Ni A Zwi Humbula?
Naa no takalela u vhala thero dza zwenezwino dza Tshiingamo? Vhonani arali ni tshi nga fhindula mbudziso dzi tevhelaho:
Ri nga iledza hani mulilo wa u amba ri songo thoma ra humbula?
Ri fanela u ṱolisisa mbilu dzashu. Nṱhani ha u sasaladza wahashu, zwi nga vha zwavhuḓi u ṱolisisisa uri ndi ngani ri na mavhonele o raloho. Naa ri khou mu sasaladza nga nṱhani ha uri ri ṱoḓa u ḓipfa ri khwine khae? Zwiṅwe hafhu, u sasaladza vhaṅwe zwi nga ṋaṋisa vhuimo vhu si havhuḓi.—8/15, siaṱari 21.
Mudzimu u hangwela hani na u hangwa zwivhi zwa vhathu vho rembuluwaho?
Yehova u amba zwi tevhelaho nga ha vhane a vha takalela. U ri: “Zwivhi zwavho a thi tsha do zwi elelwa.” (Yer. 31:34) Nga mutheo wa tshiṱhavhelo tshi rengululaho, u a kona u hangwela zwivhi. Musi a tshi hangwela, u a hangwa ngauri ha tsha dovha a humbula zwenezwo zwivhi u itela u ri ṱarafela zwone.—10/1, siaṱari 32.
Samusi ḓuvha ḽa Yehova ḽi tsini, ndi zwifhio zwiitea zwine zwa ḓo vha hone?
Hu ḓo itwa nḓivhadzo ya uri “ḽo lala, hó navhiwa.” Dzitshaka dzi ḓo vutshela Babele Ḽihulu dza ḽi fhelisa. Hu ḓo vutshelwa vhathu vha Mudzimu. Hu ḓo vha na nndwa ya Haramagedo, ine nga murahu hayo Sathane na madimoni awe vha ḓo valelwa mugodini.—9/15, siaṱari 4.
Ri vhuyelwa hani nga u sa ḓivha uri vhufhelo vhu ḓo ḓa lini?
U sa ḓivha ḓuvha na tshifhinga tshine vhufhelo ha ḓo ḓa ngatsho zwi dzumbulula zwi re mbiluni dzashu zwa vhukuma. Zwi ri ṋea tshibuli tsha u takadza mbilu ya Mudzimu. Zwi ri ṱuṱuwedza u tovhola buḓo ḽa vhutshilo vhu si ha tseḓa, na u ri thusa uri ri ḓitike tshoṱhe nga Mudzimu na Ipfi ḽawe. Zwiṅwe hafhu, zwi ri thusa uri ri khwaṱhe lutendoni musi ri tshi sedzana na milingo musalauno.—9/15, masiaṱari 24-25.
Mudzimu u ḓo fhelisa hani vhuṱungu ho vhangwaho nga tshengelo ya vhathu?
Hu si kale Mudzimu u ḓo ḓisa shango ḽiswa ḽo lugaho ḽine khaḽo ha ḓo tshila fhedzi vhathu vhane vha funa Mudzimu na vhahura vhavho. (2 Pet. 3:13). Samusi e Khosi ya Muvhuso wa Mudzimu wa ṱaḓulu, Yesu u ḓo fhelisa vhuvhi hoṱhe. (Yes. 33:24; Ndzumb. 21:4)—10/1, siaṱari 7.
Ndi vhonnyi vhane vha imelwa nga “ṋaledzi ṱhanu-na-mbili” dzi re kha tshanḓa tsha Yesu tshihulu samusi zwo bulwa kha Ndzumbululo 1: 16, 20?
Dzi imela vhalavhelesi vho ḓodzwaho nga muya, u katela na vhaṅwe vhalavhelesi vhoṱhe tshivhidzoni.—10/15, siaṱari 14.
Ndi afhio maṅwe maitele a Bivhili ane a nga ri thusa u pfesesa mahumbulele a Mudzimu nga ha u daha fola?
Mudzimu u ṱoḓa ri tshi ṱhonifha vhutshilo. (Doit. 5:17) U lavhelela uri ri mu fune, ri fune na vhahura vhashu. (Marko 12:28-31) U dovha a lavhelela uri ri iledze nḓowelo dzi songo kunaho. (2 Vha-Kor. 7:1)—10/1, siaṱari 15.
Yesu o sumbedza hani uri u a ḓiṱukufhadza samusi zwo bulwa kha Yesaya 50:4, 5?
Ndimana dzenedzo dzi amba uri o vha e na “lulimi lwa vho funzwaho” na uri ndi muthu we a “si humele murahu.” Yesu o sumbedza uri u a ḓiṱukufhadza, a thetshelesa nga vhuronwane musi Khotsi awe a tshi mu gudisa. Yesu o vha o ḓiimisela u guda kha Yehova, nahone o lavhelesa nga vhuronwane nḓila ye Mudzimu a ḓiṱukufhadza ngayo na u sumbedza tshilidzi vhathu vha re na tshivhi.—11/15, siaṱari 11.
Ri vhuyelwa hani nga u sumbedza vhaṅwe vhuthu?
Musi ri tshi sumbedza vhaṅwe vhuthu, ri ḓo ḓivha Mudzimu khwine, nahone zwenezwo zwi ita uri ri takale. (1 Yoh. 4:7; Mat. 5:7, 8) Zwiṅwe hafhu, ndi zwa ndeme kha Yehova uri ri sumbedze vhaṅwe vhuthu. (Mir. 19:17)—10/1, siaṱari 20.
