“Ni Ṱhogomele Zwithu Zwa Ndeme Vhukuma”
“Ni ṱhogomele zwithu zwa ndeme vhukuma.”—VHA-FIL. 1:10.
1, 2. Ndi vhufhio vhuporofita ha malugana na maḓuvha a vhufhelo he ha nyanyula vhafunziwa vha Yesu, nahone ndi ngani?
PETRO, Yakobo, Yohane na Andrea vho vha vho no sala vhe vhoṱhe na Muṋe wavho. Vho vha vha tshi khou vhilaedziswa nga zwe zwa ambiwa nga Yesu nga phanḓanyana malugana na u lozwiwa ha thembele. (Marko 13:1-4) Nga zwenezwo, vho mu vhudzisa vha ri: “Ri vhudze, izwi zwithu zwoṱhe zwi ḓo itea lini, nahone tshiga tsha u vha hone hau na tsha vhufhelo ha ano maitele a zwithu tshi ḓo vha tshifhio?” (Mat. 24:1-3) Yesu o thoma u vha vhudza nga ha zwiitea, kana zwiimo zwine zwa ḓo ḓisa tshanduko khulwane u katela na u sumbedza maḓuvha a vhufhelo a maitele mavhi a Sathane. Hu na tshiṅwe tshiitea tshe tsha nyanyula vhafunziwa vha Yesu. Musi o no vha vhudza nga ha zwithu zwi tsikeledzaho zwi ngaho dzinndwa, u ṱahela ha zwiḽiwa, na u engedzea ha vhuvhi, Yesu o dovha a amba hu tshee nga phanḓa tshiṅwe tshiitea tshavhuḓi tshine tsha ḓo vha tshiga tsha maḓuvha a vhufhelo. O ri: “Huno mafhungo maḓifha aya a Muvhuso a ḓo ḓivhadzwa ḽifhasini ḽoṱhe uri zwi vhe vhuṱanzi kha tshaka dzoṱhe, nga murahu ndi hone vhufhelo vhu tshi ḓo ḓa.”—Mat. 24:7-14.
2 Vhafunziwa vha Yesu vho ḓiphina nga u huwelela mafhungo maḓifha a Muvhuso na Kristo. (Luka 8:1; 9:1, 2) Khamusi vho zwi humbula uri o ri: “Khaṋo ndi khulu, fhedzi vhashumi a si vhanzhi. Ngauralo, humbelani Muṋe wa khaṋo uri a rumele vhashumi khaṋoni yawe.” (Luka 10:2) Fhedzi vho vha vha tshi ḓo huwelela hani “ḽifhasini ḽoṱhe uri zwi vhe vhuṱanzi kha tshaka dzoṱhe”? Vhashumi vho vha vha tshi ḓo bva ngafhi? Zwo vha zwi tshi ḓo vha zwavhuḓi uri vha kone u vhona zwine zwa ḓo itea tshifhingani tshi ḓaho musi vha tshee vho dzula na Yesu nga ḽeneḽo ḓuvha! Vho vha vha tshi ḓo mangadzwa nga u vhona nḓila ye eneo maipfi a si gathi ane ra a vhala kha Mateo 24:14 a ḓadzea ngayo.
