1, 2. Ndi ngani zwi tshi swayea uri Yehova a ḓifanyise na mulisa?

YEHOVA u ḓivhambedza na mulisa. (Hesek. 34:11-14) Zwenezwo zwi a swayea ngauri zwi ri thusa uri ri pfesese zwine Yehova a vha zwone. Mulisa a re na lufuno u hwala vhuḓifhinduleli ha u ṱhogomela sambi ḽawe. U ḽi isa pfuloni na zwisimani zwa maḓi (Ps. 23:1, 2); a ḽi linda vhusiku na masiari (Luka 2:8); a ḽi tsireledza kha zwivhanda (1 Sam. 17:34, 35); a ṱhogomela ngwana (Yes. 40:11); a ṱoḓa nngu dzo xelaho nahone a ṱhogomela zwavhuḓi dzo huvhalaho.—Hesek. 34:16.

² Ngauri vhathu vha Yehova vha tshifhingani tsha kale vho vha vha tshi dzula fhethu he ha vha ho ada zwa u lima na u lisa, vho vha vha tshi pfesesa ndeme ya u vhambedza Yehova Mudzimu na mulisa a re na lufuno. Vho vha vha tshi zwi ḓivha uri nngu dzi ṱoḓa u ṱhogomelwa u itela uri dzi tshile zwavhuḓi. Vhathu vha ṱoḓa zwi fanaho na nga lwa muya. (Marko 6:34) Arali vhathu vha sa rangwa phanḓa zwavhuḓi na u ṱhogomelwa nga lwa muya vha a tambula. Zwo leluwa uri vha vutshelwe nahone zwenezwo zwi nga ita uri vha si ḓifare zwavhuḓi—u nga “nngu dzi si na mulisa” dzo balanganaho. (1 Dzikh. 22:17) Naho zwo ralo, Yehova u ṋea vhathu vhawe zwishaiwa zwavho nga lufuno.

3. Ndi mini zwine ra ḓo zwi haseledza kha ino thero?

³ Na musalauno, u ḓifanyisa ha Yehova na mulisa zwi a swayea. Yehova u kha ḓi bvela phanḓa a tshi ṱhogomela vhathu vhawe vhane vha nga nngu. Kha ri vhone uri u livhisa na u fusha hani ṱhoḓea dza nngu dzawe ṋamusi. Ri ḓo dovha ra ṱhogomela nḓila ine nngu dza tea u aravha ngayo musi dzi tshi ṱhogomela uri Yehova u a dzi funa.

4. Ndi mini zwine Yesu a zwi ita kha u ṱhogomela nngu dza Yehova?

⁴ Yehova o vhea Yesu uri a vhe Ṱhoho ya tshivhidzo  tsha Vhukriste. (Vhaef. 1:22, 23) Sa “mulisa wavhuḓi,” Yesu u sumbedza lufuno, ndivho na pfaneleo zwa Khotsi awe. Yesu o dovha a “kumedza vhutshilo hawe a tshi itela nngu.” (Yoh. 10:11, 15) Tshiṱhavhelo tsha tshirengululi tsha Kristo ndi phaṱhutshedzo yavhuḓi vhukuma kha vhathu! (Mat. 20:28) Ndi ndivho ya Yehova uri “muṅwe na muṅwe ane a vha na lutendo kha [Yesu] a si fheliswe, fhedzi a wane vhutshilo vhu sa fheli”!—Yoh. 3:16.

5, 6. (a) Ndi vhafhio vhe Yesu a vha vhea uri vha ṱhogomele nngu dzawe, nahone nngu dzi fanela u ita mini uri dzi vhuyelwe nga yeneyi nzudzanyo? (b) Ri na tshiitisi tshifhio tshihulwane tsha u ṱoḓa u thetshelesa vhahulwane vha tshivhidzo?

