1, 2. Petro o vha a tshi khou ambela kha vhonnyi musi a tshi ri ni “vhanangiwa,” nahone ndi ngani o vha vhidza uri ndi vhadzulapo vha tshifhinganyana?

MIṄWAHANI i ṱoḓaho u vha 30 musi Yesu o no vhuyelela ṱaḓulu, muapostola Petro o ṅwala luṅwalo lu yaho kha “vhanangiwa vho dzulaho lwa vhatsinda, vhó balangana[ho] na ḽa Ponto, Galatia, Kapadokia, Asia na Bithinia.” (1 Pet. 1:1) Petro o shumisa ipfi “vhanangiwa” a tshi ambela kha avho vho ḓodzwaho nga muya-mukhethwa u fana nae, vhe vha ‘bebwa-hafhu, uri vha vhe na fulufhelo ḽi tshilaho’ uri vha vhuse na Kristo ngei ṱaḓulu. (Vhalani 1 Petro 1:3, 4.) Fhedzi ndi ngani o dovha a vha vhudza a ri “ní vhaeni, ní vhafhiri” kana vhadzulapo vha tshifhinganyana? (1 Pet. 2:11) Ndi ngani roṱhe ri tshi fanela u vha na dzangalelo kha enea mafhungo samusi hu tshi tou vha na Ṱhanzi dzi si gathi fhedzi dzine dza amba uri dzo ḓodziwa kana ndi vhanangiwa?

² Zwo vha zwo tea u shumisa ḽeneḽo ipfi ḽine ḽa ri “ni vhafhiri” kana ni vhadzulapo vha tshifhinganyana kha Vhakriste vho ḓodzwaho vha ḓanani ḽa u thoma ḽa miṅwaha. Ndi ngoho uri masalela a vhaḓodzwa vhane vha kha ḓi tshila ṋamusi, vha nga si tshile nga hu sa fheli fhano kha ḽifhasi. Samusi muapostola Paulo e muṅwe wa vhaḓodzwa vha “sambi ḽiṱuku” o ṱalutshedza a ri: “Á vha riṋe, hu re ha hashu ndi ngei ṱaḓulu, huné ró lindela, na hone ra ri Mutshidzi Murena Yesu Kristo u ḓo bva hone.” (Luka 12:32; Vha-Fil. 3:20) Samusi vhe vhadzulapo vha “ngei ṱaḓulu,” musi vha tshi fa, vhaḓodzwa vha ṱutshela ḽifhasi vha yo tshila vha si tsha fa ngei ṱaḓulu. (Vhalani Vha-Filipi 1:21-23.) Vha tshila lwa tshifhinganyana kha ḽino ḽifhasi ḽi langwaho nga Sathane, nga zwenezwo zwo tea uri vha vhidzwe uri ndi vhadzulapo vha tshifhinganyana.

3. Ndi mbudziso ifhio ine ra fanela u i vhudzisa nga ha vha “dziṅwe nngu?”

³ Fhedzi hu pfi mini nga vha “dziṅwe nngu”? (Yoh.  10:16) Maṅwalo a ri gudisa uri vha ḓo vha vhadzulapo vha lwa tshoṱhe kha ḽifhasi. Ḽifhasi ḽi ḓo vha haya havho. Fhedzi ndi ngani vha tshi vhidzwa vhadzulapo vha tshifhinganyana?

4. Ndi zwifhio zwine vharangaphanḓa vha shango vha kundelwa u zwi thivhela?

⁴ Samusi Yehova a tshi kha ḓi vha o tendela Sathane uri a vhuse kha ḽifhasi, vhathu vhoṱhe u katela na Vhakriste vha ḓo ḓi bvela phanḓa vha tshi pfa vhuṱungu, nga nṱhani ha uri Sathane o shandukela Yehova. Vha-Roma 8:22 i ri: ‘Ri a zwi ḓivha zwauri zwivhumbwa zwoṱhe na zwino zwi kha ḓi gomela-vho, zwi kha ḓi songwa-songwa-vho.’ Vharangaphanḓa vha ḽino shango, vhaḓivhi vha zwa saintsi, na vhathu vhane vha lingedza u thusa vhathu vha shayaho, vha a kundelwa u thivhela u shengela ha vhathu lwa tshoṱhe.

