KHOTSI anga vho bebelwa ngei Graz kha ḽa Austria nga 1899, vho vha vha tshee muswa tshifhingani tsha Nndwa ya Shango ya u Thoma. Vho kombetshedzwa u dzhenela mmbi ya vhuswole ya Dzheremane musi hu tshi thoma Nndwa ya Shango ya Vhuvhili nga 1939. Vho vhulahwa nga 1943 musi vha tshi khou lwa ngei Russia. Zwi ṱungufhadzaho ndi uri ndo xelelwa nga khotsi anga nga yeneyo nḓila musi ndi na miṅwaha mivhili fhedzi. A tho ngo wana tshibuli tsha u vha ḓivha nahone ndo vha ndi tshi tama vhukuma u vha na khotsi, zwihuluhulu ndi tshi ṱhogomela uri vhaṅwe vhatukana tshikoloni vha na vho. Nga murahu, ndo no vha miṅwahani ya vhufumi, ndo khuthadzwa nga u guda nga ha Khotsi ashu wa ṱaḓulu, Khotsi muhulwane ane a si fe.—Hab. 1:12.

Musi ndi na miṅwaha ya sumbe, ndo vha muraḓo wa tshigwada tsha vhaswa tsha Vhatukana vha Masikautu. Vhatukana vha Masikautu ndi dzangano ḽa shango ḽoṱhe ḽo thomiwaho nga 1908 ngei Great Britain nga Robert Stephenson Smyth Baden-Powellndi ane a vha mufareli wa mulanguli wa maswole a Britain. Nga 1916, o thoma tshigwada tsha vhatukana vhaṱuku vha Maisikautu vha eḓanaho na nṋe tshine tsha pfi Wolf Cubs.

Ndo vha ndi tshi takalela mafhelo a vhege musi ri tshi eḓela—madendeni, ra ambara yunifomo na u matsha musi hu tshi khou lila dzingoma. Zwihuluhulu, ndo takalela u vha ndi na vhaṅwe vhatukana vha Masikautu, u katela u imba musi ro dzula muliloni nga madekwana na u tamba mitambo ḓakani. Ro dovha ra guda zwinzhi nga ha mupo, zwe zwa ita uri ndi dzhiele nṱha mishumo ya zwanḓa zwa Musiki washu.

Vhatukana vha Masikautu vha ṱuṱuwedzwa u ḓifara zwavhuḓi ḓuvha ḽiṅwe na ḽiṅwe. Zwenezwi ndi zwe vha vha vho ḓowela u zwi ita. Ro vha ri tshi lumelisana nga maipfi ane a ri: “Dzulani No Ḓilugiselela.” Zwenezwi zwo ntakadza. Kha tshigwada tshashu tshine tsha vha na vhatukana vha fhiraho ḓana, vha ṱoḓaho u vha hafu vho vha vhe Vhakatolika, iṅwe hafu hu Vhaporotesitante nahone muthihi e Mubudda.

U bva nga 1920, ho farwa miṱangano ya shango ḽoṱhe ya Tshikautu kana zwimima nga murahu ha miṅwaha i si gathi. Ndo ya kha muṱangano wa vhusumbe wa Shango wa Tshimima tsha Tshikautu ngei Bad Ischl kha ḽa Austria nga August 1951 na wa vhuṱahe we wa farelelwa ngei Sutton Park tsini na Birmingham kha ḽa England nga August 1957. Nga murahu, Masikautu a ṱoḓaho u vha 33 000 a bvaho mashangoni na madzinguni a 85 o vha e hone. Zwiṅwe hafhu, vhathu vha ṱoḓaho u vha 750 000 vho ri dalela kha tshenetsho tshimima u katela na Mufumakadzi Elizabeth wa ngei England. Kha nṋe zwo vha zwi tshi tou nga ndi vhushaka ha vhurathu na vhukomana ha shango ḽoṱhe. Ndo vha ndi sa zwi ḓivhi uri hu si kale, ndi ḓo vha na vhushaka havhuḓi vhukuma ha vhurathu na vhukomana—ha lwa muya.

