MUAPOSTOLA Paulo o ri: “Ngauri ipfi ḽa Mudzimu ndi tshithu tshi tshilaho, tshi shumaho.” (Vha-Heb. 4:12) Musi a tshi ṅwala eneo maipfi, Paulo o vha a tshi khou bvisela khagala mbuno ya uri Ipfi ḽa Mudzimu ḽi na maanḓa a u kwama mbilu na u shandula vhutshilo ha vhathu.

Naho zwo ralo, tshifhingani tsha vhugunei he ha engedzea musi vhaapostola vho no fa, vhathu vho thoma u vha na mavhonele o khakheaho nga ha maanḓa ane mulaedza wa Bivhili wa vha nao. (2 Pet. 2:1-3) Nga u ya ha tshifhinga, vharangaphanḓa vha dzikereke vho thoma u funza uri Bivhili i na maanḓa a lwa vhuṱolo kana a manditi. Muphurofesa Harry Y. Gamble o ṅwala uri ḓanani ḽa vhuraru ḽa miṅwaha, Mupapa wa Kereke ane a pfi Origen o funza vhathu uri u pfa maipfi a re Bivhilini zwi nga vhuyedza muthu. O amba uri arali maipfi ane a shumiswa kha manditi e na maanḓa, zwi tou pfala uri maipfi o hevhedzwaho nga Mudzimu one a na maanḓa mahulwane. John Chrysostom wa ḓanani ḽa vhuṋa ḽa miṅwaha o ṅwala uri “Diabolo a nga si sendele tsini na nnḓu i re na Bivhili.” O dovha a amba uri vhaṅwe vha kungela ndimana dza Bivhili mikuloni sa zwitungulo zwine zwa ḓo vha ḓitsireledza khomboni. Muphurofesa Gamble o ri, Augustine Mugudi wa zwa vhurereli wa Mukatolika o amba uri zwo vha zwo tea uri muthu a siamele Evangeli ya Yohane arali a tshi khou remiwa nga ṱhoho, u itela uri a fhole. Nga nṱhani ha yeneyi pfunzo, vhathu vho thoma u shumisa Bivhili nga nḓila i songo teaho, vha tshi tenda uri i na maanḓa a lwa vhuṱolo. Inwi ni dzhia hani Bivhili? Naa ni i shumisela u itela u vha na mashudu, kana u itela uri i ni tsireledze kha zwithu zwivhi?

Hu na iṅwe nḓila i songo teaho ine vhathu vhanzhi vha shumisa Bivhili ngayo. Vha tenda uri arali vha vula huṅwe na huṅwe Bivhilini, ndimana ine vha vula khayo, i ḓo vha vhudza zwine vha fanela u zwi ita. Sa tsumbo, u ya nga zwe zwa ambiwa nga Muphurofesa Gamble, Augustine o vhuya a pfa ipfi ḽa ṅwana kha muṅwe muḓi ḽi tshi ri: “Dzhia u vhale, dzhia u vhale.” Augustine o humbula uri zwenezwo zwo vha zwi tshi amba uri Mudzimu u khou mu vhudza uri a vule Bivhili a vhale ndimana ine a ḓo vula khayo.

Naa no no vhuya na pfa nga ha vhathu vhane musi vho sedzana na vhuleme vha rabela Mudzimu, nahone vha vhala ndimana ine vha vula khayo Bivhilini, vha tshi fulufhela uri ndimana ye vha i vula ndi yone ine ya ḓo vha thusa u sedzana na vhuleme havho? Naho vha tshi nga vha vhe na zwiṱuṱuwedzi zwavhuḓi, yeneyo a si nḓila ine Vhakriste vha fanela u ṱoḓa ngayo vhulivhisi Bivhilini.

Yesu o khwaṱhisedza vhafunziwa vhawe uri u ḓo vha rumela muthusi ane a vha muya mukhethwa. O bvela phanḓa a ri: “Onoyo u ḓo ni funza zwoṱhe, u ḓo ni eletshedza zwoṱhe zwe nda ni vhudza.” (Yoh. 14:26) Nga zwenezwo, Bivhili i ri thusa musi ri tshi shumisa zwe ra zwi guda khayo, hu si nga u sokou vula ra vhala huṅwe na huṅwe.

Vhathu vhanzhi vha shumisa Bivhili nga nḓila i songo teaho ya lwa vhuṱolo, vha tshi fulufhela uri i ḓo vha tsireledza khomboni, i ḓo tandulula thaidzo dzavho, kana u vha thusa u ḓivha zwine zwa ḓo itea kha vhumatshelo havho. Fhedzi Bivhili i amba uri zwo khakhea u ita zwa vhungome kana zwa manditi. (Lev. 19:26; Doit. 18:9-12; Mish. 19:19) “Ipfi ḽa Mudzimu ndi tshithu tshi tshilaho, tshi shumaho,” fhedzi ri fanela u ḽi shumisa nga nḓila yo teaho. Bivhili i nga si ri thuse nga lwa vhuṱolo. U guda Bivhili ndi zwone zwine zwa ḓo khwinisa vhutshilo hashu. Nḓivho ya vhukuma ya mafhungo-ngoho yo thusa vhathu vhanzhi u khethekanya zwo lugaho na zwi songo lugaho, u itela uri vha litshe mikhuvha i si yavhuḓi, uri vha vhe na vhutshilo ha muṱa vhu takadzaho, na uri vha vhe na vhushaka ha tsini na Muṅwali wa Bivhili.