3. Luka 21:34 i khou ḓadzea hani ṋamusi, nahone ri fanela u ḓiṱolisisa nga nḓila-ḓe?
3 Ri khou tshila tshifhingani tsha u ḓadzea ha honoho vhuporofita ha Yesu. Vhathu vha dzimilioni vha a ṱanganela kha u huwelela mafhungo maḓifha a Muvhuso ḽifhasini. (Yes. 60:22) Naho zwo ralo, Yesu o amba uri vhaṅwe vha ḓo wana zwi tshi konḓa u dzula vho livhisa ṱhogomelo kha ano maḓuvha a vhufhelo. Vha ḓo thithisea vha ḓipfa vha tshi “lemelwa.” (Vhalani Luka 21:34.) Na riṋe ri khou vhona u ḓadzea ha eneo maipfi. Vhaṅwe vhane vha vha vhukati ha vhathu vha Mudzimu vha khou thithisea. Zwenezwi zwi vhonala nga phetho dzavho malugana na mushumo wa u ḓitshidza, pfunzo ya nṱha, u kuvhanganya thundu i vhonalaho, u katela na tshifhinga tshine vha tshi fhedza kha mitambo na u ḓitakadza. Vhaṅwe vha khou kulea nungo nga nṱhani ha mitsiko na mbilaelo dza vhutshilo ha ḓuvha ḽiṅwe na ḽiṅwe. Ḓivhudziseni uri: ‘Nṋe ndi khou zwi itisa hani? Naa phetho dzanga dzi a sumbedza uri ndo livhisa ṱhogomelo kha zwifhio vhutshiloni?’
4. (a) Ndi mini zwe Paulo a rabelela Vhakriste vha ngei Filipi, nahone ndi ngani? (b)Ndi mini zwine ra ḓo zwi haseledza kha ino thero na i tevhelaho, ri na tshipikwa tshifhio?
4 Vhakriste vha ḓanani ḽa u thoma ḽa miṅwaha vho vha vha tshi fanela u ita vhuḓidini ha u dzula vha tshi ḓivha uri ndi zwifhio zwithu zwa muya zwine zwa fanela u ḓa u thoma vhutshiloni havho. Muapostola Paulo o vhona ṱhoḓea ya u rabelela vha re ngei Filipi uri vha “ṱhogomele zwithu zwa ndeme vhukuma.” (Vhalani Vha-Filipi 1:9-11.) U fana na muapostola Paulo, vhathu vhanzhi nga tshenetsho tshifhinga vho vha “vha khou sumbedza u vha na tshivhindi tsha u amba ipfi ḽa Mudzimu vha sa ofhi.” (Vha-Fil. 1:12-14) Nga hu fanaho, na ṋamusi vhanzhi kha riṋe vha huwelela Ipfi ḽa Mudzimu nga tshivhindi. Naho zwo ralo, naa u ṱhogomela zwine zwa khou khunyeledzwa nga ndangulo ya Yehova zwi ḓo ri thusa uri ri livhise ṱhogomelo nga ho engedzeaho kha mushumo washu wa u huwelela u re wa ndeme vhukuma? Vhukuma, i nga ri thusa! Kha thero yeneyi, ri ḓo haseledza nga ha ndugiselelo ya Yehova ya u ita uri zwi konadzee u ḓadzisa Mateo 24:14. Ndangulo ya Yehova yo livhisa ṱhogomelo kha mini, nahone u ḓivha zwenezwi zwi ṱuṱuwedza riṋe na miṱa yashu uri ri ite mini? Kha thero i tevhelaho, ri ḓo haseledza zwine zwa ḓo ri thusa uri ni dzule ri tshi khou tshimbidzana na ndangulo ya Yehova.
TSHIPIḒA TSHA ṰAḒULU TSHA NDANGULO YA YEHOVA TSHI KHOU BVELA PHANḒA
5, 6. (a) Ndi ngani Yehova o ri ṋea mabono a tshipiḓa tsha ṱaḓulu tsha ndangulo yawe? (b) Ndi bono ḽifhio ḽe ḽa vhonwa nga Hesekiele?
5 Hu na zwithu zwinzhi zwe Yehova a khetha u sa zwi dzhenisa kha Ipfi ḽawe. Sa tsumbo, ho ngo ri ṋea zwidodombedzwa zwa nḓila ine vhuluvhi ha shuma ngayo kana nḓila ine fhethu hoṱhe ha shuma ngayo, naho e mafhungo e a vha a tshi nga takadza. Nṱhani hazwo, Yehova o ri ṋea mafhungo ane ra a ṱoḓa u itela u pfesesa ndivho dzawe na u tshila u tendelana nadzo. (2 Tim. 3:16, 17) Nga zwenezwo, zwi takadza lungafhani uri Bivhili i ri ṋea luvhonela nga ha tshipiḓa tshi sa vhonali tsha ndangulo ya Yehova! Ri a takala vhukuma musi ri tshi vhala nga ha ndangulo ya Yehova ya ṱaḓulu kha mafhungo e a ṅwalwa nga Yesaya, nga Hesekiele, nga Daniele, na e a ṅwalwa nga Yohane kha Nzumbululo. (Yes. 6:1-4; Hesek. 1:4-14, 22-24; Dan. 7:9-14; Nzumb. 4:1-11) Zwi tou nga Yehova o vula xaradeni u itela uri ri vhone zwine zwa khou itea ngei ṱaḓulu. Ndi ngani o ri ṋea enea mafhungo?
