1, 2. Ndi ngani vhufhura ho ḓala ṋamusi, nahone vhu ḓa nga nḓila dzifhio? (Sedzani tshifanyiso tsha u thoma.)

VHUKWILA, u sa fulufhedzea na vhufhura ndi zwithu zwo ḓoweleaho kha ano maitele mavhi a zwithu. Zwenezwi a zwo ngo fanela u ri mangadza. Bivhili i zwi bvisela khagala uri Sathane Diabolo u tou vha makone kha u fhura nahone ndi muvhusi wa ano maitele. (1 Tim. 2:14; 1 Yoh. 5:19) Samusi ri tsini na vhufhelo ha ano maitele mavhi, mbiti dza Sathane ndi khulwane ngauri u a zwi ḓivha uri “o salelwa nga tshifhinga tshiṱuku.” (Nzumb. 12:12) Nga zwenezwo, ri fanela u lavhelela uri vhathu vhane vha ṱuṱuwedzwa nga Diabolo vha ḓo ṋaṋa u sa fulufhedzea, zwihuluhulu vha tshi lingedza u fhura vhane vha tikedza vhurabeli ha ngoho.

² Nga zwiṅwe zwifhinga, musi vhaanḓadzi vha mafhungo vha tshi amba nga ha vhashumeli vha Yehova na zwine vha tenda khazwo, kanzhi vha amba mafhungo a xedzaho na mazwifhi. Ṱhoho dza mafhungo a gurannḓa, mbekanyamushumo dza thelevishini na Inthanethe zwi a shumiswa u itela u phaḓaladza mazwifhi. Nga zwenezwo, vhaṅwe vhathu vha a khukhulisea, vha tenda eneo mazwifhi vha sa athu thoma vha wana vhungoho hao.

3. Ndi mini zwine zwa nga ri thusa u lwisana na vhufhura?

³ U itela u lwisana na honoho vhufhura vhu kulaho nungo ha swina ḽashu, ri livhuha vhukuma uri ri na Ipfi ḽa Mudzimu ḽine ḽa “vhuyedza . . . kha u khakhulula.” (2 Tim. 3:16) Ndi zwa ndeme vhukuma u guda kha zwo ṅwalwaho nga muapostola Paulo nga ha vhaṅwe Vhakriste vha ḓanani ḽa u thoma ḽa miṅwaha vha ngei Thesalonika vhe vha fhurwa, vha tshi ṱanganedza mazwifhi. O vha ṱuṱuwedza uri vha ‘songo ṱavhanya vha dzinginyea kha mahumbulele avho.’ (2 Vhathes. 2:1, 2) Ndi ngudo dzifhio dzine ra dzi guda kha ṱhuṱhuwedzo ya Paulo ya lufuno, nahone zwenezwi ri nga zwi shumisa hani kha vhuimo hashu?

4. Vhakriste vha ngei Thesalonika vho sevhiwa hani nga u ḓa ha “ḓuvha ḽa Yehova,” nahone riṋe ri ṋewa tsevho nga nḓila-ḓe?

⁴ Vhurifhini ha u thoma he Paulo a vhu ṅwalela Vhathesalonika, o vha sevha nga ha u ḓa ha “ḓuvha ḽa Yehova.” O vha a sa ṱoḓi vhahawe vha tshi vha swiswini na u sa ḓilugiselela. Nṱhani hazwo, o vha khadeledza sa “vharwa vha tshedza” uri vha ‘dzule vho fhaṱuwa na u dzula vho dzivhuluwa.’ (Vhalani 1 Vhathesalonika 5:1-6.) Ṋamusi ro lindela u fheliswa ha Babele Ḽihulu, muvhuso wa shango wa vhurereli ha mazwifhi. Zwenezwi zwi ḓo vha u thoma ha ḓuvha ḽihulu ḽa Yehova. Zwi a takadza vhukuma uri ri a pfesesa nga ho engedzeaho u ḓadzea ha ndivho ya Yehova. Zwiṅwe hafhu, tshifhinga tshoṱhe tshivhidzoni ri wana khumbudzo dzi re tshifhingani dzine dza ri thusa u dzula ro fhaṱuwa. U thetshelesa dzenedzi tsevho dzine dza dovhololwa tshifhinga tshoṱhe zwi nga khwaṱhisa u ḓiimisela hashu u ṋekedza Mudzimu ‘tshumelo khethwa ri tshi shumisa maanḓa ashu a u humbula.’—Vharoma 12:1.

