Takalelani Mbingano Ya Ngwana!
“Kha ri takale ri pembele . . . ngauri munyanya wa mbingano wa Ngwana wo swika.”—NZUMB. 19:7.
1, 2. (a) Ndi munyanya wa mbingano ya nnyi une wa ḓo ḓisa dakalo ṱaḓulu? (b) Hu takuwa mbudziso dzifhio?
KANZHI zwi dzhia tshifhinga u lugiselela munyanya wa mbingano. Fhedzi ri ḓo livhisa ṱhogomelo kha munyanya wo khetheaho vhukuma—wa vhuhosini. Edzani u humbula! U na miṅwaha i ṱoḓaho u vha 2 000 u tshi khou lugiselelwa. Zwino tshifhinga tsha uri mukwasha a ṱanganywe na muselwa wawe tshi khou sendela nga u ṱavhanya. Hu si kale, muzika u takadzaho u ḓo lila pfamoni ya Khosi nahone mavhuthu a ṱaḓulu a ḓo imba a ri: “Rendani Yah, ngauri Yehova Mudzimu washu, Ramaanḓaoṱhe, o thoma u vhusa sa khosi. Kha ri takale ri pembele ri mu ṋee vhugala, ngauri munyanya wa mbingano wa Ngwana wo swika nahone mufumakadzi wayo o ḓilugisa.”—Nzumb. 19:6, 7.
2 “Ngwana” ine munyanya wayo wa mbingano wa ḓo ḓisa dakalo ṱaḓulu ndi Yesu Kristo. (Yoh. 1:29) O ambara nga nḓila-ḓe u itela wonoyu munyanya? Muselwa wawe ndi nnyi? Nahone o lugiselelwa nga nḓila-ḓe u itela mbingano? Munyanya u ḓo vha ngafhi? Yeneyi mbingano i ḓo ḓisa dakalo ṱaḓulu, fhedzi naa vhane vha vha na fulufhelo ḽa u tshila kha ḽifhasi nga hu sa fheli vha ḓo ṱanganela kha ḽeneḽo dakalo? Ro lavhelela nga maṱo matswuku u wana phindulo dza dzenedzo mbudziso musi ri tshi bvela phanḓa na u ṱolisisa Psalme ya 45.
‘KHANZU DZAWE DZI NA MUNUKHELELO U ḒIFHAHO’
3, 4. (a) Ndi mini zwine zwa ambiwa nga ha khanzu ya mbingano ya Mukwasha, nahone ndi mini zwine zwa engedza dakalo ḽayo? (b) “Vhananyana vha vhakololo” na “mufumakadzi” vhane vha takala na Mukwasha ndi vhonnyi?
3 Vhalani Psalme ya 45:8, 9. Mukwasha ane a vha Yesu Kristo, u ambara khanzu yawe ya vhugala ya mbingano ya vhuhosi. Nga ho fanelaho, zwiambaro zwawe zwi na munukhelelo wavhuḓi u fanaho na wa “mishonga ya munukho wavhuḓi,” i ngaho sa ṋozhe ya mira na kasia, zwe zwa vha zwi tshi shumiswa u ita mapfura makhethwa a u ḓodza ngei Isiraele.—Ek. 30:23-25.
4 Muzika wa ṱaḓulu une wa pfala pfamoni yawe u engedza dakalo ḽine Mukwasha a vha naḽo samusi mbingano yawe i tshi khou sendela. U takala na “mufumakadzi,” tshipiḓa tsha ṱaḓulu tsha ndangulo ya Mudzimu, tshine tsha katela na “vhananyana vha vhakololo,” vhane vha vha vharuṅwa vhakhethwa. Zwi takadza lungafhani u pfa maipfi a bvaho ṱaḓulu a tshi ri: “Kha ri takale ri pembele . . . ngauri munyanya wa mbingano wa Ngwana wo swika”!
MUSELWA O LUGELA MUNYANYA WA MBINGANO
5. “Mufumakadzi wa Ngwana” ndi nnyi?
