1, 2. Yehova u amba na vhashumeli vhawe nga nḓila-ḓe?

KHA ḓivhazwakale yoṱhe ya Bivhili, vhathu vho wana vhulivhisi ha Yehova nga nḓila dzo fhamba-fhambanaho. Kha vhaṅwe, Mudzimu o amba navho a tshi shumisa vharuṅwa kana mabono kana miḽoro, a vha dzumbululela zwe zwa vha zwi tshi ḓo itea tshifhingani tshi ḓaho. Yehova o dovha a vha ṋea mishumo yo livhaho. (Num. 7:89; Hesek. 1:1; Dan. 2:19) Vhaṅwe vho ṋewa vhulivhisi ha Yehova nga vhaimeleli vhane vha vha vhathu vhane vha shuma kha tshipiḓa tsha ndangulo yawe ya kha ḽifhasi. Hu sa londwi uri vhathu vha Yehova vho wana ipfi ḽawe hani, vhe vha tevhela vhulivhisi haḽo vho fhaṱutshedzwa.

² Ṋamusi, Yehova u livhisa vhathu vhawe nga Bivhili, muya wawe mukhethwa na tshivhidzo. (Mish. 9:31; 15:28; 2 Tim. 3:16, 17) Vhulivhisi vhune ra vhu wana khae vhu a pfala lune zwa tou nga ‘nḓevhe dzashu dzi khou pfa murahu hashu hu tshi pfi: “Nḓila ngeino; farani yenei!”’ (Yes. 30:21) Zwiṅwe hafhu, ri dovha ra pfa ipfi ḽa Yehova kha Yesu musi a tshi livhisi tshivhidzo a tshi shumisa “mulanda a fulufhedzeaho na wa vhuṱali.” (Mat. 24:45) Ri fanela u dzhiela nṱha honoho u gudiswa na vhulivhisi, ngauri u wana vhutshilo vhu sa fheli zwo ḓitika nga u thetshelesa.—Vhaheb. 5:9.

3. Ndi mini zwine zwa nga thithisa nḓila ine ra aravha ngayo vhulivhisi ha Yehova? (Sedzani tshifanyiso tsha u thoma.)

³ Sathane Diabolo o ḓiimisela u thithisa vhulivhisi vhu tshidzaho vhutshilo vhune ra vhu wana kha Yehova. Zwiṅwe hafhu, ‘mbilu’ yashu  ine ya vha ‘mudzia-tshimbevha’ i nga thithisa nḓila ine ra aravha ngayo vhulivhisi ha Yehova. (Yer. 17:9) Nga zwenezwo, kha ri ṱolisise nḓila ine ra nga kunda ngayo zwithithisi zwine zwa nga ita uri zwi konḓe u thetshelesa ipfi ḽa Mudzimu. Kha ri dovhe ri haseledze nḓila ine u davhidzana na Yehova zwa nga tsireledza ngayo vhushaka hashu nae hu sa londwi zwiimo zwashu.

4. Sathane u lingedza hani u ṱuṱuwedza mahumbulele a vhathu?

⁴ Sathane u lingedza u ṱuṱuwedza mahumbulele a vhathu nga u vha ṋea mafhungo o khakheaho na nga pfunzo dza vhufhura. (Vhalani 1 Yohane 5:19.) Nga nnḓa ha bugu dzo gandiswaho shangoni ḽoṱhe—u katela na zwipiḓa zwa kule zwa ḽifhasi—hu anḓadzwa mafhungo nga radio, thelevishini na kha Inthanethe. Naho zwenezwo zwiko zwi tshi nga amba nga zwithu zwi takadzaho, kanzhi zwi ṱuṱuwedza vhuḓifari na maitele a lwisanaho na a Yehova. (Yer. 2:13) Sa tsumbo, mafhungo na vhathu vha zwa vhuḓimvumvusi vha amba nga ha u vhingana na muthu wa mbeu i fanaho na yau sa maitele ane a ṱanganedzea, nahone vhathu vhanzhi vha vhona u nga nḓila ine Bivhili ya amba ngayo nga ha vhusawana yo kalula.—1 Vhakor. 6:9, 10.

5. Ri nga iledza hani u kumbiwa nga pfunzo dza Sathane dza mazwifhi?

⁵ Vhane vha funa u luga ha Mudzimu vha nga iledza hani u kumbiwa nga pfunzo dza mazwifhi dza Sathane dzo ḓalaho shangoni ṋamusi? Vha nga ṱalula hani vhuḓi kha vhuvhi? ‘Nga u tevhedza zwe fhungo [ḽa Mudzimu] ḽa amba.’ (Ps. 119:9) Ipfi ḽa Mudzimu ḽo ṅwalwaho ḽi na vhulivhisi ha ndeme vhune ha ita uri ri kone u fhambanya mafhungo ngoho kha a vhufhura. (Mir. 23:23) Musi Yesu a tshi redza Maṅwalo o ri: “Muthu . . . u tshila na nga maipfi oṱhe a bvaho mulomoni wa Yehova.” (Mat. 4:4) Ri fanela u guda u shumisa maitele a Bivhili vhutshiloni hashu. Sa tsumbo, musi Mushe a sa athu u ṅwala mulayo wa Mudzimu nga ha vhuṱonḓolo, muṱhannga ane a pfi Yosefa o vha a tshi pfesesa uri yeneyo nyito ndi tshivhi phanḓa ha Mudzimu. Ho ngo vhuya a ṱoḓa u sa thetshelesa Yehova musi mufumakadzi wa Potifara a tshi lingedza u mu kunga uri a ite zwithu zwo khakheaho. (Vhalani Genesi 39:7-9.) Naho o mu kombetshedza lwa tshifhinga tshilapfu, Yosefa ho ngo tendela ipfi ḽa onoyo mufumakadzi ḽi tshi mu thivhela u pfa ipfi ḽa Mudzimu. Tshithu tsha ndeme tshine tsha ḓo ri thusa u ṱalula zwo lugaho kha zwi songo lugaho ndi u thetshelesa ipfi ḽa Yehova na u iledza mazwifhi a Sathane a sa fheli.

