Naa no vhala nga vhuronwane thero dza zwenezwino dza Tshiingamo? Vhonani arali ni tshi nga fhindula mbudziso dzi tevhelaho:

Ngwana ya Paseka yo vha i tshi ḓo ṱhavhiwa lini nga Nisan 14?

Dziṅwe ṱhalutshedzelo dza Bivhili dzi amba uri yo vha i tshi fanela u ṱhavhiwa “vhukati ha vhusiku vhuvhili,” zwine zwa amba uri tshikovhelelo—musi ḓuvha ḽo no kovhela, fhedzi ḽi tshi kha ḓi vhonadza. (Ek. 12:6)—12/15, masiaṱari 18-19.

Ndi maitele a Bivhili afhio mararu ane vhaswa vha nga a shumisa u itela u dzhia phetho dza vhuṱali?

Zwithu zwiraru ndi (1) U ṱoḓa Muvhuso wa Mudzimu na u luga hawe u thoma. (Mat. 6:19-34) (2) U wana dakalo nga u shumela vhaṅwe. (Mish. 20:35) (3) U ḓiphina nga u shumela Mudzimu ni tshee muswa. (Muh. 12:1)—1/15, masiaṱari 19-20.

“Munyanya wa mbingano wa Ngwana” u ḓo vha hone lini? (Nzumb. 19:7)

“Munyanya wa mbingano wa Ngwana” u ḓo vha hone musi Khosi ine ya vha Yesu Kristo a tshi kunda, zwine zwa amba uri musi Babele Ḽihulu ḽo no fheliswa nahone ho no fhira nndwa ya Haramagedo.—2/15, siaṱari 10.

Ndi ngani Vhayuda vha misini ya Yesu vho vha vho “lindela” u swika ha Messia? (Luka 3:15)

A ri na vhuṱanzi ha uri Vhayuda vha ḓanani ḽa u thoma ḽa miṅwaha vho vha vha tshi pfesesa vhuporofita ha Daniele nga ha Messia u fana na riṋe. (Dan. 9:24-27) Vha nga kha ḓi vha vho pfa nḓivhadzo ya muruṅwa kha vhaṅwe vhalisa kana vho pfa zwe Ana muporofita wa mufumakadzi a zwi amba musi a tshi vhona Yesu a tshee muṱuku thembeleni. Zwiṅwe hafhu, vhaḓivhi vha ṋaledzi vho ḓa vha tshi khou ḓo ṱoḓa “khosi yo bebwaho ya Vhayuda.” (Mat. 2:1, 2) Nga murahu, Yohane Mulovhedzi o vha vhudza uri Kristo u ḓo bvelela hu si kale.—2/15, masiaṱari 26-27.

Ri nga iledza hani uri Ee yashu i vhe Hai? (2 Vhakor. 1:18)

Vhukuma, zwiṅwe zwithu zwine zwa vha nṱha ha maanḓa ashu zwi nga ita uri zwi konḓe u ita zwe ra fulufhedzisa. Fhedzi arali ro fulufhedzisa, ri fanela u ita zwoṱhe zwine ra nga kona u ita zwe ra fulufhedza.—3/15, siaṱari 32.

Ri nga iledza hani mulingo wa u sedza zwifanyiso zwi karusaho maḓipfele a zwa vhudzekani?

Vhukando vhuraru vhu thusaho ndi (1) U ṱavhanya ra sedza thungo arali ha bvelela zwifanyiso zwi songo kunaho. (2) U linda muhumbulo nga u livhisa ṱhogomelo kha zwithu zwavhuḓi na u rabela Mudzimu. (3) U linda nḓila dzashu nga u iledza dzifilimu kana Inthanethe dzine dza sumbedza zwifanyiso zwi songo kunaho.—5/1, masiaṱari 12-14.

Ndi masiandoitwa afhio a songo lavhelelwaho ane a nga vha hone arali Mukriste a sia muṱa wawe u itela u hola tshelede nnzhi kha maṅwe mashango?

Arali vhabebi vha nga dzhia phetho ya u fhandekana sa muṱa, vhana vhanga vhaisala maḓipfele nahone hu nga vha na vhuḓifari vhu si havhuḓi. Vhanga thoma u sa ṱhonifha vhabebi vhavho. Nahone vhafarisi vha nga sedzana na milingo ya u ḓifara luvhi nga zwa vhudzekani.—4/15, masiaṱari 19-20.

Ndi mbudziso dzifhio nṋa dzine ra fanela u dzi humbula musi ri tshi ṱangana na vhathu vhuḓinḓani?

Ndi vhafhio vhane nda amba navho? Ndi amba navho vhe ngafhi? Ndi tshifhio tshifhinga tsha khwine tsha u amba na vhathu? Ndi fanela u amba navho hani?—5/15, masiaṱari 12-15.