5 Vhalani Psalme ya 45:10, 11. Ro no ṱalula Mukwasha, fhedzi muselwa ndi nnyi? Ndi muselwa o vhumbwaho nga miraḓo ya tshivhidzo ine ya rangwa phanḓa nga Yesu Kristo. (Vhalani Vhaefesa 5:23, 24.) I ḓo vha tshipiḓa tsha Muvhuso wa Kristo wa Vhumessia. (Luka 12:32) Vhenevha Vhakriste vho ḓodzwaho nga muya vha 144 000, “vha dzula vha tshi tevhela Ngwana huṅwe na huṅwe hune ya ya hone.” (Nzumb. 14:1-4) Vho vha “mufumakadzi wa Ngwana,” nahone vha dzula nae vhudzuloni hawe ha ṱaḓulu.—Nzumb. 21:9; Yoh. 14:2, 3.
6. Ndi ngani vhaḓodzwa vha tshi ṱaluswa sa “ṅwananyana wa Khosi,” nahone ndi ngani hu tshi pfi vha ‘hangwe lushaka lwa havho’?
6 Muselwa wa tshifhingani tshi ḓaho ha sokou ṱaluswa sa “ṅwananyana” fhedzi, fhedzi u dovha a ṱaluswa sa “ṅwananyana wa Khosi.” (Ps. 45:13) Yeneyi “Khosi” ndi nnyi? Vhakriste vho ḓodzwaho vha dzhiiwa sa “vhana” vha Yehova. (Vharoma 8:15-17) Samusi vha tshi ḓo vha muselwa wa ṱaḓulu, vhaḓodzwa vho vhudzwa uri: “U hangwe lushaka lwa haṋu na muḓi wa khotsi-au” wa ṋama. Vha fanela u dzula vho livhisa mihumbulo yavho kha “zwithu zwa ṱaḓulu, hu si kha zwithu zwa kha ḽifhasi.”—Vhakol. 3:1-4.
7. (a) Kristo o lugisela hani muselwa wawe wa tshifhingani tshi ḓaho? (b) Muselwa u dzhia hani Mukwasha wawe wa tshifhingani tshi ḓaho?
7 Lwa miṅwaha ya maḓana, Kristo o vha a tshi khou lugisela muselwa wawe wa tshifhingani tshi ḓaho u itela mbingano ya ṱaḓulu. Muapostola Paulo o ṱalusa uri Kristo “o funa tshivhidzo nahone a ḓikumedzela tshone, a tshi ita tshikhethwa a tshi kunakisa nga maḓi a ipfi ḽa Mudzimu, a ita uri tshivhidzo tshi vhe tsho nakaho phanḓa hawe, tshi vhe tshi si na tshilavhi kana vhukhakhi kana zwithu zwo raloho, fhedzi tshi fanela uri tshi vhe tshikhethwa na tshi sa solei.” (Vhaef. 5:25-27) Paulo o vhudza Vhakriste vho ḓodzwaho vha ngei Korinta ḽa kale uri: “A thi ṱoḓi uri ni vhe vha muṅwe samusi na Mudzimu a sa zwi ṱoḓi, ngauri ndo ni fulufhedzisa uri ni vhingwe nga munna muthihi, ndi ni ise ha Kristo ni musidzana o kunaho.” (2 Vhakor. 11:2) Khosi Yesu Kristo ane a vha Mukwasha u a takalela “vhuḓi” kana lunako lwa muya lwa muselwa wawe wa tshifhingani tshi ḓaho. Muselwa na ene u mu dzhia sa “muṋe” wawe nahone u a ‘mu losha’ sa munna wawe wa tshifhingani tshi ḓaho.
MUSELWA U ḒISWA PHANḒA HA KHOSI
8. Ndi ngani zwo tea uri muselwa a ṱaluswe sa ‘o ambaraho madzanga’?
8 Vhalani Psalme ya 45:13, 14a. Muselwa u ṱaluswa sa ‘o ambaraho madzanga’ u itela mbingano ya vhuhosi. Kha Nzumbululo 21:2, muselwa u vhambedzwa na muḓi, Yerusalema Muswa, nahone o “ṱamelwa munna wawe.” Wonoyu muḓi wa ṱaḓulu u na “vhugala ha Mudzimu” nahone u penya “sa tombo ḽa thengo khulu, sa tombo ḽa yasipere ḽi vhonadzaho.” (Nzumb. 21:10, 11) U naka ha Yerusalema Muswa ho ṱaluswa zwavhuḓi buguni ya Nzumbululo. (Nzumb. 21:18-21) Ndi ngazwo mupsalme o ṱalusa muselwa sa ‘o ambaraho madzanga’! Yeneyi mbingano ya vhuhosi i itea ṱaḓulu.
9. ‘Khosi’ ine muselwa a iswa khayo ndi nnyi, nahone muselwa o ambara nga nḓila-ḓe?