⁵ Nngu dzi aravha hani kha Mulisa Wavhuḓi, Yesu Kristo? Yesu o ri: “Nngu dzanga dzi thetshelesa ipfi ḽanga, ndi a dzi ḓivha, nahone dzi a ntevhela.” (Yoh. 10:27) U thetshelesa ipfi ḽa Mulisa Wavhuḓi zwi amba u tevhela vhulivhisi hawe kha zwithu zwoṱhe. Zwenezwi zwi katela u shumisana na vhalisa vha muya vhe a vha vhea vha re nga fhasi hawe. Yesu o sumbedza uri vhaapostola na vhafunziwa vhawe vha fanela u bvela phanḓa vha tshi ita mushumo we a u thoma. Vho vha vha tshi fanela u ‘funza’ na u ‘kanzwa ngwana dza Yesu.’ (Mat. 28:20; vhalani Yohane 21:15-17.) Samusi mafhungo maḓifha o phaḓalala na tshivhalo tsha vhafunziwa tsho engedzea, Yesu o dzudzanya Vhakriste vho vhibvaho uri vha lise zwivhidzo.—Vhaef. 4:11, 12.

⁶ Musi a tshi amba na vhalavhelesi vha tshivhidzo tsha Efesa tsha ḓanani ḽa u thoma ḽa miṅwaha, muapostola Paulo o amba uri muya mukhethwa wo vha vhea uri vha vhe vhalavhelesi nahone vha “lise tshivhidzo tsha Mudzimu.” (Mish. 20:28) Zwi a fana na kha vhalavhelesi vha Vhakriste ṋamusi, samusi na vhone vho nangwa u ya nga ṱhoḓea dza Maṅwalo o hevhedzwaho nga muya mukhethwa. Nga zwenezwo, u thetshelesa vhalavhelesi vha Vhakriste zwi sumbedza uri ri ṱhonifha Yehova na Yesu, Vhalisa vhavhili vhahulwane. (Luka 10:16) Vhukuma, zwenezwi zwi fanela u vha tshiitisi tshihulwane tsha uri ri ṱoḓe u thetshelesa vhahulwane. Naho zwo ralo, hu na zwiṅwe zwiitisi zwine zwa ita uri u thetshelesa vhahulwane zwi vhe vhuṱali.

7. Vhahulwane vha ni thusa hani uri ni dzule ni na vhushaka havhuḓi na Yehova?

⁷ Musi vha tshi ṋea vhatendi ngavho vhulivhisi, vhahulwane vha ṋea ṱhuṱhuwedzo na nyeletshedzo yo thewaho Maṅwaloni kana kha maitele a Maṅwalo. Tshipikwa tshavho tsha u ṋea vhulivhisi honoho a si u vhudza vhahavho nḓila ine vha fanela u tshila ngayo. (2 Vhakor. 1:24) Nṱhani hazwo, ndi u ṋea Vhakriste ngavho vhulivhisi ha Maṅwalo uri vhu vha thuse u ita phetho dzavhuḓi na u ṱuṱuwedza uri tshivhidzoni hu dzudzanyee nahone hu vhe na mulalo. (1 Vhakor. 14:33, 40) Vhahulwane “vha linda vhutshilo” nga muhumbulo wa uri vha ṱoḓa u thusa muraḓo muṅwe na muṅwe wa tshivhidzo uri u dzule u na vhushaka havhuḓi na Yehova. Nga zwenezwo, vha ḓo ṱavhanya u thusa arali vha tshi vhona uri wahashu wa tshinnani kana wa tshisadzini u khou ḓo ita kana o “ita vhukhakhi.” (Vhagal. 6:1, 2; Yuda 22) Vhukuma, zwenezwi ndi zwiitisi zwavhuḓi zwa u ‘thetshelesa vhane vha ranga phanḓa’!—Vhalani Vhaheberu 13:17.

