Tshilani U Tendelana Na Thabelo Ya Yesu Ya Lufuno
“Khotsi . . . hulisa murwa wau, uri murwa wau a u ṋee vhugala.”—YOH. 17:1.
1, 2. Ṱalutshedzani zwe Yesu a zwi itela vhaapostola vhawe vha fulufhedzeaho musi vho no pembelela Paseka nga 33 C.E.
NDI vhusiku ha ḽa 14 Nisan nga ṅwaha wa 33 C.E. Yesu na khonani dzawe vha kha ḓi tou bva u pembelela Paseka, ine ya vha humbudza nga ha nḓila ye Mudzimu a phulusa ngayo vhomakhulukuku wavho vhupulini ha Egipita. Fhedzi vhafunziwa vhawe vha fulufhedzeaho vha ḓo tshenzhela u ‘tshidzwa nga hu sa fheli’ nga nḓila khulwane. Nga ḓuvha ḽi tevhelaho, Murangaphanḓa wavho a si na tshivhi u ḓo vhulahwa nga maswina awe. Fhedzi zwenezwi zwithu zwivhi zwi ḓo shanduka zwa vha phaṱutshedzo. Malofha a Yesu o shululwaho a ḓo vhofholola vhathu tshivhini na lufuni.—Vhaheb. 9:12-14.
2 U itela vhungoho ha uri ri si hangwe yeneyi ndugiselelo ya lufuno, Yesu o thoma vhuṱambo ha ṅwaha muṅwe na muṅwe he ha dzhiela vhudzulo Paseka. O ita zwenezwo nga u dzhia tshinkwa tshi si na mbiliso a tshi ṋekedza vhaapostola vhawe vha fulufhedzeaho vha 11, a ri: “Tshi imela muvhili wanga, une wa ḓo ṋekedzwa u itela inwi. Dzulani ni tshi ita zwenezwi u itela u nkhumbula.” A ita zwi fanaho nga tshinwelo, a vha vhudza a ri: “Tshinwelo itshi tshi imela mulanga muswa wa malofha anga ane a ḓo shululelwa inwi.”—Luka 22:19, 20.
3. (a) Ndi tshanduko ifhio khulwane ye ya vha hone nga murahu ha lufu lwa Yesu? (b) Ndi mbudziso dzifhio dzine ra fanela u dzi ṱolisisa malugana na thabelo ya Yesu yo ṅwalwaho kha Yohane ndima ya 17?
3 Mulanga wa Mulayo wa kale we wa vha u vhukati ha Mudzimu na lushaka lwa Isiraele lwa ṋama wo vha u tsini na u fhela hu si kale. Wo vha u tshi ḓo dzhielwa vhudzulo nga mulanga muswa u re vhukati ha Yehova na vhatevheli vha Yesu vho ḓodzwaho. Yesu o vha a tshi vhilaedziswa vhukuma nga ha lwonolu lushaka luswa lwa muya. Vhaisiraele vha ṋama vho vha vho fhandekana nga lwa vhurereli na nga matshilele, nahone zwenezwo zwo vha zwi tshi nyadzisa dzina ḽikhethwa ḽa Mudzimu. (Yoh. 7:45-49; Mish. 23:6-9) Zwo fhambanaho na zwenezwo, Yesu o vha a tshi ṱoḓa uri vhatevheli vhawe vha dzule vhe tshithu tshithihi u itela uri vha kone u shuma nga vhuthihi kha u hulisa dzina ḽa Mudzimu. Nga zwenezwo, ndi mini zwe Yesu a zwi ita? O rabela thabelo yavhuḓi vhukuma ine ya vha ndugelo kha muṅwe na muṅwe ane a i vhala. (Yoh. 17:1-26; sedzani tshifanyiso tsha u thoma.) Ri nga ḓivhudzisa hezwi, “Naa Mudzimu o fhindula thabelo ya Yesu?” Ri fanela u dovha ra ḓiṱolisisa nahone ra ḓivhudzisa uri: “Naa ndi khou tshila u tendelana nayo?”
