Naa Ni A Zwi Humbula?

Naa no takalela u vhala thero dza zwenezwino dza Tshiingamo? Vhonani arali ni tshi nga fhindula mbudziso dzi tevhelaho:

Naa mavhudzi a Simisoni o vha a tshi mu ṋea maanḓa?

Mavhudzi a Simisoni a si one e a mu ṋea maanḓa. Mavhudzi awe o vha a tshi imela vhushaka ho khetheaho ha Vhanaziri na Mudzimu. Honoho vhushaka ho mbo ḓi thithisea musi Delila a tshi mu vheula ṱhoho.—4/15, siaṱari 9.

Ndi zwifhio zwithu zwiraru zwine zwa nga vhuyedza mbilu yashu ya pfanyisedzo?

(1) Zwiḽiwa. Samusi mbilu yashu ya vhukuma i tshi ṱoḓa zwiḽiwa zwi re na pfushi, na ya pfanyisedzo i fanela u wana zwiḽiwa zwi re na pfushi zwa lwa muya. (2) Nyonyoloso. U ṱanganela vhuḓinḓani nga u fhisea zwi nga ita uri mbilu yashu ya pfanyisedzo i dzule i vhuimoni havhuḓi. (3) Hune ra dzula hone. Ri nga ḓifhungudzela mutsiko nga u vhumba vhukonani na vhaṅwe Vhakriste vhane vha ri funa.—4/15, siaṱari 16.

Muthu a nga iledza hani u ḓi dzhenisa kha zwa madimoni?

Sendelani kule na tshithu naho tshi tshifhio tshine tsha vhonala tshi tshi tshimbidzana na u shumisa mimuya mivhi. (Mish. 19:19, 20) Itani vhuḓidini ha u ‘Sendela tsini ha Mudzimu’ nahone ni fulufhele uri u ḓo kona u ni thusa uri ni si ṱuṱuwedzwe nga madimoni. (Yak. 4:7, 8)—7/1, siaṱari 12.

Ndi ngani muthu ane a vhea nyambo ya lufu a songo fanela u shumisa Psalme ya 116:15 musi a tshi ambela kha mufu?

Ndimana yeneyo i ri: “Lufu lwa vhavhuya vhawe, maṱoni a Yehova ndi zwihulwane.” Zwenezwi zwi amba uri Mudzimu ha takaleli lufu lwa vhashumeli vhawe vhoṱhe vha fulufhedzeaho. A nga si vhuye a tenda uri vhashumeli vhawe vhoṱhe sa tshigwada vha fheliswe kha ḽifhasi.—5/15, siaṱari 22.

Ndi vhonnyi vhe vha vha vhe Vha-colporteur?

Nga phanḓa ha 1931, ipfi ḽine ḽa ri “colporteur” ḽo vha ḽi tshi shumiswa u ṱalusa vhathu vhane zwino vha ḓivhiwa sa vhavulanḓila.—5/15, siaṱari 31.

Ndi ngani nḓila ye Yesu a fa ngayo yo khukhulisa vhaṅwe Vhayuda?

Uya nga iṅwe ṱhalutshedzelo Vhayuda vha ḓanani ḽa u thoma ḽa miṅwaha vho dzhia nḓila ye Yesu a fa ngayo i tshi shonisa. Vho vha vha tshi tenda uri nḓila ine muthu a fa ngayo i dzumbulula zwine a vha zwone zwa vhukuma. Nga zwenezwo, Yesu o vha a tshi nga dzhiiwa e ḽivemu.—7/1, siaṱari 13.

“Mivhuso yoṱhe” yo bulwaho kha Daniele 2:44 i katela ifhio?

Hu khou ambiwa nga ha mivhuso ine ya imelwa nga zwipiḓa zwo fhamba-fhambanaho zwa tshifanyiso tshihuluhulu tsha tsimbi tshe tsha ṱalutshedzwa nga Daniele.—6/15, siaṱari 17.

Muvhuso Wa Shango Wa Vhaisimane Na Vhaamerika wo vha lini muvhuso wa vhusumbe wa vhuporofita ha Bivhili?

Wonoyu muvhuso u re kavhili wo vha hone musi muvhuso wa Britain na wa United States i tshi shumisana nga nḓila i swayeaho tshifhingani tsha Nndwa ya Shango ya U Thoma.—6/15, siaṱari 19.

Ndi maitele afhio ane a nga thusa muthu uri a khethe vhumatshelo havhuḓi?

Elekanyani nga ha mvelelo dza phetho dzaṋu. (Mir. 22:3) Ḓiiteleni phetho inwi muṋe. Ṱhogomelani nḓila ine phetho dzaṋu dza ḓo kwama ngayo vhumatshelo haṋu. (Mir. 21:5). Lwelani u swikelela zwipikwa zwaṋu. (Yoh. 17:3)—7/1, masiaṱari 18-19.

Ndi maitele afhio a Bivhili ane a nga ri thusa u sedzana na zwiimo zwa ekonomi zwi si zwavhuḓi?

Vhalelani tshinyalelo. (Luka 14:28) Shandulani matshilele a vhoiwe. (Mir. 22:3) Ḓiimiseleni u ṱanganedza mushumo muṅwe na muṅwe. (Mir. 29:25) Fusheani. (Vha-Fil. 4:11, 12)—7/1, masiaṱari 20-21.