HO VHA hu nga ṅwaha wa 49 C.E. Petro, Yakobo na Yohane—‘vhane vha ḓivhiwa sa dziphuphu’—vho ṋea ndaela muapostola Paulo na mushumisani ngae Baranaba. Tshifhinga tshoṱhe musi vha tshi huwelela kha dziṅwe tshakha, vho vha vha tshi fanela u humbula nga ha Vhakriste vha shayaho. (Vha-Gal. 2:9, 10) Vho ḓadzisa hani honoho vhuḓifhinduleli?

Marifhi a Paulo a sumbedza uri vho livhisa ṱhogomelo kha enea mafhungo. Sa tsumbo, o ṅwalela Vhakriste vha Korinta a ri: “Á vha a zwiḽa zwiné na kuvhanganyela vhakhethwa, na inwi ni ite zwaṋu nga maitele é nda laedza zwivhidzo zwa Galatia. Nga ḓuvha ḽa u simula vhege noṱhe nga muthihi ene muṋe a vhee tshiné a vhulunga, nga he zwa mu anḓa, uri zwi sa vho ḓo tou kuvhanganyiwa ndi tshi ḓa. Huno musi ndi tshi ḓa ndi ḓo ri vhané na vhona vhó fanelwa nda vha ruma na marifhi uri vha ise zwa tshilidzi tshaṋu ngei Yerusalema.”—1 Vha-Kor. 16:1-3.

Kha vhurifhi hawe ha vhuvhili ho hevhedzwaho he a vhu ṅwalela Vhakorinta, Paulo o dovha a ombedzela tshipikwa tshavho tsha u kuvhanganya tshelede. Tsho vha tshi tsha u itela uri ‘zwinzhi zwine vha vha nazwo zwi ḓo thusa hune vha ṱahelelwa hone.’—2 Vha-Kor. 8:12-15.

Hu ṱoḓaho u vha nga 56 C.E., musi Paulo a tshi ṅwalela Vhakriste vha ngei Roma, vho vha vhe tsini na u fhedza u kuvhanganya tshelede. O ri: “Há vha zwino ndi ya Yerusalema u yo shumela vhakhethwa. Ngauri vha Makedonia na vha Axaya vho tonda vha ita mulanga wa zwiné zwa ḓo ya kha vhashai vha kha vhakhethwa vha Yerusalema.” (Vha-Roma 15:25, 26) Paulo o ḓadzisa vhuḓifhinduleli hawe nga u ṱavhanya nga murahu ha zwenezwo, ngauri musi a tshi vhuyelela Yerusalema o mbo ḓi farwa a valelwa dzhele, nahone o vhudza Muvhusi wa Muroma Felix a ri: “Ndó ḓela lushaka lwashu na tshifhiwa, nda ḓisa na zwidzimu.”—Mish. 24:17.

Mavhonele e a sumbedzwa nga Vhakriste vha ḓanani ḽa u thoma ḽa miṅwaha, a vhonala zwavhuḓi kha zwe Paulo a zwi vhudza vhathu vha Makedonia. O ri: “Vho ri kwengweledza zwinzhi, vha tshi ri humbela tshilidzi.” Muapostalo Paulo o ṱuṱuwedza Vhakorinta uri vha edzise tsumbo yeneyo. O ri: “Muthu waṋu nga a ite tshe a dzula ó tshi elekanya mbiluni yawe, a so ngo shuma ó ṱungufhala nge a kombetshedzwa, ngauri a ṋeaho ó takala ndi ene a funwaho nga Mudzimu.” Ndi mini zwe zwa ṱuṱuwedza zwivhidzo uri zwi ṋeele nga yeneyo nḓila? U ṋeela honoho ho vha hu sa ‘itelwi u swikisedza huné vhakhethwa vha ṱahelwa fhedzi, fhedzi ho itelwa na uri u livhuha Mudzimu hu fhufhume kha vhanzhi.’ (2 Vha-Kor. 8:4; 9:7, 12) U ṋeela hashu nga mafunda zwi nga swikelela tshipikwa tshi fanaho. Yehova Mudzimu u ḓo fhaṱutshedza muya wavhuḓi wa u ṋea, u si wa tseḓa—nahone phaṱhutshedzo dzawe dzi a pfumisa.—Mir. 10:22.

