri vha dzhiiwa sa “vhana vha Mudzimu.”—Vha-Roma 3:23, 24; 5:1; 8:15-17.
4, 5. Nḓila ya vhuvhili ya maitele a Mudzimu ndi ifhio?
4 Nḓila ya vhuvhili ndi u lugiselela vhane vha ḓo dzula Paradisoni kha ḽifhasi nga fhasi ha Muvhuso wa Vhumessia. Vha “gogo ḽihulu” ndi vhone vhathu vha u thoma vhane vha ḓo tshila Paradisoni. (Ndzumb. 7:9, 13-17; 21:1-5) Tshifhingani tsha Vhuvhusi ha Miṅwaha ya Tshigidi, vhathu vha dzimilioni vho vuswaho vhafuni vha ḓo tshila navho henefho Paradisoni. (Ndzumb. 20:12, 13) Edzani u humbula nḓila ine u vuswa ha vhafu zwa ḓo ri ṋea ngayo zwibuli zwa u sumbedza vhuthihi hashu! Musi miṅwaha ya tshigidi yo no fhela, ‘zwoṱhe zwa fhasi’ kana vha re kha ḽifhasi, vha ḓo lingiwa lwa u fhedza. Vhane vha ḓo dzula vha tshi fulufhedzea vha ḓo dzhiiwa sa “vhana vha Mudzimu” vha kha ḽifhasi.—Vha-Roma 8:21; Ndzumb. 20:7, 8.
5 Nḓila dzenedzi mbili dza maitele a Mudzimu dzi khou bvela phanḓa ṋamusi—ngei ṱaḓulu na fhano kha ḽifhasi. Fhedzi, muṅwe na muṅwe washu a nga shuma u tendelana na maitele a Mudzimu nga nḓila-ḓe?
‘LUSANI U DZULA NÍ VHATHIHI NGA MUYA’
6. Maṅwalo a sumbedza hani uri Vhakriste vha fanela u kuvhangana?
6 Maṅwalo a sumbedza uri Vhakriste vha fanela u kuvhangana. (1 Vha-Kor. 14:23; Vha-Heb. 10:24, 25) Fhedzi u vha na vhuthihi a zwi ambi u sokou fhedza tshifhinga vhoṱhe fhethu huthihi, samusi zwi tshi itwa nga vhathu vhane vha ya makete kana tshitediamu. Vhuthihi ha vhukuma vhu katela zwo engedzeaho. Ri vha na vhuthihi musi ri tshi shumisa nyeletshedzo dza Yehova nahone ri tshi tendela u ṱuṱuwedzwa nga muya wawe mukhethwa.
7. Zwi amba mini ‘u dzula rí vhathihi nga Muya’?
7 Naho Yehova a tshi dzhia vhaḓodzwa sa vho lugaho sa vhana vhawe, nahone vha dziṅwe nngu a tshi vha dzhia sa vho lugaho vha re khonani dzawe kha mutheo wa tshiṱhavhelo tsha Kristo tshi rengululaho, nga zwiṅwe zwifhinga hu ḓo vha na dziphambano vhukati hashu, arali roṱhe ri tshi kha ḓi tshila kha ḽino shango ḽivhi. (Vha-Roma 5:9; Yak. 2:23) Arali dziphambano dzo vha dzi siho, ho vha hu sa ḓo vha na nyeletshedzo yo hevhedzwaho ya uri ri “khathutshelane.” Ri nga swikelela hani vhuthihi na vhatendi nga riṋe? Ri fanela u bvela phanḓa ri tshi ‘tshimbila sa vhaṱoma, ri na vhulenda.’ Zwiṅwe hafhu, Paulo o ri ṱuṱuwedza uri ri ite vhuḓidini ha ‘u dzula rí vhathihi nga Muya, ludzi lu ri vhofhekanyaho ú mulalo.’ (Vhalani Vha-Efesa 4:1-3.) U shumisa yeneyi nyeletshedzo zwi katela u tendela muya wa Mudzimu u tshi ri ṱuṱuwedza na u ita uri ri bveledze tshiaṋwiwa tsha muya. Tshenetshi tshiaṋwiwa tshi ita uri ri dzudzanye phambano dzi re hone vhukati hashu, nahone tsho fhambana vhukuma na mishumo ya ṋama ine ya ri luṱanya.
