1. Ndi mini zwine zwa ḓo ri thusa u dzula ro fhaṱuwa na uri ri kone u sedzana na milingo?

HU SI kale hu ḓo vha na zwiitea zwi tshusaho kha ḽifhasi. U ḓadzea ha vhuporofita ha Bivhili zwi a khwaṱhisedza uri zwenezwi zwi ḓo itea, ndi ngazwo ri tshi fanela u dzula ro fhaṱuwa. Ndi mini zwine zwa ḓo ri thusa u ita nga u ralo? Muapostola Paulo o amba uri “a ri londi zwi vhonwaho, ri londa zwi sá vhonwi.” Nga zwenezwo, ri fanela u dzula ri tshi humbula uri Yehova u ḓo ri lambedza nga vhutshilo vhu sa fheli hu sa londwi uri ndi ngei ṱaḓulu kana kha ḽifhasi. Samusi lwonolwo luṅwalo lu tshi sumbedza, Paulo o ṅwala eneo maipfi u itela u ṱuṱuwedza vhatendi ngae uri vha livhise ṱhogomelo kha malamba avhuḓi ane vha ḓo a wana nga u fulufhedzea havho. U ita nga u ralo zwi ḓo dovha zwa vha thusa u sedzana na milingo na u tovholwa.—2 Vha-Kor. 4:8, 9, 16-18; 5:7.

2. (a) U itela uri fulufhelo ḽashu ḽi dzule ḽo khwaṱha, ri fanela u ita mini? (b) Ndi mini zwine ra ḓo zwi haseledza kha ino thero na i tevhelaho?

² Nyeletshedzo ya Paulo i ri funza ngudo ya ndeme: U itela uri fulufhelo ḽashu ḽi dzule ḽo khwaṱha ri fanela u livhisa ṱhogomelo na kha zwithu zwine ra si kone u zwi vhona. Ri fanela u livhisa ṱhogomelo kha zwiitea zwa ndeme ri sa athu u zwi vhona. (Vha-Heb. 11:1; 12:1, 2) Kha ri haseledze nga ha zwiitea zwa fumi zwa tshifhingani tshi ḓaho zwine zwa tshimbidzana na fulufhelo ḽashu ḽa vhutshilo vhu sa fheli. *

3. (a) Ndi tshiitea tshifhio tshine tsha kha ḓi ḓo vha hone tsho bulwaho kha 1 Vha-Thesalonika 5:2, 3? (b) Vharangaphanḓa vha politiki vha ḓo ita mini, nahone ndi vhafhio vhane vha ḓo ṱanganela navho?

³ Kha luṅwalo lwe a lu ṅwalela Vhathesalonika Paulo o amba nga ha tshiṅwe tshiitea tsha tshifhingani tshi ḓaho.  (Vhalani 1 Vha-Thesalonika 5:2, 3.) O livhisa ṱhogomelo kha “ḓuvha ḽa Murena,” kana ḓuvha ḽa Yehova. Nḓila ye ḽa shumiswa ngayo henefha “ḓuvha ḽa Murena” ḽi ḓo thoma musi hu tshi fheliswa vhurereli ha mazwifhi nahone ḽi ḓo fhela nga nndwa ya Haramagedo. Naho zwo ralo, musi ḓuvha ḽa Yehova ḽi sa athu thoma, vharangaphanḓa vha shango vha ḓo ri “Ḽo lala, hó navhiwa.” Zwenezwi zwi nga ambela kha tshiitea tshithihi kana kha zwiitea zwine zwa ḓo tou tevhekana. Mivhuso i nga humbula uri i tsini na u tandulula dziṅwe thaidzo khulwane. Vharangaphanḓa vha vhurereli vha ḓo ita mini? Samusi vhe tshipiḓa tsha shango, vha ḓo shumisana na vharangaphanḓa vha zwa politiki. (Ndzumb. 17:1, 2) Vhenevho vharangaphanḓa vha vhurereli vha ḓo vha vha tshi khou edzisela vhaporofita vha mazwifhi vha ḽa Yuda ḽa kale. Yehova o amba nga havho ari: “Vha ri: Ḽo lala! Ḽo lala! ngenó mulalo ú siho’.”—Yer. 6:14; 23:16, 17.

