1. Vhaṅwe vhathu vha ḓidzima mini, nahone ndi ngani?

VHATHU vha ḓidzima zwiṅwe zwithu nga u ḓifunela vha tshi itela zwine zwa vha zwa ndeme khavho. Vhabebi vha shumisa tshifhinga, tshelede na nungo dzavho u itela u vhuyedza vhana vhavho. Musi thangana dzavho dzi tshi tamba na u ḓitakadza, vhatambi vhane vha kha ḓi vha vhaswa vhane vha tama u imelela shango ḽa havho kha dzi-Olympic, vha fhedza awara dzo vhalaho ḓuvha ḽiṅwe na ḽiṅwe vha tshi khou ita nḓowe-nḓowe. Na Yesu o ḓidzima zwiṅwe zwithu a tshi itela zwe zwa vha zwi zwa ndeme khae. Ho ngo ṱoḓa zwithu zwa vhunzhili-nzhili nahone ho ngo vha na vhana. Nṱhani hazwo, o khetha u livhisa ṱhogomelo kha u isa phanḓa zwithu zwi tshimbidzanaho na Muvhuso. (Mat. 4:17; Luka 9:58) Na vhatevheli vhawe vho ḓidzima zwinzhi u itela u tikedza Muvhuso wa Mudzimu. U tikedza wonoyo Muvhuso zwo vha zwi zwa ndeme khavho, nahone vho ḓidzima zwiṅwe zwithu u itela uri vha kone u tikedza Muvhuso nga vhuḓalo nga hune zwa nga konadzea ngaho. (Mat. 4:18-22; 19:27) Ngauralo, ri nga ḓivhudzisa uri, ‘Ndi mini zwine zwa vha zwa ndeme vhutshiloni hanga?’

2. (a) Ndi u ḓidzima hufhio hune ha ṱoḓea kha Vhakriste vhoṱhe vha ngoho? (b) Vhaṅwe vhathu vha ḓidzima zwiṅwe zwithu zwifhio?

² U ḓidzima zwiṅwe zwithu zwi a ṱoḓea kha Vhakriste vhoṱhe vha ngoho nahone ndi zwa ndeme kha u ṱahulela u vha na vhushaka havhuḓi na Yehova. U ḓidzima honoho hu katela u vhetshela thungo tshifhinga tsha u rabela, u vhala Bivhili, vhurabeli ha muṱa, u ya miṱanganoni na vhuḓinḓani ha tsimu. * (Yosh. 1:8; Mat. 28:19, 20; Vhaheb. 10:24, 25) Nga nṱhani ha vhuḓidini hashu na phaṱhutshedzo ya Yehova, mushumo wa u huwelela u khou engedzea nahone vhathu vhanzhi vha bvela phanḓa vha tshi ya ‘thavhani ya nnḓu ya Yehova’ nga vhunzhi. (Yes. 2:2) U itela u tikedza mishumo ya Muvhuso, vhanzhi vha ḓidzima zwiṅwe  zwithu u itela u shuma Bethele, u thusa u fhaṱa Holo dza Muvhuso na Holo dza Guvhangano, u dzudzanya mabuthano kana mushumo wa u thusa musi hu na khombo dza mupo. A zwi ṱoḓei uri ri ite yeneyi mishumo yo engedzeaho u itela u wana vhutshilo vhu sa fheli, fhedzi ndi ya ndeme u itela u tikedza zwithu zwi tshimbidzanaho na Muvhuso.

3. (a) Ri vhuyelwa hani musi ri tshi ḓidzima u itela Muvhuso? (b) Ndi mbudziso dzifhio dzine ra fanela u dzi ṱolisisa?

³ Ṱhoḓea ya u tikedza Muvhuso yo engedzea vhukuma. Zwi a takadza u vhona vhahashu vhanzhi vha tshi ḓidzima zwiṅwe zwithu nga u ḓifunela vha tshi itela Yehova. (Vhalani Psalme ya 54:6.) Muya wonoyo wa mafunda u ri ṋea dakalo samusi ro lindela u ḓa ha Muvhuso wa Mudzimu. (Doit. 16:15; Mish. 20:35) Naho zwo ralo, roṱhe ri fanela u ḓiṱolisisa nga vhuronwane. Naa hu na nḓila dzine ra nga ḓidzima zwo engedzeaho ri tshi itela Muvhuso? Ri khou shumisa hani tshifhinga, tshelede, nungo na vhukoni hashu? Ndi mini zwine ra fanela u zwi ṱhogomela? Kha ri ṱolisise tsumbo ine ra nga i edzisa musi ri tshi ḓidzima nga u ḓifunela nahone ra engedza dakalo ḽashu.