8. Ndi nga muhumbulo ufhio hune ha nga ambiwa uri mishumo ya ṋama i ita uri hu si vhe na vhuthihi?
8 Ṱhogomelani nḓila ine “mishumo ya ṋama” ya ita ngayo uri ri si vhe na vhuthihi. (Vhalani Vha-Galata 5:19-21.) Vhupombwe vhu ita uri muthu a si vhe na vhuthihi na Yehova na tshivhidzo, nahone vhuṱonḓolo vhu nga ita uri vhana vha fhandekane na vhabebi vhavho, na uri mufarisi a si na mulandu a fhandekane na munna kana mufumakadzi wawe. Zwiito zwa vhuyaḓa zwi ita uri muthu a si vhe na vhuthihi na Mudzimu u katela na vhathu vhane vha mu funa. Samusi zwithu zwivhili zwi sa koni u nambatelana musi zwo ḓodzwa guluu arali tshithihi tshazwo tshi na tshika, muthu a songo kunaho siani ḽa vhuḓifari na muvhilini a nga si vhe na vhuthihi na Mudzimu na vhathu vhawe. U ḓifara luvhi nga nḓila yo kalulaho zwi sumbedza uri muthu ha dzhieli nṱha milayo ya Mudzimu yo lugaho. Mishumo yoṱhe ya ṋama i ita uri vhathu vha si vhe na vhuthihi na Mudzimu na vhukati havho vhone vhaṋe. Vhuḓifari ho raloho ho fhambana tshoṱhe na zwine Yehova a vha zwone.
9. Ri nga ḓiṱolisisa hani u itela u vhona arali ri tshi khou lwela ‘u dzula rí vhathihi nga Muya, ludzi lwo ri vhofhekanyaho hú mulalo’?
9 Nga zwenezwo, muṅwe na muṅwe washu u fanela u ḓivhudzisa uri: ‘Ndi ita vhuḓidini vhungafhani u itela u lwela “u dzula ndí na vhuthihi nga Muya, ludzi lwo ri vhofhekanyaho hú mulalo”? Ndi aravha hani musi hu tshi vha na dziphambano? Naa ndi amba nga hadzo vhukati ha vhathu u itela uri vhaṅwe vhavho vha ntikedze? Naa ndi lavhelela uri vhahulwane vha dzhenelele kha mafhungo eneo nṱhani ha u ita vhuḓidini ha u dzudzanya phambano dzenedzo nga mulalo? Naa ndi iledza muthu we nda fhambana nae nahone nda ita vhungoho ha u sa sendela tsini nae?’ Naa maitele o raloho a ḓo sumbedza uri ri khou ita zwithu u tendelana na ndivho ya Yehova ya u kuvhanganyela zwithu zwoṱhe kha Kristo?
10, 11. (a) Ndi zwa ndeme lungafhani u vha na mulalo na vhahashu? (b) Ndi mini zwine zwa nga ita uri ri vhe na mulalo na uri ri aluwe nga lwa muya?
10 Yesu o ri: “Arali hu musi uné wa yo ṋekedza dzithwala dzau kha aletare, wa elelwa henefho zwauri murathu wau u na mafhungo na iwe, Dzithwala dzau dzi sie henefho phanḓa ha aletare, U thome U yo pfumedzana na murathu wau, U kone u yo ṋekedza dzithwala dzau. Ṱavhanya u pfana . . . nae.” (Mat. 5:23-25) Yakobo o ṅwala uri: “Mbeu ya u aṋwa u luga i zwalwa nga vha-ita-mulalo ḽó lala.” (Yak. 3:17, 18) Nga zwenezwo, a zwi konadzei uri ri bvele phanḓa ri tshi ita zwo lugaho arali hu si na mulalo vhukati hashu na vhaṅwe vhathu.