6 Yehova o vha a tshi ṱoḓa uri ri songo vhuya ra hangwa uri ri tshipiḓa tsha ndangulo ya fhethu hoṱhe. Hu na zwithu zwinzhi zwine zwa khou itea zwine ra si zwi vhone zwine zwa khou tikedza ndivho dza Yehova. Sa tsumbo, Hesekiele o vhona tshipiḓa tshi sa vhonali tsha ndangulo ya Yehova tshine tsha fanyiselwa nga goloi ya Yehova ya ṱaḓulu. Yeneyi goloi i nga tshimbila nga luvhilo luhulu, ya dovha ya tshentsha nḓila nga u bonya ha iṱo. (Hesek. 1:15-21) Musi malinga ayo a tshi khou mona, yeneyo goloi i kona u swikelela fhethu hunzhi. Kha bono ḽa Hesekiele, ri ṋewa luvhonela lwa Mureili wa yeneyo goloi. O ri: “Nda vhona zwine zwa nga u penya sa’ tsimbitswuku, na vhutswuku ha mulilo u re nḓuni . . . Ndi zwone zwa vhugala ha Yehova zwe zwa vhonala.” (Hesek. 1:24-27) Zwi fanela u vha zwo mangadza Hesekiele lungafhani u vhona ḽeneḽo bono! O vhona Yehova a tshi khou langa zwoṱhe, a tshi khou shumisa muya wawe mukhethwa u itela u livhisa nḓila ine zwithu zwa fanela u tshimbila ngayo. Ndi tshifanyiso tshi mangadzaho vhukuma tsha tshipiḓa tsha ṱaḓulu tsha ndangulo ya Yehova ine ya khou bvela phanḓa!
7. Bono ḽe ḽa ṋewa Daniele ḽi ri ṋea fulufhelo nga nḓila-ḓe?
7 Daniele na ene o vhona zwithu zwinzhi zwine zwa nga ri ṋea fulufhelo. O tendelwa a tshi vhona Yehova sa “Wa-Kale Wa-Maḓuvha” o dzulaho kha khuluṋoni i re na khavhu dza mulilo. Khuluṋoni yeneyo yo vha i na malinga. (Dan. 7:9) Yehova o vha a tshi ṱoḓa Daniele a tshi vhona ndangulo yawe i tshi khou tshimbila, i tshi ḓadzisa ndivho yawe. Daniele o dovha a vhona “muṅwe we a vha a tshi nga Murwa-muthu,” Yesu, a tshi ṋea vhuḓifhinduleli ha u lavhelesa tshipiḓa tsha kha ḽifhasi tsha ndangulo ya Yehova. Vhuhosi ha Kristo ho fhelelaho vhu nga si vhe hone lwa miṅwaha i si gathi fhedzi. Nṱhani hazwo, “vhuhosi hawe ndi ha lini na lini; muvhuso wawe a u nga tshinyali.” (Dan. 7:13, 14) Ri a ṱuṱuwedzea u fulufhela tshoṱhe Yehova na u ṱhogomela zwine a khou zwi khunyeledza. O ṋea “maanḓa, na vhurena, na vhuhosi” Murwa wawe Yesu a fulufhedzeaho. Yehova u fulufhela Murwa wawe. Nga zwenezwo, na riṋe ri nga fulufhela nga ho khwaṱhaho vhurangaphanḓa ha Yesu.