4. Vhaisiraele vho vhuyelwa hani nga u ita zwiṱhavhelo?

⁴ Vhaisiraele vha kale vho vha vha tshi fanela u ṋekedza zwiṱhavhelo u itela uri vha hangwelwe zwivhi zwavho. Zwiṱhavhelo zwo vha zwi zwa ndeme kha vhathu u itela uri vha takalelwe nga Yehova. Zwiṅwe zwa zwenezwi zwo vha zwi khombe-khombe; zwiṅwe u tshi tou ḓifunela. (Lev. 23:37, 38) Vhathu vho vha vha tshi nga ṋekedza zwiṱhavhelo zwa u fhiswa sa zwiṱhavhelo zwa u ḓifunela kana zwifhiwa zwa Yehova. Tsumbo yavhuḓi ya u ita zwiṱhavhelo yo vhonala musi hu tshi ṋekedzwa thembele misini ya Salomo.—2 Koron. 7:4-6.

5. Ndi ifhio ndugiselelo ye Yehova a i itela vhashai?

⁵ Nga lufuno Yehova o vha a tshi pfesesa uri a si vhathu vhoṱhe vhane vha nga mu ṋekedza zwiṱhavhelo zwi fanaho, nahone o vha a tshi ṱoḓa uri muṅwe na muṅwe a bvise zwine a nga kona. Mulayo wa Yehova wo amba uri hu fanela u shululwa malofha a tshifuwo, e a vha e “murunzi wa zwithu zwavhuḓi zwine zwa khou ḓa” nga Murwa wawe, Yesu. (Vhaheb. 10:1-4) Naho zwo ralo, Yehova o vha a tshi tendelana na zwiimo kha nḓila ye wonoyo mulayo wa vha u tshi shuma ngayo. Sa tsumbo, Mudzimu o vha a tshi ṱanganedza tshiṱhavhelo tsha maivha-muronzhe arali muthu a sa koni u bvisa tshiṱhavhelo kha sambi. Nga zwenezwo, na vhashai vho vha vha tshi nga kona u ṋekedza Yehova tshiṱhavhelo vho takala. (Lev. 1:3, 10, 14; 5:7) Naho zwifuwo zwa tshiṱhavhelo  zwo vha zwi sa fani, ho vha hu na zwithu zwivhili zwi ṱoḓeaho kha muthu muṅwe na muṅwe ane a ṋekedza zwiṱhavhelo zwa u ḓifunela.

6. Ndi mini zwe zwa vha zwi tshi ṱoḓea kha muthu muṅwe na muṅwe we a vha a tshi ṋekedza zwiṱhavhelo, nahone u tevhedza zwenezwi zwo vha zwi zwa ndeme lungafhani?

⁶ Tsha u thoma, muthu o vha a tshi fanela u ṋekedza zwa khwine-khwine. Yehova o vhudza lwonolo lushaka uri tshiṱhavhelo naho tshi tshifhio tshi fanela u vha tshi si na “tshinyalo” u itela uri tshi ‘takalelwe.’ (Lev. 22:18-20) Arali tshifuwo tsho vha tshi na “tshinyalo,” tsho vha tshi tshi dzhiiwa sa tshiṱhavhelo tshi sa ṱanganedzei kha Yehova. Tsha vhuvhili, muthu ane a ṋekedza tshenetsho tshiṱhavhelo o vha a tshi fanela u vha o kuna. Arali muthu a songo kuna, o vha a tshi fanela u ṋekedza tshipfumelelo u itela uri a vusuluse vhushaka hawe na Yehova musi a sa athu ita tshiṱhavhelo tsha u ḓifunela. (Lev. 5:5, 6, 15) Zwenezwi zwo vha zwi zwithu zwa ndeme. Yehova o amba uri arali muthu a songo kunaho a ḽa mutendelo, zwine zwa katela tshiṱhavhelo tsha u ḓifunela, o vha a tshi fanela u bviswa kha vhathu vha Mudzimu. (Lev. 7:20, 21) Kha ḽiṅwe sia, arali muthu ane a khou ita tshiṱhavhelo e na vhuimo havhuḓi na Yehova nahone tshenetsho tshiṱhavhelo tsho kuna, onoyo muthu o vha a tshi takala zwihulu.—Vhalani 1 Koronika 29:9.