8. Vhahulwane vha tsireledza hani sambi ḽa Mudzimu?

⁸ Muapostola Paulo, ane a vha mulisa wa muya, o ṅwalela vhahawe vha ngei Kolosa uri: “Itani vhungoho ha uri hu si vhe na muthu ane a ni thuba nga pfunzo dza maṱali na vhufhura ha sialala ḽa vhathu, u ya nga zwithu zwa mutheo zwa shango, hu si u ya nga Kristo.” (Vhakol. 2:8) Yeneyi tsevho i livhisa ṱhogomelo kha tshiṅwe tshiitisi tshavhuḓi tsha u ṱhogomela nyeletshedzo ya Maṅwalo i bvaho kha vhahulwane. Vha tsireledza sambi nga u thusa vhahashu uri vha dzule vho fhaṱutshela muṅwe na muṅwe ane a nga lingedza u nyadza lutendo lwavho. Muapostola Petro o sevha nga ha “vhaporofita  vha u zwifha” na “vhagudisi vha u zwifha” vhane vha lingedza u “ungeledza vha shayaho nungo” uri vha ite vhukhakhi. (2 Pet. 2:1, 14) Vhahulwane vha ṋamusi vha fanela u ṋea tsevho i fanaho musi zwi tshi ṱoḓea. Samusi vhe vhanna vha Vhakriste vho vhibvaho, vha na tshenzhelo vhutshiloni. Zwiṅwe hafhu, musi vha sa athu vhewa, vho sumbedza uri vha pfesesa Maṅwalo zwavhuḓi nahone vha a fanelea u funza pfunzo i pfalaho. (1 Tim. 3:2; Tito 1:9) U vhibva havho, u linganyisela na vhuṱali vhu bvaho Bivhilini zwi ita uri vha ṋee sambi vhulivhisi vhu pfalaho.

9. Yesu u livhisa hani na u kanzwa tshivhidzo tsha Vhukriste ṋamusi?

⁹ Nga ndangulo yawe, Yehova u ṋea vhahashu vha shango ḽoṱhe zwiḽiwa zwinzhi zwa muya. Nyeletshedzo nnzhi ya Maṅwalo i wanala kha khandiso dzashu. Zwiṅwe hafhu, nga zwiṅwe zwifhinga ndangulo i ṋea vhahulwane vha tshivhidzo vhulivhisi, i tshi shumisa marifhi kana nyeletshedzo i bvaho kha vhalavhelesi vha dalelaho. Nngu dzi wana vhulivhisi vhu pfalaho nga dzenedzo nḓila.

10. Ndi vhuḓifhinduleli vhufhio vhune vhalisa vha muya vha vha naho malugana na vhe vha xelana na sambi?

¹⁰ Nga nḓila ya lwa muya, vhalavhelesi vha na vhuḓifhinduleli ha u tsireledza, u fara zwavhuḓi na u ṱhogomela mutakalo wa miraḓo ya tshivhidzo, zwihuluhulu vhe vha ḓivhaisa kana vhane vha lwala muyani. (Vhalani Yakobo 5:14, 15.) Vhaṅwe vha vhenevho vha nga vha vho xelana na sambi nahone vho  litsha u ṱanganela mishumoni ya Vhukriste. Kha vhuimo ho raloho, naa muhulwane a re na lufuno a nga si shumise nungo dzawe dzoṱhe u ṱoḓa nngu yo xelaho na u i ṱuṱuwedza uri i humele kha sambi, hune ha vha tshivhidzoni? Vhukuma u ḓo ita nga u ralo! Yesu o ri: “Khotsi anga wa ṱaḓulu ha funi hu tshi lovha na muṅwe wa vhenevha vhana.”—Mat. 18:12-14.

11. Ndi ngani zwi khaedu kha vhaṅwe u tevhela vhulivhisi ha vhahulwane?

¹¹ Yehova na Yesu ndi Vhalisa vho fhelelaho. Vhalisa vha vhathu vho vhewaho uri vha ṱhogomele tshivhidzo a vho ngo fhelela. Zwi nga vha khaedu kha vhaṅwe u tevhela vhulivhisi ha vhahulwane. Vhenevho vhathu vha nga amba uri: ‘A vho ngo fhelela u fana na riṋe. Ndi ngani ri tshi fanela u thetshelesa nyeletshedzo yavho?’ Ndi ngoho, vhahulwane a vho ngo fhelela. Naho zwo ralo, ri fanela u vha na mavhonele o teaho nga ha u sa fhelela havho na vhushayanungo havho.