ZWE ZWA VHA ZWI ZWA NDEME KHA YESU
4, 5. (a) Ndi mini zwine ra zwi guda kha zwine zwa ḓa u thoma kha thabelo ya Yesu? (b) Yehova o fhindula hani khumbelo ya Yesu nga ha vhumatshelo hawe?
4 Yesu u amba na vhafunziwa vhawe u swika vhusiku, a tshi vha ṋea nḓivho ya ndeme i bvaho ha Mudzimu. Ngauralo, a lavhelesa ṱaḓulu nahone a rabela a ri: “Khotsi, tshifhinga tsho swika; hulisa murwa wau, uri murwa wau a u ṋee vhugala, samusi wo mu ṋea maanḓa kha vhathu vhoṱhe, uri a ṋee vhathu vhoṱhe vhe wa mu ṋea vhone vhutshilo vhu sa fheli. . . . Ndo u ṋea vhugala fhano shangoni, samusi ndo fhedza mushumo we wa nṋea uri ndi u ite. Khotsi, zwino nṋee vhugala he nda vha ndi naho tsini na iwe musi shango ḽi sa athu vha hone.”—Yoh. 17:1-5.
5 Ṱhogomelani zwithu zwine zwa ḓa u thoma kha thabelo ya Yesu. Tshithu tshe tsha vha tshi tshi mu vhilaedzisa vhukuma ndi u ṋea Khotsi awe wa ṱaḓulu vhugala, nahone zwenezwi zwi tendelana na khumbelo ya u thoma kha thabelo ya Yesu ya tsumbo ine ya ri: “Khotsi, dzina ḽau nga ḽi itwe ḽikhethwa.” (Luka 11:2) Mbilaelo ya vhuvhili ya Yesu yo vha i ṱhoḓea dza vhafunziwa vhawe, ‘uri a vha ṋee vhutshilo vhu sa fheli.’ Nga murahu ha zwenezwo, Yesu o ita khumbelo ya uri: “Khotsi, zwino nṋee vhugala he nda vha ndi naho tsini na iwe musi shango ḽi sa athu vha hone.” Yehova o lambedza Murwa wawe a fulufhedzeaho nga zwithu zwo engedzeaho u fhira zwe a humbela musi a tshi mu ṋea “dzina ḽavhuḓi ḽi fhiraho” ḽa vharuṅwa vhoṱhe.—Vhaheb. 1:4.
‘U ḒIVHA MUDZIMU WA NGOHO E EṰHE’
6. Ndi mini zwe vhaapostola vha vha vha tshi fanela u zwi ita u itela uri vha wane vhutshilo vhu sa fheli, nahone ri zwi ḓivha hani uri vho bvelela?
6 Yesu o dovha a rabela nga ha zwine riṋe sa vhaitazwivhi ra fanela u zwi ita u itela uri ri fanelee u wana tshifhiwa tsha vhutshilo vhu sa fheli. (Vhalani Yohane 17:3.) O amba uri ri fanela u bvela phanḓa ri tshi ‘ḓivha’ Mudzimu na Kristo. Iṅwe nḓila ya u ita zwenezwi i katela u shumisa maṱo na nḓevhe dzashu u guda zwo engedzeaho nga ha Yehova na Murwa wawe. Iṅwe nḓila ya ndeme ya u ḓivha Mudzimu ndi nga u tshenzhela dakalo ḽi ḓiswaho nga u shumisa zwine ra zwi guda nga hae. Vhaapostola vho tevhela enea maitele a tshidzaho, samusi Yesu o bvela phanḓa a tshi rabela a ri: “Ndo vha vhudza zwe wa mmbudza, vho zwi ṱanganedza.” (Yoh. 17:8) Fhedzi u itela u wana vhutshilo vhu sa fheli, vho vha vha tshi fanela u dzula vha tshi elekanya nga zwine Mudzimu a amba na u zwi shumisa vhutshiloni havho ha ḓuvha ḽiṅwe na ḽiṅwe. Naa vhaapostola vha fulufhedzeaho vho bvelela kha u ita zwenezwo u swika magumoni a vhutshilo havho ha kha ḽifhasi? Vhukuma, vho bvelela. Zwenezwi ri a zwi ḓivha ngauri madzina avho oṱhe o ṅwalwa lwa tshoṱhe kha matombo a 12 a mutheo wa Yerusalema Muswa wa ṱaḓulu.—Nzumb. 21:14.
