1, 2. Muvhuso wa Mudzimu u ḓo khunyeledza mini, nahone ndi ngani ri tshi nga vha na vhungoho ha uri wonoyo Muvhuso u ḓo ḓa?

MUSI Yesu Kristo e thavhani i re tsini na Kapernaume nga tshimedzi tsha 31 C.E., o gudisa vhatevheli vhawe u rabela nga heyi nḓila: “Muvhuso wau nga u ḓe.” (Mat. 6:10) Ṋamusi, vhathu vhanzhi vha a timatima arali Muvhuso u tshi ḓo ḓa. Naho zwo ralo, ri na vhungoho ha uri thabelo dzashu dzi bvaho mbiluni dza uri Muvhuso wa Mudzimu u ḓe dzi ḓo fhindulwa.

² Yehova u ḓo shumisa wonoyo Muvhuso u itela u ṱanganya muṱa wawe wa ṱaḓulu na wa ḽifhasi. Yeneyo ndivho ya Mudzimu i ḓo ḓadzea. (Yes. 55:10, 11) Zwi re zwone ndi uri Yehova o no ḓi vha Khosi misini yashu! Zwiitea zwi takadzaho zwa miṅwahani ya ḓana yo fhiraho zwi khwaṱhisedza zwenezwi. Mudzimu u khou itela vhathu vhanzhi vha fulufhedzeaho mishumo mihulwane na yavhuḓi. (Sak. 14:9; Nzumb. 15:3) Naho zwo ralo, u vha ha Yehova Khosi zwo fhambana na u ḓa ha Muvhuso wa Mudzimu, we Yesu a ri funza uri ri u rabelele. Zwenezwi zwiitea zwo fhambana hani, nahone zwi ri kwama hani?

3. (a) Yesu o vhewa lini uri a vhe Khosi, nahone ngafhi? (b) Ni nga zwi sumbedza hani uri Muvhuso wo thewa nga 1914? (Sedzani ṱhalutshedzo i re magumoni a siaṱari.)

³ Musi ḓana ḽa vhu-19 ḽa miṅwaha ḽi tsini na u fhela, ho thoma u pfeseswa vhuporofita ha Daniele he ha ṅwalwa miṅwahani ya 2500 yo fhiraho: “Misi ya eneo mahosi, ndi hone Mudzimu  wa ṱaḓulu a tshi ḓo vusa muvhuso une wa sa ḓo tshinyala lini na Iini.” (Dan. 2:44) Vhagudi vha Bivhili vho fhedza mahumi a miṅwaha vha tshi sumbedza uri ṅwaha wa 1914 u ḓo vha u swayeaho. Vhathu vhanzhi vha tshifhingani tshenetsho vho vha vhe na maḓipfele a uri zwithu zwi khou tshimbila zwavhuḓi. Ndi ngazwo muṅwe muṅwali o ṅwala uri: “Shango ḽa 1914 ḽo vha ḽo ḓala fulufhelo na fulufhedziso.” Naho zwo ralo, u vuwa ha Nndwa ya Shango ya U Thoma nga wonoyo ṅwaha zwo ḓadzisa vhuporofita ha Bivhili. Nḓala, midzinginyo na malwadze khathihi na u ḓadzea ha vhuṅwe vhuporofita ha Bivhilini zwo khwaṱhisedza uri Yesu Kristo o thoma u vhusa ṱaḓulu sa Khosi ya Muvhuso wa Mudzimu nga 1914. * Nga u vhea Murwa wawe uri a vhe Khosi ya Vhumessia, Yehova o vha o no vha Khosi nga muṅwe muhumbulo!