12, 13. (a) Ndi mini zwine zwa nga ambiwa nga ha vhukhakhi ha vhaṅwe vhe vha shumiswa nga Yehova u hwala vhuḓifhinduleli? (b) Ndi ngani vhukhakhi ha vhanna vha re na vhuḓifhinduleli ho ṅwalwa Bivhilini?

¹² Maṅwalo a bvisela khagala vhukhakhi ha vhe Yehova a vha shumisa u livhisa vhathu vhawe vha tshifhingani tsho fhiraho. Sa tsumbo, Davida o vha o vhewa sa khosi na murangaphanḓa wa Isiraele. Naho zwo ralo, o lingea nahone a vha na mulandu wa vhuṱonḓolo na u vhulaha. (2 Sam. 12:7-9) Dovhani ni ṱhogomele muapostola Petro. Naho o vha o ṋewa vhuḓifhinduleli vhuhulwane tshivhidzoni tsha Vhukriste tsha ḓanani ḽa u thoma ḽa miṅwaha, o ita vhukhakhi vhuhulwane. (Mat. 16:18, 19; Yoh. 13:38; 18:27; Vhagal. 2:11-14) Nga nnḓa ha Yesu, a hu na vhathu vhe vha vhuya vha vha vho fhelelaho u bva tshee Adamu na Eva vha vha hone.

¹³ Ndi ngani Yehova o ita uri vhaṅwali vha Bivhili vha ṅwale nga ha vhushayanungo ha vhanna vhe a vha ruma? Mudzimu o ita zwenezwo u itela u sumbedza uri a nga shumisa vhathu vha songo fhelelaho u ranga phanḓa vhathu vhawe. Zwi re zwone ndi uri o zwi ita u bva kale. Nga zwenezwo, a ro ngo fanela u shumisa u sa fhelela ha vhane vha ranga phanḓa vhukati hashu ṋamusi sa tshiitisi tsha u vha gungulela kana u sa vha thetshelesa. Yehova u lavhelela uri ri ṱhonifhe vhenevho vhahashu na u vha thetshelesa.—Vhalani Ekisodo 16:2, 8.

14, 15. Ri nga guda mini kha nḓila ye Yehova a davhidzana ngayo na vhathu vha tshifhingani tsho fhiraho?

¹⁴ U thetshelesa vhane vha ranga phanḓa vhukati hashu ṋamusi ndi zwa ndeme. Humbulani nga ha nḓila ye Yehova a vha a tshi davhidzana ngayo na vhathu zwifhingani zwo fhiraho zwi konḓaho. Musi vhathu Vhaisiraele vha tshi ṱuwa Egipita ḽa kale, vho wana vhulivhisi ha Mudzimu kha Mushe na Aroni. U itela u ponyoka ṱhamu dza fumi, Vhaisiraele vho vha vha tshi fanela u thetshelesa ndaela ya u ḽa zwiḽiwa zwo khetheaho na u ḓodza malofha a nngu dzo ṱhavhiwaho kha mihangammbwa na zwiaramo zwa nnḓu dzavho. A vho ngo pfa ipfi ḽi bvaho ṱaḓulu musi vha tshi wana yeneyo nyeletshedzo. Fhedzi vho vha vha tshi fanela u thetshelesa vhanna vhahulwane vha Isiraele, vhe na vhone vha wana vhulivhisi vhu bvaho kha Mushe. (Ek. 12:1-7, 21-23, 29) Kha honoho vhuimo, Mushe na vhahulwane vho vha vha tshi shuma u ḓivhadza vhathu ndaela dza Yehova. Na vhahulwane vha Vhakriste vha ita mushumo wa ndeme ṋamusi.