5. U bva nga 1914, vhathu vha dzimilioni vho khetha u ita mini, nahone ndi ngani?

⁵ U bva nga 1914, vhathu vha dzimilioni vho khetha nga u ḓifunela u vha vhalanda vha Khosi, Yesu Kristo yo vhewaho nga Mudzimu. A vha funi u vha tshipiḓa tsha shango ḽa Sathane. A vha ḽi tikedzi. Nṱhani hazwo, vha shumisa vhutshilo havho na thundu dzavho u itela u tikedza Muvhuso wa Mudzimu.—Vha-Roma 14:7, 8.

6. Ṱhanzi dza Yehova ndi vhadzulapo vha tshifhinganyana nga muhumbulo ufhio?

⁶ Vhukuma, Ṱhanzi dza Yehova ndi vhadzulapo vhavhuḓi mashangoni a fhiraho 200. Fhedzi hu sa londwi hune vha dzula hone, ndi vhatsinda kana vhadzulapo vha tshifhinganyana. Kha mashango ane vha dzula khao, a vha dzhii sia kha mafhungo a zwa politiki na a tshitshavha. Zwa zwino, vha ḓidzhia vhe vhadzulapo vha shango ḽiswa ḽe ḽa fulufhedziswa nga Mudzimu. Vha a zwi takalela u ḓivha uri vha vhadzulapo vha tshifhinganyana kha ḽino shango ḽivhi ḽine ḽa ḓo fheliswa hu si kale.

7. Zwi ḓo itea hani uri vhashumeli vha Mudzimu vha fulufhedzeaho vha vhe vhadzulapo vha lwa tshoṱhe, nahone ngafhi?

⁷ Hu si kale Kristo u ḓo fhelisa shango ḽivhi ḽa Sathane. Muvhuso wa Kristo wo fhelelaho  u ḓo fhelisa tshivhi na zwililo shangoni. U ḓo fhelisa vhathu vhoṱhe vhane vha shandukela vhuvhusahoṱhe ha Yehova ho teaho. Vhashumeli vha Mudzimu vha fulufhedzeaho vha ḓo vha vhadzulapo vha lwa tshoṱhe Paradisoni kha ḽifhasi. (Vhalani Ndzumbululo 21:1-5.) Zwivhumbwa zwoṱhe zwi ḓo ‘vhofhololwa tshoṱhe, zwa bva kha vhupuli ha u pfi zwi ḓo sina; zwa vhó ḓi-langa-vho, musi vhana vha Mudzimu vha tshi ya vhugalani.’—Vha-Roma 8:21.

8, 9. Ṱalutshedzani uri Petro o vha a tshi khou amba mini musi a tshi ri “sendelani kule ha dzinyemulo dza ṋama.”

⁸ Petro o amba zwine zwa lavhelelwa kha Vhakriste musi a tshi ri: “Vhafunwa, ndi a ni fhembeledza, ndi ri: Vhunga ní vhaeni, ní vhafhiri, sendelani kule ha dzinyemulo dza ṋama, dziné dza lwa na muya.” (1 Pet. 2:11) Yeneyo nyeletshedzo yo vha yo livhiswa kha Vhakriste vho ḓodzwaho, fhedzi i dovha ya shuma na kha dziṅwe nngu dza Yesu.

⁹ Zwiṅwe zwithu zwine ra zwi takalela zwi vha zwi songo khakhea arali zwi sa lwisani na zwine Mudzimu a zwi funa. Zwenezwo zwi ita uri ri takalele vhutshilo. Sa tsumbo, hu na zwithu zwo ḓoweleaho zwine ra zwi takalela, zwine zwa katela u ḓiphina nga zwiḽiwa zwi ḓifhaho na zwinwiwa, u tamba mitambo i homolosaho na u ḓiphina nga vhukonani havhuḓi na vhaṅwe. Ndi zwa nzulele u vha na lutamo lwa u ita zwa vhudzekani nahone zwo tea musi zwi tshi itwa nga vhathu vhavhili vha re mbinganoni. (1 Vha-Kor. 7:3-5) Naho zwo ralo, Petro o vha a tshi khou amba nga ha “dzinyemulo dza ṋama, dziné dza lwa na muya.” Musi i tshi amba nga ha dzenedzi nyemulo dza ṋama, ṱhalutshedzelo ya Bivhili ya (King James Version) i shumisa mubulo une wa ri “lutamo lwa ṋama” nahone kha (New International Version) hu shumiswa mubulo une wa ri “nyemulo-mmbi.” Zwi tou vha khagala uri Yehova o ri vhudza nḓila ine ra fanela u tshila ngayo, nahone a ro ngo fanela u tendela lutamo naho lu lufhio lu tshi tshinya vhushaka hashu havhuḓi na Mudzimu. Arali zwa sa ralo, vhutshilo hashu sa Vhakriste vhu ḓo vha khomboni.