7, 8. (a) Ndi dakalo ḽifhio ḽine vhanzhi vha ḽi wana musi vha tshi ḓidzima u itela Muvhuso? (b) Ndi zwithu zwifhio zwine ra vha nazwo?

⁷ Ṋamusi, vhathu vhanzhi vha ṱoḓa u ita zwo engedzeaho tshumeloni ya Yehova nga u ḓifunela, nahone zwenezwi zwi takadza Yehova. U shumela vhahashu zwi a vhuyedza. Muṅwe wahashu ane a fhaṱa Holo dza Muvhuso na u thusa vho welwaho nga khombo dza mupo o amba uri zwi a konḓa u ṱalusa nḓila ine a fushea ngayo musi a tshi shumela vhahawe nga dzenedzi nḓila. O amba uri, “U vhona vhahashu vha tshinnani na vha tshisadzini vho takala nahone vha tshi livhuha musi vhe Holoni yavho ya Muvhuso ntswa, kana musi vha tshi thusiwa nga murahu ha khombo ya mupo zwi ita uri wonoyo mushumo woṱhe na vhuḓidini zwi vhe zwa ndeme.”

⁸ Ndangulo ya Yehova ya musalauno yo ḓi dzula i tshi ṱoḓa zwibuli zwa u tikedza mushumo wa Yehova. Nga 1904, Wahashu C. T. Russell o ṅwala uri: “Muṅwe na muṅwe u fanela u ḓidzhia o vhewa nga Murena uri a vhe mukoma wa tshifhinga tshawe, ṱhuṱhuwedzo yawe, tshelede yawe na zwiṅwe, nahone muṅwe na muṅwe u fanela u shumisa dzenedzi talente nga nungo dzawe dzoṱhe, u itela u ṋea Muṋe vhugala.” Naho ri tshi wana phaṱhutshedzo  nnzhi, ri fanela u ita vhuḓidini uri ri kone u ḓidzima ri tshi itela Yehova. (2 Sam. 24:21-24) Zwi nga vha zwavhuḓi arali ra shumisa zwine ra vha nazwo nga nḓila ya khwine.

9. Musi zwi tshi ḓa kha nḓila ine ra shumisa ngayo tshifhinga tshashu, ndi maitele afhio a re kha ndaela ya Yesu i wanalaho kha Luka 10:2-4 ane ra nga a shumisa?

⁹ Tshifhinga tshashu. Zwi dzhia tshifhinga na nungo u ṱalutshedzela na u gandisa khandiso dzashu, u fhaṱa fhethu ha vhurabeli, u dzudzanya mabuthano, u thusa hu re na khombo dza mupo, na u ita miṅwe mishumo ya ndeme. Ri na awara dzo linganyiselwaho nga ḓuvha. Yesu o ri ṋea maitele ane a nga ri thusa. Musi Yesu a tshi rumela vhafunziwa vhawe tsimuni, o vha vhudza uri vha songo “fhedza tshifhinga [vha] tshi khou lumelisa muthu nḓilani.” (Luka 10:2-4) Ndi ngani Yesu o vha a tshi nga ṋea dzenedzi ndaela? Muṅwe mugudi wa Bivhili o amba uri: “U fhambana na riṋe, kha vhathu vha Vhubvaḓuvha u lumelisana ho vha hu sa kateli u khothanyana, kana u khaḓa, fhedzi ho vha hu tshi tou kuvhatedzwa lunzhi, na u khotha, khathihi na u losha. Zwenezwi zwoṱhe zwo vha zwi tshi ṱoḓa tshifhinga tshinzhi.” Yesu o vha a sa khou ṱuṱuwedza vhatevheli vhawe uri vha si vhe na vhukonani. Nṱhani hazwo, o vha a tshi khou vha thusa uri vha vhone uri vha na tshifhinga tshiṱuku nahone vho vha vha tshi fanela u tshi shumisa zwavhuḓi u itela u ṱhogomela zwithu zwa ndeme. (Vhaef. 5:16) Naa ri nga shumisa eneo maitele u itela u vha na tshifhinga tsho engedzeaho tsha u thusa kha mushumo wa Muvhuso?

10, 11. (a) Ndi dzifhio dziṅwe nḓila dzine miṋeelo yashu ya mushumo wa shango ḽoṱhe ya shumiswa ngadzo? (b) Ndi maitele afhio o ṅwalwaho kha 1 Vhakorinta 16:1, 2 ane a nga ri thusa?