9 Muselwa u ḓiswa kha Mukwasha ane a vha Khosi ya Vhumessia. O mu lugisela na u mu “kunakisa nga maḓi a ipfi ḽa Mudzimu.” Ndi ‘mukhethwa nahone ha solei.’ (Vhaef. 5:26, 27) Muselwa wawe u fanela u vha o ambarela mbingano. Vhukuma, “nguvho yawe yo lukiwa nga ṱhale dza musuku,” nahone “u ḓiswa phanḓa [ha khosi] o ambara nguvho dza u naka.” Samusi a tshi khou vhingana na Ngwana, “o tendelwa uri a ambare zwiambaro zwa labi ḽi penyaho, ḽo kunaho, ḽavhuḓi—ngauri labi ḽo kunaho ḽi imela mishumo yo lugaho ya vhakhethwa.”—Nzumb. 19:8.
‘MUNYANYA WA MBINGANO WO SWIKA’
10. Munyanya wa mbingano wa Ngwana u ḓo itea lini?
10 Vhalani Nzumbululo 19:7. Mbingano ya Ngwana i ḓo itea lini? Naho ‘mufumakadzi wayo o ḓilugisela’ mbingano, zwine zwa bulwa nga murahu a zwi ṱalusi munyanya wa mbingano. Nṱhani hazwo, zwi ṋea ṱhaluso i pfalaho ya tshipiḓa tsha u fhedzisela tsha maṱungu mahulu. (Nzumb. 19:11-21) Naa zwenezwi zwi amba uri munyanya u itea musi Mukwasha ane a vha Khosi a sa athu khunyeledza gundo ḽawe? Hai. Mabono a re buguni ya Nzumbululo ho ngo ṅwalwa u ya nga u tevhekana ha zwiitea. Kha Psalme ya 45, munyanya wa mbingano wa vhuhosi u itea nga murahu ha uri Khosi, Yesu Kristo, a fare pfumo nahone a kunde maswina awe.—Ps. 45:3, 4.
11. Kristo u ḓo khunyeledza gundo ḽawe nga u tevhekana hufhio ha zwiitea?
11 Nga zwenezwo, ri nga phetha nga ḽa uri zwiitea zwi ḓo tevhekana nga heyi nḓila: Tsha u thoma, hu ḓo haṱulwa “phombwe khulu,” Babele Ḽihulu, muvhuso wa shango wa vhurereli ha mazwifhi. (Nzumb. 17:1, 5, 16, 17; 19:1, 2) Nga murahu, Kristo a ḓisa khaṱulo dza Mudzimu kha maitele mavhi a Sathane oṱhe a re kha ḽifhasi, nga u a fhelisa nga Haramagedo, “nndwa ya ḓuvha ḽihulu ḽa Mudzimu Ramaanḓaoṱhe.” (Nzumb. 16:14-16; 19:19-21) Mafheleloni, Khosi ya Mudziammbi i ḓo khunyeledza gundo ḽayo nga u posa Sathane na madimoni awe mugodini, ya vha vhea vhuimoni vhu fanaho na ha vhafu.—Nzumb. 20:1-3.
12, 13. (a) Mbingano ya Ngwana i ḓo itea lini? (b) Ndi nnyi ane a ḓo takalela mbingano ya Ngwana ngei ṱaḓulu?
12 Musi Vhakriste vho ḓodzwaho vha tshi ṱhaphudza buḓo ḽavho ḽa kha ḽifhasi tshifhingani tsha u vha hone ha Kristo, vha vuselwa ṱaḓulu. Nga murahunyana musi ho no fheliswa Babele Ḽihulu, Yesu u ḓo ḓikuvhanganyela masalela a miraḓo ya tshigwada tsha muselwa. (1 Vhathes. 4:16, 17) Nga zwenezwo, musi hu sa athu vuwa nndwa ya Haramagedo, miraḓo yoṱhe ya “muselwa” i ḓo vha i ṱaḓulu. Nga murahu ha yeneyo nndwa, hu ḓo kona u vha na munyanya wa mbingano wa Ngwana. Wonoyo munyanya u ḓo vha tshiitea tshi takadzaho lungafhani! Nzumbululo 19:9 i ri: “Hu takala vho rambiwaho munyanyani wa mbingano wa Ngwana.” Hu ḓo takala miraḓo ya 144 000 ya tshigwada tsha muselwa. Nahone Mukwasha ane a vha Khosi u ḓo takala vhukuma u vha na tshivhalo tsho fhelelaho tsha khonani dzawe dza vhuhosini dzine dza ḓo ‘ḽa na u nwa nae ṱafulani Muvhusoni wawe’ nga lwa pfanyisedzo. (Luka 22:18, 28-30) Naho zwo ralo, munyanya wa mbingano wa Ngwana a u nga ḓo takalelwa nga Mukwasha na muselwa wawe fhedzi.