7. U ‘ḓivha’ Mudzimu zwi amba mini, nahone ndi ngani zwenezwo zwi zwa ndeme?
7 U ya nga vhaḓivhi vha Lugerika, mubulo wa Lugerika wo ṱalutshedzelwaho nga uri “vha ḓivhe” u nga dovha wa ṱalutshedzelwa nga uri “vha fanela u bvela phanḓa vha tshi ḓivha.” Yeneyo mibulo mivhili i a tshimbidzana nahone ndi ya ndeme. Ṱhaluso i re magumoni a siaṱari ya Yohane 17:3 i re kha Reference Bible i amba uri “u u ḓivha.” Nga zwenezwo, u ‘ḓivha’ zwi ambela kha maitele a bvelaho phanḓa ane a ita uri muthu a vhe na ndugelo ya u ‘ḓivha’ Mudzimu. Naho zwo ralo, u ḓivha Muthu muhulwanesa fhethu hoṱhe, zwi katela zwo engedzeaho u fhira u sokou ḓivha pfaneleo na ndivho ya Mudzimu. U ḓivha Yehova zwi katela u vha na vhushaka ha tsini nae khathihi na vhatendi nga riṋe. Bivhili i ri: “A si na lufuno ha ḓivhi Mudzimu.” (1 Yoh. 4:8) Nga zwenezwo, u ḓivha Mudzimu zwi katela u mu thetshelesa. (Vhalani 1 Yohane 2:3-5.) Ndi ndugelo khulwane vhukuma u vha muṅwe wa vhane vha ḓivha Yehova! Fhedzi u fana na zwe zwa itea kha Yudasi Iskariote, ri nga xelelwa nga honovhu vhushaka ha ndeme. Kha ri shume vhukuma u itela u vhu khwaṱhisa. Nga zwenezwo, ri ḓo kona u wana tshifhiwa tsha vhutshilo vhu sa fheli.—Mat. 24:13.
“NGA NṰHANI HA DZINA ḼAU”
8, 9. Ndi zwifhio zwe zwa vha zwi zwa ndeme kha Yesu tshifhingani tsha vhuḓinḓa hawe ha kha ḽifhasi, nahone u fanela u vha o landula sialala ḽifhio ḽa vhurereli?
8 Nga murahu ha u vhala thabelo ya Yesu yo ṅwalwaho kha Yohane ndima ya 17, ndi nnyi ane a nga timatima lufuno luhulwane lwa Yesu kha vhaapostola vhawe vhe vha vha vhe nae na kha vhafunziwa vhawe vha tshifhingani tshi ḓaho? (Yoh. 17:20) Naho zwo ralo, ri fanela u zwi pfesesa uri u tshidzwa hashu a si zwone fhedzi zwa ndeme kha Yesu. Ndivho yawe khulwane u bva mathomoni u swika magumoni a vhuḓinḓa hawe ha kha ḽifhasi yo vha i ya u ṋea dzina ḽa Khotsi awe vhugala na u ḽi ita ḽikhethwa. Sa tsumbo, musi a tshi ḓivhadza mushumo wawe e sinagogoni ya Nazareta, Yesu o vhala mupombo wa Yesaya a ri: “Muya wa Yehova u kha nṋe, ngauri o nḓodza uri ndi ḓivhadze vhashai mafhungo maḓifha.” A zwi timatimisi uri Yesu o vha a tshi ḓo ḓivhadza dzina ḽa Mudzimu nga nḓila i pfalaho musi a tshi vhala enea mafhungo.—Luka 4:16-21.
