1, 2. (a) Yehova o sumbedza lushaka lwa Isiraele uri u Mudzimu wa mufuda-ḓe? (b) Ndi mbudziso ifhio ine ya ḓo haseledzwa kha yeneyi thero?

MISINI ya Nehemia, Vhalevi vho zwi amba kha thabelo yavho ya khagala uri vho-makhulukuku wavho “vho hana u pfa” ndaela dza Yehova. Naho zwo ralo, Yehova o vha sumbedza lunzhi-lunzhi uri u “Mudzimu wa tshilidzi, wa vhulenda na vhuhwavho.” Nahone o bvela phanḓa a tshi sumbedza tshilidzi kha Vhalevi vhe vha vha vhe vhuthubwani.—Neh. 9:16, 17.

² Muṅwe na muṅwe a nga ḓivhudzisa uri, ‘U hangwelwa nga Yehova zwi amba mini kha nṋe?’ U itela uri ri kone u fhindula yeneyi mbudziso ya ndeme, kha ri ṱolisise uri Mudzimu o shumisana hani na Davida na Manase, khosi mbili dze dza vhuyelwa musi Yehova a tshi dzi hangwelwa.

3-5. Zwo ḓa hani uri Davida a ite zwivhi zwihulwane?

³ Naho Davida o vha a tshi ofha Mudzimu, o ita zwivhi zwihulwane. Zwivhi zwawe zwo kwama vhavhingani, Uria na Batseba. Mvelelo dza zwenezwo zwivhi dzo pfisa vhuṱungu vhathu vhoṱhe vhe vha vha vha tshi katelwa. Naho zwo ralo, nḓila ye Mudzimu a khakhulula ngayo Davida yo sumbedza uri Yehova u a hangwela. Kha ri ṱhogomele zwe zwa itea.

⁴ Davida o rumela mmbi ya Vhaisiraele uri i yo govhela muḓi wa Raba, wa Vhaamoni. Wo vha u muḓi u re khilomithara dza 80 vhubvaḓuvha ha Yerusalema, seli ha Mulambo wa Yorodane. Davida o sala ngei Yerusalema, nahone musi o ima kha ṱhanga ya nnḓu yawe, o vhona Batseba musadzi wa Uria a tshi khou ṱamba. Munna wawe o vha e siho. Davida o takadzwa nga u vhona Batseba nahone a rumela muḓinḓa wawe uri a ḓiswe pfamoni, u itela uri a ite zwa vhudzekani nae.—2 Sam. 11:1-4.

 ⁵ Musi Davida a tshi pfa uri Batseba ndi muthu wa thovhela, o laedza uri Uria a vhuye Yerusalema u itela uri a ite zwa vhudzekani na mufumakadzi wawe. Fhedzi Uria ho ngo dzhena muḓini wawe—hu sa londwi uri Davida o lingedza nga nḓila dzoṱhe u mu ṱuṱuwedza uri a ite nga u ralo. Nga zwenezwo, Davida o ṅwala luṅwalo a vhudza muḓinḓa wa nndwa uri Uria u fanela u ‘ranga phanḓa afho hune nndwa ya vhifha’ u itela uri maṅwe maswole a mu laṱedze. Sa zwe Davida a zwi dzudzanya, Uria o fela nndwani. (2 Sam. 11:12-17) Nga zwenezwo, khosi Davida ho ngo ita vhuṱonḓolo fhedzi, fhedzi o engedza nga u ita uri hu vhulahwe munna a si na mulandu.