4. Ndi mini zwine riṋe ra zwi pfesesa, zwine vhaṅwe vhathu vha shango vha si zwi pfesese?

⁴ Hu sa londwi uri ndi vhafhio vhane vha ḓo amba uri “ḽo lala, hó navhiwa,” u amba zwenezwo zwi ḓo sumbedza uri ḓuvha ḽa Yehova ḽi tsini. Ndi ngazwo Paulo o amba uri: “Inwi-ha vharathu, a ni swiswini, huné ḓuvha ḽa ni fara vhunga mbava. Ngauri inwi noṱhe ni vharwa vha tshedza.” (1 Vha-Thes. 5:4, 5) A ri fani na vhathu vha shango vhane vha si pfesese ndeme ya lwa Maṅwalo ya zwine zwa khou itea zwino. Honovhu vhuporofita ha uri “ḽo lala, hó navhiwa,” vhu ḓo ḓadzea hani? Ri fanela u lindela ra vhona. Nga zwenezwo, “nga ri fhaṱuwe, ri dzule ró dzivhuluwa.”—1 Vha-Thes. 5:6; Tsef. 3:8.

5. (a) “Vhuṱungu vhuhulu” vhu ḓo thoma hani? (b) Ndi ifhio “khosi” ya mufumakadzi ine ya sa ḓo ṱhogomela khombo ine ya ḓo i wela?

⁵ Ndi tshifhio tshiṅwe tshiitea tshi sa athu vhonwa tshine tsha ḓo tevhela? Paulo o ri: “Arali hu tshi pfi: Ḽo lala, hó navhiwa, ndi hone ka-thihi fhedzi vha tshi ḓo ḓelwa nga tshínyalo.” Tshipiḓa tsha u thoma tsha ndozwo ine ya ḓo itea nga “ka-thihi fhedzi” ndi u vutshelwa ha “Babele ḽihulu” muvhuso wa shango wa vhurereli ha mazwifhi, une wa ḓivhiwa sa “phombwe.” (Ndzumb. 17:5, 6, 15) U vutshelwa ha vhurereli hoṱhe ha mazwifhi u katela na ḽa Vhudzhagane ndi hone u thoma ha “vhuṱungu vhuhulu.” (Mat. 24:21; 2 Vha-Thes. 2:8) Vhanzhi vha ḓo mangadzwa nga tshiitea tshenetshi. Ndi ngani? Ndi nga nṱhani ha uri nga tshenetsho tshifhinga, phombwe i ḓo vha i tshi ḓifulufhela nga maanḓa i tshi ḓidzhia sa “khosi” ya mufumakadzi ine ya sa ḓo vhuya ya “ṱungufhala.” Fhedzi nga u ṱavhanya i ḓo zwi vhona uri a yo ngo ṱhogomela khombo ine ya ḓo i wela. I ḓo fheliswa nga u ṱavhanya,  zwa nga ndi nga “ḓuvha ḽithihi.”—Ndzumb. 18:7, 8.

6. Ndi vhonnyi vhane vha ḓo fhelisa vhurereli ha mazwifhi?

⁶ Ipfi ḽa Mudzimu ḽi ṱalusa uri “ḽivhanda” ḽi re na “ṋanga dza fumi” ndi ḽone ḽine ḽa ḓo vutshela phombwe. Zwe zwa gudwa kha bugu ya Ndzumbululo zwi sumbedza uri ḽivhanda ḽi ambela kha United Nations (UN). “Ṋanga dza fumi” dzi imela mivhuso yoṱhe ya zwa politiki ine ya tikedza ḽeneḽi “ḽivhanda ḽikhunwana.” * (Ndzumb. 17:3, 5, 11, 12) I ḓo vha mvutshelo i ofhisaho vhukuma. Tshaka dzine dza tikedza UN dzi ḓo hasekanya lupfumo lwa phombwe, dza bvukulula zwine ya vha zwone zwa vhukuma, dza i fhelisa, na u i “fhisa nga mulilo.” U fheliswa hayo hu ḓo vha ha tshoṱhe.—Vhalani Ndzumbululo 17:16.

