Zwe Ra Zwi Vhulunga

U Tshimbila Na Vha-Pilgrim

“Ndi nga si kone u ya nnḓu nga nnḓu!” Ndi vhagudiswa vhangana vhaswa vha Bivhili vhe vha ḓipfa nga yeneyo nḓila musi vha tshi fanela u ya u huwelela kha vhathu vha sa vha ḓivhi! Naho zwo ralo, haya maipfi o ambiwa nga tshiambi tsha khagala tshi re na tshenzhelo, tshine tsha vha mugudisi wa Bivhili ane a ḓivhiwa sa mu-pilgrim.

Vhavhali vhanzhi vha Tshiingamo vhe vha ṱutshela kereke dzavho, vho vha vha tshi ṱulutshelwa u kuvhangana na vhathu vha re na ḓora ḽi fanaho na ḽavho ḽa mafhungo-ngoho a Bivhili. Wonoyu magazini wo ṱuṱuwedza vhavhali vhawo uri vha ṱoḓe vhathu vha re na lutendo lu fanaho na lwavho, vha kuvhangane navho tshifhinga tshoṱhe u itela u guda Bivhili. U thoma nga 1894, Watch Tower Society yo rumela vhaimeleli vha dalelaho uri vha ye kha zwigwada zwe zwa humbela u dalelwa. Nga murahu vhenevha vhanna vhane vha shuma nga maanḓa, vha re na tshenzhelo, vhe vha vha vha tshi ḓivhiwa sa vha-pilgrim, vho vha vha tshi khethwa nga nṱhani ha u vuḓa havho, u vha na nḓivho ya Bivhili, u vha na vhutsila ha u amba na u funza, na u sumbedza uri vha a fulufhedzea kha tshiṱhavhelo tshi rengululaho. U dalela ho ḓoweleaho ho vha hu tshi fhedza ḓuvha ḽithihi kana mavhili fhedzi, ane khao vha farakanea vhukuma. Vhagudiswa vha Bivhili vhanzhi vho ya tshumeloni ya tsimu lwa u thoma musi vha tshi khou ya u phaḓaladza zwibammbiri zwa u ramba vhathu u thetshelesa nyambo ya khagala ine ya ḓo ṋekedzwa nga mu-pilgrim. Nga murahu ha u ṋekedza nyambo yawe nga madekwana tshikoloni, Hugo Riemer, we nga murahu a vha muraḓo wa Tshigwada tshi Langaho, o fhindula mbudziso dza Bivhili u swika maḓautsha. O vha o neta fhedzi o takala, nahone o amba uri muṱangano wo vha u “wavhuḓi” vhukuma.

Tshiingamo tsho amba uri mushumo wa ndeme wa u dala ha vha-pilgrim ndi u fhaṱa “vha nnḓu ya lutendo” nga u fara miṱangano miḓini ya vhatendi. Vhagudi vha Bivhili vha dzulaho tsini vho vha vha tshi ḓa u thetshelesa nyambo na u ṱanganela kha dzulo ḽa mbudziso na phindulo. Nga murahu ho vha hu tshi vha na tshifhinga tsha u sumbedzana mafunda a Vhukriste. Musi a tshee musidzana, Maude Abbott o vha hone kha nyambo ya nga matsheloni, nahone nga murahu vhathu vhoṱhe vha dzula ṱafulani henefho dzharaṱani u itela u ḽa. “Ho vha hu na zwiḽiwa zwinzhi vhukuma—ham, khuhu yo kadzingwaho, marotho a mifuda minzhi, dziphai, na makhekhe. Vhathu vho ḽa nga hune vha kona ngaho, nahone hu ṱoḓaho u vha nga awara ya vhuvhili ro dovha ra kuvhangana u itela u thetshelesa iṅwe nyambo.” Fhedzi o dovha a ri, “Nga tshenetsho tshifhinga, muṅwe na muṅwe o vha a tshi vho kumedza.” Benjamin Barton, mu-pilgrim wa tshifhinga tshilapfu o vhuya a ri, ‘Ngavhe ndi ḽe mifuda yoṱhe ya zwiḽiwa zwe nda ṋewa, ndo vha ndi tshi ḓo vha ndo ṱutshela mushumo wa vhu-pilgrim kale-kale.’ Vhurifhi vhu bvaho ofisini khulwane ngei Brooklyn ho eletshedza vhahashu vha tshisadzini vha re na mafunda uri zwi ḓo vha zwavhuḓi arali vha bikela vha-pilgrim “zwiḽiwa zwo ḓoweleaho zwa ḓuvha ḽiṅwe na ḽiṅwe,” na “u vha ṋea tshifhinga tsha u awela.”

Vha-pilgrim vho vha vha tshi bvelela vhukuma kha u funza vha tshi shumisa dzitshati, zwifanyiso, kana zwiṅwe na zwiṅwe zwine vha vha nazwo u itela uri zwine vha khou zwi funza zwi pfale. Nyambo dza R. H. Barber “dzo vha dzi tshi dzula dzi tshi ṋekedzwa nga nḓila i nyanyulaho.” W. J. Thorn a re na pfaneleo dzi ngaho dza khotsi, o vha a tshi amba sa “musimulalushaka wa zwifhingani zwa kale.” Nga ḽiṅwe ḓuvha musi Shield Toutjian o ṋamela goloi ya Ford, o huwelela nga u ṱavhanya a ri “Imani!” O mbo ḓi tsa goloini nga u ṱavhanya a ka maluvha a ḓaka, a ṋea vhane a khou tshimbila navho u itela u vha ṋea ngudo nga ha tsiko ya Yehova.

