Naa no vhala nga vhuronwane thero dza zwenezwino dza Tshiingamo? Vhonani arali ni tshi nga fhindula mbudziso dzi tevhelaho:

Yesu o huwelela lini kha “mimuya i re dzhele”? (1 Pet. 3:19)

Zwi vhonala u nga tshiṅwe tshifhinga nga murahu ha mvuwo yawe, Yesu o ḓivhadza mimuya mivhi malugana na tshigwevho tshine ya ḓo tshi wana.—6/15, siaṱari 23.

Ndi zwithu zwifhio zwiraru zwine zwa ita uri mbingano ya vhuvhili i vhe i bvelelaho?

Ndi: u lwela uri mbingano yaṋu ya u thoma i si dzhiele vhudzulo mbingano yaṋu ya vhuvhili; u davhidzana na khonani dzaṋu dza kale dzi sa athu ḓowelana na mufarisi waṋu muswa; u fulufhela mufarisi waṋu muswa naho mufarisi waṋu wa u thoma o vha a sa fulufhedzei.—9/1, masiaṱari 10-12.

Yesu u ḓo haṱula lini vhathu sa nngu na mbudzi? (Mat. 25:32)

Yesu u ḓo haṱula vhathu musi a tshi ḓa nga tshifhinga tsha maṱungu mahulu, musi ho no fheliswa vhurereli ha mazwifhi.—7/15, siaṱari 6.

Vhathu vha si na mulayo vhe vha ambiwa kha tshifanyiso tsha goroi na tsheṋe vha ḓo lila na u shenganya maṋo lini? (Mat. 13:36, 41, 42)

Vha ḓo ita zwenezwo tshifhingani tsha maṱungu mahulu musi vha tshi wana uri vha nga si kone u ponyoka yeneyo ndozwo.—7/15, siaṱari 13.

Maipfi a Yesu nga ha mulanda a fulufhedzeaho na wa vhuṱali o thoma u ḓadzea lini? (Mat. 24:45-47)

O thoma u ḓadzea nga murahu ha 1914, hu si nga Pentekoste ya 33 C.E. Nga 1919, mulanda a fulufhedzeaho o vhewa uri a ṱhogomele vha nnḓu yawe, vhane vha katela Vhakriste vhoṱhe vhane vha kanzwiwa muyani.—7/15, masiaṱari 21-23.

Yesu u ḓo vhea lini mulanda a fulufhedzeaho uri a ṱhogomele vha nnḓu yawe?

Zwenezwo zwi ḓo itea tshifhingani tshi ḓaho, tshifhingani tsha maṱungu mahulu musi mulanda a fulufhedzeaho a tshi ṋewa malamba a ṱaḓulu.—7/15, siaṱari 25.

Ndi zwifhio zwine zwa nga itea arali ra sa vhea mikano kha madzangalelo a zwa vhuvhambadzi?

Ri nga thithisea nga hu leluwaho—kana ra si tsha vha na lufuno lu fanaho—zwihuluhulu arali ri tshi takalela mushumo washu wa u ḓitshidza. (Mat. 6:24)—8/15, siaṱari 6.

Nga nnḓa ha maanḓa a bvaho ha Mudzimu, ndi mini zwo thusaho Ṱhanzi dza 230 u ponyoka kha lwendo lulapfu lu bvaho gammbani ya tshengedzo ya Sachsenhausen?

Naho vhoṱhe vho vha vho kulea nungo nga nṱhani ha nḓala na malwadze, vho bvela phanḓa vha tshi ṱuṱuwedzana uri vha kone u konḓelela.—8/15, siaṱari 18.

Ndi ngani mafhungo a Vhaisiraele a u pfuka Mulambo wa Yorodane vha tshi ya Shangoni ḽo Fulufhedziswaho a tshi ri ṱuṱuwedza?

Naho mulambo wo vha u na maḓi manzhi, Yehova o imisa eneo maḓi u itela uri vhathu vhawe vha kone u fhira. Zwenezwo zwi nga vha zwo khwaṱhisa lutendo na fulufhelo ḽavho khae, nahone eneo mafhungo a nga ri kwama mbilu.—9/15, siaṱari 16.

Mukriste a nga “ṅalela Yehova” nga nḓila-ḓe?

Mbiluni yawe, muthu a nga sinyutshela Yehova, muthu onoyo a nga kha ḓi sa ya miṱanganoni tshifhinga tshoṱhe kana a si tsha tikedza nga vhuḓalo nzudzanyo dza vhurabeli ha Yehova.—8/15, siaṱari 11.

Vhuporofita vhu re kha Mixa 5:5 ha vhalisa vha sumbe na vhalanga-vhathu vha malo vhu ḓadzea hani tshifhingani tshashu?

Ri a zwi pfesesa uri ‘vhalisa vha sumbe na vhalanga-vhathu vha malo’ vhe vha ambiwa kha Mixa 5:5 vha ambela kha vhahulwane vha tshivhidzo vho vhewaho, vhane vha khwaṱhisa vhathu vha Mudzimu kha mvutshelo yo dzulaho yo ambiwa ine ya khou vha ḓela.—11/15, siaṱari 20.

Ndi zwifhio zwiṅwe zwiitisi zwa uri ri ṱoḓe Mudzimu?

Ri ṱoḓa vhulivhisi havhuḓi na phindulo dza thaidzo dza vhutshilo hashu, dzine Mudzimu a ri ṋea. U ṱoḓa u ri thusa u itela uri ri kone u tshila zwavhuḓi ro takala nahone u ḓo ḓadzisa mafulufhedziso a re Ipfini ḽawe u itela uri zwenezwi zwi konadzee.—1/1, masiaṱari 4-7.