11 Sa tsumbo, hu anganyelwa uri kha maṅwe mashango o tshinyadzwaho nga dzinndwa, phesenthe dza 35 dza mavu dzo vha dzi tshi nga shumiselwa zwa vhulimi arali vhathu vha vho vha si na thaidzo ya u vhilaedziswa ngauri hu na bomo dzo fukedzwaho mavuni. Musi bomo dzenedzo dzi tshi thuthuba, vhalimi vha ṱutshela mabulasi avho, zwa ita uri vhathu vha si vhe na zwine vha ḓitshidza ngazwo mivhunduni yeneyo, nahone vhathu vha dziḓoroboni vha konḓelwa u wana zwiḽiwa. Nga hu fanaho, zwi a konḓa uri ri bvele phanḓa ri tshi aluwa nga lwa muya arali ri na pfaneleo dzine dza thithisa mulalo u re hone vhukati hashu na vhaṅwe vhatendi. Fhedzi musi ri tshi hangwelana nga u ṱavhanya na u ita zwithu zwine zwa vhuyedza vhahashu, roṱhe ri nga vha na mulalo nahone ra ḓiphina nga phaṱhutshedzo ya Yehova.
12. Vhahulwane vha nga ri thusa hani uri ri vhe na vhuthihi?
12 Zwiṅwe hafhu, ‘zwifhiwa zwine zwa vha vhathu’ zwi nga ri ṱuṱuwedza uri ri vhe na vhuthihi. Ro ṋewa zwifhiwa zwenezwi u itela uri zwi ri thuse “ri vhe vhathihi u tendani.” (Vha-Ef. 4:8, 13) Musi vhahulwane vha tshi shumisana na riṋe tshumeloni khwethwa nahone vha tshi ri ṋea nyeletshedzo dzo thewaho Ipfini ḽa Mudzimu, vha ri thusa uri ri kone u ita mvelaphanḓa, ri ambare muthu muswa. (Vha-Ef. 4:22-24) Kha nyeletshedzo dzine vha ni ṋea dzone, naa ni a vhona uri Yehova u vha a tshi khou ni lugiselela u tshila shangoni ḽiswa nga fhasi ha vhuvhusi ha Murwa wawe? Vhoiwe vhahulwane, musi ni tshi ṋea vhaṅwe nyeletshedzo itani uri vha vhone uri ni khou ṱoḓa u vha thusa.—Vha-Gal. 6:1.
“TSHAṊU NGA HU VHE U ITELANA VHUHWAVHO, NA VHULENDA”
13. Hu ḓo vha na mvelelo dzifhio arali ra sa thetshelesa nyeletshedzo i re kha vha Vha-Efesa 4:25-32?
13 Luṅwalo lwa Vha-Efesa 4:25-29 lu ṱalula vhuḓifari vhune ra fanela u vhu iledza. Vhuḓifari honoho vhu katela u amba mazwifhi, u sinyuwa kana u bvafha, u amba maṱamba nṱhani ha u amba zwithu zwavhuḓi zwine zwa fhaṱa. Arali ra sa thetshelesa yeneyi nyeletshedzo, ri ḓo ṱungufhadza muya wa Mudzimu ngauri ndi wone une wa ṱuṱuwedza vhuthihi. (Vha-Ef. 4:30) U shumisa nyeletshedzo ya Paulo na zwone zwi ita uri ri vhe na mulalo na vhuthihi. Kha ndimana dzi tevhelaho o ri: “U kalakata hoṱhe na mbiti na tsinyuwo na u zhamba na maṱamba nga zwi vhe kule haṋu na vhuvhi hoṱhe. Tshaṋu nga hu vhe u itelana vhuhwavho, na vhulenda na u khathutshelana, vhunga na Mudzimu ó ni khathutshela kha Kristo.”—Vha-Ef. 4:31, 32.
14. (a) Maipfi ane a ri “tshaṋu nga hu vhe u itelana vhuhwavho, na vhulenda” a amba mini? (b) Ndi mini zwine zwa ḓo ri thusa uri ri vhe na vhulenda?