Nga tshimedzi tsha 1958, ndo vha ndi tsini na u fhedza u gudiswa sa muṋekedzi wa zwiḽiwa Hodelani ya  Grand Wiesler ngei Graz kha ḽa Austria. Musi ndi henefho, Rudolf Tschiggerl mushumisani na nṋe ane a bika o ṱanziela kha nṋe lu songo dzudzanywaho. Ndo vha ndi sa athu u pfa tshithu nga ha ngoho. O thoma u amba nga pfunzothendwa ya Vhuraruthihi nahone a amba uri a si pfunzo yo thewaho Bivhilini. Ndo ṱaṱisana nae ndi tshi khou imelela Vhuraruthihi nahone ndo vha ndi tshi ṱoḓa u mu sumbedza uri ha khou amba ngoho. Ndo vha ndi tshi takalela mushumisani na nṋe nahone ndo lingedza u mu ṱuṱuwedza uri a humele Kerekeni ya Katolika.

Rudolf we ra vha ri tshi mu vhidza Rudi, o nngwanela Bivhili. Ndo ombedzela uri i fanela u vha i ya Katolika. Nda thoma u i vhala nahone nga u ṱavhanya nda wana uri Rudi o dzhenisa tshibambiri tsha Bivhili tsho gandiswa nga Watchtower Society. A tho ngo tshi takalela ngauri ndo vhona u nga tsho ṅwalwa nga maipfi ane a pfala u nga ndi ngoho ngeno e si ngoho. Naho zwo ralo, ndo vha ndo ḓiimisela u haseledza nae Bivhili. Rudi o pfesesa nahone a si tsha nḓisela khandiso na luthihi. Lwa miṅwedzi i ṱoḓaho u vha miraru, ro vha ri tshi vha na khaseledzo ya Bivhili ye ya vha i tshi fhela nga madekwana.

Musi ndo no fhedza u gudiswa hodelani ya shangoni ḽa hashu ngei Graz, mme anga vho nṋea tshelede ya uri ndi bvele phanḓa tshikoloni tsha vhalanguli vha hodela. Nga zwenezwo, nda pfulutshela Bad Hofgastein, ḓoroboni i re govhani ḽa thavha dza Alps, he tshikolo tsha vha tshi hone. Tsho vha tshi tshi tshimbidzana na Hodela ya Grand ngei Bad Hofgastein, nahone nga zwiṅwe zwifhinga ndo vha ndi tshi ya u shuma henengei u itela u wana tshenzhelo i fhiraho ye nda i guda kilasini.

Rudi o rumela ḓiresi yanga ntswa ofisini ya davhi ya ngei Vienna nahone davhi ḽa i fhirisela kha vhahashu vha tshisadzini vhavhili vhane vha vha vharumiwa, vhane vha vha Ilse Unterdörfer na Elfriede Löhr. * Ḽiṅwe ḓuvha muṱanganedzi wa vhaeni hodelani o mmbidza a mmbudza uri hu na vhafumakadzi vhavhili vha re nnḓa goloini nahone vha ṱoḓa u amba na nṋe. Ndo vha ndo mangala ngauri ndo vha ndi sa vha ḓivhi. Fhedzi ndo ya u vhona uri ndi vho nnyi. Nga murahu, ndo pfa uri vho shuma sa vharumiwa vha Dziṱhanzi vha ngei Dzheremane ḽa Vhunazi musi mushumo u tshi thivhelwa nga phanḓa ha Nndwa ya Shango ya Vhuvhili. Naho nndwa yo vha i sa athu thoma, vho farwa nga mapholisa a tshiphirini a Dzheremane nahone a vha rumela gambani ya tshengedzo ya ngei Lichtenburg. Nga zwenezwo, musi hu tshi khou lwiwa, vho iswa gambani ya ngei Ravensbrück tsini na Berlin.

Vhenevho vhahashu vha tshisadzini vho vha vha tshi eḓana na mme anga, nga zwenezwo ndo vha ndi tshi vha ṱhonifha. Ndi ngazwo ndo vha ndi sa ṱoḓi u vha fhedzela tshifhinga nga u haseledza navho, khamusi nga murahu ha dzivhege kana miṅwedzi nda vha vhudza uri a thi tsha ṱoḓa u bvela phanḓa. Nga zwenezwo, ndo vha humbela uri vha nnḓisele mutevhe wa maṅwalo ane a tshimbidzana na pfunzothendwa ya Katolika wa vhaapostola. Ndo vha vhudza uri ndi ḓo i isa kha mufunzi wa henefho nahone nda haseledza nae. Ndo vhona u nga ndi ḓo kona u ḓivha uri ngoho ndi ifhio.