4. Ndi mini zwe Khosi ntswa yo vhewaho ya zwi ita u thoma, nahone nga murahu yo livhisa ṱhogomelo kha vhafhio?

⁴ Mushumo wa u thoma wa Khosi ntswa yo vhewaho nga Mudzimu wo vha u wa u lwa na Sathane, Swina ḽa Khotsi awe ḽihulwane. Yesu na vharuṅwa vhawe vho pandela Diabolo na madimoni awe ṱaḓulu. Zwenezwi zwo ita uri ṱaḓulu hu vhe na dakalo ḽihulu, fhedzi zwa ḓisa makhaulambilu a si na vhukono kha ḽifhasi. (Vhalani Nzumbululo 12:7-9, 12.) Nga murahu, Khosi yo livhisa ṱhogomelo kha vhalanda vhayo vha re kha ḽifhasi uri i vha kunakise, i vha funze, na u vha dzudzanyela u ita zwine Mudzimu a zwi funa. Kha ri ṱolisise uri nḓila yavhuḓi ye vha aravha ngayo yeneyi mishumo miraru ya Muvhuso i ri vhetshela hani tsumbo yavhuḓi ṋamusi.

5. Ndi u kunakiswa hufhio he ha itea vhukati ha 1914 na mathomoni a 1919?

⁵ Musi Khosi yo vhewaho yo no bvisa ṱhuṱhuwedzo i si yavhuḓi ya Sathane na madimoni awe ṱaḓulu, Yehova o livhisa Yesu uri a ṱole na u kunakisa vhuimo ha lwa muya ha vhatevheli vhawe vha re kha ḽifhasi. Muporofita Maleaxi o ṱalusa zwenezwi sa u kunakiswa ha lwa muya. (Mal. 3:1-3) Ḓivhazwakale i sumbedza uri zwenezwi zwo itea vhukati ha 1914 na mathomoni a 1919. * U itela uri ri vhe tshipiḓa tsha muṱa wa Yehova wa fhethu hoṱhe, ri fanela u vha ro kuna, kana ri vhakhethwa. (1 Pet. 1:15, 16) A ro ngo fanela u tshikafhadzwa nga vhurereli ha mazwifhi kana politiki dza ḽino shango.

6. Ri wana zwiḽiwa zwa muya nga nḓila-ḓe, nahone ndi ngani zwi zwa ndeme?

⁶ Nga murahu, Yesu o shumisa maanḓa awe sa khosi u itela u vhea “mulanda a fulufhedzeaho na wa vhuṱali.” Onoyo mulanda o vha a tshi ḓo kanzwa vhoṱhe vhane vha vhumba “sambi ḽithihi” ḽi re nga fhasi ha ṱhogomelo ya Yesu nga zwiḽiwa zwa muya zwa tshifhinga tshoṱhe. (Mat. 24:45-47; Yoh. 10:16) U bva nga 1919, mulanda a fulufhedzeaho na wa vhuṱali o hwala vhuḓifhinduleli vhuhulwane ha u kanzwa “vha nnḓu” nga u fulufhedzea. Zwiḽiwa zwinzhi zwa muya zwine ra zwi wana nga nḓila yeneyi zwi a ri kanzwa u itela uri ri vhe na lutendo lwo khwaṱhaho. Zwi khwaṱhisa u ḓiimisela hashu u dzula ro kuna muyani, kha vhuḓifari, muhumbuloni, na ṋamani. Zwenezwi zwiḽiwa zwa muya zwi dovha zwa ri gudisa na u ri lugiselela u ṱanganela nga vhuḓalo mushumoni wa ndeme une wa khou itwa kha ḽifhasi ṋamusi. Naa ni khou shumisa dzenedzi ndugiselelo nga vhuḓalo?