14 Maipfi ane a ri “tshaṋu nga hu vhe u itelana vhuhwavho, na vhulenda” a amba uri naho ri tshi sumbedza vhaṅwe vhulenda zwino, ri nga kona u khwinisa nḓila ine ra vha sumbedza ngayo vhulenda. Ri fanela u ḓigudisa u dzhia maḓipfele a vhaṅwe e a ndeme u fhira ashu! (Vha-Fil. 2:4) Nga zwiṅwe zwifhinga ri nga amba zwithu zwine zwa nga ita uri vhaṅwe vha see kana zwa ita uri ri dzhiiwe sa vho thanyaho. Arali zwi sa sumbedzi vhulenda a ro ngo fanela u zwi amba? U elekanya nga ha zwenezwi hu tshee nga phanḓa zwi ḓo ri thusa uri ri sumbedze vhaṅwe “vhulenda.”
GUDANI U FUNANA NA U ṰHONIFHANA MUṰANI
15. Vha-Efesa 5:28 i thusa hani vhanna uri vha pfesese nḓila ine vha fanela u edzisa ngayo Kristo?
15 Bivhili i vhambedza vhushaka vhune Kristo a vha naho na tshivhidzo, na vhushaka vhu re hone vhukati ha munna na mufumakadzi wawe. Zwenezwi zwi sumbedza nḓila ine munna a fanela u livhisa ngayo, u funa na u ṱhogomela muṱa wawe nahone mufumakadzi u fanela u ḓiṱukufhadza mbinganoni. (Vha-Ef. 5:22-33) Musi Paulo a tshi ṅwala uri: “Nga yeneyi nḓila vhanna vha fanela u funa vhasadzi vhavho u fana na nḓila ine vha funa ngayo mivhili yavho,” ndi ifhio “nḓila” ye a vha a tshi khou amba nga hayo? (Vha-Ef. 5:28) Zwe a zwi amba nga ha Kristo na tshivhidzo zwi ri thusa u fhindula mbudziso yeneyi. O ri: “Kristo ó funa tshivhidzo, a ḓi-kumedzela tshone, . . .a tshi kupula nga u tshi ṱambisa” nga maḓi a Ipfi ḽa Mudzimu. Nga zwenezwo, munna u na vhuḓifhinduleli ha u thusa muṱa wawe uri u vhe na vhushaka havhuḓi na Yehova. U thusa muṱa wawe nga yeneyo nḓila zwi ḓo amba uri u khou ita zwithu u tendelana na ndivho ya Yehova ya u ṱanganya vhathu vhoṱhe uri vha vhe muṱa muthihi nga fhasi ha Kristo.
16. Hu vha na mvelelo dzifhio musi vhabebi vha tshi hwala vhuḓifhinduleli havho ha Maṅwalo muṱani?
16 Vhabebi vha fanela u humbula uri vho ṋewa vhuḓifhinduleli nga Yehova. Zwi ṱungufhadzaho ndi uri vhathu vhanzhi shangoni ḽino vha “shaya lufuno.” (2 Tim. 3:1, 3) Vhokhotsi vhanzhi a vha na ndavha na vhuḓifhinduleli he vha ṋewa hone, nahone zwenezwi zwi pfisa vhuṱungu vhana vhanzhi na u ita uri vha si takale. Fhedzi Paulo o eletshedza vhokhotsi vha Vhakriste a ri: “Ni songo sinyusa vhana vhaṋu, vha aluseni nga u vha laya na u vha kwengweledzela zwa Murena.” (Vha-Ef. 6:4) Hayani ndi hone fhethu hune vhana vha guda nga ha lufuno na ṱhonifho. Vhabebi vhane vha bvelela kha u funza vhana vhavho u vha na lufuno na ṱhonifho, vha khou ita zwithu u tendelana na ndivho ya Yehova ya u vha na vhuthihi. Vhabebi vha fanela u ita uri vhana vhavho vha ḓipfe vha tshi funiwa muṱani. Nga zwenezwo, vha fanela u langa tsinyuwo nahone a vho ngo tea u hambekanya vhana na u vha semekanya. Musi vha tshi ita nga u ralo, vha vha vha tshi khou ṋea vhana ngudo dza ndeme malugana na u sumbedza lufuno na ṱhonifho. Zwenezwi zwi ḓo lugiselela vhana u tshila shangoni ḽiswa.
