Ḓifareni Sa Vhadzulapo Vha Muvhuso Wa Mudzimu!
Ḓifareni Sa Vhadzulapo Vha Muvhuso Wa Mudzimu!
“Dzudzanani lwo fanelaho vha mafhungo-maḓifha.”—VHA-FIL. 1:27.
NI ḒO ARAVHA HANI?
Ndi vhafhio vhane vha nga vha vhadzulapo vha Muvhuso?
Ri fanela u ita mini malugana na luambo, ḓivhazwakale na milayo ya Muvhuso wa Mudzimu?
Vhadzulapo vha Muvhuso wa Mudzimu vha sumbedza hani uri vha funa zwilinganyo zwa Mudzimu?
1, 2. Ndi ngani nyeletshedzo ya Paulo tshivhidzoni tsha Filipi i tshi swayea vhukuma?
MUAPOSTOLA Paulo o ṱuṱuwedza tshivhidzo tsha Filipi a ri: “Dzudzanani lwo fanelaho vha mafhungo-maḓifha.” (Vhalani Vha-Filipi 1:27.) Ipfi ḽa Lugerika ḽo shumiswaho nga Paulo ḽine ḽa ri “dzudzanani” ḽi nga dovha ḽa ṱalutshedzelwa nga uri “bvelani phanḓa u tshila sa vhadzulapo.” Wonoyu mubulo wo vha u wa ndeme kha vhathu vha tshivhidzo tsha Filipi. Ndi ngani? Nga nṱhani ha uri ḓorobo ya Filipi ndi iṅwe ya dzi si gathi dze vhadzulapo vhadzo vha ṋewa thendelo ya u vha vhadzulapo vha Roma. Vhadzulapo vha Roma vha ngei Filipi na kha Muvhuso woṱhe wa Roma vho vha vha tshi dzhiela nṱha vhuimo havho na tsireledzo yo khetheaho ye vha vha vha tshi i wana nga fhasi ha mulayo wa Roma.
2 Miraḓo ya tshivhidzo tsha Filipi yo vha i na tshiitisi tshi pfalaho tsha u takalela u vha vhadzulapo vha shango ḽeneḽo. Paulo o vha humbudza uri samusi vhe Vhakriste vho ḓodzwaho, vho vha vhe vhadzulapo vha “ngei ṱaḓulu.” (Vha-Fil. 3:20) Vho vha vhe si vhadzulapo vha muvhuso wa vhathu, fhedzi vhe vha Muvhuso wa Mudzimu. Nga nṱhani ha zwenezwo, vho vhuyelwa vhukuma na u tsireledzwa nga Mudzimu.—Vha-Ef. 2:19-22.
3. (a) Ndi vhafhio vhane vha re na tshibuli tsha u vha vhadzulapo vha Muvhuso wa Mudzimu? (b) Ndi mini zwine ra ḓo zwi haseledza kha ino thero?
3 Nyeletshedzo ya Paulo ya uri vha bvele phanḓa u tshila sa vhadzulapo i shuma zwihulu-hulu kha vhane vha ḓo vhusa na Kristo ngei ṱaḓulu. (Vha-Fil. 3:20) Fhedzi i dovha ya katela na vhane vha ḓo vha vhalanda vha Muvhuso wa Mudzimu. Ndi ngani? Nga nṱhani ha uri Vhakriste vhoṱhe vho ḓiṋekedzaho vha shumela Khosi nthihi, Yehova, nahone vha livhiswa nga zwilinganyo zwi fanaho vhutshiloni. (Vha-Ef. 4:4-6) Ṋamusi vhathu vha ita vhuḓidini vhuhulwane u itela uri vha vhe vhadzulapo vha shango ḽo bvelaho phanḓa. Riṋe ri fanela u dzhiela nṱha vhukuma tshibuli tshine ra vha natsho tsha u vha vhadzulapo vha Muvhuso wa Mudzimu! U itela u ri thusa u pfesesa khwine ndugelo ine ra vha nayo, kha ri haseledza dziṅwe mbuno dzine dza fana vhukati ha u vha mudzulapo wa mivhuso ya vhathu, na u vha mudzulapo wa Muvhuso wa Mudzimu. Ri ḓo ṱolisisa zwithu zwiraru zwine ra fanela u zwi ita arali ri tshi ṱoḓa u dzula ri tshi dzhiiwa sa vhadzulapo vha Muvhuso wa Mudzimu.