10. Ndi zwifhio zwiṅwe zwikwekwe zwine Sathane a zwi shumisa, u itela u kunga Vhakriste uri vha vhe tshipiḓa tsha shango ḽawe?

¹⁰ Tshipikwa tsha Sathane ndi tsha u ita uri Vhakriste vha si tsha ḓiimisela u dzula vha tshi ḓidzhia sa vhadzulapo vha tshifhinganyana kha ḽino shango. U ṱoḓa ri tshi funesa zwithu zwi vhonalaho, ri tshi kungwa nga vhuḓifari vhu songo kunaho, ri tshi ḓidzhiela nṱha na u fhisetshela lushaka lwashu, nahone zwenezwi zwoṱhe ndi zwikwekwe zwa Sathane. Arali ra ḓiimisela u iledza dzenedzi nyemulo dza ṋama, ri vha ri tshi khou sumbedza uri a ri tshipiḓa tsha shango ḽivhi ḽa Sathane. Ri ṋea vhuṱanzi ha uri ri khou tshila khaḽo lwa tshifhinganyana. Zwine roṱhe ra khou zwi ṱoḓa na zwine ra khou lwela u zwi swikelela, ndi u vha vhadzulapo vha lwa tshoṱhe shangoni ḽiswa ḽa Mudzimu ḽo lugaho.

11, 12. Nga zwiṅwe zwifhinga, vhathu vhane vha dzula shangoni ḽi si ḽa havho vha dzhiiwa hani, nahone hu nga pfi mini nga ha Ṱhanzi dza Yehova?

¹¹ Kha ndimana ya vhu-12, Petro o bvela phanḓa a tshi ṱalutshedza zwine zwa lavhelelwa kha Vhakriste vhane vha vha vhadzulapo vha tshifhinganyana musi a tshi ri: “Kutshimbilele kwaṋu kwa vhukati ha vha shango ku vhe kwo nakaho, uri vha tshi ni ambelela na pfi: ni a tshinya, vha ri u sedza, vha vhone mishumo í yo nakaho, vha rende Mudzimu nga ḓuvha ḽa u lingululwa.” Vhathu vhane vha dzula shangoni ḽi si ḽa havho vha anzela u sasaladzwa. Vha dzhiiwa sa vhathu vhavhi nga nṱhani ha uri a vha fani na vhahura vhavho. Nḓila ine vha amba ngayo, zwiito zwavho, kuambarele, na mbonalo  yavho, i nga fhambana na ya vhadzulapo vha shango ḽeneḽo. Fhedzi musi vhuḓifari havho vhu havhuḓi, vhaṅwe vha a zwi ṱhogomela uri a si vhathu vhavhi.

¹² Nga hu fanaho, Vhakriste vha ngoho vho fhambana na vhunzhi ha vhahura vhavho kha zwithu zwine vha haseledza nga hazwo, na zwine vha ḓimvumvusa ngazwo. Nḓila ine vha ambara na u ḓilugisa ngayo na yone yo fhambana na ya vhaṅwe vhadzulapo. U fhambana havho zwo ita uri vhathu vhane vha sa ḓivhe zwine vha tenda zwone vha vha dzhie sa vhathu vhavhi. Naho zwo ralo, musi vhaṅwe vhathu vha tshi vhona nḓila ine vha tshila ngayo, vha a vha khoḓa.

13, 14. “Vhuṱali vhu vhonala nga vhana vhaho,” nga nḓila-ḓe? Ṋeani tsumbo.