7. Musi Yesu e kha ḽifhasi o thoma mushumo ufhio wa ndeme, nahone wo vha u tshi ḓo bvela phanḓa u swika lini?

⁷ Musi Yesu a tshi thoma vhuḓinḓa hawe ha kha ḽifhasi, o ḓivhadza uri: “Ndi fanela uri ndi ye na kha miṅwe miḓi u itela uri ndi ḓivhadze mafhungo maḓifha a Muvhuso wa Mudzimu, ngauri ndo rumiwa u ita zwenezwo.” (Luka 4:43) Lwa miṅwaha i fhiraho miraru, Yesu o ita  uri wonoyo mushumo u vhe wa ndeme vhutshiloni hawe. O laedza vhafunziwa vhawe a ri: “Musi ni tshi khou tshimbila, ni huwelele, ni ri: ‘Muvhuso wa ṱaḓulu u tsini.’” (Mat. 10:7) Musi o no vuswa vhafuni, Yesu o amba hu tshee nga phanḓa uri vhatevheli vhawe vha ḓo ḓivhadza wonoyu mulaedza “u swika tshipiḓani tsha kule vhukuma tsha ḽifhasi.” (Mish. 1:8) O vha fulufhedzisa uri u ḓo tikedza wonoyu mushumo wa ndeme u swika misini yashu.—Mat. 28:19, 20.

8. Khosi yo ṱuṱuwedza hani vhalanda vhayo vha re kha ḽifhasi uri vha dzhie vhukando?

⁸ Nga 1919, “mafhungo maḓifha . . . a Muvhuso” o vha a tshi khou huwelelwa nga u fhisea. (Mat. 24:14) Khosi yo vha i tshi khou vhusa ṱaḓulu, nahone yo vha yo kuvhanganya tshigwada tshiṱuku tsha vhalanda vho kunakiswaho vha re kha ḽifhasi. Vho aravha nga mafulufulu ndaela ya Yesu i ṱuṱuwedzaho ine ya ri: Huwelelani ḽifhasini ḽoṱhe mafhungo maḓifha a Muvhuso wa Mudzimu wo vhewaho! (Mish. 10:42) Sa tsumbo, vhatikedzi vha Muvhuso vha ṱoḓaho u vha 20 000 vho ya buthanoni ḽa tshaka dzoṱhe ngei Cedar Point, Ohio, kha ḽa U.S.A., nga September 1922. Edzani u humbula dakalo ḽavho musi Wahashu Rutherford a tshi ṋekedza nyambo i re na tshiṱoho tshine tsha ri, “Muvhuso” nahone a amba uri: “Vhonani, Khosi i khou vhusa! Ni vhaimeli vhayo vha khagala. Nga zwenezwo ḓivhadzani, ḓivhadzani, ḓivhadzani, Khosi na muvhuso wayo.” Ṱhanzi dzi bvaho kha maṅwe mashango dzi ṱoḓaho u vha 2000 dzo aravha nga u ṱanganela “Tshumeloni” yo khetheaho, dzi tshi dalela mahaya a re vhukule ha khilomithara dza 72 u bva buthanoni. Muṅwe wahashu we a ṱuṱuwedzwa nga yeneyo nyambo o ri: “Ndi nga si vhuye nda hangwa khuwelelo ya u ḓivhadza nga Muvhuso na u fhisea ha vhathu vhe vha vha vho kuvhangana henefho!” Vhanzhi vho vha vha tshi ḓipfa nga nḓila i fanaho.

9, 10. (a) Ndi mini zwe zwa dzudzanywa u itela u gudisa vhahuweleli vha Muvhuso? (b) No vhuyelwa hani nga yeneyi pfunzo?

