Yesu O Ri Vhetshela Tsumbo Ya U Ḓiṱukufhadza
“Ndo ni sumbedza nḓila uri ni ite zwe nṋe nda ni ita.” —YOH. 13:15.
1, 2. Vhusikuni hawe ha u fhedza e kha ḽifhasi, ndi ifhio ngudo ya ndeme ye Yesu a i ṋea vhaapostola vhawe?
VHUSIKUNI hawe ha u fhedza e kha ḽifhasi, Yesu o vha e na vhaapostola vhawe nḓuni ya nṱha ngei Yerusalema. Musi vha tshi khou ḽa tshilalelo, Yesu o takuwa a bvula nguvho dzawe dza nṱha. A ḓivhofha khundu nga ṅwenda. A shela maḓi sambeloni a thoma u ṱanzwa milenzhe ya vhafunziwa vhawe, a dovha a i phumula nga ṅwenda. Musi o no fhedza a dovha a ambara nguvho dzawe dza nṱha. Ndi ngani Yesu o ita mushumo wonoyo wa u ḓiṱukufhadza?—Yoh. 13:3-5.
2 Musi a tshi ṱalutshedza Yesu o ri: “Naa zwe nda ni ita ni a zwi ḓivha naa? . . . Zwino nṋe ndi re Murena waṋu na Mufunzi waṋu ndó ni ṱanzwa milenzhe, na inwi ní ralo ni tshi ṱanzwana milenzhe. Ndo ni sumbedza nḓila uri ni ite zwe nṋe nda ni ita.” (Yoh. 13:12-15) Musi Yesu a tshi ita wonoyo mushumo wa fhasi nga u ḓifunela, o ṋea vhafunziwa vhawe ngudo ya ndeme, ye vha vha vha sa ḓo i hangwa, nahone yo vha i tshi ḓo vha ṱuṱuwedza uri vha ḓiṱukufhadze tshifhingani tshi ḓaho.
3. (a) Kha zwiitea zwivhili, Yesu o ombedzela hani ndeme ya u ḓiṱukufhadza? (b) Ndi mini zwine ra ḓo zwi haseledza kha ino thero?
3 Musi Yesu a tshi ṱanzwa milenzhe ya vhaapostola vhawe, ho vha hu si lwa u thoma a tshi ombedzela ndeme ya u ḓiṱukufhadza. Kha tshiṅwe tshiitea tsha nga phanḓa ha tshenetshi, musi vhaṅwe vhaapostola vha tshi sumbedza u vha na muya wa vhuhovheleli, Yesu o dzhia ṅwana muṱuku a mu vhea phanḓa havho, a ri: “A ṱanganedzaho uyu ṅwana a tshi itela dzina ḽanga, u ṱanganedza nṋe; huno a ṱanganedzaho nṋe u ṱanganedza o nthumaho. A re muṱuku kha inwi noṱhe, ndi ene muhulwane.” (Luka 9:46-48) Samusi o vha a tshi zwi ḓivha uri Vhafarisei vha ṱoḓa vhuimo ha nṱha, nga murahu musi Yesu e vhuḓinḓani hawe o ri: “Vhoṱhe vhané vha ḓi-hudza vha ḓo ṱukufhadzwa; ané a ḓi-ṱukufhadza u ḓo huliswa.” (Luka 14:11) Zwi tou vha khagala uri Yesu u ṱoḓa vhatevheli vhawe vha tshi ḓiṱukufhadza, zwine zwa amba uri a vho ngo fanela u ḓidzhiela nṱha na u ḓihudza. Samusi ri tshi ṱoḓa u mu edzisa, kha ri haseledze tsumbo yawe ya u ḓiṱukufhadza. Ri ḓo dovha ra vhona nḓila ine pfaneleo yeneyi ya vhuyedza ngayo vhaṅwe vhathu u katela na vhane vha i sumbedza.
‘NṊE NDI SI HUMELE MURAHU’