¹³ Ndi ngoho uri vhuḓifari havhuḓi vhu ita uri ri si sasaladzwe zwi songo tea. Na Yesu munna we a vha o fhelela, we a fulufhedzea kha Mudzimu o pomokwa mazwifhi. Vhaṅwe vho ri ndi “muthu wa u ḽésa na mudzia-u-nwa, khonani ya vha-lutho na vha-ita-zwivhi.” Fhedzi o vha na vhuṱali musi a tshi khou shumela Mudzimu, zwe zwa ita uri vhapomoki vhawe vha si vhe na tshiitisi tshi pfalaho tsha u mu pomoka. Yesu o ri: “Vhuṱali vhu vhonala nga vhana vhaho.” (Mat. 11:19) Na ṋamusi zwo tou ralo. Sa tsumbo, vhathu vhane vha dzula tsini na Bethele i re Selters ngei Dzheremane vho vha vha tshi dzhia vhahashu vha tshinnani na vha tshisadzini vhane vha shuma henefho sa vhane vha tshila nga nḓila i songo ḓoweleaho. Fhedzi Ṋeḓorobo wa henefho o vha ambela a ri: “Dziṱhanzi dzine dza shuma henefho dzi na nḓila ine dza tshila ngayo ine ya si thithise vhutshilo ha vhaṅwe vhadzulapo.”

¹⁴ Ho dovha ha swikelelwa phetho i fanaho zwenezwino malugana na Ṱhanzi dza Yehova dza Moscow ngei Russia. Vho pomokwa mazwifhi kha zwiitea zwo vhalaho. Nga June, 2010, Khothe ya Yuropa ya Ndugelo dza Vhathu i re Strasbourg, ngei Fura, yo tshea tsheo ya uri ḓorobo ya Moscow yo khakha musi i tshi dzhenelela kha vhurabeli ha Ṱhanzi dza Yehova, nahone yo vha i si na ndugelo ya u vha thivhela uri vha fare miṱangano yavho. Khothe ya Yuropa yo amba uri Khothe ya Russia a yo ngo ṋea vhuṱanzi vhu pfalaho ha uri Dziṱhanzi dzi na mulandu wa u pwasha miṱa, u ṱuṱuwedza vhathu uri vha ḓivhulahe kana uri vha hane ngalafho. Yo amba uri vho shumisa milayo ya khothe ya Moscow yo khwaṱhaho nga nḓila i songo teaho, zwa ita uri Ṱhanzi dzi si haṱulwe zwavhuḓi.

15. Ndi maitele afhio a Bivhili ane Vhakriste vha ngoho mashangoni oṱhe vha a tevhedza?

¹⁵ Ṱhanzi dza Yehova ngei Moscow—na mashangoni oṱhe, vha tevhedza ndaela dze Petro a ri Vhakriste vha fanela u dzi tevhedza. O ṅwala uri: ‘Vhoṱhe vho vhumbiwaho nga vhathu, ni vha thetshelese, ni tshi itela Murena: Kana ndi khosi, ngauri ndi ene muhulwane, Kana ndi vhavhusi.’ (1 Pet. 2:13, 14) Naho vhe si tshipiḓa tsha shango ḽivhi ḽa Sathane, Vhakriste vha ngoho vha thetshelesa nyeletshedzo ya Paulo ya u ḓiṱukufhadzela mivhuso ‘yo vhewaho’ nga u ḓifunela, tenda  i sa lwisani na milayo ya Mudzimu.—Vhalani Vha-Roma 13:1, 5-7.

16, 17. (a) Ndi mini zwine zwa sumbedza uri a ri lwisani na mivhuso? (b) Vharangaphanḓa vha zwa politiki vho kona u vhona mini?

¹⁶ Ṱhanzi dza Yehova vha tshila sa vhadzulapo vha tshifhinganyana kha ḽino shango ḽivhi, nahone a vha iti nga u ralo nga nṱhani ha uri vha pikisana na mivhuso, kana vha sasaladza vhaṅwe vhathu. Nahone a vha hanedzani kana u thithisa vhathu vhane vha ḓiitela phetho ya u dzhenelela kha zwa politiki. Naho zwiṅwe zwigwada zwa vhurereli zwi tshi dzhenelela kha zwa politiki, Ṱhanzi dza Yehova a vha dzhii sia kha zwa politiki. A vha lingedzi u shandula nḓila ine vhavhusi vha vhusa ngayo vhathu. Nahone zwi nga si vhuye zwa itea uri vha lwisane na mivhuso kana u ṱuṱuwedza vhaṅwe vhathu uri vha vutshele mivhuso!