17. Ndi mini zwine zwa ṱoḓea u itela uri ri kone u lwisana na Diabolo?
17 Ri fanela u zwi ṱhogomela uri Diabolo ndi ene we a thithisa mulalo fhethu hoṱhe, nahone u ḓo ita zwoṱhe zwi re maanḓani awe u itela uri ri si thetshelese Mudzimu. Vhathu vhanzhi shangoni vha khou ita zwine Sathane a zwi funa musi vha tshi ṱalana, vha tshi dzula vhoṱhe vha songo vhingana, na musi vha tshi zwi ṱanganedza uri vhathu vha mbeu nthihi vha vhingane. Fhedzi riṋe a ri tevhedzi vhuḓifari kana mavhonele ane a ṱanganedzwa nga vhathu vhanzhi musalauno. Kristo ndi ene tsumbo yashu. (Vha-Ef. 4:17-21) Nga zwenezwo, ri ṱuṱuwedzwa u ‘ambara mafumo oṱhe a Mudzimu’ u itela uri ri kone u lwisana na Diabolo na madimoni awe nga hu bvelelaho.—Vhalani Vha-Efesa 6:10-13.
“NI TSHIMBILE LUFUNONI”
18. Arali ri tshi ṱoḓa u vha na vhuthihi, ndi pfaneleo ifhio ine ra fanela u vha nayo?
18 Ri fanela u vha na lufuno arali ri tshi ṱoḓa u vha na vhuthihi. Ri funa “Murena [washu] muthihi,” nga mbilu yoṱhe, na “Mudzimu [washu] muthihi” nahone na riṋe ri a funana. Ndi ngazwo ro ḓiimisela ‘u dzula rí vhathihi nga Muya, ludzi lwo ri vhofhekanyaho hú mulalo’.’ (Vha-Ef. 4:3-6) Yesu o rabela malugana na lufuno lwo raloho a ri: “A thi humbeleli vhone fhedzi, ndi humbelela na vha u ḓo ntenda vhó pfa vhone, Uri vhoṱhe vha vhe vhathihi, vhunga iwe Khotsi Ú kha nṋe, nṋe nda vha kha iwe; uri na vhone vha vhe vhathihi kha riṋe . . . Ndo vha ḓivhadza dzina ḽau, huno ndi ḓo ḓi vha ḓivhadza, uri lufuno lwe wa mpfuna ngalwo’ lu vhe kha vhone, nṋe ndi vhe kha vhone.”—Yoh. 17:20, 21, 26.
19. No ḓiimisela u ita mini?
19 Arali ra wana zwi tshi ri konḓela u shandula dziṅwe pfaneleo dzashu dzi si dzavhuḓi, lufuno lu fanela u ri sudzulusela u rabela nga nḓila i fanaho na ya mupsalme we a ri: “Tshiṱuvho tsha mbilu yanga tshi vhe tshithihi, hu vhe u ofha dzina ḽau.” (Ps. 86:11) Ri fanela u ḓiimisela u lwisana na Diabolo musi a tshi lingedza u ri sendedza kule na Yehova na vhathu vhane a vha takalela. Ri fanela u ita vhuḓidini ha u “edzisa-Mudzimu sa vhana vha funwaho. Ri tshimbile lufunoni vhunga na Kristo ó ri funa,”—nahone ri fanela u zwi ita miṱani yashu, vhuḓinḓani ha tsimu na tshivhidzoni.”—Vha-Ef. 5:1, 2.
[Mbudziso Dza Pfunzo]
[Tshifanyiso kha siaṱari 29]
Dzithwala dzau dzi sie henefho phanḓa ha aletare, U thome U yo pfumedzana na murathu wau
[Tshifanyiso kha siaṱari 31]
Vhabebi, gudisani vhana vha vhoiwe uri vha sumbedze ṱhonifho