4. Murwa wa Mudzimu mubebwa e eṱhe o ḓiṱukufhadza hani na musi a sa athu vha muthu wa ṋama?
4 Murwa wa Mudzimu mubebwa e eṱhe o ḓiṱukufhadza na musi a sa athu ḓa kha ḽifhasi. Musi a sa athu vha muthu wa ṋama, Yesu o fhedza miṅwaha minzhi vhukuma na khotsi awe ngei ṱaḓulu. Bugu ya Bivhili ya Yesaya yo amba nga ha vhushaka he Murwa a vha e naho na Khotsi awe musi i tshi ri: “Muṋe wanga Yehova o mpha lulimi lwa vho funzwaho, uri ndi kone u tika muneti nga u amba nae’. U mvusa misi yoṱhe ḽi tshi tsha; u vusa nḓevhe yanga uri ndi thetshelese sa mufunziwa. Muṋe wanga Yehova o vula nḓevhe yanga, nṋe ndi si hane, ndi si humele murahu.” (Yes. 50:4, 5) Murwa wa Mudzimu o sumbedza uri u a ḓiṱukufhadza nahone a thetshelesa nga vhuronwane zwe Yehova a mu funza zwone. O vha o ḓiimisela nahone a tshi fhisetshela u gudiswa nga Mudzimu wa ngoho. Yesu u fanela u vha o vhona nḓila ye Yehova a ḓiṱukufhadza ngayo musi a tshi sumbedza tshilidzi vhathu vha re na tshivhi!
5. Naho Yesu e Mikaele muruṅwa muhulwane, o ri vhetshela hani tsumbo ya u ḓiṱukufhadza na u ḓifhima musi a tshi lwa na Diabolo?
5 A si zwivhumbiwa zwoṱhe zwa ṱaḓulu zwe zwa vha zwi na mavhonele a fanaho na a Murwa mubebwa e eṱhe wa Mudzimu. Muruṅwa we a vha Sathane Diabolo ho ngo ḓiṱukufhadza nga nṱhani ha uri o vha a songo ḓiimisela u guda kha Yehova, fhedzi o ṱuṱuwedzwa nga pfaneleo dza u ḓidzhiela nṱha na u ḓihudza—dze dza ita uri a shandukele Yehova. U fhambana na zwenezwo, Yesu ho ngo vhuya a ḓipfa a songo fushea nga vhuimo hawe ngei ṱaḓulu, kana a ṱuṱuwedzea u shumisa maanḓa awe nga nḓila i songo teaho. Naho Yesu e Mikaele muruṅwa muhulwane, ho ngo vhuya a shumisa luvhi maanḓa awe “musi a tshi lwa na Diabolo, musi vha tshi vhangisana mutumbu wa Mushe.” Nṱhani hazwo, Murwa wa Mudzimu o sumbedza u ḓiṱukufhadza na u ḓifhima. O takalela u vhona Yehova Muhaṱuli Muhulwane wa fhethu hoṱhe a tshi dzudzanya mafhungo nga nḓila yawe na nga tshifhinga tshawe.—Vhalani Yuda 9.
6. Yesu o sumbedza hani uri u a ḓiṱukufhadza musi a tshi ṱanganedza mushumo wa u vha Messia?
6 A zwi timatimisi uri zwithu zwe Yesu a zwi guda musi a sa athu vha muthu wa ṋama zwi katela vhuporofita he ha bulwa hu tshee nga phanḓa nga ha zwidodombedzwa zwa vhutshilo hawe ha kha ḽifhasi sa Messia. Nga zwenezwo, o vha a tshi zwi ḓivha hu tshee nga phanḓa uri u ḓo tshenzhela zwithu zwi vhavhaho. Naho zwo ralo, Yesu o ṱanganedza mushumo wa u tshila kha ḽifhasi na u fa sa Messia o fulufhedziswaho. Ndi ngani? Muapostola Paulo o bvisela khagala u ḓiṱukufhadza ha Murwa mu bebwa e eṱhe wa Mudzimu musi a tshi ṅwala uri: “We a ri e tshivhilini tsha Mudzimu; u fana hawe na Mudzimu a si hu ite vhunga tshithu tshe tsha tou thubiwa. Ene a ḓi-bvula, a ambara tshivhili tsha mulanda. A shanduka a fana na vhathu, na maitele muthu a wana a tshi nga a muthu.”—Vha-Fil. 2:6, 7.
MUSI E KHA ḼIFHASI “O ḒIṰUKUFHADZA”
Ri nga vhuyelwa hani nga u ḓiṱukufhadza ha Yesu?
7, 8. Musi a tshee muṱuku, na tshifhingani tsha vhuḓinḓa hawe ha kha ḽifhasi, Yesu o sumbedza nga nḓila dzifhio uri u a ḓiṱukufhadza?
7 Paulo o ṅwala uri: “[Yesu o ] ḓi-ṱukufhadza, a vha a pfaho u swika lufuni, lufuni lwa kha danda ḽa tshengedzo, NW.” (Vha-Fil. 2:8) U bva vhuṱukuni hawe, Yesu o ri vhetshela tsumbo ya u ḓiṱukufhadza. Naho o aluswa nga vhabebi vha songo fhelelaho Yosefa na Maria—Yesu o ḓiṱukufhadza “a dzula a tshi vha pfa.” (Luka 2:51) Ndi tsumbo yavhuḓi lungafhani kha vhaswa, ngauri Mudzimu u ḓo vha fhaṱutshedza musi vha tshi thetshelesa vhabebi vhavho nga u ḓifunela.