8. Hesekiele na Yesaya vho kwamiwa hani nga mabono a bvaho ha Yehova, nahone riṋe ri fanela u kwamea hani?
8 Ri fanela u dzhia hani nḓila ine tshipiḓa tshi sa vhonali tsha ndangulo ya Yehova tsha ri kwama ngayo? U fana na Hesekiele, ri a mangadzwa vhukuma nga zwine Yehova a khou zwi khunyeledza ṋamusi nahone zwi ita uri ri ḓiṱukufhadze. (Hesek. 1:28) U elekanya nga ha ndangulo ya Yehova zwi nga ri ṱuṱuwedzela uri ri dzhie vhukando u fana na zwe zwa itwa nga Yesaya. Musi a tshi wana tshibuli tsha u vhudza vhaṅwe nga ha zwine Yehova a khou zwi ita, o shumisa tshenetsho tshibuli a sa timatimi. (Vhalani Yesaya 6:5, 8.) Yesaya o vha e na vhungoho ha uri arali Yehova a tshi khou mu tikedza, a nga kona u sedzana na khaedu naho i fhio nga hu bvelelaho. Nga hu fanaho, lwonolwu luvhonela lwe ra ṋewa lwone malugana na ndangulo ya Yehova i sa vhonali lu fanela u ri ṱuṱuwedza na u ita uri ri dzhie vhukando. Zwi ṱuṱuwedza lungafhani u humbula nga ha ndangulo ine ya dzula i tshi khou bvela phanḓa yo livhisa ṱhogomelo kha u ḓadzea ha ndivho dza Yehova!
TSHIPIḒA TSHA KHA ḼIFHASI TSHA NDANGULO YA YEHOVA
9, 10. Ndi ngani hu na ṱhoḓea ya uri hu vhe na tshipiḓa tshi sa vhonali tsha ndangulo ya Yehova?
9 A tshi shumisa Murwa wawe, Yehova o thoma ndangulo kha ḽifhasi ine ya ḓo shumisana na tshipiḓa tshi sa vhonala tsha ndangulo yawe. Ndi ngani hu tshi ṱoḓea yeneyo ndangulo i vhonalaho u itela u khunyeledza mushumo we wa ṱaluswa kha Mateo 24:14? Ri ḓo haseledza zwiitisi zwiraru.
10 Tsha u thoma, Yesu o amba uri wonoyu mushumo wa u huwelela u ḓo ita uri vhafunziwa vhawe vha swike na “tshipiḓani tsha kule vhukuma tsha ḽifhasi.” (Mish. 1:8) Tsha vhuvhili, ho vha hu tshi fanela u itwa ndugiselelo dza u ṋea zwiḽiwa zwa muya na u ṱhogomela vhathu vhane vha ḓo ita wonoyo mushumo. (Yoh. 21:15-17) Tsha vhuraru, ho vha hu tshi fanela u itwa ndugiselelo dza uri vhane vha huwelela mafhungo maḓifha vha kuvhangane vhoṱhe u itela u gwadamela Yehova na u gudiswa nḓila ya u ita mushumo wonoyo. (Vha-Heb. 10:24, 25) Zwenezwo zwipikwa zwo vha zwi tshi fanela u dzudzanywa zwavhuḓi u itela uri zwi kone u khunyeledzwa. Ngauralo, u itela uri vhatevheli vha Kristo vha bvelele, mushumo wo vha u tshi fanela u dzudzanywa zwavhuḓi.
11. Ri sumbedza hani uri ri tikedza nzudzanyo dzo itwaho nga ndangulo ya Yehova?
11 Ri sumbedza hani uri ri tikedza nzudzanyo dzo itwaho nga ndangulo ya Yehova? Iṅwe nḓila ya ndeme ndi u dzula ri tshi sumbedza uri ri fulufhela vho vhewaho nga Yehova na Yesu uri vha range phanḓa mushumo wa u huwelela. Hu na mishumo minzhi shangoni ine ya lwisana na zwine vhane vha khou ranga phanḓa vha tea u livhisa ṱhogomela khazwo. Naho zwo ralo, ndi mini zwine tshipiḓa tshi sa vhonali tsha ndangulo ya Yehova tsha dzula tsho livhisa ṱhogomelo khazwo?