5, 6. (a) Vhurifhini hawe ha vhuvhili he a vhu ṅwalela Vhathesalonika, Paulo o amba nga ha mini? (b) Ndi mini zwine Mudzimu a ḓo zwi ita hu si kale a tshi shumisa Yesu, nahone ri fanela u ḓivhudzisa mini?

⁵ Nga murahunyana musi o no rumela Vhakriste vha Thesalonika vhurifhi ha u thoma, Paulo o vha rumela ha vhuvhili. Kha honovhu vhurifhi o vha sevha nga ha u ḓa ha maṱungu musi Murena Yesu a tshi ḓo ḓisa khaṱulo ya Mudzimu kha “vhane vha si ḓivhe Mudzimu na vhane vha si thetshelese mafhungo maḓifha.” (2 Vhathes. 1:6-8) Ndima ya vhuvhili ya honovhu vhurifhi i amba nga ha vhaṅwe tshivhidzoni tshenetsho vhe vha “thithiswa” nga ḓuvha ḽa Yehova nahone zwenezwo zwa vha ita uri vha tende uri ḽeneḽo ḓuvha ḽi tsini. (Vhalani 2 Vhathesalonika 2:1, 2.) Vhenevho Vhakriste vha u thoma vho vha vha sa pfesesi nga vhuḓalo u ḓadzea ha ndivho ya Yehova, nahone nga murahu Paulo o amba zwi tevhelaho nga ha vhuporofita musi a tshi ri: “Ngauri ri na nḓivho ṱhukhu i songo fhelelaho nahone ri porofita nga nḓila i songo fhelelaho; musi hu tshi swika zwo fhelelaho, zwi songo fhelelaho zwi ḓo fheliswa.” (1 Vhakor. 13:9, 10) Fhedzi tsevho yo hevhedzwaho ye ya ṅwalwa nga Paulo, muapostola Petro na vhaṅwe vhahashu vha fulufhedzeaho vho ḓodzwaho vha tshifhinga tshenetsho, yo ita uri vha dzule vha tshi fulufhedzea.

⁶ U itela u khakhulula mahumbulele avho, musi Paulo o hevhedzwa o ṱalutshedza uri vhugunei vhuhulwane na “muthu muvhi” zwo vha zwi tshi ḓo vhonala musi hu sa athu ḓa  ḓuvha ḽa Yehova. * Nga murahu, nga tshifhinga tshawe, Murena Yesu o vha a tshi ḓo “fhelisa” vhoṱhe vhe vha fhurwa. Muapostola o bula tshiitisi tsha khaṱulo yavho; tsho vha tshi tsha uri a “vho ngo ṱanganedza na u funa ngoho.” (2 Vhathes. 2:3, 8-10) Ndi zwavhuḓi u ḓivhudzisa uri: ‘Ngoho ndi i funa lungafhani? Naa ndi tshimbidzana na kupfesesele kwashu kwa zwenezwino samusi ku tshi sumbedzwa kha wonoyu magazini na dziṅwe khandiso dzo thewaho Bivhilini dze dza ṋewa tshivhidzo tsha shango ḽoṱhe tsha vhathu vha Mudzimu?’

7, 8. (a) Ndi dzifhio khombo dze Vhakriste vha u thoma vha vha vho sedzana nadzo? (b) Ndi khombo ifhio khulwane ye Vhakriste vha sedzana nayo ṋamusi?

⁷ Vhukuma, Vhakriste vho vha vha sa ḓo sedzana na khombo dza vhagunei na pfunzo dzavho fhedzi, fhedzi vho vha vha tshi ḓo dovha vha sedzana na dziṅwe khombo. Paulo o ṅwalela Timotheo uri “mudzi wa zwithu zwoṱhe zwivhi ndi u funesa tshelede.” Muapostola o amba uri nga “u ṱahulela lwonolwo lufuno vhaṅwe vho ṱutshela lutendo, vha ḓipfisa vhuṱungu vhunzhi zwa tou nga vho tou ḓiṱhavhekanya.” (1 Tim. 6:10) “Mishumo ya ṋama” na yone yo vha i tshi ḓo vha khombo khulwane.—Vhagal. 5:19-21.