8 Musi o no aluwa, Yesu o sumbedza uri u a ḓiṱukufhadza nga u ita uri zwi funwaho nga Yehova zwi vhe zwa ndeme u fhira zwine zwa funwa ngae. (Yoh. 4:34) Tshifhingani tsha vhuḓinḓa hawe, Yesu Kristo o shumisa dzina ḽa Mudzimu a dovha a thusa vhathu vha mbilu dzavhuḓi uri vha ḓivhe pfaneleo dza Yehova na ndivho dzawe malugana na vhathu. Yesu o vha a tshi tshila u tendelana na zwine a zwi funza nga ha Yehova. Sa tsumbo, kha thabelo yawe ya tsumbo, mbuno ya u thoma ye Yesu a i bula ndi ya uri “Khotsi-ashu wa ṱaḓulu! dzina ḽau ḽi khethwe.” (Mat. 6:9) Yesu o ṋea vhatevheli vhawe ndaela ya uri zwa ndeme u fhira zwoṱhe ndi uri dzina ḽa Yehova ḽi itwe ḽikhethwa. Na ene o vha a tshi tshilela zwenezwo. Musi e tsini na u fhedza vhuḓinḓa hawe ha kha ḽifhasi, Yesu o rabela Yehova nahone a amba zwo tea musi a tshi ri: “Ndo vha ḓivhadza [vhaapostola] dzina ḽau, huno ndi ḓo ḓi vha ḓivhadza.” (Yoh. 17:26) Zwiṅwe hafhu, kha vhuḓinḓa hawe hoṱhe, Yesu o hulisa Yehova nga zwe a zwi khunyeledza kha ḽifhasi.—Yoh. 5:19.
9. Sakaria o porofita mini malugana na Messia, nahone zwo khunyeledzwa hani kha Yesu?
9 Malugana na Messia, Sakaria o ṅwala maipfi a tevhelaho a vhuporofita musi a tshi ri: “Hee ṅwananyana wa Tsioni, mifhululu nga i ṱahe! Hee ṅwananyana wa Yerusalema, itou khana! U ḓivhe zwauri Khosi yau i khou ḓa ha iwe, Muvhuya, Mutshidzi, Ndi Ene Mulenda; o namela mbongola, ṋamana yayo, voḓa ḽa mbongola.” (Sak. 9:9) Honovhu vhuporofita ho ḓadzea musi Yesu a tshi dzhena Yerusalema nga phanḓa ha Paseka, nga ṅwaha wa 33 C.E. Vhathu vhanzhi vho adza nguvho dzavho na matavhi a miri nḓilani. Vhukuma, musi a tshi dzhena, ho vuwa vilili muḓini woṱhe. Naho o ṱanganedzwa sa Khosi phanḓa ha mavhuthu, Yesu o dzula a tshi ḓiṱukufhadza.—Mat. 21:4-11.
10. U thetshelesa ha Yesu u swika a tshi fa zwo sumbedza mini?
10 Yesu Kristo o ḓiṱukufhadza na u thetshelesa u swika musi a tshi fa kha danda ḽa tshengedzo. Nga zwenezwo, o zwi sumbedza nga vhuḓalo uri vhathu vha nga dzula vha tshi fulufhedzea kha Yehova naho vha nga lingwa zwihulu. Yesu o dovha a sumbedza uri Sathane o vha a tshi khou zwifha musi a tshi amba uri vhathu vha shumela Yehova nga nṱhani ha zwiitisi zwa tseḓa. (Yobo 1:9-11; 2:4) U fulufhedzea ha Kristo zwo dovha zwa tikedza tshoṱhe u tea na u luga ha vhuvhusahoṱhe ha Yehova. Zwi tou vha khagala uri Yehova o takadzwa nga u fulufhedzea ha Murwa wawe ane a ḓiṱukufhadza.—Vhalani Mirero 27:11.
11. Tshiṱhavhelo tsha Yesu Kristo tshi rengululaho tsho ita uri vhathu vha re na lutendo vha vhe na tshilavhelelwa tshifhio?