13 Samusi ro zwi ṱhogomela mathomoni, mavhuthu a ṱaḓulu a ḓo imba nga vhuthihi a ri: “Kha ri takale ri pembele ri mu ṋee [Yehova] vhugala, ngauri munyanya wa mbingano wa Ngwana wo swika nahone mufumakadzi wayo o ḓilugisa.” (Nzumb. 19:6, 7) Hu pfi mini nga ha vhashumeli vha Yehova vha re kha ḽifhasi? Naa na vhone vha ḓo ṱanganela kha ḽeneḽo dakalo?
“VHA ḒISWA HU TSHI PFALA MIFHULULU”
14. Samusi zwo bulwa kha Psalme ya 45, “vhasidzana” vha muselwa ndi vhonnyi?
14 Vhalani Psalme ya 45:12, 14b, 15. Muporofita Sakaria o dzula o amba uri tshifhingani tsha vhufhelo, vhathu vha tshaka dzoṱhe vha ḓo takalela u ḓikonanya na vha masalela a Isiraele wa muya. O ṅwala uri: “Misi iyo vhanna vha ná fumi vha mirafhorafho ya vha-nnḓa, vha ḓo fara munna muthihi wa Yuda, vha tou mu fara nga dzinguvho, vha ri: Litsha ri tshimbile na vho-inwi, ngauri ro zwi pfa zwauri Mudzimu u na inwi.” (Sak. 8:23) Kha Psalme ya 45:12, hu ambiwa uri vhenevha “vhanna vha ná fumi” ndi “ṅwananyana wa Tiro” na “dzitshakha dza vhapfumi.” Vha ḓisela vha masalela a vho ḓodzwaho zwifhiwa, vha tshi ṱoḓa uri vha vha ṱanganedze nahone vha vha thuse nga lwa muya. U bva nga 1935, vhathu vha dzimilioni vho tendela vha masalela ‘vha tshi vha isa kha zwivhuya.’ (Dan. 12:3) Dzenedzi khonani dzi fulufhedzeaho dza Vhakriste vho ḓodzwaho dzo kunakisa vhutshilo hadzo dza vha vhasidzana vha muya. Vhenevha “vhasidzana” vha muselwa vho ḓiṋekedzela kha Yehova nahone vho ḓisumbedza uri ndi vhalanda vha fulufhedzeaho vha Mukwasha ane a vha Khosi.
15. “Vhasidzana” vha shumisana hani na vha tshigwada tsha muselwa vhane vha kha ḓi vha kha ḽifhasi?
15 Vha masalela a tshigwada tsha muselwa vha livhuha vhenevha “vhasidzana” samusi vha tshi vha thusa u huwelela nga u fhisea “mafhungo maḓifha aya a Muvhuso” ḽifhasini ḽoṱhe. (Mat. 24:14) A si “muya na muselwa fhedzi zwine zwa bvela phanḓa zwi tshi ri: ‘Iḓa!’” fhedzi na a zwi pfaho nga a ri: “Iḓa!” (Nzumb. 22:17) Vhukuma, vha “dziṅwe nngu” vho pfa miraḓo ya tshigwada tsha muselwa o ḓodzwaho i tshi ri “Iḓa!” na vhone vha ṱanganela kha u vhudza vhathu vha ḽifhasi uri “Iḓa!”—Yoh. 10:16.