Pfunzo ya Vharoma ya Katolika ya mutevhe wa vhaapostola i amba uri hu na mutevhe mulapfu wa mupapa u bva kha muapostola Petro. (Kereke yo amba zwi  si zwone nga ha maipfi a Yesu o redzwaho kha Mateo 16:18, 19.) Vhakatolika vha dovha vha amba uri mupapa ha zwifhi musi zwi tshi ḓa kha mafhungo ane a a amba a pfunzothendwa. Ndo tenda zwenezwo, ndi tshi humbula uri mupapa ane Vhakatolika vha mu vhidza Khotsi Mukhethwa a sa zwifhi kha pfunzothendwa dzawe na uri u ḓivhadza uri Vhuraruthihi ndi ngoho, nga zwenezwo zwi fanela u vha ngoho. Fhedzi arali hu mazwifhi zwi amba uri pfunzothendwa ndi mazwifhi. Ndi ngazwo pfunzo nnzhi dza Vhakatolika dza mutevhe wa vhaapostola dzi dza ndeme vhukuma, samusi u vha ngoho na u sa vha ngoho ha dziṅwe pfunzo dza Vhakatolika zwo ḓitika ngadzo!

Musi ndi tshi dalela mufunzi ho ngo kona u fhindula mbudziso dzanga, fhedzi o vula khabodo yawe nahone a dzhia bugu ya pfunzothendwa ya Vhakatolika ine ya amba nga ha mutevhe wa vhaapostola. Ndo ṱuwa nayo hayani, nda i vhala samusi o ri ndi ite nga u ralo nahone nda humela khae ndi na mbudziso nnzhi. Mafheleloni mufunzi o kundelwa u fhindula mbudziso dzanga nahone a ri: “Ndi nga si kone u ita uri ni tende, na inwi ni nga si ite uri ndi tende. . . . Ndi ni tamela mashudu mavhuya!” O vha a si tsha ṱoḓa u haseledza zwinzhi na nṋe.

Nga tshenetsho tshifhinga, ndo vha ndo ḓiimisela u guda Bivhili na Ilse na Elfriede. Vho ngudisa zwinzhi nga ha Khotsi Mukhethwa wa vhukuma wa ṱaḓulu, Yehova Mudzimu. (Yoh. 17:11) Ho vha hu sa athu vha na tshivhidzo henefho fhethu, vhahashu vhavhili vha tshisadzini vho vha vha tshi fara miṱangano muḓini wa muṅwe muṱa u re na dzangalelo. Ho vha hu tshi ṱanganela vha si gathi fhedzi. Vhenevho vhahashu vha tshisadzini vhavhili vho vha vha tshi fara miṱangano, samusi ho vha hu si na wa tshinnani o lovhedzwaho ane a nga ranga phanḓa. Nga zwiṅwe zwifhinga, wahashu wa tshinnani o no bva huṅwe o vha a tshi ḓa a ṋekedza nyambo ya khagala, fhethu ho tou hiriwaho.

Ilse na Elfriede vho thoma u guda na nṋe Bivhili nga October 1958 nahone nda lovhedzwa nga murahu ha miṅwedzi miraru nga January 1959. Musi ndi sa athu lovhedzwa, ndo humbela u ṱuwa navho mushumoni wa nnḓu nga nnḓu u itela u vhona nḓila ine mushumo wa u huwelela wa itwa ngayo. (Mish. 20:20) Nga murahu ha u ṱuwa navho lwa u tou thoma, ndo vha vhudzisa arali ndi tshi nga vha na tsimu yanga ine nda nga shuma khayo. Vho nṋea fhethu hune nda nga huwelela hone nahone ndo vha ndi tshi ya henefho ndi ndoṱhe, nda huwelela nnḓu nga nnḓu na u ita nyendo dza u vhuyelela kha vhane vha vha na dzangalelo. Wahashu wa u thoma we nda ṱuwa nae vhuḓinḓani ha nnḓu nga nnḓu ho vha hu mulavhelesi wa ḽiisela we a ri dalela nga murahu.

Nga 1960, musi ndo no fhedza pfunzo dzanga ngei hodelani, ndo humela hune nda bva hone u itela u lingedza u thusa mashaka anga u guda ngoho ya Bivhili. U swika zwino, a hu na na muthihi we a ḓa ngohoni, fhedzi vhaṅwe vha khou sumbedza u vha na dzangalelo.