9 U ya nga sialala ḽa Vhayuda, musi Yesu a sa athu ḓa kha ḽifhasi, vharangaphanḓa vha vhurereli vho funza vhathu uri vha si shumise dzina ḽa Mudzimu. Ri nga vha na vhungoho ha uri Yesu o landula ḽeneḽo sialala ḽi si ḽa maṅwalo. O vhudza vhapikisi vhawe a ri: “Ndo ḓa dzinani ḽa Khotsi anga, fhedzi a ni nṱanganedzi; arali muṅwe muthu a vhe o ḓa nga dzina ḽawe, no vha ni tshi ḓo vha no mu ṱanganedza.” (Yoh. 5:43) Nga zwenezwo, maḓuvha a si gathi a sa athu fa, Yesu o amba nga ha zwe zwa vha zwi zwa ndeme vhukuma vhutshiloni hawe musi a tshi rabela a ri: “Khotsi hulisa dzina ḽau.” (Yoh. 12:28) Nga zwenezwo, a zwo ngo fanela u ri mangadza uri kha yeneyo thabelo yoṱhe ine ra khou i ṱolisisa zwino, Yesu o livhisa ṱhogomelo kha dzina ḽa Khotsi awe.
10, 11. (a) Ndi zwifhio zwe Yesu a zwi ita u itela uri dzina ḽa Khotsi awe ḽi ḓivhiwe? (b) Vhafunziwa vha Yesu vha fanela u shumela u wana tshipikwa tshifhio?
10 Yesu o rabela a ri: “Ndo ḓivhadza dzina ḽau kha vhathu vhe wa nṋea vhone vha tshi bva shangoni. Vho vha vhe vhau, zwino wo nṋea vhone, nahone vho tevhedza zwe wa zwi amba. Zwiṅwe hafhu, nṋe a thi tsha vha fhano shangoni, fhedzi vhone vha shangoni, hone nṋe ndi khou ḓa ha iwe. Khotsi mukhethwa, vha tsireledze nga nṱhani ha dzina ḽau ḽe wa nṋea ḽone, uri vha vhe vhathihi samusi na riṋe ri vhathihi.”—Yoh. 17:6, 11.
11 U ḓivhadza dzina ḽa Khotsi awe kha vhafunziwa vhawe zwo vha zwi sa kateli u sokou amba ḽeneḽo dzina. Yesu o dovha a vha thusa u ḓivha zwine dzina ḽa Mudzimu ḽa amba zwone, zwine zwa vha pfaneleo dzavhuḓi dza Mudzimu na nḓila ine a shumisana ngayo na riṋe. (Ek. 34:5-7) Zwiṅwe hafhu, samusi Yesu e vhuimoni hawe ha vhugala ngei ṱaḓulu, u bvela phanḓa a tshi thusa vhafunziwa vhawe u ḓivhadza dzina ḽa Yehova ḽifhasini ḽoṱhe. U na tshipikwa tshifhio? Tshipikwa tshawe ndi uri hu kuvhanganywe vhafunziwa vho engedzeaho hu sa athu ḓa vhufhelo ha ano maitele mavhi a zwithu. Nga zwenezwo, Yehova u ḓo ḓiitela dzina ḽavhuḓi lungafhani musi a tshi dzhia vhukando u itela u tshidza ṱhanzi dzawe dzi fulufhedzeaho!—Hesek. 36:23.