⁸ Nga zwenezwo, ni nga dzhiela nṱha zwe Paulo a zwi ombedzela musi a tshi sevha Vhathesalonika nga ha khombo khulwane ya vhathu vhe a vha vhidza uri ndi “vhaapostola vha mazwifhi.” Vhukati havho ho vha hu na vhathu vhe vha vha vha tshi “shanda ngoho u itela u kunga vhafunziwa uri vha vha tevhele.” (2 Vhakor. 11:4, 13; Mish. 20:30) Nga murahu Yesu o khoḓa tshivhidzo tsha Efesa ngauri tsho vha tshi sa koni u “konḓelela vhathu vhavhi.” Zwi re zwone ndi uri vhenevho Vhaefesa vho “linga” vhathu vhe vha vha vhe vhaapostola vha mazwifhi. (Nzumb. 2:2) Zwi takadzaho ndi uri vhurifhini hawe ha vhuvhili he a vhu ṅwalela Vhathesalonika, Paulo o vha ṱuṱuwedza a ri: “Vhahashu, ri khou ni ṋea nyeletshedzo dzinani ḽa Murena Yesu Kristo, uri ni sendele kule na wahashu muṅwe na muṅwe a sa tshili nga maitele a Mudzimu.” O dovha a amba nga ho livhaho nga ha Vhakriste vhe vha vha vha “sa ṱoḓi u shuma.” (2 Vhathes. 3:6, 10) Fhedzi arali vhenevho vhathu vha tshi dzhiiwa vha sa tshili nga maitele a Mudzimu, na vhane vha vha vhagunei vha dzhiiwa nga yeneyo nḓila! Vhukuma, tshifhingani tsho fhiraho, u vha na vhukonani ha tsini na vhenevho vhathu zwo vha zwi na khombo nahone zwo vha zwi tshi fanela u iledzwa—zwenezwo ndi ngoho na ṋamusi.—Mir. 13:20.

9. Ndi ngani ri tshi fanela u ḓiṱhogomela arali muṅwe a thoma u sola kana u sasaladza?

⁹ Ri tsini na maṱungu mahulu na vhufhelo ha ano maitele mavhi, nga zwenezwo, dzenedzo tsevho dzo hevhedzwaho dze dza ṋewa ḓanani ḽa u thoma ḽa miṅwaha ndi dza ndeme vhukuma. A ri ṱoḓi u ‘xelelwa nga ndivho’ ya tshilidzi tshihulwane tsha Yehova nahone ra xelelwa nga fulufhedziso ḽa vhutshilo vhu sa fheli, ḽi re ṱaḓulu kana kha ḽifhasi. (2 Vhakor. 6:1) Arali muṅwe ane a ḓa miṱanganoni ya tshivhidzo a lingedza u ri dzhenisa kha nyambedzano dza u sola kana u sasaladza, ri fanela u ḓiṱhogomela.—2 Vhathes. 3:13-15.

10. Vhakriste vha Thesalonika vho ṱuṱuwedzwa u farelela kha pfunzo dzifhio?

¹⁰ Paulo o ṱuṱuwedza vhahawe vha ngei Thesalonika uri vha ‘ime vho khwaṱha’ nahone vha farelele kha zwe vha zwi guda. (Vhalani 2 Vhathesalonika 2:15.) Ndi dzifhio ‘pfunzo’ dze vha gudiswa dzone? Vhukuma, o vha a sa khou ambela kha pfunzo dzi funzwaho nga vhurereli ha mazwifhi na dzine dza vhonala dzi dza ndeme u fhira dzi wanalaho Maṅwaloni.  Nṱhani hazwo, Paulo o vha a tshi khou ambela kha pfunzo dze ene na vhaṅwe vha dzi wana kha Yesu, u katela na zwe Mudzimu a sudzulusela muapostola uri a zwi ṅwale, zwe zwinzhi zwazwo zwa vha tshipiḓa tsha Maṅwalo o hevhedzwaho. Paulo o khoḓa vhahawe tshivhidzoni tsha Korinta musi a tshi ṅwala uri: “No nkhumbula kha zwithu zwoṱhe na uri ni khou tevhedza zwenezwo zwithu u ya nga nḓila ye nda ni ṋea ngayo.” (1 Vhakor. 11:2) Dzenedzo pfunzo dzi bva tshisimani tshi fulufhedzeaho nahone dzi nga fulufhelwa nga ngoho.

11. Vhaṅwe vhathu vha nga fhurwa nga nḓila-ḓe?

¹¹ Musi a tshi ṅwalela Vhaheberu, Paulo o livhisa ṱhogomelo kha nḓila mbili dzine dza nga ita uri Vhakriste vha xelelwe nga lutendo nahone vha kundelwe u ima vho khwaṱha. (Vhalani Vhaheberu 2:1; 3:12.) O amba nga ha u “pambuwa” na u “ṱutshela.” Tshikepe tshi nga pambuwa nga zwiṱuku nga zwiṱuku philiphilini. Nga zwiṱuku nga zwiṱuku, tshikhala tshi nga engedzea. Kha ḽiṅwe sia, muthu ene muṋe a nga sukumedzela tshikepe tshawe kule na philiphili. Tsumbo dzenedzi mbili dzi sumbedza zwavhuḓi zwine zwa nga itea arali muthu a tenda u fhurwa nahone a tendela fulufhelo ḽawe kha ngoho ḽi tshi fhungudzea.