Nga 1961, ho vhaliwa vhurifhi tshivhidzoni vhu bvaho ofisini ya davhi vhu ṱuṱuwedzaho u vula nḓila. Ndo vha ndi si ho mbinganoni nahone ndi na mutakalo wavhuḓi, nga zwenezwo nda wana hu si na tshiitisi tsha u sa vha muvulanḓila. Ndo amba na Kurt Kuhn ane a vha mulavhelesi wa ḽiisela, uri zwi nga vha hani arali nda shuma lwa miṅwedzi i si gathi u itela u renga goloi, ine ya ḓo nthusa musi ndi tshi khou vula nḓila. O ri: “Naa Yesu na vhaapostola vho vha vha tshi ṱoḓa goloi u itela u vha tshumeloni ya tshifhinga tsho ḓalaho?” Ndo pfa ndo fhindulea! Ndo dzudzanya u thoma u vula nḓila nga u ṱavhanya. Fhedzi samusi ndo vha ndi tshi shuma awara dza 72 vhege iṅwe na iṅwe hodelani, ndo vha ndi tshi fanela u thoma nda ita dziṅwe tshanduko.

Ndo humbela mutholi wanga arali a tshi nga ntendela uri ndi shume awara dza 60. O tenda khumbelo  yanga nahone a mbadela tshelede i fanaho. Nga murahunyana, ndo mu humbela arali ndi tshi nga shuma awara dza 48 nga vhege. O tenda na yeneyo khumbelo nahone a mbadela tshelede i fanaho. Nga murahu, nda humbela arali ndi tshi nga shuma awara dza 36 nga vhege kana u shuma awara dza 6 kha maḓuvha a 6, nahone o ṱanganedza yeneyo khumbelo. Zwi mangadzaho ndi uri ndo hola muholo u fanaho! Zwi vhonala u nga mutholi wanga o vha a sa ṱoḓi ndi tshi ṱuwa. Nga yeneyo mbekanyo, ndo thoma u vha muvulanḓila wa tshifhinga tshoṱhe. Nga tshenetsho tshifhinga, muvulanḓila o vha a tshi fanela u shuma awara dza 100 nga ṅwedzi.

Nga murahu ha miṅwedzi miṋa, ndo vhewa sa muvulanḓila o khetheaho na mushumeli kha tshivhidzo tshiṱuku vunḓuni ḽa Carinthia, ḓoroboni ya Spittal an der Drau. Nga tshenetsho tshifhinga vhavulanḓila vho khetheaho vho vha vha tshi fanela u shuma awara dza 150 nga ṅwedzi. Ho vha hu si na muvulanḓila ane nda nga shuma nae, fhedzi ndi livhuha thikhedzo ye nda i wana kha wahashu wa tshisadzini ane a pfi Gertrude Lobner, we a vha a tshi shuma sa muthusi wa mushumeli wa tshivhidzo. *

Nga 1963, ndo rambiwa uri ndi ite mushumo wa ḽiisela. Nga zwiṅwe zwifhinga, ndo vha ndi tshi tshimbila nga tshidimela u bva kha tshiṅwe tshivhidzo u ya kha tshiṅwe, ndo fara phuthumennde dzi lemelaho. Vhunzhi ha vhahashu vho vha vhe si na goloi, nga zwenezwo ho vha hu si na muthu we a vha a tshi nga ḓa a nṱanganedza tshiṱitshini tsha tshidimela. U itela u sa ḓiita wa khwine, ndo vha ndi sa ṱoḓi u tshimbila nga thekhisi, u itela u ya fhethu he nda vha ndi tshi ḓo dzula hone, nga zwenezwo ndo tshimbila nga milenzhe u ya henefho fhethu.

Nga 1965, musi ndi sa athu vhinga, ndo rambiwa uri ndi ye kilasini ya vhu-41 Tshikoloni tsha Gilead. Vhunzhi ha vhathu vhe nda vha ndi tshi dzhena navho tshikolo vho vha vha songo vhinga. Zwo mmangadzaho vhukuma ndi uri musi ndi tshi ṱhaphudza tshikolo, ndo rumelwa murahu shangoni ḽa hashu ḽa Austria u itela u bvela phanḓa na mushumo wa ḽiisela. Naho zwo ralo, musi ndi sa athu ṱuwa United States, ndo humbelwa uri ndi tshimbile na mulavhelesi wa ḽiisela lwa vhege nṋa. Ndo takala vhukuma u shuma na Anthony Conte, wahashu a re na lufuno, ane a funa na u fhisetshela tshumelo ya tsimu. Ro shuma roṱhe devhula ha New York muḓanani wa Cornwall.