ṰHOḒEA DZA U VHA MUDZULAPO
4. Luambo lwo ṱambaho ndi mini nahone ri lu “amba” nga nḓila-ḓe?
4 Gudani luambo. Miṅwe mivhuso ya vhathu i ṱoḓa uri vhane vha khou ita khumbelo ya u vha vhadzulapo vha shango ḽavho vha kone u amba luambo lwa tshiofisi lwa shango ḽeneḽo. Naho vho no ṋewa thendelo ya u vha vhadzulapo, vhathu vha nga kha ḓi fhedza miṅwaha vha tshi khou ita vhuḓidini ha u guda u amba zwavhuḓi luambo lwonolwo. Vha nga kha ḓi guda phenḓaluambo nga u ṱavhanya, fhedzi zwi nga vha dzhiela tshifhinga tshilapfu u bula maipfi nga nḓila yo teaho. Nga hu fanaho, vhadzulapo vha Muvhuso wa Mudzimu vha fanela u guda zwine Bivhili ya ri ndi luambo lwo “ṱambaho.” (Vhalani Tsefanya 3:9.) Ndi lufhio lwonolwo luambo? Luambo lwo ṱambaho ndi mafhungo-ngoho nga ha Mudzimu na ndivho dzawe samusi zwi tshi wanala Bivhilini. Ri “amba” luambo lwo ṱambaho musi vhuḓifari hashu vhu tshi tshimbidzana na milayo ya Mudzimu na maitele awe. Vhadzulapo vha Muvhuso wa Mudzimu vha nga guda pfunzo dza mutheo dza Bivhili nga u ṱavhanya nahone vha lovhedzwa. Naho zwo ralo, na musi vho no lovhedzwa vha fanela u lwela u dzula vha tshi khwinisa nḓila ine vha amba ngayo luambo lwo ṱambaho. Nga nḓila-ḓe? Muṅwe na muṅwe washu u fanela u ḓivha na u shumisa zwe a zwi guda Bivhilini.
5. Ndi ngani ri tshi fanela u guda zwoṱhe zwine ra nga kona nga ha ḓivhazwakale ya ndangulo ya Yehova?
5 Gudani ḓivhazwakale. Muthu ane a ṱoḓa u vha mudzulapo wa shango a nga kha ḓi fanela u guda zwiṅwe nga ha ḓivhazwakale ya shango ḽeneḽo. Nga hu fanaho, vhane vha ṱoḓa u vha vhadzulapo vha Muvhuso wa Mudzimu vha fanela u ita vhuḓidini ha u guda zwoṱhe zwine vha nga kona nga hawo. Ṱhogomelani tsumbo ya vharwa vha Kora vhe vha vha vha tshi shuma ngei Isiraele ḽa kale. Vho vha vha tshi funa nga maanḓa Yerusalema na fhethu ha vhurabeli, na u anetshela vhaṅwe nga ha ḓivhazwakale ya muḓi wonoyo. Vho vha vha sa funi fhedzi lunako lwa muḓi wonoyo, fhedzi vho vha vha tshi funa nga maanḓa zwine zwa imelwa nga fhethu ha vhurabeli na muḓi wonoyo. Muḓi wa Yerusalema wo vha u “musanda wa Khosi ya mavhuthu” Yehova, ngauri ho vha hu tshisimani tsha vhurabeli ho kunaho. Mulayo wa Yehova wo vha u tshi funzwa henefho. Vhalanda vha Khosi ya Yerusalema vho vha vhe vhathu vhane Yehova a vha funa na u vha ṱanganedza. (Vhalani Psalme ya 48:1, 2, 9, 12, 13) U fana na vhathu vhenevho, naa ni na dzangalelo ḽa u guda na u anetshela vhaṅwe ḓivhazwakale ya tshipiḓa tshi re kha ḽifhasi tsha ndangulo ya Yehova? Musi ni tshi guda nga ha ndangulo ya Mudzimu na nḓila ine Yehova a tikedza ngayo vhathu vhawe, Muvhuso wa Mudzimu u ḓo vha wa vhukuma kha inwi. Ni ḓo fhisetshela nga ho engedzeaho u huwelela mafhungo maḓifha a Muvhuso.—Yer. 9:24; Luka 4:43.
