1. Samusi ro vhumbwa nga tshifanyiso tsha Mudzimu, ri na vhukoni vhufhio?

“HOYU u tou vha khotsi awe,” enea ndi maipfi ane a anzela u ambiwa. Vhukuma, vhana vhanzhi vha fana na vhabebi vhavho. Naho zwo ralo, ṅwana hu na zwe a zwi dzhiela kha mme na khotsi awe. Yehova, Khotsi ashu wa ṱaḓulu ndi Muṋei wa vhutshilo. (Ps. 36:9) Na riṋe sa vhana vhawe, hu na zwine ra fana ngazwo nae. Samusi ro vhumbwa nga tshifanyiso tshawe, ri na vhukoni ha u humbula, u dzhia phetho, u vha na vhukonani na u vhu vhulunga.—Gen. 1:26.

2. U vha Khonani ya Yehova zwo thewa kha mini?

² Yehova a nga vha Khonani yashu ya tsini. Honoho vhukonani ho thewa kha lufuno lune Mudzimu a vha na nalwo kha riṋe na lutendo lwashu khae na Murwa wawe. Yesu o amba uri: “Mudzimu o funa shango zwihuluhulu a vhuya a kumedza Murwa wawe mubebwa e eṱhe, uri muṅwe na muṅwe ane a vha na lutendo khae a si fheliswe, fhedzi a wane vhutshilo vhu sa fheli.” (Yoh. 3:16) Hu na tsumbo nnzhi dza vhathu vhe vha vha vhe na vhushaka ha tsini na Yehova. Kha ri ṱolisise tsumbo mbili.

3, 4. Sumbedzani nḓila ye Abrahamu na vhaḓuhulu vhawe vha vha vho fhambana ngayo musi zwi tshi ḓa kha vhukonani havho na Yehova.

³ Yehova o vha a tshi vhidza musimulalushaka na makhulukuku wa Vhaisiraele u ri “Abrahamu khonani yanga.” (Yes. 41:8) Koronika  ya Vhuvhili 20:7 i dovha ya vhidza Abrahamu khonani ya Mudzimu. Ndi mini zwe zwa ita uri onoyo munna wa lutendo a vhe na vhukonani he ha fhedza tshifhinga tshilapfu na Musiki wawe? Ho vha hu lutendo lwawe.—Gen.15:6; vhalani Yakobo 2:21-23.

⁴ Vhaḓuhulu vha Abrahamu vhe vha vha lushaka lwa Isiraele ḽa kale, mathomoni vho vha vha tshi dzhia Yehova sa Khotsi na Khonani yavho. Naho zwo ralo, zwi ṱungufhadzaho ndi uri, vho xelelwa nga vhukonani havho na Mudzimu. Ndi ngani? Nga nṱhani ha uri vho vha vhe si tshe na lutendo kha mafulufhedziso a Yehova.

5, 6. (a) Yehova o vha hani Khonani yaṋu? (b) Ndi mbudziso dzifhio dzine ra fanela u ḓivhudzisa dzone?

⁵ Musi ni tshi guda zwo engedzeaho nga ha Yehova, ni ḓo vha na lutendo lwo khwaṱhaho khae nahone lufuno lwaṋu khae lu ḓo engedzea. Humbulani nga ha tshifhinga tsha musi ni tshi thoma u ḓivha uri Mudzimu ndi Muthu wa vhukuma, muthu ane na nga kona u vhumba vhushaka ha tsini nae. No dovha hafhu na guda uri roṱhe ro bebwa ri na tshivhi nga nṱhani ha u sa thetshelesa ha Adamu. No dovha na pfesesa uri vhathu vhoṱhe vho sendedzwa kule na Mudzimu. (Vhakol. 1:21) Nga murahu, no ṱhogomela uri Khotsi ashu wa ṱaḓulu a re na lufuno haho kule na riṋe nahone u na dzangalelo kha riṋe. Musi ri tshi guda nga ha ndugiselelo yawe ya tshiṱhavhelo tshi rengululaho tsha Yesu na u vha na lutendo khatsho, ro thoma u vha na vhukonani na Mudzimu.