6. Mudzimu o ita mini nga ha zwivhi zwe zwa itwa nga Davida, nahone zwenezwi zwi ri vhudza mini nga ha Yehova?

⁶ Vhukuma, Yehova o vhona zwoṱhe zwe zwa itea, ngauri maṱo awe a vhona zwoṱhe. (Mir. 15:3) Naho khosi yo fheleledza yo vhinga Batseba, “mafhungo aya e Davida a ita o vhifhela Yehova.” (2 Sam. 11:27) Mudzimu o ita mini nga ha zwivhi zwihulwane zwa Davida? O rumela muporofita wawe Nathani uri a ye kha Davida. Samusi e Mudzimu ane a hangwela, Yehova o vha o ḓiimisela u mu sumbedza khathutshelo. Naa ni wana zwe zwa itwa nga Yehova zwi tshi ni kwama mbilu? Ho ngo kombetshedza Davida uri a bule zwivhi zwawe, nṱhani hazwo o laedza Nathani uri a ṱalutshedze Davida tshifanyiso tshine tsha ḓo mu sumbedza uri o ita zwivhi zwihulwane. (Vhalani 2 Samuele 12:1-4.) Yehova o shumisa yeneyo nḓila i bvelelaho vhukuma u itela u pfesesa maḓipfele a vhukuma a Davida!

7. Davida o aravha hani musi a tshi vhudzwa mafhungo a tshifanyiso tsha Nathani?

⁷ Mafhungo a tshifanyiso tshe tsha shumiswa nga Nathani o ita uri khosi i humbule nga ha khaṱulokwayo. Davida o sinyuswa nga mafhungo a munna wa mupfumi nahone a vhudza Nathani a ri: “Nga vhutshilo ha Yehova, uyo munna tshawe ndi u vhulahwa.” Zwiṅwe hafhu, Davida o amba uri munna we a khakha u fanela u lifhela muthu we a mu khakhela. Fhedzi ho itea zwithu zwe Davida a vha a songo zwi humbulela. Nathani o mu fhindula a ri: “Munna uyo ndi iwe.” Nga zwenezwo, Davida o vhudzwa uri nga nṱhani ha mishumo yawe, “pfumo” ḽi nga si ṱuwe lini na lini nḓuni yawe nahone muṱa wawe u ḓo welwa nga khombo. O vha a tshi ḓo dovha a shoniswa nga nṱhani ha vhutshinyi hawe. Davida o ṱhogomela uri o ita tshivhi tshihulwane nahone a ḓisola a ri: “Ndo tshinya, ndo levhela Yehova.”—2 Sam. 12:5-14.

8, 9. Psalme ya 51 i sumbedza hani nḓila ye Davida a vha a tshi ḓipfa ngayo, nahone i ri gudisa mini nga ha Yehova?

⁸ Mafhungo a luimbo lwe lwa ṅwalwa nga Khosi Davida a sumbedza uri o ḓisola vhukuma. Psalme ya 51 i na mafhungo a kwamaho mbilu a musi Davida a tshi humbela thuso kha Yehova, nahone zwenezwo zwo sumbedza uri o vha a songo sokou ṱanganedza vhukhakhi hawe fhedzi, fhedzi o vha o rembuluwa zwivhini zwawe. Davida o vha a tshi vhilaedziswa, zwihulu-hulu nga vhushaka hawe na Mudzimu. O ri: “Ndo tshinya phanḓa hau fhedzi.” O humbela Yehova a ri: “Ntsikele mbilu yo ṱambaho, U mphe muya muswa wo khwaṱhaho. . . . Ntshidze, ndi dovhe ndi takale, ndi fhiwe muya u si na nyofho.” (Ps. 51:1-4, 7-12) Musi ni tshi amba na Yehova nga vhukhakhi haṋu, naa ni a ḓipfa no vhofholowa nahone na amba nae nga u fulufhedzea?

⁹ Yehova ha ngo tsireledza Davida kha mvelelo dza zwivhi zwawe. Mvelelo dza zwivhi zwawe dzo vha dzi tshi ḓo mu kwama vhutshiloni hawe hoṱhe. Naho zwo ralo, nge a vhona uri Davida o rembuluwa na uri u na “mbilu yo ṱhavhiwaho, yo paḓukanaho”—Yehova o mbo ḓi mu hangwela. (Vhalani Psalme  ya 32:5; Ps. 51:17.) Mudzimu Ramaanḓaoṱhe u a pfesesa maḓipfele na zwiṱuṱuwedzi zwa vhukuma zwine zwa ita uri muthu a ite zwivhi. Yehova ho ngo tendela vhahaṱuli vha vhathu vha tshi haṱulela lufu Davida na Batseba nga nṱhani ha vhupombwe havho u ya Mulayo wa Mushe, fhedzi o dzhenelela a vha ene ane a vha haṱula. (Lev. 20:10) Mudzimu o vhea na Salomo murwa wavho uri a vhe khosi i tevhelaho ya Isiraele.—1 Koron. 22:9, 10.