7. Ndi mini zwine zwa ḓo ita uri “ḽivhanda” ḽi vutshele phombwe?

⁷ Vhuporofita ha Bivhili vhu dovha ha sumbedza zwine zwa ḓo ṱuṱuwedza u thoma ha mvutshelo yeneyo. Yehova u ḓo dzhenisa mbiluni dza vharangaphanḓa vha zwa politiki uri “vha ite tshe Ene a tshi elekanya,” zwine zwa vha u fhelisa tshoṱhe phombwe. (Ndzumb. 17:17) Vhurereli vhune ha funesa dzinndwa vhu bvela phanḓa vhu tshi tshinyadza shango ḽoṱhe, nga zwenezwo, dzitshaka dzi ḓo vhona u nga dzi ḓo vhuyelwa musi phombwe i tshi fheliswa. Zwi re zwone ndi uri musi vhavhusi vha tshi vutshela na u fhelisa phombwe, vha ḓo vhona u nga hu khou itwa lufuno lwavho. Fhedzi, zwi re zwone ndi uri vha ḓo vha vha tshi khou shumiswa nga Mudzimu u itela u fhelisa vhurereli ha mazwifhi. Nga zwenezwo, tshiṅwe tshipiḓa tsha maitele a Sathane tshi ḓo vutshela tshiṅwe, nahone Sathane a nga si vhe na maanḓa a u zwi thivhela.—Mat. 12:25, 26.

8. Ndi ifhio mvutshelo ine ya ḓo itwa nga “Gogo kha ḽa Mágogo”?

⁸ Musi vhurereli ha mazwifhi ho no fheliswa, vhashumeli vha Mudzimu vha ḓo vha vha tshi kha ḓi vha “vho dzulaho vhó takala” vha “si na mitsheṱo.” (Hesek. 38:11, 14) Hu ḓo itea mini kha vhenevha vhathu vhane vha bvela phanḓa vha tshi gwadamela Yehova naho zwi tshi vhonala u nga a vho ngo tsireledzea? Zwi vhonala u nga “tshakha nzhi” dzi ḓo vha vutshela. Ipfi ḽa Mudzimu ḽi ṱalusa mvutshelo yeneyo sa ine ya ḓo itwa nga “Gogo kha ḽa Mágogo.” (Vhalani Hesekiele 38:2, 15, 16.) Ri fanela u dzhia hani mvutshelo yeneyo?

9. (a) Ndi mini zwine Mukriste a fanela u zwi vhilaelela nga maanḓa? (b) Ndi vhukando vhufhio vhune ra fanela u vhu dzhia zwino u itela u khwaṱhisa lutendo lwashu?

⁹ U ḓivha hu tshee nga phanḓa uri vhathu vha Mudzimu vha ḓo vutshelwa a zwo ngo fanela u ita uri ri vhilaele nga ho kalulaho.  A ri vhilaeleli nga maanḓa u tshidzwa hashu, fhedzi ri vhilaelela u itwa ha dzina ḽa Yehova ḽikhethwa na u lwelwa ha vhuvhusahoṱhe hawe. Zwi re zwone ndi uri Yehova o amba lu fhiraho 60 a ri: “Ndi hone ni tshi ḓo ḓivha zwauri ndi Nṋe Yehova.” (Hesek. 6:7) Nga zwenezwo, ri na dzangalelo ḽa u vhona honoho vhuporofita ha Hesekiele vhu tshi ḓadzea, nahone ri fulufhela uri “Murena u a zwi ḓivha u ponyokisa mulingoni vha mu ofhaho.” (2 Pet. 2:9) Zwa zwino, ri ṱoḓa u shumisa tshibuli tshiṅwe na tshiṅwe u itela u khwaṱhisa lutendo lwashu u itela uri ri dzule ri tshi fulufhedzea kha Yehova hu sa londwi milingo ine ra nga sedzana nayo. Ri fanela u ita mini? Ri fanela u rabela, u guda Ipfi ḽa Mudzimu na u elekanya nga haḽo, na u vhudza vhaṅwe mulaedza wa Muvhuso. Nga u ita zwenezwo, ri ita uri fulufhelo ḽashu ḽa vhutshilo vhu sa fheli ḽi dzule ḽo khwaṱha, vhunga “thikho yo simiwaho ya dzhena.”—Vha-Heb. 6:19; Ps. 25:21.

10, 11. Ndi mini zwine zwa ḓo ita uri Haramagedo i thome, nahone hu ḓo itea mini nga tshenetsho tshifhinga?