U LIVHISA ṰHOGOMELO KHA “ZWITHU ZWA NDEME VHUKUMA”
12, 13. Vhahulwane vha Vhakriste vha ita hani mushumo wavho, nahone ndi ngani zwenezwo zwi tshi ni ṱuṱuwedza?
12 Shangoni ḽoṱhe, vhahulwane vha Vhakriste vha re na tshenzhelo vho vhewa uri vha lavhelese na u ṱuṱuwedza vhaṅwe uri vha ite mushumo wa u huwelela nga ha Muvhuso nga u fhisea, mashangoni ane vha shuma khao. Sa zwenezwi, u itela u tshimbidzana na ndangulo ya Yehova ine ya nga goloi na u pfesesa zwine zwa ṱoḓea mashangoni ane vha dzula khao, vhenevha vhanna vha fulufhedzeaho na vhane vha ḓiṱukufhadza vha edzisa tsumbo ya Yehova na Yesu. Nga zwenezwo, musi vhenevha vhahashu vha tshi ita phetho, vha ṱoḓa vhulivhisi kha Ipfi ḽa Mudzimu, vha ḽi ita ‘ḓenzhe ḽa milenzhe yavho, tshedza tsha nḓila yavho.’ vha rabela zwi tshi bva mbiluni u itela u livhiswa nga Yehova.—Ps. 119:105; Mat. 7:7, 8.
13 Vhahulwane vha Vhakriste ṋamusi vha edzisa vhe vha ranga phanḓa ḓanani ḽa u thoma ḽa miṅwaha, kha u ranga phanḓa mushumo wa u huwelela, nahone vho ḓikumedza kha u “funza ipfi ḽa Mudzimu.” (Mish. 6:4) Vha a takala vhukuma musi vha tshi vhona mushumo wa u huwelela mafhungo maḓifha u tshi khou bvela phanḓa hune vha dzula hone, na shangoni ḽoṱhe. (Mish. 21:19, 20) A vha vhei milayo minzhi na maitele ane a fanela u tevhedzwa. Nṱhani hazwo, vha tevhedza zwi re Maṅwaloni, na vhulivhisi ha muya wa Mudzimu, musi vha tshi ita nzudzanyo dzi ṱoḓeaho u itela u thusa uri mushumo wa u huwelela u bvele phanḓa. (Vhalani Mishumo 15:28.) Musi vha tshi ita nga u ralo, vhenevha vhahashu vha re na vhuḓifhinduleli vha vhetshela vhoṱhe zwivhidzoni zwine vha ṱanganela khazwo tsumbo yavhuḓi.—Vha-Ef. 4:11, 12.
14, 15. (a) Ndi dzifhio ndugiselelo dzi re hone u itela u tikedza mushumo wa u huwelela shangoni ḽoṱhe? (b) Ni ḓipfa hani nga u ṱanganela kha u tikedza mushumo wa u huwelela nga ha Muvhuso?
14 Zwine vhathu vhanzhi vha sa zwi vhone ndi mishumo minzhi ine vha i ita musi vha tshi lugiselela zwiḽiwa zwa muya u bva kha khandiso dzashu, vha tshi lugiselela miṱangano na mabuthano. Vhashumi vha u ḓifunela vhane vha ita vhuḓidini vhuhulwane ha u ṱalutshedzela zwenezwi zwiḽiwa zwa lwa muya nga nyambo dzi ṱoḓaho u vha 600, u itela uri vhathu vhanzhi nga hune zwa konadzea ngaho vha gude “mishumo ya maanḓa ya Mudzimu” nga luambo lwavho. (Mish. 2:7-11) Vhahashu vha tshinnani na vha tshisadzini vhaswa vha ita mushumo wa u bveledza khandiso kha mitshini ya u gandisa i re na luvhilo luhulwane, na ine ya dzi ṱanganya. Dzenedzi khandiso dzi rumelwa zwivhidzoni, na zwi re kule-kule kha ḽifhasi.