10. (a) Ndi mini zwiṅwe zwe zwa ita uri Yehova a hangwele Davida? (b) Muthu u fanela u ita mini u itela uri Yehova a mu hangwele?

¹⁰ Khamusi Yehova o hangwela Davida, nga nṱhani ha nḓila ye a khathutshela ngayo Saulo. (1 Sam. 24:4-7) Yesu o dzula o amba uri, Yehova u ri fara nga nḓila ine ra fara ngayo vhaṅwe. O ri: “Ni songo haṱula, uri na inwi ni sa ḓo haṱulwa-vho. Ngauri khaṱhulo iné na haṱula ngayo’, na inwi ni ḓo haṱulwa ngayo’. Na muelo uné na ela ngawo’, na inwi ni ḓo e̗lelwa ngawo.’” (Mat. 7:1, 2) Zwi a ri khuthadza vhukuma u ḓivha uri Yehova u a ri hangwela zwivhi zwashu—naho ra nga ita tshivhi tshihulwane vhukuma sa vhuṱonḓolo kana u vhulaha! U ḓo ri hangwela arali na riṋe ri na muya wa u hangwela, arali ri tshi bula zwivhi zwashu khae, nahone ri tshi sumbedza uri ri a ḓisola na u shanduka kha zwiito zwashu zwivhi. Musi vhathu vha tshi rembuluwa zwi tshi bva mbiluni, Yehova u a ‘phumula’ zwivhi zwavho.—Vhalani Mishumo 3:19.

11. Khosi Manase o ita zwo vhifhaho phanḓa ha Yehova nga nḓila dzifhio?

¹¹ Kha ri ṱhogomele maṅwe mafhungo a re Maṅwaloni ane a sumbedza uri Yehova u a ṱoḓa u ri hangwela. Manase o vha khosi ya Yuda nga murahu ha miṅwaha ya 360 musi Davida o no vhusa. O vhusa miṅwaha ya 55, nahone o ita zwithu zwivhi zwa dzitshika zwo vhifhaho zwe zwa ita uri a laṱwe nga Yehova. Zwiṅwe hafhu, Manase o fhaṱa zwiṋari zwa Baali, a gwadamela “gogo ḽoṱhe ḽa lutomboni,” nahone a dzhenisa vharwa vhawe muliloni, a ita zwa vhungome. Vhukuma, “o ita zwinzhi zwe zwa vhifhela Yehova.”—2 Koron. 33:1-6.

12. Manase o vhuyelela hani kha Yehova?

¹² Mafheleloni, Manase o dzhiiwa shangohaya ḽawe a poswa khothoni ngei Babele. Musi e henefho, a nga vha o humbula maipfi e Mushe a vhudza Vhaisiraele ane a ri: “Musi wó khakhelwa, misi zwithu hezwi zwoṱhe zwó wana, ndi hone U tshi ḓo vhuyelela ha Yehova Mudzimu wau wa ḓo thetshelesa zwine a amba.” (Doit. 4:30) Manase o vhuyelela kha Yehova. Nga nḓila-ḓe? O dzula a tshi “ḓi-vhuyedza zwihulu-hulu” a “rabela” Mudzimu (samusi zwo sumbedzwa kha siaṱari 21). (2 Koron. 33:12, 13) A hu na mafhungo  o ṅwalwaho ane a ri vhudza nga ho livhaho zwe zwa ambiwa nga Manase kha dzenedzo thabelo dzawe, fhedzi khamusi dzo vha dzi tshi fana na dza Khosi Davida dzo ṅwalwaho kha Psalme ya 51. Hu sa londwi uri zwi re zwone ndi zwifhio, Manase o shanduka zwi tshi bva mbiluni.