¹⁰ Ndi tshifhio tshiitea tshi ofhisaho tshine tsha ḓo vha hone musi hu tshi vutshelwa vhashumeli vha Yehova? Yehova u ḓo dzhenelela u itela u thusa vhathu vhawe a tshi shumisa Yesu na mmbi yawe ya ṱaḓulu. (Ndzumb. 19:11-16) U dzhenelela hawe zwi ḓo amba u thoma ha Haramagedo—yone ‘nndwa ya ḽone ḓuvha ḽihulu ḽa Mudzimu, Mu-vhusa-hoṱhe.’—Ndzumb. 16:14, 16.

¹¹ Malugana na nndwa yeneyo, Yehova o shumisa Hesekiele musi a tshi amba uri: “Ndi hone [Gogo] ndi tshi ḓo mu rambela pfumo dzithavhani dzanga dzoṱhe. Muṋe wa vhoṱhe Yehova u ralo. Vha hawe vha ḓo rungana nga tshavho.” Nga nṱhani ha u hanganea ha vha re siani ḽa Sathane, vha ḓo ḓaḓa vha thoma u ṱhavhana nga tshavho. Naho zwo ralo, Sathane na ene u ḓo vha khakhathini. Yehova o ri: “Ndi ḓo nisa mulilo na tsevhela, zwa wela fhasi khae’ na kha dzimmbi dzawe, na kha dzitshakha nzhi dzine a vha nadzo’.” (Hesek. 38:21, 22) U dzhenelela ha Mudzimu zwi ḓo ḓisa mvelelo dzifhio?

12. Ndi mini zwine dzitshaka dza ḓo kombetshedzea u zwi ṱhogomela?

¹² Dzitshaka dzi ḓo fanela u ṱhogomela uri dzo kundwa nga Yehova nga dzawe. Nga zwenezwo, u fana na zwe zwa itwa nga vhavutsheli vha Vhaegipita musi vha tshi pandamedza Vhaisiraele Lwanzheni Lutswuku, mmbi dza Sathane dzi ḓo ṱavha mikosi nga u hanganea dza ri: “Vha lwelwa nga Yehova”! (Ek. 14:25) Vhukuma, dzitshaka dzi ḓo kombetshedzea u ḓivha Yehova. (Vhalani Hesekiele 38:23.) Zwenezwi zwiitea zwine zwa ḓo tevhekana zwi tsini lungafhani na u thoma?

13. Ndi mini zwine ra zwi ḓivha nga ha tshipiḓa tsha vhuṱanu tsha tshifanyiso tshe tsha ṱaluswa nga Daniele?

¹³ Vhuporofita vhu re buguni ya Daniele vhu ri thusa u pfesesa tshifhinga tshine ra khou tshila khatsho. Daniele o ṱalusa tshifanyiso tshi ngaho muthu tsho itwaho nga tsimbi dzo fhamba-fhambanaho. (Dan. 2:28, 31-33) Tshi imela u tevhekana ha mivhuso ya shango ye ya vha na ṱhuṱhuwedzo khulwane kha vhathu vha Mudzimu vha tshifhingani tsho fhiraho na vha musalauno. Yeneyo mivhuso i katela wa Babele, wa Meda na Peresia, wa Gerika, wa Roma—na wa u fhedza une wa khou vhusa zwino misini yashu. Musi ri tshi guda vhuporofita ha Daniele ri wana uri muvhuso wa shango wa u fhedza u fanyiselwa nga ṋayo na zwikunwane zwa tshifanyiso tshenetsho. Misini ya Nndwa ya Shango ya U Thoma, muvhuso wa Britain wo vhumba vhushaka ho khetheaho na wa United States. Vhukuma, Muvhuso wa Shango wa Vhaisimane na Vhaamerika ndi wone u re tshipiḓa tsha vhuṱanu tsha tshifanyiso tsha Daniele. Ṋayo dzi vhumba tshipiḓa tsha u fhedza tsha tshifanyiso, zwine zwa sumbedza uri a hu na muṅwe muvhuso wa shango une wa  kha ḓi ḓo vhusa. Zwauri ṋayo na zwikunwane ndi tsimbi yo vanganywaho na vumba zwi sumbedza u fhungudzwa ha maanḓa a Muvhuso wa Shango wa Vhaisimane na Vhaamerika.