15 Hu na nzudzanyo dzo vhalaho dze dza itwa u itela uri ri kone u livhisa ṱhogomelo kha u huwelela mafhungo maḓifha tshivhidzoni tshine ra ṱanganela khatsho. Sa tsumbo, musi ri tshi tou vhala mishumo i si gathi ine ya itwa, hu na vhashumi vha u ḓifunela vhanzhi vhane vha thusa kha u fhaṱa Holo dza Muvhuso na dza Maguvhangano, vhane vha thusa musi hu na khombo dza mupo, kana vho sedzanaho na vhuimo ha shishi ha zwa ngalafho, vhane vha dzudzanya maguvhangano na mabuthano, vhane vha gudisa zwikoloni zwa lwa ṱaḓulu. Ndi ifhio ndivho ya wonoyu mushumo woṱhe? Ndi u huwelela mafhungo maḓifha, u ṱhogomela mutakalo wa vhane vha khou ita wonoyu mushumo, na u bvisela phanḓa vhurabeli ha ngoho. Naa tshipiḓa tsha kha ḽifhasi tsha ndangulo ya Yehova tsho dzula tsho livhisa ṱhogomelo kha mishumo ya ndeme? Vhukuma, tsho ita zwenezwo!
TEVHEDZANI TSUMBO YA NDANGULO YA YEHOVA
16. Ndi mini zwine zwa nga ni vhuyedza sa muthu nga eṱhe, kana sa muṱa arali na nga guda nga ha eneo mafhungo?
16 Naa ri a ḓiṋea tshifhinga tsha u elekanya nga ha nḓila ine ndangulo ya Yehova ya shuma ngayo? Kha vhurabeli havho ha muṱa na pfunzo ya muthu nga eṱhe, vhaṅwe vho dzhia phetho ya u ita ṱhoḓisiso nga ha enea mafhungo na u elekanya nga hao. Mabono e a ṋewa Yesaya, Hesekiele, Daniele, na Yohane a nga takadza vhukuma musi muthu a tshi guda nga hao. Bugu ine ya pfi Jehovah’s Witnesses—Proclaimers of God’s Kingdom na dziṅwe khandiso kana dzi-DVD dzi re hone nga luambo lwa vhoiwe dzi nga ni funza zwo engedzeaho nga ha ndangulo.
17, 18. (a) Yeneyi khaseledzo yo ni vhuyedza hani? (b) Ndi mbudziso dzifhio dzine ra fanela u ḓivhudzisa dzone?
17 U elekanya nga zwe Yehova a zwi khunyeledza nga ndangulo yawe zwi nga ri vhuyedza. U nga ri ri nga ḓiimisela u dzula ro livhisa ṱhogomelo kha zwithu zwa ndeme vhukuma, samusi na yeneyi ndangulo yo ita nga u ralo. Arali ra ita zwenezwo, ri ḓo khwaṱhiswa, ra dovha ra ḓiimisela u fana na Paulo we a ṅwala uri: “samusi ri na vhuḓinḓa honovhu u ya nga he ra khathutshelwa ngaho, a ri neti.” (2 Vha-Kor. 4:1) O dovha a ṱuṱuwedza vhashumisani nae a ri: “ri songo litsha u ita zwo lugaho, ngauri nga tshifhinga tsho teaho ri ḓo kaṋa arali ri sa neti.”—Vha-Gal. 6:9.
18 Naa hu na zwine muṅwe na muṅwe washu a fanela u zwi shandula, kana u ita tshanduko muṱani u itela uri ri ṱhogomele zwithu zwa ndeme vhukuma zwa ḓuvha na ḓuvha? Naa ri nga leludza vhutshilo hashu kana ra fhungudza zwithithisi u itela uri ri kone u livhisa ṱhogomelo kha mushumo wa u huwelela u re wa ndeme vhukuma? Kha thero i tevhelaho, ri ḓo haseledza nga ha zwithu zwiṱanu zwine zwa ḓo ri thusa uri ri dzule ri tshi khou tshimbidzana na ndangulo ya Yehova.