¹⁵ Khamusi ni nga kha ḓi humbula nga zwiṅwe zwithu zwi si gathi zwo iteaho Bivhilini musi Yehova a tshi ṋea nyeletshedzo dzi tshidzaho vhutshilo a tshi shumisa vhathu kana vharuṅwa. Kha zwoṱhe zwenezwo, Mudzimu o vhona zwo tea u ṋea vhaṅwe vhuḓifhinduleli.  Vhaḓinḓa vho amba nga dzina ḽawe nahone vha vhudza vhathu vhawe zwine vha fanela u zwi ita u itela u ponyoka makhaulambilu. Edzani u humbula uri naa Yehova a nga si ite zwi fanaho nga Haramagedo? Nga ho ḓoweleaho, vhahulwane vhe vha ṋewa vhuḓifhinduleli ha u imela Yehova kana ndangulo yawe ṋamusi vha fanela u ṱhogomela nga vhuronwane uri vha si shumise luvhi vhuḓifhinduleli he vha ṋewa hone.

16. Ndi ḽifhio ‘ipfi’ ḽine ra fanela u dzula ri tshi ḽi thetshelesa?

¹⁶ Vhathu vha Yehova vha vhumba “sambi ḽithihi” ḽi re nga fhasi ha “mulisa muthihi,” ane a vha Yesu Kristo. (Yoh. 10:16) Yesu o sumbedza uri u ḓo vha na vhafunziwa vhawe “misi yoṱhe u swika vhufheloni ha ano maitele a zwithu.” (Mat. 28:20) Sa Khosi i re ṱaḓulu, u langa zwiitea zwoṱhe zwine zwa ḓo livhisa kha u haṱula tshoṱhe shango ḽa Sathane. U itela uri ri dzule ri na vhuthihi na u tsireledzea kha sambi ḽa Mudzimu, ri fanela u thetshelesa ‘ipfi ḽi re murahu hashu,’ ḽine ḽa ri vhudza nḓila ine ra fanela u i dzhia. Heḽi ‘ipfi’ ḽi katela zwine muya mukhethwa wa Mudzimu wa amba zwone samusi zwo sumbedzwa Bivhilini na zwe Yehova na Yesu vha zwi amba vha tshi shumisa vhalisa vha re nga fhasi havho vhe vha vha vhea.—Vhalani Yesaya 30:21; Nzumbululo 3:22.

17, 18. (a) Ndi khombo ifhio ye sambi ḽa sedzana nayo, fhedzi ri nga vha na fulufhelo ḽifhio? (b) Hu ḓo haseledzwa zwifhio kha thero i tevhelaho?

¹⁷ Bivhili i ri Sathane u dzula a tshi khou mona-mona “sa ndau i vhombaho, a tshi ṱoḓa ane a nga mu mila.” (1 Pet. 5:8) Sa ḽivhanda ḽi re na nḓala, u dodela sambi, o lindela tshibuli tsha u fara dzo kuleaho nungo kana dzo xelaho. Tshenetsho ndi tshiitisi tshihulwane tshi itaho uri ri dzule tsini-tsini na sambi, na “mulisa na mulavhelesi wa vhutshilo ha[shu].” (1 Pet. 2:25) Malugana na vho ponyokaho maṱungu mahulu, Nzumbululo 7:17 i ri: “Ngwana [Yesu] . . . i ḓo vha lisa, ya vha isa zwisimani zwa maḓi a vhutshilo. Huno Mudzimu u ḓo phumula miṱodzi yoṱhe maṱoni avho.” Ḽeneḽo ndi fulufhedziso ḽavhuḓi vhukuma!

¹⁸ Samusi ro ṱolisisa mushumo wa ndeme vhukuma wa vhahulwane vha Vhakriste sa vhalisa vha muya vha re nga fhasi ha Yesu, ndi zwavhuḓi u vhudzisa uri: Vhenevha vhanna vho nangwaho vha nga ita hani vhungoho ha uri vha fare nngu dza Yesu nga nḓila yavhuḓi? Phindulo i ḓo haseledzwa kha thero i tevhelaho.