⁹ Nga 1922, vhahuweleli vha Muvhuso vha fhiraho 17 000 vho vha vha tshi khou huwelela mashangoni a 58. Naho zwo ralo, vho vha vha tshi fanela u gudiswa. Ḓanani ḽa u thoma ḽa miṅwaha, Khosi yo Nangwaho yo ṋea vhatevheli vhayo vhulivhisi vhu pfalaho ha zwine vha fanela u zwi amba, hune vha fanela u huwelela hone, na nḓila ine vha fanela u huwelela ngayo. (Mat. 10:5-7; Luka 9:1-6; 10:1-11) Musi a tshi tevhela yeneyi tsumbo, Yesu u ita vhungoho ha uri vhoṱhe vhane vha ṱanganela mushumoni wa u huwelela nga ha Muvhuso vha wana ndaela na zwishumiswa zwine zwa ṱoḓea u itela uri vha kone u huwelela nga nḓila i bvelelaho. (2 Tim. 3:17) Yesu u shumisa tshivhidzo tsha Vhukriste u itela u gudisa vhalanda vhawe uri vha ye vhuḓinḓani. Iṅwe nḓila ine a vha gudisa ngayo ndi nga Tshikolo tsha Vhuḓinḓa ha lwa Ṱaḓulu, tshine tsha farwa zwivhidzoni zwi fhiraho 111 000 u mona na ḽifhasi. Vha tshi thetshelesa yeneyi ndaela, zwino vhahuweleli vha fhiraho milioni dza sumbe vho shomedzelwa u huwelela na u funza nga nḓila ine ya kunga “vhathu vha mifuda yoṱhe.”—Vhalani 1 Vhakorinta 9:20-23.

 ¹⁰ Nga nnḓa ha Tshikolo tsha Vhuḓinḓa ha lwa Ṱaḓulu, ho thewa zwiṅwe zwikolo zwa Bivhili u itela u gudisa vhahulwane vha zwivhidzo, vhavulanḓila, vhahashu vha tshinnani vha songo vhingaho, vhavhingani vha Vhakriste, miraḓo ya Komiti ya Davhi na vhafumakadzi vhavho, vhalavhelesi vha dalelaho na vhafumakadzi vhavho, na vharumiwa. * Vhagudiswa vha iṅwe kilasi ya Tshikolo Tsha Bivhili Tsha Vhavhingani Vha Vhakriste vho bula nḓila ine vha ḓipfa ngayo nga ha tshenetsho tshikolo, vho ri: “Pfunzo yo khetheaho ye ra i wana yo engedza nḓila ine ra funa ngayo Yehova nahone yo ri shomedzela khwine u thusa vhaṅwe.”

11. Vhahuweleli vha Muvhuso vho kona hani u konḓelela hu sa londwi u pikiswa?

¹¹ Swina ḽine ḽa vha Sathane ḽi vha ḽi tshi khou ḓi zwi vhona musi wonoyu mushumo muhulwane wa u huwelela na u funza nga Muvhuso u tshi khou itwa. Ḽi shumisa nḓila dzo livhaho na dzo dzumbamaho u vutshela mulaedza wa Muvhuso na vhahuweleli vhawo, ḽi tshi lingedza u thivhela wonoyo mushumo. Fhedzi vhuḓidini haḽo a ho ngo bvelela. Yehova o vhea Murwa wawe nṱha ha “mivhuso yoṱhe na vhuvhusi na maanḓa na vhurena.” (Vhaef. 1:20-22) Samusi Yesu e Khosi, u shumisa maanḓa awe u tsireledza na u livhisa vhafunziwa vhawe u itela u vha na vhungoho ha uri zwine Khotsi awe a zwi funa zwi itwe. * Mafhungo maḓifha a khou huwelelwa, nahone vhathu vha dzimilioni vha re na mbilu dzavhuḓi vha khou gudiswa nḓila dza Yehova. Ndi ndugelo yavhuḓi lungafhani u ṱanganela kha wonoyu mushumo muhulwane!

12. Ṱalusani zwiṅwe zwithu zwe zwa khwiniswa ndanguloni u bva tshee Muvhuso wa thewa.