“URI SHANGO ḼI TENDE”
12. Ndi zwithu zwifhio zwiraru zwine zwa ṱoḓea u itela uri ri bvelele mushumoni washu wa u tshidza vhathu?
12 Musi e kha ḽifhasi, Yesu o ita vhuḓidini vhuhulwane u thusa vhafunziwa vhawe u kunda vhushayanungo havho. Zwenezwi zwo vha zwi zwa ndeme khavho u itela uri vha fhedze mushumo we wa thomiwa nga Yesu. Yesu o rabela a ri: “Samusi wo nthuma shangoni, na nṋe ndi khou vha ruma shangoni.” U itela uri vha kone u bvelela kha wonoyu mushumo u tshidzaho vhathu, Yesu o ombedzela zwithu zwiraru zwa ndeme. Tsha u thoma, o rabelela uri vhafunziwa vhawe vha si vhe tshipiḓa tsha shango ḽivhi ḽa Sathane. Tsha vhuvhili, o rabelela uri vha itwe vhakhethwa nga u shumisa ngoho i re Ipfini ḽa Mudzimu. Tsha vhuraru, Yesu o humbela a tshi dovholola uri vhafunziwa vhawe vha vhe na vhuthihi na lufuno lune lwa vha vhukati hawe na Khotsi awe. Zwenezwo zwi ṱoḓa uri ri ḓiṱolisise. Muṅwe na muṅwe washu u fanela u ḓivhudzisa uri, ‘Naa ndi khou tshila u tendelana na khumbelo tharu dza Yesu?’ Nga u livhisa ṱhogomelo kha zwenezwi zwithu, Yesu o sumbedza uri u na vhungoho ha maipfi ane a ri “uri shango ḽi tende zwauri wo nthuma.”—Vhalani Yohane 17:15-21.
Vhakriste vha ḓanani ḽa u thoma ḽa miṅwaha vho shumisana na muya mukhethwa u itela uri hu vhe na vhuthihi (Sedzani phara 13)
13. Thabelo ya Yesu yo fhindulwa hani ḓanani ḽa u thoma ḽa miṅwaha C.E.?
13 U itela u vhona uri thabelo ya Yesu yo fhindulwa, zwi nga vhonala nga u guda bugu ya Bivhili ine ya tevhela Evangeli nṋa, ine ya vha Mishumo ya Vhaapostola. Edzani u humbula nga ha phambano ye ya vha i tshi nga vha hone vhukati ha Vhakriste vha u thoma, vhe vha vha vha tshi katela Vhayuda na Vhannḓa, vho pfumaho na vhashai, dziphuli na vhaṋe vha dziphuli. Naho zwo ralo, vhoṱhe vho vha vhe na vhuthihi lwe vha vha vha tshi nga fanyiswa na miraḓo yo fhambanaho ya muvhili wa muthu, nahone Yesu e ṱhoho yavho. (Vhaef. 4:15, 16) Ndi zwithu zwi swayeaho vhukuma shangoni ḽa Sathane ḽo fhandekanaho! U khoḓwa hoṱhe hu fanela u ya kha Yehova, we a ita uri zwenezwi zwi konadzee a tshi shumisa muya wawe mukhethwa u re na maanḓa.—1 Vhakor. 3:5-7.
Vhathu vha Yehova shangoni ḽoṱhe vha na vhuthihi (Sedzani phara 14)
14. Thabelo ya Yesu yo fhindulwa hani musalauno?
14 Zwi ṱungufhadzaho ndi uri honovhu vhuthihi ha lwa vhuṱolo a ho ngo bvela phanḓa musi vhaapostola vho no fa. Nṱhani hazwo, samusi zwo dzula zwo ambiwa, ho vha na vhugunei vhuhulwane he ha ita uri hu vhe na zwigwada zwa ḽa Vhudzhagane zwo fhandekanaho. (Mish. 20:29, 30) Fhedzi nga ṅwaha wa 1919, Yesu o vhofholola vhatevheli vhawe vho ḓodzwaho vhuthubwani ha vhurereli ha mazwifhi nahone a vha kuvhanganya kha “mbofho yo fhelelaho ine ya ita uri hu vhe na vhuthihi.” (Vhakol. 3:14) Mushumo wavho wa u huwelela wo kwama hani shango ḽoṱhe? Vha “dziṅwe nngu” vha fhiraho milioni dza sumbe vha bvaho kha “tshaka dzoṱhe na ndimi dzoṱhe” vho kokodzelwa kha sambi ḽi re na vhuthihi na vhaḓodzwa vha Mudzimu. (Yoh. 10:16; Nzumb. 7:9) Yeneyi ndi phindulo yavhuḓi vhukuma ya thabelo ya Yesu ine ya ri, “uri shango ḽi ḓivhe uri [iwe Yehova] wo nthuma na uri u a vha funa samusi wo mpfuna”!—Yoh. 17:23.