16. Yehova o ṋea vha dziṅwe nngu ndugelo ifhio?
16 Vha masalela a vho ḓodzwaho vha funa khonani dzavho nahone zwi a vha takadza u ḓivha uri Yehova, Khotsi a Mukwasha o ṋea dzenedzi dziṅwe nngu dzine dza vha kha ḽifhasi ndugelo ya u pembelela munyanya wa mbingano wa Ngwana u re ngei ṱaḓulu. Zwo dzula zwo ambiwa uri vhenevha “vhasidzana” “vha ḓiswa hu tshi pfala mifhululu na khuwa.” Vhukuma, vha dziṅwe nngu vhane vha vha na fulufhelo ḽa u tshila tshoṱhe kha ḽifhasi, vha ḓo vha na mukovhe musi fhethu hoṱhe hu tshi pembelelwa munyanya wa mbingano wa Ngwana ngei ṱaḓulu. Zwi a pfala uri bugu ya Nzumbululo i amba uri miraḓo ya vha “gogo ḽihulu” yo “ima phanḓa ha khuluṋoni na phanḓa ha Ngwana.” Vha itela Yehova tshumelo khethwa muṱani wa kha ḽifhasi wa thembele yawe ya muya.—Nzumb. 7:9, 15.
Munyanya wa mbingano wa Ngwana u ḓisela “vhasidzana” vha muselwa dakalo (Sedzani phara 16)
“VHUDZULONI HA VHO-KHOTSI-AU HU ḒO DZULA VHARWA VHAU”
17, 18. Mbingano ya Ngwana i ḓisa mvelelo dzavhuḓi nga nḓila-ḓe, nahone Kristo u ḓo vha Khosi kha vhafhio tshifhingani tsha Vhuvhusi ha Miṅwaha ya Tshigidi?
17 Vhalani Psalme ya 45:16. “Vhasidzana” vha muselwa wa Kristo wa ṱaḓulu vha ḓo vha na tshiṅwe tshiitisi tsha u takala musi vha tshi vhona mbingano i tshi ḓisa mvelelo dzavhuḓi shangoni ḽiswa. Mukwasha ane a vha Khosi u ḓo livhisa ṱhogomelo kha ḽifhasi nahone a vusa “vho-khotsi” awe vha re kha ḽifhasi, nahone vha ḓo vha “vharwa” vhawe vha kha ḽifhasi. (Yoh. 5:25-29; Vhaheb. 11:35) Kha vhenevho, u ḓo khetha “dzikhosi mashangoni oṱhe.” A zwi timatimisi uri Kristo u ḓo khetha vhaṅwe vhukati ha vhahulwane vha fulufhedzeaho ṋamusi uri vha range phanḓa shangoni ḽiswa.—Yes. 32:1.
18 Tshifhingani tsha Vhuvhusi hawe ha Miṅwaha ya Tshigidi; Kristo u ḓo dovha a vha khotsi na kha vhaṅwe. Zwi re zwone ndi uri vhathu vhoṱhe vhane vha vha kha ḽifhasi vhane vha ḓo wana vhutshilo vhu sa fheli, vha ḓo vhu wana nga nṱhani ha uri vha na lutendo kha tshiṱhavhelo tsha Yesu tsha tshirengululi. (Yoh. 3:16) Nga zwenezwo, u mbo ḓi vha “Randalamo” khavho.—Yes. 9:5, 6.
VHA SUDZULUSELWA U “ḒIVHADZA DZINA ḼAWE”
19, 20. Zwiitea zwi nyanyulaho zwo ṅwalwaho kha Psalme ya 45 zwi kwama hani Vhakriste vhoṱhe vha ngoho ṋamusi?
19 Vhalani Psalme ya 45:1, 17. Vhukuma, zwiitea zwo ṅwalwaho kha Psalme ya 45 zwi kwama Vhakriste vhoṱhe. Vha masalela a vho ḓodzwaho vhane vha kha ḓi vha kha ḽifhasi vha takalela uri hu si kale vha ḓo vha vhathihi na vhahavho na Mukwasha wavho ngei ṱaḓulu. Vha dziṅwe nngu vha sudzuluselwa u thetshelesa Khosi yavho ya vhugala nga ho engedzeaho, nahone vha dzhiela nṱha ndugelo ya u konana na miraḓo ya muselwa wawe ine ya kha ḓi vha kha ḽifhasi. Nga murahu ha mbingano yavho, Kristo na vhane a ḓo vhusa navho vha ḓo ḓisela vhathu vha re kha ḽifhasi phaṱhutshedzo nnzhi.—Nzumb. 7:17; 21:1-4.
20 Samusi ro lavhelela u ḓadzea ha “luimbo lwavhuḓi” lu re malugana na Khosi ya Vhumessia, naa a ri sudzuluselwi u “ḓivhadza dzina ḽawe”? U nga ri ri nga vha vhaṅwe vha vhane vha ḓo ‘renda Khosi zwino na lini na lini.’
