Hu na tshiitisi tshi pfalaho tsha u tenda uri wonoyu mubulo u ambela kha vharwa vha Mudzimu vha muya. Fhedzi vhuṱanzi ndi vhufhio?

Ndimana dza u thoma dzi vhalea nga u rali: ‘Vhana [vharwa] vha Mudzimu vha lavhelesa vhana vha vhathu, vha wana vhó naka, vha dzhia vhasadzi kha vhoṱhe vhenevho vhe vha vha vha tshi vha takadza.’—Gen. 6:2.

Kha Maṅwalo a Luheberu, mubulo une wa ri “vhana [vharwa] vha Mudzimu” u bvelela kha Genesi 6:2, 4; Yobo 1:6; 2:1; 38:7; na Psalme ya 89:6. Dzenedzo ndima dzi amba mini nga ha vhenevho “vharwa vha Mudzimu”?

“Vharwa vha Mudzimu” vhane ra vhala nga havho kha Yobo 1:6 vho vha vhe zwivhumbiwa zwa muya zwo kuvhanganaho phanḓa ha Mudzimu. Vhukati havho ho vha hu na Sathane, we a vha a tshi khou “buḓa-buḓa shango.” (Yobo 1:7; 2:1, 2) Zwi fanaho na zwenezwo, Yobo 38:4-7, ri vhala nga ha ‘vharwa vha Mudzimu’ vhe vha “khana vhó takala” musi Mudzimu a tshi “vhea tombo ḽa muteo” kha ḽifhasi. Khamusi vho vha vhe vha vharuṅwa, sa izwi vhathu vho vha vha sa athu u sikwa. “Vharwa vha Mudzimu” vhe vha bulwa kha Psalme ya 89:6 ndi zwivhumbiwa zwa muya zwi re ṱaḓulu na Mudzimu, hu si vhathu.

Ndi vhafhio “vhana [vharwa] vha Mudzimu” vho bulwaho kha Genesi 6:2, 4? U tendelana na mbuno dzo fhiraho dzi bvaho Bivhilini, zwi a pfala u phetha nga ḽa uri ndi vharwa vha Mudzimu vha muya vhe vha ḓa kha ḽifhasi.

Vhaṅwe vha wana zwi tshi konḓa u tenda uri vharuṅwa vha nga vha na dzangalelo ḽa u ṱanganela kha zwa vhudzekani. Maipfi a Yesu o ṅwalwaho kha Mateo 22:30 a sumbedza uri mbingano na zwa vhudzekani a zwi ho ṱaḓulu. Fhedzi nga zwiṅwe zwifhinga vharuṅwa vho vhuya vha ambara mivhili ya vhathu, vha ḽa nahone vha nwa na vhathu. (Gen. 18:1-8; 19:1-3) Nga zwenezwo, zwi a pfala u phetha nga ḽa uri kha mivhili yeneyo ya vhathu, vho vha tshi nga kona u ṱanganela kha zwa vhudzekani na vhafumakadzi.

Hu na zwiitisi zwi pfalaho zwi re Bivhilini zwa u tenda uri vhaṅwe vharuṅwa vho ita zwenezwo. Yuda 6, 7 i vhambedza tshivhi tsha vhanna vha Sodoma, vhe vha emula zwithu zwa ṋama nga nḓila i si ya nzulele, na “vharuṅwa vhe vha si dzhiele nṱha vhuimo havho, fhedzi vha ṱutshela vhudzulo havho ho teaho.” Mbuno ndi ya uri vharuṅwa vhenevho na vhathu vha Sodoma vho “ḓidzhenisa kha vhuḓifari vhu songo kunaho nga nḓila yo kalulaho na u emula zwithu zwa ṋama nga nḓila i si ya nzulele.” Maṅwe mafhungo a fanaho na a re kha 1 Petro 3:19, 20 a sumbedza u tshimbidzana hu re hone vhukati ha vharuṅwa vha sa thetshelesi na ‘misi ya Noaxe.’ (2 Pet. 2:4, 5) Nga zwenezwo, vharuṅwa vha sa thetshelesi vha misini ya Noaxe vha nga vhambedzwa na tshivhi tsha vha Sodoma na Gomora.