6. Ndi ngani zwi tshi pfala uri Yehova u ṱoḓa ri tshi guda na u thetshelesa milayo ya Muvhuso na maitele?
6 Ḓivhani milayo. Mivhuso ya vhathu i ṱoḓa vhalanda vhayo vha tshi guda na u thetshelesa milayo ya shango. Nga zwenezwo, zwi a pfala uri Yehova u lavhelela uri ri gude na u thetshelesa milayo na maitele ane a livhisa vhadzulapo vhoṱhe vha Muvhuso wa Mudzimu. (Yes. 2:3; Yoh. 15:10; 1 Yoh. 5:3) Milayo ya vhathu a yo ngo fhelela nahone a i haṱuli nga nḓila yo teaho. U fhambana na zwenezwo, “Milayo ya Yehova yo luga.” (Ps. 19:7) Naa ri a takalela mulayo wa Yehova nahone ri a vhala Ipfi ḽawe ḓuvha ḽiṅwe na ḽiṅwe? (Ps. 1:1, 2) Nḓila nthihi fhedzi ine ra nga guda ngayo mulayo wa Mudzimu, ndi u vhala Bivhili riṋe vhaṋe. Nahone, a hu na muthu ane a nga ri itela zwenezwo.
VHADZULAPO VHA MUVHUSO VHA FUNA ZWILINGANYO ZWA MUDZIMU
7. Ndi zwifhio zwilinganyo zwa nṱha zwine vhadzulapo vha Muvhuso wa Mudzimu vha zwi tevhedza?
7 U itela u dzula ri vhadzulapo vha Muvhuso wa Mudzimu, a zwo ngo eḓana u sokou ḓivha zwilinganyo zwa Mudzimu fhedzi, fhedzi ri fanela u dovha ra zwi funa. Vhadzulapo vhanzhi vha mivhuso ya vhathu vha amba uri vha a tendelana na milayo na zwilinganyo zwa shango ḽiṋe vha dzula khaḽo. Naho zwo ralo, musi vha tshi vhona u nga hu na mulayo une wa khou vha konḓisela, nahone hu si na ane a khou vha vhona, vha a pfuka mulayo wonoyo. Kanzhi vhenevho vhathu vha ṱoḓa u ‘takalelwa nga vhathu.’ (Vha-Kol. 3:22) Vhadzulapo vha Muvhuso wa Mudzimu vha tevhedza zwilinganyo zwa nṱha. Ri tevhedza milayo ya Mudzimu nga u ḓifunela naho hu si na muthu ane a khou ri vhona. Ndi ngani? Nga nṱhani ha uri ri funa Muthei wa milayo yeneyo.—Yes. 33:22; vhalani Luka 10:27.
8, 9. Ni nga zwi ḓivha hani arali ni tshi funa zwa vhukuma milayo ya Mudzimu?
8 Ni nga zwi ḓivha hani arali ni tshi funa zwa vhukuma milayo ya Mudzimu? Ṱolisisani nḓila ine na aravha ngayo musi ri tshi ṋewa nyeletshedzo malugana na mafhungo ane na vhona u nga ndi a muthu nga eṱhe—sa tsumbo, mafhungo a u ambara na u ḓilugisa. Musi ni sa athu vha mudzulapo wa Muvhuso, khamusi no vha ni sa ṱhogomeli nḓila ine na ambara ngayo kana ni tshi ambara nga nḓila ine ya karusa maḓipfele a zwa vhudzekani. Musi nḓila ine na funa ngayo Mudzimu i tshi engedzea, no guda u ambara nga nḓila ine ya mu hulisa. (1 Tim. 2:9, 10; 1 Pet. 3:3, 4) Khamusi zwino ni vhona u nga ni ambara nga nḓila i ṱhonifheaho. Fhedzi ni ḓo ita mini arali muhulwane a ni vhudza uri nḓila ine na ambara ngayo i khukhulisa vhaṅwe vhahuweleli tshivhidzoni? Ni ḓo aravha hani? Naa ni ḓo ḓiimelela, na sinyuwa, kana na ita swili? Mulayo wa mutheo wa Muvhuso wa Mudzimu ndi uri vhadzulapo vhawo vhoṱhe vha fanela u edzisa Kristo. (1 Pet. 2:21) Musi a tshi amba nga ha tsumbo ya Yesu, muapostola Paulo o ṅwala uri: “Muthu washu nga a takalelwe nga vhaṅwe, hu vhe u nakisa na u alusana, Ngauri na Kristo ho ngo ḓi-ḓivha.” (Vha-Roma 15:2, 3) U itela uri hu vhe na mulalo tshivhidzoni, Mukriste o vhibvaho u ḓo thetshelesa nyeletshedzo a songo sinyuwa a tshi itela u sa khukhulisa mvalo dza vhaṅwe.—Vha-Roma 14:19-21.