Musi ndi tshi humela ngei Austria, ndo rumelwa kha ḽiisela ḽe khaḽo nda ṱangana na Tove Merete, wahashu wa tshisadzini wavhuḓi. O alutshela ngohoni u bva e na miṅwaha miṱanu. Musi vhahashu vha tshi ri vhudzisa uri ro ṱangana hani, ri fhindula ri tshi khou swaswa ra ri, “Ro ṱanganyiswa nga ofisi ya davhi.” Ro vhingana nga murahu ha ṅwaha, nga April 1967 nahone ro tendelwa u bvela phanḓa ri tshi ita mushumo wa u dalela.

Nga ṅwaha u tevhelaho, ndo ṱhogomela uri nga nṱhani ha vhuthu vhuhulu ha Yehova, o ndzhia sa murwa wawe wa muya. Nga zwenezwo, ndo thoma vhushaka hanga ho khetheaho na Khotsi anga wa ṱaḓulu na vhane vha “vhidzelele [vha] ri: ‘Aba, Khotsi!’” u ya nga Vharoma 8:15.

Nṋe na Merete ro bvela phanḓa ri tshi shuma roṱhe kha mushumo wa ḽiisela na wa tshiṱiriki u swika nga 1976. Nga zwiṅwe zwifhinga hu vhuriha, ro vha ri tshi fanela u eḓela kamarani i rotholaho vhukuma. Ḽiṅwe ḓuvha ri tshi vuwa ro wana nguvho yo oma nahone yo tshena nga mufemo washu u rotholaho! Mafheleloni,  ro phetha nga ḽa uri ri vhe na hithara ṱhukhu ya muḓagasi, u itela uri hu dudele nga madekwana. Huṅwe fhethu, u itela u ya nḓuni ṱhuku nga madekwana, ro vha ri tshi fanela u tshimbila nnḓa mahaḓani u itela u ya nḓuni ye kanzhi ya vha i tshi rothola vhukuma. Ro vha ri si na nnḓu, nga zwenezwo nga Musumbuluwo kanzhi ro vha ri tshi dzula muṱani wonoyo we ra vha ri tshi khou shuma hone vhukati ha vhege. Nga zwenezwo, nga Ḽavhuvhili nga matsheloni ro vha ri tshi fara lwendo lwa u ya tshivhidzoni tshi tevhelaho.

Ndi a takala musi ndi tshi amba uri miṅwahani yoṱhe mufumakadzi wanga o ntikedza vhukuma tshifhinga tshoṱhe. U funa tshumelo ya tsimu nahone a thi athu vhuya nda mu ṱuṱuwedza uri a ye vhuḓinḓani. U dovha a funa dzikhonani nahone u a vhilaelela vhaṅwe. Yeneyo yo vha thuso khulwane vhukuma.

Nga 1976, ro rambiwa uri ri ye u shuma ofisini ya davhi ḽa Austria ngei Vienna nahone ndo vhewa sa muraḓo wa Komiti ya Davhi. Nga tshenetsho tshifhinga, davhi ḽa Austria ḽo vha ḽi tshi khou ingamela mushumo wa mashango o vhalaho a Vhubvaḓuvha ha Yuropa nahone ḽo vha ḽi tshi dzudzanya u hwala dzi khandiso dzi ya ho kha eneo mashango. Wahashu Jürgen Rundel o vha a tshi ranga phanḓa kha zwenezwi, a tshi sumbedza vhuḓidini vhuhulwane. Ndo wana ndugelo ya u shuma nae nahone nga murahu ndo humbelwa uri ndi vhe mulavhelesi kha mushumo wa u ṱalutshedzela kha nyambo dza fumi dza Vhubvaḓuvha ha Yuropa. Jürgen na mufumakadzi wawe Gertrude, vho bvela phanḓa nga u fulufhedzea vha tshi shuma sa vhavulanḓila vho khetheaho ngei Dzheremane. Nga 1978, davhi ḽa Austria ḽo thoma u gandisa magazini nga nyambo dza rathi kha mutshini muṱuku wa u gandisa. Ro rumela dziṅwe khandiso kha maṅwe mashango e a vha o ita khumbelo. Otto Kuglitsch ane zwino a shuma na mufumakadzi wawe Ingrid ofisini ya davhi ya Dzheremane, o vha e ene ane a tshimbidza zwithu.