⁶ Musi ri tshi humbula zwa murahu, zwi nga vha zwavhuḓi u ḓivhudzisa uri: ‘Naa ndi khou ita mvelaphanḓa kha vhushaka hanga na Mudzimu? Naa fulufhelo ḽine nda vha naḽo khae ḽo khwaṱha na nḓila ine nda funa ngayo Khonani yanga Yehova zwi khou engedzea ḓuvha ḽiṅwe na ḽiṅwe?’ Muṅwe muthu wa tshifhingani tsha kale we a vha e na vhushaka ha tsini na Yehova ndi Gideoni. Kha ri ṱhogomele tsumbo yawe nahone ri i tevhele.

7-9. (a) Ndi tshenzhelo ifhio i swayeaho ye Gideoni a vha nayo, nahone ho vha na mvelelo ifhio? (Sedzani tshifanyiso tsha u thoma.) (b) Ri nga vha hani na vhukonani na Yehova?

⁷ Muhaṱuli Gideoni o shumela Yehova zwifhingani zwi konḓaho zwa ḓivhazwakale ya Isiraele musi lwonolo lushaka lwo no dzhena Shangoni ḽo Fulufhedziswaho. Vhahaṱuli ndima ya 6 i amba uri muruṅwa wa Yehova o dalela Gideoni ngei Ofura. Nga tshenetsho tshifhinga, vhahura vhane vha vha Vha-Midiani vho vha vhe khombo khulwane kha Vhaisiraele. Nga tshenetsho tshiitisi, Gideoni ho ngo fhula mavhele masimuni, fhedzi o a fhula minḓirivheni, fhethu he a vha a tshi nga a dzumba hone nga u ṱavhanya. O mangala musi muruṅwa a tshi bvelela na u mu vhidza “Muhali,” nahone Gideoni o timatima arali Yehova we a vhofholola Vhaisiraele ngei Egipita a tshi ḓo kona u vha thusa zwa vhukuma nga tshenetsho tshifhinga. Musi muruṅwa a tshi amba o imela Musiki, o khwaṱhisedza Gideoni uri Yehova o vha a tshi ḓo mu tikedza zwa vhukuma.

⁸ Gideoni o ḓivhudzisa uri u ḓo zwi kona hani u ‘lamulela Isiraele zwanḓani zwa Vha-Midiani.’ O wana phindulo yo livhaho i bvaho kha Yehova ine ya ri: “Ndi ḓo ima na iwe, U ḓo kunda Vha-Midiani, zwa nga musi hu tshi kundwa muthu muthihi.” (Vhahaṱ. 6:11-16) Gideoni a tshi kha ḓi timatima uri zwenezwi zwi ḓo itea hani, o ṱoḓa u vhona tshiga. Ṱhogomelani uri kha yeneyo nyambedzano Gideoni ho ngo timatima uri Yehova ndi Muthu wa vhukuma.

⁹ Zwe zwa itea nga murahu zwo khwaṱhisa lutendo lwa Gideoni nahone zwa ita uri a sendele nga ho engedzeaho tsini na Mudzimu. Gideoni o lugisela zwiḽiwa nahone a zwi ṋea muruṅwa. Musi zwiḽiwa zwi tshi swa nga lwa vhuṱolo nge muruṅwa a zwi kwama nga lubaḓa lwawe, Gideoni o ṱhogomela uri muruṅwa ndi muimeleli wa Yehova zwa vhukuma. Gideoni o amba uri: “Yawee, Muṋe wanga Yehova! Khee ndó vhona Muruṅwa wa  Yehova, ra livhana zwifhaṱuwo.” (Vhahaṱ. 6:17-22) Fhedzi, naa zwenezwo zwi nga vha zwo tshinya vhushaka ha Gideoni na Mudzimu? A zwo ngo ralo! Ho itea zwo fhambanaho na zwenezwo. Gideoni o ḓivha Yehova nahone zwa ita uri a vhe na mulalo na Mudzimu. Ri ḓivha zwenezwi ngauri aletare yo fhaṱiwaho nga Gideoni o i vhidza uri—“Yehova Mulalo.” (Vhalani Vhahaṱuli 6:23, 24.) Musi ri tshi elekanya nga zwine Yehova a ri itela zwone ḓuvha ḽiṅwe na ḽiṅwe, ri a zwi ṱhogomela uri ndi Khonani ya vhukuma. U rabela Mudzimu tshifhinga tshoṱhe zwi ita uri ri vhe na mulalo wo engedzeaho nahone vhukonani hashu nae vhu a khwaṱha.