9 Kha ri ṱhogomele dziṅwe mbuno mbili dza ndeme: mavhonele ashu malugana na zwa vhudzekani na mbingano. Vhathu vha sa athu vha vhadzulapo vha Muvhuso wa Mudzimu vha nga vhona zwi songo khakhea uri vhathu vha mbeu i fanaho vha ite zwa vhudzekani, u ṱalela zwifanyiso zwi karusaho maḓipfele a zwa vhudzekani, nahone vha nga kha ḓi humbula uri vhuṱonḓolo na ṱhalano ndi mafhungo a muthu nga eṱhe. Vhadzulapo vha Muvhuso a vha tsheena mavhonele eneo o khakheaho na a tseḓa. Naho Vhakriste vhanzhi vho vha vha tshi ḓifara luvhi kale, zwino vha dzhia vhudzekani na mbingano sa zwifhiwa zwi bvaho ha Mudzimu. Vha ṱhonifha zwilinganyo zwa Yehova nga mbilu dzavho dzoṱhe, nahone vha a tenda uri vhane vha bvela phanḓa vha tshi ḓifara luvhi nga zwa vhudzekani a vha fanelei u vha vhadzulapo vha Muvhuso wa Mudzimu. (1 Vha-Kor. 6:9-11) Naho zwo ralo, vha a zwi ḓivha uri mbilu ndi mudzia-tshimbevha. (Yer. 17:9) Nga zwenezwo, vha zwi dzhia zwi ndugelo u ṋewa tsevho dzine dza vha thusa u dzula vha tshi ṱhonifha zwilinganyo zwa nṱha zwa vhuḓifari.
VHADZULAPO VHA MUVHUSO VHA DZHIELA NṰHA TSEVHO
10, 11. Ndi tsevho dzifhio dzi re tshifhingani dzine Muvhuso wa Mudzimu wa ri ṋea dzone, nahone ni ḓipfa hani nga ha tsevho dzenedzo?
10 Mivhuso ya vhathu i nga kha ḓi ṋea vhathu tsevho dza mutakalo malugana na zwiḽiwa na mishonga. Zwi tou pfala uri a zwi ambi uri zwiḽiwa zwoṱhe na mishonga zwi na khombo. Fhedzi arali hu na tshiḽiwa kana mushonga zwi re na khombo, muvhuso u nga sevha vhadzulapo vhawo u itela uri vha tsireledzee. Arali muvhuso wa sa ita nga u ralo, u ḓo vha na mulandu wa u sa ṱhogomela vhadzulapo. Nga hu fanaho, Muvhuso wa Mudzimu u ṋea tsevho dzi re tshifhingani malugana na zwithu zwine zwa nga ita uri ri pfuke mulayo wa Mudzimu na zwine zwa nga tshinya vhushaka hashu nae. Sa tsumbo, Inthanethe ndi tshishumiswa tshavhuḓi vhukuma tsha vhudavhidzano, pfunzo, na vhuḓimvumvusi. Ndangulo ya Mudzimu i shumisa Inthanethe, nahone i vuledza mishumo yavhuḓi ngayo. Naho zwo ralo, website nnzhi kha Inthanethe dzi nga tshinya vhushaka hashu na Mudzimu na u ita uri ri ḓifare luvhi. Website dzine dza ṱuṱuwedza zwifanyiso zwi karusaho maḓipfele a zwa vhudzekani dzi khombo nga maanḓa kha vhumuya ha vhadzulapo vha Muvhuso wa Mudzimu. Ho no fhela mahumi a miṅwaha tshigwada tsha mukoma a fulufhedzea tshi tshi khou ri sevha nga ha web-site dzenedzo. Ri livhuha lungafhani tsevho dzenedzo dzine dza tsireledza vhushaka hashu na Mudzimu!