Vhahashu vha ngei Vhubvaḓuvha ha Yuropa na vhone vho gandisa khandiso mashangoni avho vha tshi shumisa mutshini wa mimeograph kana nga u shumisa filimu. Zwiṅwe hafhu, vho vha vha tshi ṱoḓa thikhedzo i bvaho kha maṅwe mashango. Yehova o tsireledza wonoyo mushumo nahone ngei davhini ro takalela vhahashu vhe vha shuma nga fhasi ha vhuimo vhu konḓaho na u thivhelwa ha wonoyo mushumo lwa miṅwaha minzhi.

Nga 1989, ndo vha na ndugelo ya u ṱuwa na Wahashu Theodore Jaracz, muraḓo wa Tshigwada Tshilangaho u ya ngei Romania. Tshipikwa tsho vha tshi tsha  u thusa tshigwada tshihulwane uri tshi vhuyelele ndanguloni. Mathomoni a 1949, vho vha vhe na zwiitisi zwo fhamba-fhambanaho zwa u sa ḓiṱanganya na ndangulo nahone vha thoma tshivhidzo tshavho. Naho zwo ralo, vho bvela phanḓa vha tshi huwelela na u lovhedza. Na vhone vho valelwa dzhele nga nṱhani ha u sa dzhia sia ngauri ndi Vhakriste, u fana na vhahashu vhe vha vha vhe miraḓo ya ndangulo, ye ya vha i tshi tendelwa nga ofisi khulwane dza shango ḽoṱhe. Mushumo wo vha u tshee wo thivhelwa ngei Romania, nga zwenezwo ro vha ri tshi ṱangana tshiphirini muḓini wa Wahashu Pamfil Albu, u katela na vhahulwane vhaṋa na vhaimeleli vho tendelwaho vha Komiti ya Shango ḽa Romania. Ro tshimbila na muḓologi Rolf Kellner ane a bva ngei Austria.

Nga madekwana a vhuvhili a yeneyo khaseledzo, Wahashu Albu o luvhelela vhahulwane ngae vhaṋa uri vha dovhe vha vhe na vhuthihi na riṋe musi a tshi ri: “Arali ra sa zwi ita zwino, ri nga si tsha dovha ra wana tshibuli tsha u zwi ita.” Nga murahu, vhahashu vha ṱoḓaho u vha 5000 vho vhuyelela ndanguloni. Yehova o kunda vhukuma nahone Sathane o kundelwa!

Mafheloni a 1989, musi Vhukomunisi ha ngei Vhubvaḓuvha ha Yuropa vhu sa athu u fheliswa, Tshigwada tshi Langaho tsho ramba nṋe na mufumakadzi wanga uri ri ye ofisini khulwane dza shango ḽoṱhe ngei New York. Zwenezwo zwo ri mangadza vhukuma. Ro dzhenela tshumelo ya Bethele ya Brooklyn nga July 1990. Nga 1992, ndo vhewa sa muthusi wa Komiti ya Tshumelo ya Tshigwada tshi Langaho nahone u bva nga July 1994, ndo wana ndugelo ya u shuma na Tshigwada tshi Langaho.

Tshifhinga tshee nda shuma hodelani tsho fhira ndi kale. Zwino ndi takalela ndugelo ya u ṱanganela kha u lugiselela na u phaḓaladza zwiḽiwa zwa muya kha vharathu na vhakomana vha shango ḽoṱhe. (Mat. 24:45-47) Musi ndi tshi humbula nga ha miṅwaha ya 50 ye nda i fhedza ndi tshumeloni yo khetheaho ya tshifhinga tsho ḓalaho, ndi livhuha zwi tshi bva mbiluni na u vha na dakalo ḽine nda li wana nga u fhaṱutshedzwa nga Yehova nga vhushaka ha vhurathu na vhukomana ha shango ḽoṱhe. Ndi takalela u ṱanganela mabuthanoni a tshaka dzoṱhe, hune ha ombedzelwa u guda nga ha Khotsi ashu wa ṱaḓulu Yehova na ngoho i re Bivhilini.

Ndi rabela uri vhathu vha fhiraho dzimilioni vha gude Bivhili, vha ṱanganedze ngoho na u shumela Yehova nga vhuthihi na vhushaka ha vhurathu na vhukomana ha Vhukriste ha shango ḽoṱhe. (1 Pet. 2:17) Ndi dovha nda lavhelela u vhona vhathu vha tshi vuswa kha ḽifhasi ndi ṱaḓulu nahone mafheleloni nda wana khotsi anga vha ṋama. Ndi fulufhela uri khotsi anga, mme anga na maṅwe mashaka vha ḓo ṱoḓa u gwadamela Yehova Paradisoni.