¹⁷ Vhakriste vha ṱhonifha na u hulisa mivhuso i vha vhusaho, u tendelana na maipfi a Petro ane a ri: “Hulisani khosi.” (1 Pet. 2:17) Nga zwiṅwe zwifhinga, vhavhusi vho kona u zwi vhona uri a vha na tshiitisi tshi pfalaho tsha u vhilaedziswa nga Ṱhanzi dza Yehova. Sa tsumbo, Steffen Reiche, rapolitiki wa Mudzheremane we a vha e muraḓo wa muvhuso ḓoroboni ya Brandenburg, we nga murahu a vha tshipiḓa tsha phalamennde ya Dzheremane o amba uri, Ṱhanzi dza Yehova vho ḓifara zwavhuḓi tshifhingani tsha musi vho valelwa dzhele kana gammbani dza tshengedzo. A vho ngo ṱutshela lutendo lwavho naho vha tshi khou tovholwa, nahone vho dovha vha sumbedza u vha na vhuthu kha vhathu vhe vha vha vho valelwa navho dzhele. O dovha a ri dzenedzo pfaneleo dzo vha dzi dza ndeme zwihulu-hulu kha shango ḽa Dzheremane, samusi vhathu nga tshenetsho tshifhinga vho vha vha sa sumbedzi vhuthu kha vhathu vha bvaho kha maṅwe mashango, kana kha vhathu vha vhurereli vhu sa fani na havho, na vha re na mavhonele a sa fani na avho a zwa politiki.

18. (a) Ndi ngani zwi tshi leluwa uri ri sumbedzane lufuno lwa vhurathu na vhukomana? (b) Vhathu vhane vha si vhe Dziṱhanzi vho ṱhogomela mini?

¹⁸ Muapostola Petro o ri: “Funani vha haṋu, ofhani Mudzimu.” (1 Pet. 2:17) Ṱhanzi dza Yehova a vha ṱoḓi u sinyusa Mudzimu, ngauri vha a mu ṱhonifha, vha ṱoḓa u ita lufuno lwawe. Vha takalela u shumela Yehova vhe tshipiḓa tsha vhahashu vha tshinnani na vha tshisadzini vha shangoni ḽoṱhe vhane vha ṱoḓa u ita lufuno lwawe. Nga zwenezwo, ndi zwa nzulele khavho u ‘funa vha havho, na u ofha Mudzimu.’ Lufuno lwo raloho lwa vhurathu na vhukomana, a lwo ngo ḓowelea kha ḽino shango ḽi re na ṱseḓa, nahone ndi ngazwo lu tshi mangadza vhathu vhane vha si vhe Dziṱhanzi. Sa tsumbo, mutandudzi ane a shuma kha bindu ḽa u endedza vhathu ḽa Amerika, o mangala vhukuma musi a tshi vhona nḓila ye vhahashu vha sumbedza ngayo lufuno Dziṱhanzi dzi bvaho kha maṅwe mashango, dze dza ḓa buthanoni ḽa tshaka dzoṱhe ngei Dzheremane nga 2009. O amba uri o vha a sa athu u vhuya a vhona zwithu zwo no nga zwenezwo miṅwahani yoṱhe ye a i fhedza a tshi khou shuma sa mutandudzi wa vhathu. Nga murahu ha zwenezwo, muṅwe wahashu o amba zwi tevhelaho: “Onoyu mutandudzi o amba mafhungo enea e na mafulufulu nahone o mangala vhukuma.” Kha buthano ḽe na vhuya na ya khaḽo, naa no vhuya na pfa vhathu vha tshi amba nga ha Ṱhanzi dza Yehova nga nḓila i fanaho na ye ya ambiwa nga onoyo mutandudzi?

19. Ri fanela u ḓiimisela u ita mini, nahone ndi ngani?

¹⁹ Ṱhanzi dza Yehova vha zwi sumbedza nga dzenedzo nḓila na nga dziṅwe nnzhi, uri zwa vhukuma vha vhadzulapo vha tshifhinganyana kha ḽino shango ḽa Sathane. Vha takalela u ita nga u ralo, nahone vho ḓiimisela u dzula vhe vhadzulapo vha tshifhinganyana. Vha na fulufhelo ḽo khwaṱhaho na ḽo dzikaho ḽa uri, hu si kale vha ḓo vha vhadzulapo vha lwa tshoṱhe shangoni ḽiswa ḽa Mudzimu ḽo lugaho. Naa no lavhelela ḽeneḽo shango ḽiswa?