11 Musalauno, hu na web-site dzine dza funeswa nga maanḓa—fhedzi dzi tea u shumiswa nga vhulondi. Web-site dzine dza ḓivhiwa sa dza vhudavhidzano dzi nga vha na khombo khulwane vhukuma. Dzi nga ita uri muthu a ḓowelane na vhathu vhavhi. (1 Vha-Kor. 15:33) Ndi ngazwo ndangulo ya Mudzimu i tshi ri sevha uri ri vhe na mavhonele a u linganyisela musi ri tshi shumisa web-site dzenedzo. Naa no vhala khandiso dza zwenezwino dzo gandiswaho nga mukoma a fulufhedzeaho dzine dza haseledza nḓila ya u shumisa web-site dza vhudavhidzano? Zwi ḓo vha vhutsilu vhuhulwane u shumisa web-site dza vhudavhidzano ni songo thoma na vhala dzenedzi khandiso! * Zwi ḓo fana na u nwa mushonga ni songo thoma na vhala tshibammbiri tsha u ni livhisa tsho nambatedzwaho kha boḓelo.
12. Ndi ngani zwi vhutsilu u sa thetshelesa tsevho?
12 Vhane vha sa thetshelese tsevho dza mukoma a fulufhedzeaho vha ḓipfisa vhuṱungu u katela na vhathu vhane vha vha funa. Vhaṅwe vho no tou vha na dzema ḽivhi ḽa u ṱalela zwifanyiso zwi karusaho maḓipfele a zwa vhudzekani kana vho ḓifara luvhi vha ḓifhura nga u humbula uri Mudzimu ha vhoni zwine vha khou ita. Zwi ḓo vha zwi vhutsilu lungafhani u humbula uri ri nga dzumbela Yehova vhuḓifari hashu! (Mir. 15:3; vhalani Vha-Heberu 4:13.) Mudzimu u ṱoḓa u thusa vhathu vho raloho nahone u ṱuṱuwedza vhaimeleli vhawe vha kha ḽifhasi uri vha thuse vhathu vhenevho nga u ṱavhanya. (Vha-Gal. 6:1) Naho zwo ralo, samusi muvhuso wa vhathu u tshi nga dzhiela muthu ndugelo ya u vha mudzulapo arali a pfuka miṅwe milayo, vhathu vha sa rembuluwi vhane vha pfuka zwilinganyo zwa Yehova, vha ḓo dzhielwa ndugelo ya u vha vhadzulapo Muvhusoni wawe. * (1 Vha-Kor. 5:11-13) Naho zwo ralo, u na khathutshelo. Vhane vha rembuluwa nahone vha shandula vhuḓifari havho, vha nga vusulusa vhushaka havho havhuḓi na Yehova vha dzula vhe vhadzulapo vha Muvhuso wawe. (2 Vha-Kor. 2:5-8) Ndi ndugelo khulwane vhukuma u shumela Khosi yo raloho i re na lufuno!
VHADZULAPO VHA MUVHUSO VHA DZHIELA NṰHA PFUNZO
13. Vhadzulapo vha Muvhuso vha sumbedza hani uri vha dzhiela nṱha pfunzo?
13 Mivhuso minzhi ya vhathu i ita vhuḓidini vhuhulwane ha u gudisa vhadzulapo. I dzudzanya zwikolo zwine zwa gudisa vhathu u vhala na u ṅwala na zwine zwa vha gudisa vhutsila. Vhadzulapo vha Muvhuso wa Mudzimu vha a dzhiela nṱha zwenezwi zwikolo nahone vha ita vhuḓidini vhuhulwane ha u guda u vhala na u ṅwala, na u kona u ḓiṱhogomela kha sia ḽa masheleni. Vha dovha vha dzhiela nṱha nga maanḓa pfunzo ine vha i ṋewa sa vhadzulapo vha Muvhuso wa Mudzimu. Yehova u shumisa tshivhidzo tsha Vhukriste u itela u ṱuṱuwedza vhathu u guda u vhala na u ṅwala. Vhabebi vha ṱuṱuwedzwa uri vha vhalele vhana vhavho vhaṱuku. Ṅwedzi muṅwe na muṅwe, mukoma a fulufhedzeaho u gandisa masiaṱari o vhalaho a mafhungo o thewaho Bivhilini kha khandiso dza Tshiingamo na Awake! Arali na nga vhala masiaṱari a si gathi ḓuvha ḽiṅwe na ḽiṅwe, ṅwedzi u tshi fhela ni ḓo vha no vhala dzoṱhe dza ṅwedzi wonoyo. Nga u ita zwenezwo ni ḓo vhuyelwa vhukuma nga pfunzo ine Yehova a ri ṋea yone.