13. Ndi ngani Yehova o hangwela Manase?

¹³ Yehova o aravha hani thabelo dza Manase? Yehova o “tenda, a ita zwe [Manase] a humbela.” U fana na Davida, Manase o ṱhogomela uri o ita zwivhi zwihulwane, a rembuluwa zwi tshi bva mbiluni. Ndi ngazwo Mudzimu o hangwela Manase, a mu vhuyedzedza uri a vhe khosi ngei Yerusalema. Nga nṱhani ha zwenezwo, “Manase [o] ḓivha ngazwo’ uri Mudzimu vhukuma ndi Yehova.” (2 Koron. 33:13) Zwi a ri khwaṱhisa vhukuma u ḓivha na kha yeneyi tsumbo uri Mudzimu washu u na khathutshelo, na uri u a hangwela vhane vha rembuluwa zwi tshi bva mbiluni.

14. Ndi mini zwine zwa ita uri Yehova a hangwele muitazwivhi?

¹⁴ Musalauno, a si vhashumeli vhanzhi vha Mudzimu vhane vha ita zwivhi zwihulwane zwine zwa fana na zwe zwa itwa nga Davida na Manase. Fhedzi, u hangwela ha Yehova dzenedzi khosi mbili zwi ri thusa u vhona uri Mudzimu washu o ḓiimisela u hangwela na muthu o itaho zwivhi zwihulwane, tenda onoyo muitazwivhi a rembuluwa zwi tshi bva mbiluni.

15. Ri zwi ḓivha hani uri Yehova ha hangweli vhathu vhoṱhe tshifhinga tshoṱhe?

¹⁵ Zwi ḓo vha zwi songo tea u dzhia phetho ya uri Yehova u hangwela zwivhi zwoṱhe, tshifhinga tshoṱhe? Malugana na enea mafhungo, kha ri vhambedze mavhonele a Davida na Manase, na a lushaka lwa mashandukwa lwa Vhaisiraele, na lwa Vhayuda. Mudzimu o rumela Nathani uri a yo amba na Davida u itela uri a mu ṋee tshibuli tsha u shandula mavhonele awe. Davida o ṱanganedza yeneyo nyeletshedzo. Musi Manase e  kha vhuimo vhu fanaho, na ene o rembuluwa zwi tshi bva mbiluni. Naho zwo ralo, kanzhi vhathu vha lushaka lwa Isiraele na lwa Vhayuda vho vha vha sa rembuluwi. Nga zwenezwo, Yehova ho ngo vha hangwela. Nṱhani hazwo, o rumela vhaporofita vhawe lunzhi-lunzhi uri vha vha vhudze nḓila ine a dzhia ngayo u sa fulufhedzea havho. (Vhalani Nehemia 9:30.) Na nga murahu ha musi Vhaisiraele vho no vhuyelela shangohaya ḽavho vha tshi vha vhuthubwani ha Babele, Yehova o bvela phanḓa a tshi rumela vhaḓinḓa vhawe vha fulufhedzeaho, sa tshifhe Esera na muporofita Maleaxi. Musi Vhaisiraele vha tshi ita zwine Yehova a zwi funa, vho vha vha tshi takala vhukuma.—Neh. 12:43-47.

16. (a) U sa rembuluwa zwo ita uri hu vhe na mvelelo dzifhio kha lushaka lwoṱhe lwa Isiraele? (b)Hu ḓo vha na mvelelo dzifhio kha muthu muṅwe na muṅwe wa lushaka lwa Isiraele lwa ṋama?