¹² Tshee Muvhuso wa thewa nga 1914, Khosi yo khwinisa nḓila ye vhashumeli vha Mudzimu vha dzudzanywa ngayo u itela u ita zwine zwa funwa nga Khotsi awe. (Vhalani Yesaya 60:17.) Nga 1919, ha vhewa mulanguli wa tshumelo tshivhidzoni tshiṅwe na tshiṅwe u itela u ranga phanḓa mushumo wa u huwelela. Nga 1927, ha dzudzanywa mushumo wa u huwelela nnḓu nga nnḓu Swondaha iṅwe na iṅwe. Nga 1931, vhatikedzi vha Muvhuso vha ṱuṱuwedzwa uri vha engedze vhuḓidini havho musi vha tshi wana dzina ḽo thewaho Maṅwaloni ḽine ḽa ri Ṱhanzi dza Yehova. (Yes. 43:10-12) Nga 1938, u khethwa ha vhanna vhane vha vha na vhuḓifhinduleli zwivhidzoni nga nḓila ya demokirasi zwa dzhielwa vhudzulo nga u khethwa nga nḓila ya lwa ṱaḓulu. Nga 1972, vhuḓifhinduleli ha u lavhelesa tshivhidzo ha ṋewa tshigwada tsha vhahulwane nṱhani ha mulavhelesi muthihi wa tshivhidzo. Vhanna vhoṱhe vha faneleaho vha ṱuṱuwedzwa uri vha ṱanganele kha u ‘lisa sambi ḽa Mudzimu ḽine vha ḽi ṱhogomela.’ (1 Pet. 5:2) Nga 1976, Tshigwada Tshi Langaho tsha khethekanywa tsha vha komiti dza rathi u itela u langa mushumo wa Muvhuso shangoni  ḽoṱhe. Nga ho teaho, Khosi yo vhewaho nga Yehova yo dzudzanya vhalanda vha Muvhuso nga zwiṱuku nga zwiṱuku nga nḓila ya lwa ṱaḓulu.

13. Zwithu zwe zwa khunyeledzwa miṅwahani ya ḓana ya vhuvhusi ha Muvhuso zwi ni kwama hani?

¹³ Edzani u humbula zwe Khosi ya Vhumessia ya zwi khunyeledza miṅwahani ya ḓana ya u thoma ya vhuvhusi hayo. Yo kunakisa vhathu i tshi itela dzina ḽa Yehova. Ya livhisa u huwelelwa ha mafhungo maḓifha a Muvhuso mashangoni a 239 nahone ya gudisa vhathu vha dzimilioni nga ha nḓila dza Yehova. Yo ṱanganya vhalanda vha fulufhedzeaho vha fhiraho milioni dza sumbe, muṅwe na muṅwe wavho o ḓiṋekedzela nga u ḓifunela u ita zwine Khotsi awe a zwi funa. (Ps. 110:3) Vhukuma, mishumo ya Yehova a tshi shumisa Muvhuso wa Vhumessia ndi mihulwane nahone ndi i mangadzaho. Hu na zwiitea zwavhuḓi zwine zwa kha ḓi ḓa!

14. (a) Ri vha ri tshi khou humbela Mudzimu uri a ite mini musi ri tshi rabela ra ri: “Muvhuso wau nga u ḓe”? (b) Ndimana yashu ya ṅwaha wa 2014 i ri mini, nahone ndi ngani yo tea?