Zwenezwo zwi i a pfala musi ri tshi ri ‘vhana [vharwa] vha Mudzimu’ vho bulwaho kha Genesi 6:2, 4 vho vha vhe vharuṅwa vhe vha ambara mivhili ya vhathu nahone vha ita zwa vhudzekani na vhafumakadzi.

Muapostola Paulo o ṱalula yeneyo mimuya sa vhe vha “si thetshelese musi Mudzimu a tshi lindela a sa fheli mbilu misini ya Noaxe.” (1 Pet. 3:20) Zwi tou vha khagala uri Paulo o vha a tshi khou ambela kha zwivhumbiwa zwa muya zwe zwa khetha u ṱanganela na Sathane kha vhushandukwa. Yuda o amba nga vharuṅwa vhe vha “si dzhiele nṱha vhuimo havho, fhedzi vha ṱutshela vhudzulo havho ho teaho,” a amba uri Mudzimu “o vha vhofha nga mbofho dza lini na lini na u vha vhulunga swiswini ḽihulu u swika musi vha tshi haṱulwa nga ḓuvha ḽihulu.”—Yuda 6.

Zwivhumbiwa zwa muya zwo sumbedza u sa thetshelesa nga nḓila-ḓe tshifhingani tsha Noaxe? Nga phanḓa ha Maḓi Mahulu, zwenezwi zwivhumbiwa zwa muya zwivhi zwo ambara mivhili ya vhathu—zwithu zwe zwa vha zwi si ndivho ya Mudzimu. (Gen. 6:2, 4) Zwiṅwe hafhu, vhenevho vharuṅwa vhe vha ita zwa vhudzekani na vhana vha vhathu vho vha vha tshi khou ita vhuṱudzi. Mudzimu ho ngo sika zwivhumbiwa zwa muya uri zwi ite zwa vhudzekani na vhana vha vhathu. (Gen. 5:2) Vhenevha vharuṅwa vhavhi vha sa thetshelesi, vha ḓo fheliswa nga tshifhinga tsho teaho tsha Mudzimu. Nga zwenezwo, samusi Yuda o dzula o zwi amba, vha “swiswini ḽihulu”—dzhele ya pfanyisedzo ya lwa muya.

Yesu o huwelela lini nahone hani kha yeneyi “mimuya i re dzhele”? Petro o ṅwala uri zwenezwi zwo itea musi Yesu a tshi “vuswa lwa muya.” (1 Pet. 3:18, 19) Dovhani ni ṱhogomele uri Petro o amba uri Yesu o “huwelela.” Musi Petro a tshi amba anea maipfi zwa nga o no itea, zwo vha zwi tshi amba uri u huwelela ho vha ho no itea Petro a sa athu u ṅwala vhurifhi hawe ha u thoma. Nga zwenezwo, zwi vhonala u nga tshiṅwe tshifhinga nga murahu ha mvuwo yawe, Yesu o ḓivhadza mimuya mivhi malugana na tshigwevho tsho iteaho, tshine ya ḓo tshi wana. Yesu ho ngo huwelela u itela u i ṋea fulufhelo. O huwelela u itela u i haṱula. (Yona 1:1, 2) Musi Yesu o no sumbedza lutendo lwawe na u fulufhedzea u swika lufuni nahone a vuswa—zwi tshi sumbedza uri Diabolo ha na ṱhuṱhuwedzo khae—Yesu o vha e na tshiitisi tsha u huwelela u itela u i vhona mulandu.—Yoh. 14:30; 16:8-11.

Tshifhingani tshi ḓaho, Yesu u ḓo vhofha Sathane na vharuṅwa vhenevho nahone a vha posa mugodini. (Luka 8:30, 31; Nzumb. 20:1-3) U swika hu tshi ḓo itea zwenezwo, yeneyi mimuya i sa thetshelesi i swiswini ḽihulu ḽa muya nahone i ḓo fheliswa zwa vhukuma.—Nzumb. 20:7-10.