Vhathu vhanzhi vha edzisa zwe zwa vha zwi tshi itwa misini ya muapostola Paulo nga u vhetshela thungo, kana u vhekanya tshelede ine vha i longa mabogisini a muṋeelo o ṅwalwaho uri “Mushumo wa Shango Ḽoṱhe.” (1 Vha-Kor. 16:2) Ṅwedzi muṅwe na muṅwe, zwivhidzo zwi rumela tshelede yeneyi ofisini ya Ṱhanzi dza Yehova ine ya ṱhogomela mashango ane zwa vha khao. Zwi a konadzea u rumela miṋeelo kha dzangano ḽi re mulayoni ḽine ḽa shumiswa nga Ṱhanzi dza Yehova shangoni ḽa vhoiwe. U itela u ḓivha dzina ḽa dzangano ḽine ḽa shumiswa nga Ṱhanzi dza Yehova shangoni ḽa vhoiwe, kwamani ofisi ya davhi ine ya ṱhogomela shango ḽine na dzula khaḽo. Ni nga wana ḓiresi ya ofisi ya davhi ya shango ḽa haṋu nga u sedza kha www.pr418.com. Miṋeelo ine ya nga rumelwa ofisini ya davhi ndi i tevhelaho:

MIṊEELO I SI NA MIKANO

• Ni nga ṋeela nga dzhuwele kana zwiṅwe zwithu zwa ndeme.
• Miṋeelo yeneyi i fanela u rumelwa na vhurifhi vhune ha ṱalutshedza uri zwifhiwa zwenezwo a zwi na mikano.

U ṊEELA HO DZUDZANYWAHO

Nga nnḓa ha zwifhiwa zwi si na mikano zwa tshelede na miṋeelo ya tshelede, hu na maṅwe maitele a u ṋeela u itela u vhuyedza mushumo wa Muvhuso shangoni ḽoṱhe. Maitele eneo o bulwa afho fhasi. Hu sa londwi nḓila dzine na ṱoḓa u ṋeela ngadzo, zwi ḓo vha zwavhuḓi uri ni kwamane na ofisi ya davhi ine ya ṱhogomela shango ḽa vhoiwe u itela u ḓivha arali maitele ane na ṱoḓa u a shumisa a tshi ṱanganedzwa shangoni ḽeneḽo. Samusi ṱhoḓea dza lwa mulayo na dza mithelo dzi sa fani kha mashango o fhamba-fhambanaho, ndi zwa ndeme u kwamana na vhaeletshedzi vha zwa mithelo vha re mulayoni na vhoramilayo musi ni sa athu khetha nḓila ya khwine ine na nga ṋeela ngayo.

Ndindakhombo: Watch Tower Bible and Tract Society of South Africa i nga ḓi ṅwaliswa sa ine ya ḓo vhuyelwa kha ndugiselelo ya tshelede ya ndindakhombo ya vhutshilo, kana kha tshelede ya u notha kana ya phesheni.

Akhaunthu Dza Banngani: Akhaunthu dza banngani, zwiḽipi zwa u dipositha, na tshelede ya phesheni zwi nga ṋewa Watch Tower Bible and Tract Society of South Africa, ni tshi kha ḓi tshila kana no no lovha, zwi tshi ya nga ṱhoḓea dza bannga ya henefho.

Mikovhe na Dzi-bond: Mikovhe na dzi-bond zwi nga ṋekedzwa Watch Tower Bible and Tract Society of South Africa, sa zwifhiwa zwi si na mikano.

Zwifhaṱo: Zwifhaṱo zwine zwa rengisea zwi nga ṋeelwa sa zwifhiwa zwi si na mikano, kana arali hu nnḓu hu nga itwa pfano ya uri i si dzhiiwe musi ane a khou dzula henefho a tshi kha ḓi tshila. Ḓivhadzani ofisi ya davhi ya hune na dzula hone ni sa athu ṋeela nga tshifhaṱo naho tshi tshifhio.

Mbofho: Thundu kana tshelede zwi nga ṋewa Watch Tower Bible and Tract Society of South Africa nga u tevhedza ndaela ya mufu i re mulayoni, kana Watch Tower Bible and Tract Society of South Africa i nga kha ḓi ṅwaliswa sa ine ya ḓo wana thundu kana tshelede. Tshelede kana thundu ine ya ṋewa ndangulo ya vhurereli i nga kha ḓi vha na mbuyelo dzavhuḓi kha zwa muthelo.

Arali ni tshi ṱoḓa mafhungo o engedzeaho, ni fanela u kwamana na Accounting Office nga luṱingo kana nga u tou ṅwala vhurifhi kha ḓiresi yo ṅwalwaho afho fhasi kana ni nga kwama ofisi ya davhi ine ya ṱhogomela shango ḽa vhoiwe.