¹⁴ Naho Yehova o vhea Murwa wawe Yesu Kristo sa Khosi ya Vhumessia nga 1914, zwenezwo zwo vha zwi sa fhinduli nga vhuḓalo thabelo yashu ya uri “Muvhuso wau nga u ḓe.” (Mat. 6:10) Zwo vha zwo ambiwa hu tshee nga phanḓa Bivhilini uri Yesu u ḓo “vhusa vhukati ha maswina” awe. (Ps. 110:2) Mivhuso ya vhathu ine ya langwa nga Sathane i kha ḓi hanedza Muvhuso. Musi ri tshi rabelela Muvhuso wa Mudzimu uri u ḓe, ri vha ri tshi khou humbela Mudzimu uri Khosi ya Vhumessia na vhane ya vhusa navho, vha fhelise vhuvhusi ha vhathu na vhane vha pikisa Muvhuso vha re kha ḽifhasi. Zwenezwi zwi ḓo ḓadzisa maipfi a re kha Daniele 2:44 ane a amba uri Muvhuso wa Mudzimu “u ḓo pwashakanya mivhuso yoṱhe wa i lozwa.” U ḓo fhelisa madzangano oṱhe a politiki ane a vha maswina awo. (Nzumb. 6:1, 2; 13:1-18; 19:11-21) Tshifhinga tsha uri zwenezwi zwi itee tshi tsini vhukuma. Zwo tea vhukuma uri ndimana ya ṅwaha wa 2014, miṅwaha ya ḓana u bva tshee Muvhuso wa Mudzimu wa thoma ṱaḓulu, i thewe kha Mateo 6:10: “Muvhuso wau nga u ḓe”!

15, 16. (a) Ndi zwiitea zwifhio zwi nyanyulaho zwine zwa ḓo itea tshifhingani tsha Vhuvhusi ha Miṅwahani ya Tshigidi? (b) Ndi vhukando vhufhio ha u fhedzisela vhune Yesu a ḓo vhu dzhia sa Khosi ya Vhumessia, nahone vhukando honoho vhu ḓo amba mini malugana na ndivho ya Yehova ya tsiko yawe yoṱhe?

¹⁵ Musi Khosi ya Vhumessia yo no fhelisa maswina a Mudzimu, i ḓo posa Sathane na madimoni awe mugodini lwa miṅwaha ya tshigidi. (Nzumb. 20:1-3) Samusi yeneyo ṱhuṱhuwedzo mmbi i tshi ḓo vha i si tsheeho, Muvhuso u ḓo shumisa mbuyelo dza tshiṱhavhelo tsha Yesu tsha tshirengululi na u fhelisa mvelelo dza tshivhi tsha Adamu. Khosi i ḓo vusa vha dzimilioni vho eḓelaho mavhiḓani nahone i ḓo dzudzanya mbekanyamushumo ya u vha funza nga ha Yehova. (Nzumb. 20:12, 13) Ḽifhasi ḽoṱhe ḽi ḓo fana na tsimu ya Edeni. Vhathu vhoṱhe vha fulufhedzeaho vha ḓo vha vho fhelelaho.

¹⁶ Musi Vhuvhusi ha Kristo ha Miṅwaha ya Tshigidi vhu tshi fhela, Muvhuso wa Vhumessia u ḓo vha wo swikelela ndivho yawo. Nga murahu ha zwenezwo, Yesu u ḓo ṋea Khotsi awe Muvhuso. (Vhalani 1 Vhakorinta 15:24-28.) Hu ḓo vha hu si tsheena ṱhoḓea ya muimeleli vhukati ha Yehova na vhana vhawe vha re kha ḽifhasi. Vhana vhoṱhe vha Mudzimu vha re ṱaḓulu na vha re kha ḽifhasi vha ḓo vha tshithu tshithihi na Khotsi avho wa ṱaḓulu vhe tshipiḓa tsha muṱa wa fhethu hoṱhe.

17. No ḓiimisela u ita mini malugana na Muvhuso?

¹⁷ Zwiitea zwi nyanyulaho zwa miṅwaha ya ḓana ya vhuvhusi ha Muvhuso zwi ri khwaṱhisedza uri Yehova u khou langa nahone ndivho yawe nga ha ḽifhasi i ḓo ḓadzea. U nga ri ri nga bvela phanḓa ri tshi vha vhalanda vha fulufhedzeaho nahone ra ḓivhadza nga ha Khosi na Muvhuso wayo. Zwenezwi ri zwi ita ri na fulufhelo ḽo khwaṱhaho ḽa uri hu si kale Yehova u ḓo fhindula thabelo yashu i bvaho mbiluni ine ya ri: “Muvhuso wau nga u ḓe”!