¹⁰ Tshelede yashu. Hu ṱoḓea tshelede nnzhi u itela u tikedza mishumo ya Muvhuso. Ṅwaha muṅwe na muṅwe hu shumiswa tshelede nnzhi vhukuma u itela u ṱhogomela tshinyalelo dza vhalavhelesi vha dalelaho, vhavulanḓila vho khetheaho na vharumiwa. U bva nga 1999, ho fhaṱiwa Holo dza Muvhuso dzi fhiraho 24 500 mashangoni a shayaho. Naho zwo ralo, hu kha ḓi ṱoḓea Holo dza Muvhuso dzi ṱoḓaho u vha 6 400. Ṅwedzi muṅwe na muṅwe hu gandiswa magazini dza Tshiingamo na Awake! dzi ṱoḓaho u vha milioni dza 100. Zwenezwi zwoṱhe zwi tikedzwa nga miṋeelo ya u ḓifunela.

¹¹ Muapostola Paulo o ṋea maitele ane a fanela u tevhelwa musi ri tshi bvisa miṋeelo. (Vhalani 1 Vhakorinta 16:1, 2.) Musi o hevhedzwa, o ṱuṱuwedza vhahawe vha ngei Korinta uri vha si lindele vhege i tshi fhela u itela u vhona zwo salaho, fhedzi vha vhetshele thungo tshelede musi vhege i tshi thoma u ya nga zwine vha zwi kona. U fana na ḓanani ḽa u thoma ḽa miṅwaha, vhahashu vha tshinnani na vha tshisadzini ṋamusi vha dzudzanya hu tshee nga phanḓa u ṋeela nga mafunda u ya nga zwiimo zwavho. (Luka 21:1-4; Mish. 4:32-35) Yehova u dzhiela nṱha wonoyu muya wa mafunda.

12, 13. Ndi mini zwine zwa nga ita uri vhaṅwe vha si shumise nungo na vhukoni havho, fhedzi Yehova u ḓo vha thusa hani?

¹² Nungo na vhukoni hashu. Yehova u tikedza vhuḓidini hashu ha u shumisa nungo na vhukoni hashu ri tshi itela Muvhuso. U ri fulufhedzisa u ri thusa musi ri tshi neta. (Yes. 40:29-31) Naa ri ḓipfa u nga vhutsila hashu a ho ngo eḓana u itela u thusa kha wonoyo mushumo? Naa ri humbula u nga vhaṅwe vha a fanelea u ri fhira? Humbulani uri Yehova a nga khwinisa vhukoni ha muṅwe na muṅwe ha nzulele, samusi o zwi ita kha Betsaliele na Oholiaba.—Ek. 31:1-6; sedzani tshifanyiso tsha u thoma.

¹³ Yehova u ri ṱuṱuwedza uri ri ṋee zwa khwine-khwine nahone ri songo dzimana. (Mir. 3:27) Musi hu tshi khou fhaṱululwa thembele, Yehova o vhudza Vhayuda vha ngei Yerusalema uri vha elekanye nga ha zwe vha vha vha tshi khou zwi ita malugana na mushumo wa u fhaṱa. (Hag. 1:2-5) Vho vha vho khakhisea nahone vha songo tsha livhisa ṱhogomelo kha mushumo. Ri ita zwavhuḓi musi ri tshi ṱolisisa arali zwi re zwa ndeme kha riṋe  zwi tshi tshimbidzana na zwi re zwa ndeme kha Yehova. Naa ri nga “elekanya nḓila dze [r]a tshimbila” u itela uri ri kone u ṱanganela nga vhuḓalo mushumoni wa Muvhuso maḓuvhani ano a vhufhelo?

14, 15. (a) Ri ṱuṱuwedzwa hani nga tsumbo ya vhahashu vha shayaho? (b) Ndi mini zwine ra fanela u ḓiimisela zwone?

¹⁴ Vhathu vhanzhi vha dzula fhethu hune vhuleme kana vhushai zwa vha zwithu zwo ḓoweleaho. Ndangulo yashu i lwela u “thusa” hune vhahashu vhane vha dzula mashangoni o raloho vha ṱahelelwa hone. (2 Vhakor. 8:14) Naho zwo ralo, na vhahashu vha shayaho vha dzhiela nṱha ndugelo ya u ṋea. Zwi takadza Yehova musi vhathu vha shayaho vha tshi ṋea vho takala.—2 Vhakor. 9:7.