Mushumo u konḓaho wa vha-pilgrim wo vha u na khaedu nnzhi, zwihuluhulu kha vha re vha maḓuvha. Naho zwo ralo, kha vhaṅwe khaedu khulwane yo vha u  shandulwa ha nḓila ine mushumo wonoyu wa itwa ngayo. Vho vha vha tshi vho lavhelelwa uri vha range phanḓa kha u huwelela nnḓu nga nnḓu. Tshiingamo tsha ḽa 15 March, 1924 tsho amba uri “mushumo wa ndeme” wa Vhakriste vha ngoho ndi “u ṱanziela nga ha muvhuso. Vha-pilgrim vha rumelwa u itela u yo ḓadzisa yeneyo ndivho.”

Zwi vhonala u nga vhaṅwe vha-pilgrim a vho ngo takalela tshanduko yeneyi, ngauri vho mbo ḓi litsha mushumo wa u dalela zwivhidzo, nahone vhaṅwe vhe vha sinyuswa nga tshanduko yeneyi vho vhumba zwigwada zwavho zwa vhurereli. Robie D. Adkins o amba nga ha muṅwe mu-pilgrim we a vha e tshiambi tshavhuḓi vhukuma we a amba o sinyuwa a ri: “Zwine nda zwi ḓivha ndi u huwelela ndi kha pulatifomo fhedzi. Ndi nga si kone u ya nnḓu nga nnḓu!” Wahashu Adkins u humbula u ri: “Ndo mbo ḓi dovha nda mu vhona nga 1924 buthanoni ngei Columbus, Ohio. O vha a tshi vhonala a songo takala na luthihi, o ima e eṱhe nga fhasi ha muri, a tshi vhonala e na vhumvumvu naho e vhukati ha vhahashu vhanzhi-vhanzhi vho takalaho vhukuma. A tho ngo tsha dovha nda mu vhona. O ṱutshela ndangulo nga u ṱavhanya nga murahu ha ḽeneḽo buthano. Kha ḽiṅwe sia, “vhahashu vhanzhi vho takalaho, vho vha vha tshi khou fhira vho livha goloini dzavho vho fara dzibugu,” nahone zwo vha zwi tshi tou vha khagala uri vha khou fhisetshela u ya u huwelela nnḓu nga nnḓu.—Mish. 20:20, 21.

Vha-pilgrim vhanzhi vho vha vha tshi ofha u ya u huwelela nnḓu nga nnḓu u fana na vhe vha vha vha tshi fanela u vha gudisa, fhedzi vho huwelela nga mafulufulu. Malugana na u huwelela nnḓu nga nnḓu, Maxwell G. Friend, mu-pilgrim wa Mudzheremane o ṅwala uri: “Tshenetshi tshipiḓa tsha mushumo wa vha-pilgrim tshi engedza kha phaṱhutshedzo dza u dalela zwivhidzo.” Mu-pilgrim ane a pfi John A. Bohnet o amba uri vhahashu vhanzhi vho ṱanganedza yeneyi ndaela ya uri vha fanela u huwelela nga ha Muvhuso. U ya ngae, vhanzhi vho vha vha tshi “fhisetshela u ranga phanḓa kha wonoyu mushumo.”

Ho no fhela miṅwaha minzhi vhahashu vha dalelaho zwivhidzo vha tshi khou ṱuṱuwedza vhukuma vhahashu vha tshinnani na vha tshisadzini. Wahashu Norman Larson o no fhedzaho miṅwaha minzhi e Ṱhanzi o ri: “Zwo vha zwi tshi tou vha khagala uri mbuyelo dza u vha na vha-pilgrim ndi nnzhi na uri ndi vha ndeme, naho ndo vha ndi tshee mutukana. Vho shela mulenzhe kha u nṱuṱuwedza u tshimbila nḓilani yo teaho.” U swika na ṋamusi vhenevha vhalavhelesi vha dalelaho vhane vha ḓikumedza vhukuma na u fulufhedzea, vha khou thusa vhatendi ngavho uri vha ambe uri: “Ri nga kona u ya nnḓu nga nnḓu!”

[Maipfi o ṱumbulwaho kha siaṱari 32]

Ḽo vha ḓuvha ḽi takadzaho musi hu tshi ḓa vha-pilgrim!

[Tshifanyiso kha siaṱari 31]

Lwendo lwa Benjamin Barton lwa 1905 lwo katela uri a dalele fhethu ha 170

[Tshifanyiso kha siaṱari 32]

Walter J. Thorn o vha e mu-pilgrim, ane a ḓivhiwa sa Pappy nga nṱhani ha pfaneleo dzawe dza u vha sa khotsi, na u edzisa Kristo

[Tshifanyiso kha siaṱari 32]

J. A. Browne o rumelwa ngei Jamaica sa mu-pilgrim nga vho-1902 u itela u khwaṱhisa na u ṱuṱuwedza zwigwada zwiṱuku zwa 14

[Tshifanyiso kha siaṱari 32]

Mushumo wa vhu-pilgrim wo fhaṱa lutendo, wa khwaṱhisa vhuthihi ha Vhukriste, na u ita uri vhahashu vha vhe tsini na ndangulo