10. U ya nga Psalme ya 15:3, 5, ndi mini zwine Yehova a zwi lavhelela kha riṋe arali ri tshi ṱoḓa u vha khonani dzawe?

¹⁰ Naho zwo ralo, u itela uri Yehova a vhe Khonani yashu, ri fanela u swikelela zwiṅwe zwilinganyo. Samusi zwo ṅwalwa kha Psalme ya 15, Davida o imba nga ha zwine ra fanela u zwi ita u itela uri ri ‘dzhene nḓuni’ ya Yehova, zwine zwa amba u vha khonani ya Mudzimu. (Ps. 15:1) Kha ri livhise ṱhogomelo kha zwenezwo zwithu zwivhili—u iledza zwitshele na u fulufhedzea kha zwoṱhe zwine ra zwi ita. Malugana na enea mafhungo, Davida o amba zwi tevhelaho nga ha ane a ḓo dzhena nḓuni ya Yehova: “[Ndi] ané a si tshinye nga lulimi lwawe. . . . A si na tshanḓa-nguvhoni vhó hwelela a si na mulandu.”—Ps. 15:3, 5.

11. Ndi ngani ri tshi fanela u iledza zwitshele?

¹¹ Kha iṅwe psalme, Davida o sevha a ri: “Linda-ha lulimi lwau lu si tshinye.” (Ps. 34:13) Arali ra kundelwa u pfa yeneyi nyeletshedzo yo hevhedzwaho zwi ḓo ita uri hu si vhe na vhushaka vhukati hashu na Khotsi ashu wa ṱaḓulu o lugaho. Zwitshele ndi pfaneleo khulwane ya Sathane, swina ḽihulwane ḽa Yehova. Ipfi “Diabolo” ḽi bva kha ipfi ḽa Lugerika ḽine ḽa amba “zwitshele.” Musi ri tshi ṱhogomela zwine ra zwi amba kha vhaṅwe zwi ḓo ita uri ri dzule ri na vhushaka ha tsini na Yehova. Zwihuluhulu ri fanela u ṱhogomela nḓila ine ra dzhia ngayo vhanna vho vhewaho tshivhidzoni.—Vhalani Vhaheberu 13:17; Yuda 8.

12, 13. (a) Ndi ngani ri tshi fanela u fulufhedzea kha zwithu zwoṱhe? (b) U fulufhedzea hashu hu nga kwama hani vhaṅwe?

¹² U fulufhedzea na u sa fara vhaṅwe luvhi, ndi pfaneleo ya vhashumeli vha Yehova. Muapostola Paulo o ṅwala uri: “Bvelani phanḓa ni tshi ri rabelela, ngauri ri fulufhela uri ri na luvalo lwo ṱambaho, samusi ri tshi tama u ḓifara nga nḓila i fulufhedzeaho kha zwithu zwoṱhe.” (Vhaheb. 13:18) Samusi ro ḓiimisela “u ḓifara nga nḓila i fulufhedzeaho kha zwithu zwoṱhe,” ri iledza u fara vhahashu vha Vhakriste nga nḓila i si yavhuḓi u itela u ḓivhuyedza. Sa tsumbo, arali ro vha thola, ri ita vhungoho ha uri ri vha fara zwavhuḓi nahone ra vha badela u ya nga zwe ra tendelana ngazwo. Sa Vhakriste, ri a fulufhedzea kha vhe ra vha thola na vhathu vhoṱhe. Arali ro tholiwa nga Mukriste nga riṋe, a ro ngo fanela u ṱoḓa u ḓivhuyedza nga nḓila i si yavhuḓi nga u ṱoḓa ndugelo dzo khetheaho.

¹³ Ri anzela u pfa vhathu vhane vha shumisana na Ṱhanzi dza Yehova vha tshi livhuha nḓila ine vha shumisana navho ngayo. Sa tsumbo, mulanguli wa khamphani khulwane ya zwa u fhaṱa o ṱhogomela uri Ṱhanzi dza Yehova dzi ita zwe dza fulufhedzisa. O amba uri: “Tshifhinga tshoṱhe ni dzula kha fhungo ḽe na ḽi amba.” (Ps. 15:4) U ḓifara ho raloho hu ri thusa u dzula ri na vhukonani na Yehova. Zwiṅwe hafhu, hu dovha ha ḓisela thendo Khotsi ashu wa ṱaḓulu wa lufuno.

14, 15. Musi ri vhuḓinḓani, ri nga thusa hani vhaṅwe uri vha vhe khonani dza Yehova?