14. (a) Ndi u gudiswa hufhio hune ra hu wana? (b) Ndi zwifhio zwo themendelwaho zwe na takalela u zwi shumisa kha Vhurabeli ha Muṱa ha nga madekwana?
14 Vhege iṅwe na iṅwe, vhadzulapo vha Muvhuso wa Mudzimu vha a gudiswa miṱanganoni yavho ya tshivhidzo. Sa tsumbo, ho no fhela mahumi a miṅwaha a fhiraho rathi vhathu vha tshi khou gudiswa kha Tshikolo tsha Vhuḓinḓa ha lwa Ṱaḓulu u itela uri vha vhe vhagudisi vha bvelelaho vha Ipfi ḽa Mudzimu. Naa no ṅwalisa tshikoloni tshenetsho? Miṅwahani ya zwenezwino, mukoma a fulufhedzeaho o ṱuṱuwedza roṱhe u vha na Vhurabeli ha Muṱa ha nga madekwana. Yeneyi ndugiselelo i khwaṱhisa vhuthihi ha muṱa. Naa no kona u shumisa zwo themendelwaho khandisoni dzashu? *
15. Ndi ifhio ndugelo khulwane ine ra vha nayo?
15 Vhadzulapo vha mivhuso ya vhathu vha zwi sumbedza khagala uri vha tikedza ḽihoro ḽifhio ḽa politiki, nahone vha tshimbila nnḓu nga nnḓu u itela u sumbedza zwenezwo. Shangoni ḽoṱhe, vhadzulapo vha Muvhuso vha sumbedza u tikedza Muvhuso wa Mudzimu nga u huwelela kha vhathu zwiṱaraṱani na nnḓu nga nnḓu. Zwi re zwone ndi uri samusi zwo ambiwa kha thero yo fhiraho, Tshiingamo tshi ḓivhadzaho Muvhuso wa Mudzimu, ndi wone magazini une wa phaḓaladzwa u fhira yoṱhe shangoni! Ndugelo khulwane ine ra vha nayo ndi ya u vhudza vhaṅwe nga ha Muvhuso wa Mudzimu. Naa ni khou ṱanganela nga u fhisea kha wonoyu mushumo wa u huwelela?—Mat. 28:19, 20.
16. Ni nga sumbedza hani uri ni mudzulapo wavhuḓi wa Muvhuso wa Mudzimu?
16 Hu si kale, Muvhuso wa Mudzimu ndi wone u woṱhe une wa ḓo vha u tshi khou vhusa kha ḽifhasi. U ḓo lavhelesa masia oṱhe a vhutshilo ha ḓuvha ḽiṅwe na ḽiṅwe, hu si a muya fhedzi, fhedzi na matshilisano. Naa ni ḓo vha mudzulapo wavhuḓi wa Muvhuso wa Mudzimu nga tshenetsho tshifhinga? Zwino ndi tshifhinga tsha u sumbedza uri ni ḓo ita nga u ralo. Kha phetho dzoṱhe dzine na dzi ita ḓuvha ḽiṅwe na ḽiṅwe, ni tea u ita zwoṱhe u itela u rendisa Yehova na u sumbedza uri ni khou bvela phanḓa ni tshi tshila sa mudzulapo wa Muvhuso wa Mudzimu.—1 Vha-Kor. 10:31.
[Ṱhaluso dzi re magumoni a siaṱari]
^ Sa tsumbo, sedzani Awake! ya July 2011, masiaṱari 24-27; ya August 2011, masiaṱari 10-13; na ya February 2012, masiaṱari 3-9.
^ Sedzani Tshiingamo tsha ḽa 15 March, 2012, masiaṱari 30-31.
^ Sedzani Tshiingamo tsha ḽa 15 August, 2011, masiaṱari 6-7 na Vhuḓinḓa Hashu ha Muvhuso, ha January 2011, masiaṱari 3-6.
[Mbudziso Dza Pfunzo]
[Maipfi o ṱumbulwaho kha siaṱari 14]
Naa ni a thetshelesa tsevho dzo thewaho Bivhilini malugana na u shumisa Inthanethe?
[Tshifanyiso kha siaṱari 12]
U fana na vharwa vha Kora, naa ni a takalela vhurabeli ho kunaho na ḓivhazwakale yaho?
[Tshifanyiso kha siaṱari 15]
Vhurabeli ha Muṱa ha nga madekwana vhu nga ni thusa na muṱa waṋu uri ni vhe vhadzulapo vhavhuḓi vha Muvhuso wa Mudzimu