MAGUMO AVHUḒI
15. Yesu o itela vhafunziwa vhawe vho ḓodzwaho khumbelo ifhio yo khetheaho?
15 Ḽo no kovhela nga ḽa 14 Nisan, Yesu o ṋea vhaapostola vhawe vhugala kana khuliso nga u vhofha mulanga navho wa u vhusa nae Muvhusoni wawe. (Luka 22:28-30; Yoh. 17:22) Malugana na vhoṱhe vhane vha ḓo vha vhatevheli vhawe vho ḓodzwaho, Yesu o rabela a ri: “Khotsi, ndi ṱoḓa uri vhathu vhe wa nṋea vhone na vhone vha vhe na nṋe hune nda vha hone, uri vha vhone vhugala hanga he wa nṋea hone, ngauri wo mpfuna shango ḽi sa athu vha hone.” (Yoh. 17:24) Vhaṅwe vha dziṅwe nngu dza Yesu vha a takala nahone a vha na vivho, nahone zwenezwo zwi sumbedza uri hu na vhuthihi kha Vhakriste vhoṱhe vha ngoho kha ḽifhasi ṋamusi.
16, 17. (a) Musi a tshi phetha thabelo yawe, ndi mini zwe Yesu a amba uri u ḓo bvela phanḓa a tshi zwi ita? (b) Ndi mini zwine ra fanela u ḓiimisela u zwi ita?
16 Vha tshi ṱuṱuwedzwa nga vharangaphanḓa vhavho vha vhurereli, vhathu vhanzhi shangoni vha khetha u sa dzhiela nṱha vhuṱanzi vhu pfalaho ha uri Yehova u na vhathu vha re na vhuthihi vhane vha mu ḓivha zwa vhukuma. Zwo vha zwo tou ralo na misini ya Yesu. Nga zwenezwo, o phetha nga maipfi avhuḓi a tevhelaho: “Khotsi o lugaho, shango a ḽi u ḓivhi; fhedzi nṋe ndi a u ḓivha, na vhenevha vha a zwi ḓivha uri ndo rumiwa nga iwe. Ndo vha ḓivhadza dzina ḽau nahone ndi ḓo ḓi ḽi ḓivhadza, uri vha vhe na lufuno lwe wa mpfuna ngalwo nahone ndi vhe na vhuthihi navho.”—Yoh. 17:25, 26.
17 Ndi nnyi ane a nga hanedza uri Yesu o tshila u tendelana na thabelo yawe? Sa Ṱhoho ya tshivhidzo, u bvela phanḓa a tshi ri thusa uri ri ḓivhadze dzina na ndivho ya Khotsi awe. U nga ri ri nga bvela phanḓa ri tshi ḓiṱukufhadzela vhuṱoho hawe nga u thetshelesa ndaela yawe ya u huwelela na u ita vhafunziwa nga u fhisea. (Mat. 28:19, 20; Mish. 10:42) U nga ri ri nga ita vhuḓidini u itela u vhulunga vhuthihi hashu ha ndeme. Musi ri tshi ita zwenezwi zwithu, ri ḓo vha ri tshi khou tshila u tendelana na thabelo ya Yesu, u itela uri dzina ḽa Yehova ḽi rendwe nahone ri wane dakalo ḽa nga hu sa fheli.