¹⁴ Vhathu vhanzhi vhane ra ṱangana navho vhuḓinḓani hashu vha a tenda uri Mudzimu u hone, fhedzi a vha mu dzhii sa Khonani yavho ya tsini. Ri nga vha thusa hani? Ṱhogomelani  ndaela dze Yesu a dzi ṋea vhafunziwa vhawe vha 70 musi a tshi vha ruma nga vhavhili nga vhavhili u itela u huwelela, o ri: “Nnḓu iṅwe na iṅwe ine na dzhena khayo ni ambe ni ri: ‘Ngavhe ino nnḓu i tshi vha na mulalo.’ Arali hu na muthu ane a funa mulalo henefho, mulalo waṋu u ḓo vha khae. Fhedzi arali e siho, mulalo u ḓo vhuyelela kha inwi.” (Luka 10:5, 6) Ri nga kungela vhathu ngohoni nga nḓila ya vhukonani ine ra amba navho ngayo. Zwenezwi zwi nga thusa vhahanedzi uri tshifhingani tshi ḓaho vha ri ṱanganedze.

¹⁵ Musi ri tshi ṱangana na vhathu vhane vha vha kha vhurereli ha mazwifhi kana vhane vha tevhela mikhuvha i siho Maṅwaloni, ri bvela phanḓa ri tshi sumbedza vhukonani na u vha na mulalo navho. Miṱanganoni yashu, ri ṱanganedza nga lufuno vhathu vhane u sa fushea havho nga nḓila ine zwithu zwa itwa ngayo musalauno zwa ita uri vha ṱoḓe u guda zwo engedzeaho nga ha Mudzimu ane ra mu gwadamela. Thero dzi re kha mutevhe wa zwiṱoho “Bivhili I Shandula Vhutshilo” dzi ri ṋea tsumbo nnzhi dzavhuḓi.

16. Ri nga dzhiiwa sa khonani na “vhashumisani” na Yehova nga muhumbulo ufhio?

¹⁶ Vhathu vhane vha shuma vhoṱhe kanzhi vha vha khonani dza tsini. Vhoṱhe vhe vha ḓiṋekedzela kha Yehova vha na ndugelo ya u dzhiiwa sa khonani dzawe na “vhashumisani” nae. (Vhalani 1 Vhakorinta 3:9.) Vhukuma, musi ri tshi ita mushumo wa u huwelela na u ita vhathu vhafunziwa, ri kona u pfesesa khwine pfaneleo dzavhuḓi dza Khotsi ashu wa ṱaḓulu. Ri vhona nḓila ine muya wawe mukhethwa wa ri thusa ngayo u ri shomedzela u ita mushumo washu wa u huwelela mafhungo maḓifha.

17. Zwiḽiwa zwa muya zwine ra zwi wana maguvhanganoni na mabuthanoni ashu zwi sumbedza hani uri Yehova ndi Khonani yashu?

¹⁷ Musi ri tshi ṱanganela nga ho engedzeaho mushumoni wa u ita vhafunziwa, ri ḓipfa ri tsini na Yehova. Sa tsumbo, ri vhona nḓila ine Yehova a thivhela ngayo vhapikisi. Humbulani nga ha zwe zwa itea miṅwahani i si gathi yo fhiraho. Ro vhona zwavhuḓi nḓila ine Mudzimu a ri livhisa ngayo. Ri takalela zwiḽiwa zwinzhi zwa muya zwi sa fheli. Mabuthano na maguvhangano ashu a sumbedza nḓila ine Khotsi ashu a pfesesa ngayo thaidzo na zwishaiwa zwashu. Muṅwe muṱa wo ṅwala zwi tevhelaho u tshi livhuha buthano: “Mbekanyamushumo yo ri kwama vhukuma. Ro vhona nḓila ine Yehova a funa ngayo muṅwe na muṅwe washu nahone u ṱoḓa ri tshi bvelela.” Musi vhaṅwe vhavhingani vha ngei Dzheremane vho no ya buthanoni ḽo khetheaho ngei Ireland, vho livhuha nḓila ya lufuno ye vha ṱanganedzwa na u ṱhogomelwa ngayo, vho ri: “Fhedzi ane ra mu livhuha vhukuma ndi Yehova na Khosi yawe Yesu Kristo. Vho ri ramba uri ri vhe tshipiḓa tsha lwonolu lushaka lu re na vhuthihi. Honovhu vhuthihi a si ha mulomo fhedzi, fhedzi ri vhu takalela ḓuvha ḽiṅwe na ḽiṅwe. Zwe ra zwi tshenzhela buthanoni ḽo khetheaho ngei Dublin zwi ḓo dzula  zwi tshi ri humbudza ndugelo yo khetheaho ine ra vha nayo ya u shumela Mudzimu washu muhulwane na vhoiwe.”