11 Nga nṱhani ha u fa hawe kha danda ḽa tshengedzo, Yesu o rengulula vhanzhi. (Mat. 20:28) Zwenezwi zwo ṋea vhathu vha re na tshivhi tshibuli tsha u tshila tshoṱhe na u ita uri vha dzhiiwe sa vho lugaho. Paulo o ṅwala uri: “U lulamisa ha muthihi hó ḓisela vhathu vhoṱhe u pfi vho luga, nga vha tshile.” (Vha-Roma 5:18) Lufu lwa Yesu lwo ita uri Vhakriste vho ḓodzwaho nga muya vha lavhelele u tshila vha si tsha fa ngei ṱaḓulu, ngeno vha “dziṅwe nngu” vha tshi lavhelela u tshila nga hu sa fheli kha ḽifhasi.—Yoh. 10:16; Vha-Roma 8:16, 17.
“NDI MUDZIA-U-ḒI-ṰUKUFHADZA”
12. Yesu o sumbedza hani u vha na vhulenda na u ḓiṱukufhadza, musi a tshi shumisana na vhathu vha songo fhelelaho?
12 Yesu o ramba vhoṱhe ‘vho netaho na vha lemelwaho’ uri vha ḓe khae. O ri: “Ḓi-hweseni dzhogo yanga, ni funzwe nga nṋe; ngauri ndo vuḓa, ndi mudzia-u-ḓi-ṱukufhadza mbiluni; ndi hone dzimbilu dzaṋu dzi tshi ḓo rula.” (Mat. 11:28, 29) Pfaneleo ya u ḓiṱukufhadza na ya vhulenda yo ita uri Yesu a vhe na vhuthu na u kona u shumisana na vhathu vha songo fhelelaho. O vha a tshi humbulela vhafunziwa vhawe a sa lavheleli zwo engedzeaho khavho. Yesu o vha a tshi vha khuthadza na u vha ṱuṱuwedza. Ha ngo ita uri vha ḓipfe vhe si vha ndeme. Musi Yesu a tshi amba navho o vha a sa vha halifheli kana u vha sinyutshela. Zwiṅwe hafhu, o fulufhedzisa vhafunziwa vhawe uri musi vha tshi sendela khae na u ita zwine a vha funza, vha ḓo homoloswa, ngauri dzhogo yawe a i gogoni, nahone muhwalo wawe u a leluwa. Vhathu vha mbeu dzi sa fani u katela vhaṱuku na vhahulwane vho ḓipfa vho vhofholowa musi vhe nae.—Mat. 11:30.
Yesu o vha e tsumbo yavhuḓi ya u pfela vhaṅwe vhuṱungu
13. Yesu o sumbedza hani u pfela vhuṱungu Vhaisiraele?
13 Musi a tshi shumisana na Vhaisiraele, Yesu o vha pfela vhuṱungu nga ṅwambo wa uri vho vha vhe kha vhuimo vhu konḓaho, nahone o vha ṋea zwine vha zwi ṱoḓa. Musi e tsini na muḓi wa Yeriko, o ṱangana na vhanna vhavhili vho pofulaho vhe vha vha tshi khou humbela. Muṅwe wavho o vha a tshi pfi Baratimeo. Vho humbela Yesu uri a vha thuse, fhedzi gogo ḽa vhathu ḽa vha kaidza ḽa ri vha fhumule. Zwo vha zwi tshi nga leluwa uri a si thetshelese yeneyo khumbelo ya vhenevho vhanna. Nṱhani hazwo, Yesu o humbela uri vha ḓiswe khae, a vha pfela vhuṱungu, nahone a vha fhodza. Vhukuma, Yesu o vha a tshi edzisa Khotsi awe Yehova nga u ḓiṱukufhadza na u khathutshela vhaitazwivhi.—Mat. 20:29-34; Marko 10:46-52.
“ANE A ḒIṰUKUFHADZA U ḒO HULISWA”
14. U ḓiṱukufhadza ha Yesu zwi ḓo vhuyedza hani vhathu?
14 Vhutshilo ha Yesu Kristo ha u ḓiṱukufhadza ho vha vhu takadzaho na vhu vhuyedzaho. Yehova o vha a tshi takalela u vhona Murwa wawe ane a mu funa a tshi ḓiṱukufhadzela u ita lufuno lwawe. Vhaapostola na vhafunziwa vho vha vha tshi homoloswa nga u sa fhela mbilu ha Yesu na u ḓiṱukufhadza hawe. Tsumbo yawe, nḓila ye a vha a tshi funza ngayo, na ṱhuṱhuwedzo yawe ya lufuno zwo vha ita uri vha ite mvelaphanḓa ya lwa muya. Vhathu-zwavho vho vhuyelwa nga u ḓiṱukufhadza ha Yesu nga nṱhani ha uri vho vha vha tshi ṱanganedza thuso, pfunzo, na ṱhuṱhuwedzo yawe. Tshiṱhavhelo tsha Yesu tshi rengululaho tshi ḓo vhuyedza vhathu vhoṱhe lwa tshoṱhe.