¹⁵ Kha ḽiṅwe shango ḽi shayaho ḽa ngei Afurika, vhaṅwe vhahashu vha dzhia tshipiḓa tshiṱuku tsha tsimu yavho nahone vha shumisa tshelede ya zwe vha rengisa kha tshenetsho tshipiḓa u itela u tikedza mushumo wa Muvhuso. Kha ḽeneḽo shango, ho vha ho dzudzanywa mushumo wa u fhaṱa Holo ya Muvhuso ye vha vha vha tshi i ṱoḓa nga maṱo matswuku. Vhahashu vha tshinnani na vha tshisadzini vha henefho fhethu vho vha vha tshi ṱoḓa u thusa. Naho zwo ralo, wonoyo mushumo wo vha u tshi fanela u itwa nga tshifhinga tshavho tsha u lima. Samusi vho vha vho ḓiimisela u vha na mukovhe, vho shuma Holoni ya Muvhuso nga masiari, nahone vha ya masimuni nga madekwana u itela u lima. Wonoyo ndi muya wa u ḓidzima vhukuma! Zwenezwi zwi ri humbudza vhahashu vha ḓanani ḽa u thoma ḽa miṅwaha vha ngei Makedonia. Vho vha vhe ‘vhushaini vhuhulwane,’ fhedzi vho humbela u vha na ndugelo ya u thusa kha mushumo we wa vha u tshi khou itwa. (2 Vhakor. 8:1-4) U nga ri muṅwe na muṅwe washu a nga ṋeela ‘zwo eḓanaho phaṱhutshedzo ye Yehova a mu ṋea.’—Vhalani Doiteronomio 16:17.

16. Ri nga vha hani na vhungoho ha uri u ḓidzima hashu zwi a ṱanganedzwa nga Yehova?

¹⁶ Naho zwo ralo, hu na zwine ra fanela u zwi ṱhogomela. U fana na Vhaisiraele vha kale, ri fanela u ita vhungoho ha uri u ḓidzima hashu nga u ḓifunela zwi a ṱanganedzea kha Mudzimu. Ndi ngani zwo ralo? Ri fanela u linganyisela u itela uri ri kone u ḓadzisa vhuḓifhinduleli hashu ha ndeme ha u ṱhogomela miṱa yashu na u gwadamela Yehova. U ṋeela nga tshifhinga na thundu dzashu ri tshi itela vhaṅwe a zwo ngo fanela u ri ita uri ri litshelele miṱa yashu muyani na ṋamani. Zwenezwo zwi ḓo vha zwi tshi amba uri ri khou ṋeela nga zwine ra si vhe nazwo. (Vhalani 2 Vhakorinta 8:12.) Zwiṅwe hafhu, ri fanela u ṱhogomela vhumuya hashu. (1 Vhakor. 9:26, 27) Naho zwo ralo, ivhani na vhungoho ha uri musi ri tshi tshila u tendelana na zwilinganyo zwa Bivhili, u ḓidzima hashu zwi ḓisa dakalo na u fushea huhulwane, nahone zwi “a ṱanganedzwa vhukuma” nga Yehova.

17, 18. Ri ḓipfa hani nga vhahashu vhoṱhe vhane vha ḓidzima u itela Muvhuso, nahone ndi mini zwine roṱhe ra fanela u zwi ṱolisisa?

¹⁷ Vhahashu vha tshinnani na vha tshisadzini vhanzhi vha ‘ḓishulula sa tshinwiwa tshi shelwaho kha tshiṱhavhelo’ nga mushumo wavho wa u tikedza mishumo ya ndeme ya Muvhuso. (Vhafil. 2:17) Ri a livhuha vhukuma vhe vha sumbedza wonoyo muya wa u ṋea. Vhafumakadzi na vhana vha vhahashu vhane vha ranga phanḓa mushumo wa Muvhuso na vhone vha fanela u khoḓelwa muya wavho wa mafunda na u ḓidzima havho.

¹⁸ Hu kha ḓi vha na mushumo munzhi une wa fanela u itwa u itela u tikedza zwithu zwi tshimbidzanaho na Muvhuso. U nga ri roṱhe ri nga ṱolisisa nga thabelo nḓila ine ra nga ṱanganela ngayo nga vhuḓalo nga hune zwa nga konadzea ngaho. Ni nga vha na fulufhelo ḽa uri malamba ndi mahulwane zwino nahone a ḓo vha mahulwanesa “kha maitele a zwithu a ḓaho.”—Marko 10:28-30.