18. Ndi mini zwine ra nga ḓivhudzisa zwone malugana na nḓila ine ra davhidzana ngayo na Yehova?

¹⁸ Vhukonani vhu a khwaṱha musi ri tshi davhidzana zwavhuḓi. Web site dza vhudavhidzano na u ṅwalelana milaedza nga luṱingo ndi zwithu zwo ḓoweleaho vhukuma tshifhingani tshino tsha Inthanethe na thekinolodzhi ya vhudavhidzano. Fhedzi zwenezwi ri zwi vhambedza hani na nḓila ine ra davhidzana ngayo na Khonani yashu ya tsini, Yehova? Vhukuma, ndi “Mupfi wa dzithabelo.” (Ps. 65:2) Fhedzi ri amba nae lungana?

19. Ndi mini zwine zwa ri thusa musi ri tshi konḓelwa u bulela Khotsi ashu wa ṱaḓulu maḓipfele ashu o dzikaho?

¹⁹ Vhaṅwe vhashumeli vha Mudzimu vha a konḓelwa u bula zwi re mbiluni yavho na u amba maḓipfele avho o dzikaho. Fhedzi, zwenezwo ndi zwine Yehova a ṱoḓa ri tshi zwi ita musi ri tshi rabela. (Ps. 119:145; Zwililo 3:41) Naho zwi tshi ri konḓela u amba zwi re mbiluni yashu, ri nga wana thuso. Paulo o ṅwalela Vhakriste vha ngei Roma uri: “Nga zwiṅwe zwifhinga zwi a itea uri ri rabele, fhedzi ri si ḓivhe zwine ra fanela u zwi amba uri ri sumbedze maḓipfele ashu, ri wana thuso nga maanḓa a Mudzimu. Naho zwo ralo, ane a ṱolisisa mbilu u a ḓivha zwine muya wa vha zwone, ngauri u humbelela vhakhethwa u ya nga zwine Mudzimu a zwi funa.” (Vharoma 8:26, 27) U elekanya nga maipfi o ṅwalwaho buguni dza Bivhili dzi ngaho sa Yobo, Dzipsalme na Mirero zwi ḓo ri thusa u bulela Yehova maḓipfele ashu o dzikaho.

20, 21. Maipfi a Paulo a re kha Vhafilipi 4:6, 7 a ri khuthadza hani?

²⁰ Musi ro sedzana na vhuimo vhu tsikeledzaho, kha ri thetshelese nyeletshedzo ya Paulo yo hevhedzwaho ye a i ṅwalela Vhafilipi musi a tshi ri: “Ni songo vhilaela nga tshithu na tshithihi, fhedzi zwoṱhe zwine na zwi ṱoḓa ni humbele Mudzimu nga thabelo khathihi na u livhuha.” Vhukuma, u davhidzana ro vhofholowa nga yeneyo nḓila na Khonani yashu ya tsini zwi ḓo ri khuthadza, samusi Paulo o engedza nga uri: “Mulalo wa Mudzimu une wa fhira u ṱalukanya hoṱhe u ḓo tsireledza mbilu dzaṋu na maanḓa aṋu a muhumbulo nga Kristo Yesu.” (Vhafil. 4:6, 7) U nga ri ri nga dzula ri tshi takalela “mulalo wa Mudzimu” u sa vhambedzwi na tshithu, une wa tsireledza mbilu na maanḓa ashu a muhumbulo.

²¹ Thabelo i ri thusa u ṱahulela vhukonani na Yehova. Nga zwenezwo, kha ri ‘dzule ri tshi rabela.’ (1 Vhathes. 5:17) U nga ri yeneyi ngudo i nga khwaṱhisa vhushaka hashu ha ndeme na Mudzimu na u ḓiimisela hashu u tevhela milayo yawe yo lugaho. Kha ri ḓiṋee tshifhinga tsha u elekanya nga ha phaṱhutshedzo dzine ra vha nadzo ngauri Yehova ndi Khotsi ashu, Mudzimu washu na Khonani yashu zwa vhukuma.