14. Ndi ufhio muvhuso wa shango une wa ḓo vha u tshi khou vhusa musi Haramagedo i tshi thoma?

¹⁴ Vhuporofita honoho vhu sumbedza uri tombo ḽihulwane ḽine ḽa imela Muvhuso wa Mudzimu ḽo phiguluswa nga 1914 ḽi tshi bva thavhani ine ya fanyisela vhuvhusahoṱhe ha Yehova. Ḽeneḽo tombo ḽi khou kunguluwa nga luvhilo ḽo livha kha ṋayo dza tshifanyiso tshenetsho. Misini ya Haramagedo, ṋayo na tshenetsho tshifanyiso tshoṱhe zwi ḓo pwashekanywa. (Vhalani Daniele 2:44, 45.) Nga zwenezwo, Muvhuso wa Shango wa Vhaisimane na Vhaamerika u ḓo vha u tshi kha ḓi vhusa musi Haramagedo i tshi thoma. Zwi ḓo nyanyula lungafhani u vhona u ḓadzea tshoṱhe ha honovhu vhuporofita! * Naho zwo ralo, ndi mini zwine Yehova a ḓo zwi ita Sathane?

15. Nga murahu ha Haramagedo, ndi mini zwine zwa ḓo itea kha Sathane na madimoni awe?

¹⁵ Tsha u thoma, Sathane u fanela u vhona nga awe maṱo musi hu tshi fheliswa ndangulo yawe yoṱhe kha ḽifhasi. Nga murahu, hu ḓo livhiswa ṱhogomelo kha Sathane. Muapostola Yohane o amba zwine zwa ḓo itea nga murahu. (Vhalani Ndzumbululo 20:1-3.) Yesu Kristo—‘muruṅwa a re na khoṋo ya mugodi’—u ḓo fara Sathane na madimoni awe a vha posa mugodini, a vha valela henefho miṅwaha ya tshigidi. (Luka 8:30, 31; 1 Yoh. 3:8) Tshiitea tshenetsho tshi ḓo vha tshipiḓa tsha u thoma tsha u pwashwa ha ṱhoho ya ṋowa. *—Gen. 3:15.

16. Zwi ḓo amba mini u valelwa ha Sathane ‘mugodini’?

¹⁶ “Mugodi” une Sathane na madimoni awe vha ḓo poswa khawo ndi mini? Ipfi ḽa Lugerika ḽine ḽa ri a′bys·sos ḽe ḽa shumiswa nga Yohane ḽi amba “fhethu ho tsaho vhukuma.” Ḽi dovha ḽa ṱalutshedzelwa nga uri “nga ho kalulaho, hu si na mikano,” na “hu sa gumi.” Nga zwenezwo, ndi fhethu hu sa swikelelwi nga muthu nga nnḓa ha Yehova na muruṅwa wawe a re na “khoṋo ya mugodi.” Musi e henefho, Sathane u ḓo vha e kha vhuimo ha u sa kona u ita tshithu, a tshi nga o fa u itela uri a “si tsha ḓo khakhisa dzitshakha.” Vhukuma, yeneyo “ndau i vhombaho” i ḓo vha i si tsha vhomba.—1 Pet. 5:8.

17, 18. (a) Ndi zwifhio zwiitea zwi sa vhonwiho zwe ra zwi haseledza? (b) Nga murahu ha zwiitea zwenezwi, ndi mini zwine ra ḓo ḓiphina ngazwo?

¹⁷ Hu na zwiitea zwi swayeaho vhukuma na zwi ofhisaho zwine zwa ḓo vha hone hu si kale. Ro lavhelela tshifhinga tshine vha ḓo amba ngatsho uri “ḽo lala, hó navhiwa.” Nga murahu ri ḓo vhona musi hu tshi fheliswa Babele Ḽihulu, musi Gogo wa kha ḽa Magogo a tshi vutshela, nndwa ya Haramagedo, na musi Sathane na madimoni awe vha tshi poswa mugodini. Nga murahu ha zwenezwo zwiitea, vhuvhi hoṱhe vhu ḓo vha vhu si tsheeho, hu ḓo thoma Vhuvhusi ha Kristo ha Miṅwaha ya Tshigidi, nahone ri ḓo ḓiphina nga “muḓalo wa mulalo.”—Ps. 37:10, 11.

¹⁸ Nga nnḓa ha zwenezwi zwiitea zwiṱanu zwe ra zwi haseledza, hu kha ḓi vha na zwiitea “zwi sá vhonwiho” zwine ra ṱoḓa u zwi “londa.” Zwenezwo zwiitea zwi ḓo haseledzwa theroni i tevhelaho.