12. Ndi zwithu zwifhio zwine zwa nga tshinya vhumuya hashu ṋamusi?

¹² Zwenezwo zwi nga kha ḓi vha zwo vha zwo tou ralo na kha vhaṅwe Vhathesalonika. Hu pfi mini ṋamusi? Hu na zwithu zwinzhi zwine zwa nga ri ḽela tshifhinga. Humbulani uri hu fhedzwa awara nnzhi lungafhani vhathu vha tshi khou davhidzana nga Inthanethe, u vhala na u fhindula milaedza ya luṱingo, u tovhola vhuḓimvumvusi kana u dzula u kha zwa mitambo. Zwiṅwe na zwiṅwe kha zwenezwi zwi nga khakhisa Mukriste nahone zwa ita uri a si tsha fhisea. Mvelelo ndi dzifhio? Thabelo dzi bvaho mbiluni, u guda Ipfi ḽa Mudzimu, u ya miṱanganoni na u huwelela mafhungo maḓifha zwi nga thithisea. Ndi mini zwine ra nga zwi ita u itela u iledza u ṱavhanya u dzinginyea kha mahumbulele ashu?

13. Samusi zwo dzula zwo ambiwa, mavhonele a vhathu ndi afhio, nahone ndi mini zwine zwa nga tsireledza lutendo lwashu?

¹³ Tshithu tshithihi tshine ra fanela u tshi ita ndi u dzula ri tshi ṱhogomela tshifhinga tshine ra khou tshila khatsho na mvelelo dza u ḓikonanya na vhathu vhane vha hana u tenda uri ri khou tshila “maḓuvhani a vhufhelo.” Muapostola Petro o ṅwala hezwi malugana na tshino tshifhinga: “Hu ḓo vha na vhagoḓi vhane vha ḓo ni goḓa, vha tshi langwa nga nyemulo dzavho nahone vha ri: ‘Zwe zwa fulufhedziswa nga ha u vha hone hawe zwi ngafhi? U bva nga ḓuvha ḽe vhomakhulukuku washu vha fa, zwithu zwoṱhe zwi kha ḓi bvela phanḓa nga nḓila i fanaho na musi zwithu zwi tshi thoma u sikwa.’” (2 Petro 3:3, 4) U vhala na u guda Ipfi ḽa Mudzimu ḓuvha ḽiṅwe na ḽiṅwe zwi ḓo ri thusa u livhisa ṱhogomelo kha tshifhinga tshine ra khou tshila khatsho—zwa ri ita uri ri ṱhogomele uri ri “maḓuvhani a vhufhelo.” Vhugunei he ha dzula ho ambiwa ho thoma u vha hone kale nahone vhu kha ḓi bvela phanḓa na ṋamusi. “Muthu muvhi” u bvela phanḓa a tshi vha hone nahone u pikisa vhashumeli vha Mudzimu. Nga zwenezwo, ri fanela u dzula ro fhaṱuwa ri tshi zwi ḓivha uri ḓuvha ḽa Yehova ḽi tsini.—Tsef. 1:7.

14. U dzula ro farakanea tshumeloni ya Mudzimu zwi ri tsireledza hani?

¹⁴ Tshenzhelo yo sumbedza uri nḓila ya ndeme ya u dzula ro fhaṱuwa na u iledza u dzinginyea kha mahumbulele ashu ndi u dzula ro farakanea nga u huwelela mafhungo maḓifha a Muvhuso. Nga zwenezwo, musi Kristo Yesu, Ṱhoho ya tshivhidzo a tshi laya vhatevheli vhawe uri vha ite vhathu vha tshaka dzoṱhe vhafunziwa, vha tshi vha funza u tevhela zwoṱhe zwe a vha laya, o vha a tshi khou vha ṋea nyeletshedzo ye ya vha i tshi ḓo vha tsireledza. (Mat. 28:19, 20) U itela u thetshela vhulivhisi hawe, ri fanela u fhisetshela mushumo wa u huwelela. Naa ni humbula u nga vhahaṋu vha ngei Thesalonika vho vha vho fushea nga u sokou huwelela na u funza nga nḓila i si ya vhulondi, zwi tshi nga  ndi zwithu zwine vha khou tou kombetshedzwa? Humbulani zwe zwa ambiwa nga Paulo musi a tshi vha vhudza uri: “Ni songo dzima mulilo wa muya mukhethwa. Ni songo nyadza vhuporofita.” (1 Vhathes. 5:19, 20) Vhuporofita vhune ra vhu guda na u vhu vhudza vhaṅwe vhathu vhu a nyanyula vhukuma!