¹⁶ Musi Yesu o no rumelwa kha ḽifhasi u itela u ṋekedza tshiṱhavhelo tshi rengululaho tsho fhelelaho, Yehova ho ngo tsha ṱanganedza zwiṱhavhelo zwa zwipuka zwa Vhaisiraele. (1 Yoh. 4:9, 10) Yesu o sumbedza u vha na mavhonele a Khotsi awe musi e kha ḽifhasi, nahone o amba maipfi a ṱuṱuwedzaho ane a ri: “Hee Yerusalema, Yerusalema! Iwe muvhulahi wa vhaporofita, U kanḓaho nga matombo vho rumiwaho ha iwe! Ndi ka-ngana ndi tshi ri ndi kuvhanganye vhana vhau sa khuhu i tshi kuvhanganya khukhwana dzayo tsini ha phapha dzayo; iwe wa ro hana.” Yesu o dovha a ri: “Ni ḓo zwi vhona, nnḓu yaṋu i ḓo ṱutshelwa ya vha shubi.” (Mat. 23:37, 38) Zwenezwo zwo ita uri lushaka lwe lwa si rembuluwe lu dzhielwe vhudzulo nga Isiraele wa muya. (Mat. 21:43; Vha-Gal. 6:16) Fhedzi, naa muthu muṅwe na muṅwe wa lushaka lwa Isiraele lwa ṋama a nga kona u hangwelwa zwivhi zwawe? Ee, a nga hangwelwa na u khathutshelwa nga Yehova arali a sumbedza u vha na lutendo kha Mudzimu na kha tshiṱhavhelo tsha Yesu Kristo. Tshenetsho tshibuli tshi ḓo waniwa na nga vhathu vhe vha lovha vha sa athu rembuluwa zwivhini zwavho, fhedzi vhe vha vusiwa uri vha tshile kha ḽifhasi ḽo kunakiswaho.—Yoh. 5:28, 29; Mish. 24:15.

17, 18. Ndi mini zwine zwa nga ita uri Yehova a ri hangwele?

¹⁷ Ri fanela u aravha hani nga ha u ḓiimisela ha Yehova u ri hangwela? Vhukuma, ri ṱoḓa u aravha nga nḓila i fanaho na ya Davida na Manase. Ri fanela u ṱhogomela zwivhi zwashu, ra rembuluwa kha vhukhakhi hashu, ra humbela zwi tshi bva mbiluni uri Yehova a ri hangwele, na u humbela uri a ri ṋee mbilu dzo kunaho. (Ps. 51:10) Arali ro ita zwivhi zwihulwane, ri fanela u humbela thuso ya lwa muya kha vhahulwane. (Yak. 5:14, 15) Hu sa londwi zwiimo zwashu, zwi a khuthadza u humbula nḓila ye Yehova a ḓiṱalusa ngayo kha Mushe musi a tshi ri: “Mudzimu wa khathutshelo na wa vhuthu, wa u sa fhela mbilu, wa vhuhwavho vhuhulu na u fulufhedzea, ane vha maḓana na maḓana a vha ita nga tshilidzi, ane a hangwela vhatshinyi na vhapambuwi na vha-ita-zwivhi.” Yehova ha athu shanduka.—Ek. 34:6, 7.

¹⁸ Yehova o fulufhedzisa Vhaisiraele vho rembuluwaho uri u ḓo vha hangwela zwivhi zwavho, na u ita uri zwivhi zwavho zwo tswukaho sa “muridili” zwi tshene sa “mahaḓa.” (Vhalani Yesaya 1:18.) Nga zwenezwo, u hangwelwa nga Yehova zwi amba mini kha riṋe? Ri nga hangwelwa tshoṱhe zwivhi zwashu na vhukhakhi hashu, tenda ra sumbedza uri ro rembuluwa zwi tshi bva mbiluni.

19. Ndi mini zwine ra ḓo zwi haseledza theroni i tevhelaho?

¹⁹ Samusi Yehova a tshi hangwela zwivhi zwashu, ri nga mu edzisa hani musi ri tshi shumisana na vhaṅwe? Ri nga iledza hani u vha na mavhonele a u sa hangwela vhathu vhane vha ita tshivhi tshihulwane, fhedzi vha rembuluwa zwa vhukuma? Thero i tevhelaho i ḓo ri thusa u ṱolisisa mbilu dzashu u itela uri ri kone u edzisa Khotsi ashu Yehova, “wa vhuḓi na vhulenda.”—Ps. 86:5.