15. Yesu o vhuyelwa hani nga u ḓiṱukufhadza hawe?
15 Yesu o vhuyelwa hani? Naa u ḓiṱukufhadza zwo mu vhuyedza? Vhukuma zwo mu vhuyedza, ngauri o vhudza vhafunziwa vhawe a ri: “Vha u ḓi-ṱukufhadza vha ḓo huliswa.” (Mat. 23:12) Eneo maipfi o ḓadzea khae. Paulo o ṱalutshedza a ri: “Mudzimu a simesa u mu hulisa ngazwo’, a mu tonda nga ḽone dzina ḽi fhiraho madzina oṱhe. Uri dzinani ḽa Yesu magona oṱhe a gwadame, a vha ṱaḓulu na vha fhano fhasi na vha ḓasi ha mavu, Ndimi dzoṱhe dzi bvumele zwauri: Yesu Kristo ndi ene Murena, hu vhe u renda Mudzimu Khotsi.” Nga nṱhani ha u ḓiṱukufhadza na u fulufhedzea ha Yesu musi e kha ḽifhasi, Yehova Mudzimu o hulisa Murwa wawe nahone a mu ṋea maanḓa a u vhusa zwoṱhe zwi re ṱaḓulu na kha ḽifhasi.—Vha-Fil. 2:9-11.
YESU U ḒO “PHALALELA VHAFULUFHEDZEI NA VHO VUḒAHO”
16. Ndi mini zwine zwa sumbedza uri Murwa wa Mudzimu u ḓo bvela phanḓa a tshi ḓiṱukufhadza?
16 Yesu Murwa wa Mudzimu u ḓo bvela phanḓa na mishumo yawe nga u ḓiṱukufhadza. Mupsalme o dzula o amba nga ha nḓila ine Yesu a ḓo dzhiela ngayo maswina awe vhukando musi e kha vhuimo hawe ha ṱaḓulu. O ri: “Vhurena hau vhu ḓo kona U . . . phalalela vhafulufhedzei na vho vuḓaho na vho lugaho.” (Ps. 45:4) Nga tshifhinga tsha Haramagedo Yesu Kristo u ḓo dzhia vhukando u itela u lwela vho vuḓaho, vhane vha ḓiṱukufhadza, na vha funaho mafhungo-ngoho. Nahone hu ḓo itea mini vhufheloni ha Miṅwaha ya Tshigidi musi Khosi Messia a tshi vhusa “ó no kunda mivhuso yoṱhe, na vhadzia-maanḓa vhoṱhe na vhadzia-nungo”? Naa u ḓo ḓiṱukufhadza? Ee, u ḓo ita nga u ralo musi a tshi “kumedza vhuhosi Mudzimu a ré Khotsi.”—Vhalani 1 Vha-Korinta 15:24-28.
17, 18. (a) Ndi ngani zwi zwa ndeme uri vhashumeli vha Yehova vha edzise tsumbo ya Yesu ya u ḓiṱukufhadza? (b) Ndi mini zwine ra ḓo zwi haseledza theroni i tevhelaho?
17 Hu pfi mini nga riṋe? Naa ri ḓo edzisa tsumbo yawe ya u ḓiṱukufhadza? Ri ḓo kwamea hani musi Khosi Yesu Kristo a tshi haṱula vhathu nga Haramagedo? Nḓila ine a ḓo dzhia ngayo vhukando i sumbedza uri u ḓo tshidza vhane vha ḓiṱukufhadza na vho lugaho fhedzi. Arali ri tshi ṱoḓa u tshidzwa, zwi ḓo vha zwa ndeme uri ri ṱahulele u ḓiṱukufhadza zwino. Zwiṅwe hafhu, samusi u ḓiṱukufhadza zwo vhuyedza Yesu Kristo na vhaṅwe, na riṋe ri ḓo vhuyelwa nga nḓila nnzhi arali ra ḓiṱukufhadza.
18 Ndi mini zwine zwa ḓo ri thusa uri ri edzise tsumbo ya Yesu ya u ḓiṱukufhadza? Ri nga lwela hani u ḓiṱukufhadza hu sa londwi khaedu dzine ra nga sedzana nadzo? Mbudziso dzenedzi dzi ḓo haseledzwa theroni i tevhelaho.