15. Ndi zwithu zwifhio zwi thusaho zwine ra nga zwi ṱolisisa musi ri tshi ita vhurabeli ha muṱa?

¹⁵ Zwi a pfesesea uri ri ṱoḓa u thusa miṱa yashu u ṱanḓavhudza vhukoni havho tshumeloni ya tsimu. Vhaṅwe vhahashu vha tshinnani na vha tshisadzini vho wana uri nḓila ya u khunyeledza zwenezwo ndi u livhisa ṱhogomelo kha u shumisa tshiṅwe tshipiḓa tsha vhurabeli ha muṱa, nga u ita nḓowe-nḓowe ya vhuḓinḓa. Ni nga wana zwi tshi thusa u haseledza nḓila ine miraḓo ya muṱa ya ḓo vhuyelela ngayo kha vhathu vhe vha sumbedza dzangalelo. Ndi mini zwine vha ḓo zwi amba kha lwendo lu tevhelaho? Ndi thero dzifhio dzine ra nga amba nga hadzo dzine dza ḓo ita uri ṋemuḓi a ṱoḓe u guda zwo engedzeaho? Ndi tshifhio tshifhinga tshavhuḓi tsha u vhuyelela? Vhaṅwe vha shumisa tshiṅwe tsha tshifhinga tshavho tsha vhurabeli ha muṱa u lugiselela miṱangano u itela uri vha ḓivhe zwine zwa ḓo vha zwi tshi khou haseledzwa miṱanganoni yeneyo. Naa ni nga ita zwo engedzeaho u itela u fhindula? U ṱanganela haṋu zwi ḓo khwaṱhisa lutendo lwaṋu nahone zwa ni thusa u iledza u dzinginyea kha mahumbulele aṋu. (Ps. 35:18) Vhukuma, u ṱanganela kha vhurabeli ha muṱa zwi ḓo ri tsireledza kha u sokou humbulela zwithu na kha u timatima.

16. Vhakriste vho ḓodzwaho vha na ṱhuṱhuwedzo ifhio ya u dzula vhe na maanḓa a u humbula?

¹⁶ Musi ri tshi elekanya nga ha nḓila ye Yehova a fhaṱutshedza ngayo vhathu vhawe lwa miṅwaha minzhi nga kupfesesele kwo engedzeaho kwa vhuporofita ha Bivhili, ri nga dzhiela nṱha malamba avhuḓi ane a khou ḓa. Vhaḓodzwa vha na tshilavhelelwa tsha u vha na Kristo ṱaḓulu. Ndi ṱhuṱhuwedzo yavhuḓi vhukuma khavho ya uri vha dzule vhe na maanḓa a u humbula! Vhukuma, ri nga shumisa khavho maipfi e Paulo a a ṅwalela Vhathesalonika: “Vhahashu vha funwaho nga Yehova, tshifhinga tshoṱhe ri a kombetshedzea u livhuha Mudzimu nga nṱhani haṋu, ngauri Mudzimu o ni nanga . . . uri ni tshidzwe nga u ni ita vhakhethwa nga muya wawe na nga u tenda haṋu ngoho.”—2 Vhathes. 2:13.

17. Ndi ṱhuṱhuwedzo ifhio ine na i wana kha maipfi a wanalaho kha 2 Vhathesalonika 3:1-5?

¹⁷ Vhoṱhe vhe vha lavhelela nga maṱo matswuku vhutshilo vhu sa fheli kha ḽifhasi vha fanela u lwela u iledza u ṱavhanya u dzinginyea kha mahumbulele avho. Arali ni na fulufhelo ḽa u tshila kha ḽifhasi, dzhielani nṱha ṱhuṱhuwedzo ya lufuno ye Paulo a i ṅwalela vhaḓodzwa ngae vha ngei Thesalonika. (Vhalani 2 Vhathesalonika 3:1-5.) Muṅwe na muṅwe washu u fanela u dzhiela nṱha eneo maipfi a lufuno. Vhukuma, marifhi e a ṅwalelwa Vhathesalonika a na tsevho ya ndeme nga ha u sokou humbulela zwithu kana mihumbulo i timatimisaho. Samusi ri tshi khou tshila tshifhingani tsha vhufhelo, dzenedzi ndi tsevho dzine Vhakriste ṋamusi vha dzi dzhiela nṱha.