6, 7. Ri fanela u ita mini u itela u iledza nyeletshedzo mmbi ya Sathane?

⁶ Shango ḽo ḓala pfunzo dza vhurereli dzi hanedzanaho na pfunzothendwa dzine vhathu vhanzhi vha vhona u nga u ṱoḓa vhurereli ha ngoho ndi mahandana. Naho zwo ralo, Yehova o ita uri vhulivhisi hawe vhu pfale vhukuma kha vhe vha ḓiimisela u vhu tevhela. Ri fanela u dzhia phetho ya uri ndi nnyi ane ra ḓo mu thetshelesa. Samusi zwi sa konadzei u thetshelesa maipfi mavhili nga tshifhinga tshithihi, ri fanela u “ḓivha ipfi” ḽa Yesu nahone ri mu thetshelese. Ndi ene we Yehova a mu vhea uri a ṱhogomele nngu dzawe.—Vhalani Yohane 10:3-5.

 ⁷ Yesu o ri: “Dzhielani nṱha zwine na khou zwi pfa.” (Marko 4:24) Nyeletshedzo ya Yehova i a pfala nahone ndi ya ngoho, ri fanela u livhisa ṱhogomelo khayo na u i thetshelesa nga u lugiselela mbilu yashu uri i ṱanganedze yeneyo nyeletshedzo. Arali ra sa ṱhogomela, ri nga thetshelesa nyeletshedzo mmbi ya Sathane, nṱhani ha u thetshelesa nyeletshedzo ya Mudzimu ya lufuno. Ni songo vhuya na tendela zwithu zwa shango zwi ngaho muzika, dzividio, mbekanyamushumo dza thelevishini, dzibugu, dzikhonani, vhadededzi, kana vhane vha vhidzwa vhaḓivhi vha tshi langa vhutshilo haṋu.—Vhakol. 2:8.

8. (a) Mbilu yashu i nga ri dzhenisa hani kha zwikwekwe zwa Sathane? (b) Hu nga itea mini kha riṋe arali ra nyadza zwiga zwi sevhaho?

⁸ Zwiṅwe hafhu, Sathane u a zwi ḓivha uri ri na nḓowelo mmbi nahone u lingedza u ri ṱuṱuwedza uri ri dzi fushe. Musi Sathane a tshi ri vutshela nga yeneyi nḓila, zwi vha khaedu khulwane u dzula ri tshi fulufhedzea. (Yoh. 8:44-47) Ri nga kunda hani yeneyi khaedu? Edzani u humbula nga ha muthu ane a kungwa tshoṱhe nga muḓifho wa tshifhinganyana lune a vho fheleledza o ita tshithu tsho khakheaho tshe a vha a sa humbuli uri u ḓo vhuya a tshi ita. (Vharoma 7:15) Ndi mini zwe zwa ita uri a ḓiwane e kha honoho vhuimo vhu ṱungufhadzaho? Khamusi onoyo muthu o mbo ḓi thoma u sa thetshelesa ipfi ḽa Yehova. Khamusi a nga vha a songo ṱhogomela zwiga zwi sevhaho zwine zwa khou itea mbiluni yawe kana o khetha u sa zwi thetshelesa. Sa tsumbo, a nga vha o litsha u rabela, a si tsha fhisetshela vhuḓinḓa, kana a si tsha ya miṱanganoni tshifhinga tshoṱhe. Mafheleloni, a ḓiṋekedzela kha lutamo lwawe nahone a ita zwe a vha a tshi ḓivha uri zwo khakheaho. Ri nga iledza vhukhakhi ho raloho vhu re na khombo, arali ra dzula ro fhaṱutshela zwiga zwoṱhe zwi sevhaho nahone ra dzhia vhukando nga u ṱavhanya u itela u khakhulula eneo mafhungo. Arali ri tshi khou thetshelesa ipfi ḽa Yehova, ri nga si thetshelese zwine vhagunei vha amba.—Mir. 11:9.

9. Ndi ngani u ṱhogomela nḓowelo mmbi nga u ṱavhanya zwi zwa ndeme vhukuma?

⁹ Arali vhulwadze ha tumbulwa nga u ṱavhanya zwi nga tshidza vhutshilo ha muthu. Nga hu fanaho, ri nga iledza khombo arali ra ṱavhanya ra ṱhogomela zwithu zwine zwa nga ita uri ri lingee. Musi ri tshi ṱhogomela uri ri vho sendamela kha zwithu zwo khakheaho, zwi ḓo vha vhuṱali uri ri dzhie vhukando nga u ṱavhanya—ri sa athu ‘fashwa [nga Sathane] ri tshi kha ḓi tshila uri ri ite zwine a zwi funa.’ (2 Tim. 2:26) Ri fanela u ita mini arali ra ṱhogomela uri ro tendela mahumbulele ashu na lutamo zwi tshi ri sendedzela kule na zwine Yehova a zwi lavhelela kha riṋe? Ri songo tsha ima-ima, kha ri vhuyelela khae nga u ḓiṱukufhadza, ri thetshelese nyeletshedzo yawe na u mu thetshelesa nga mbilu yashu yoṱhe. (Yes.  44:22) Ri fanela u zwi ṱhogomela uri u dzhia phetho dzi si dzavhuḓi zwi nga ri vhaisa vhukuma lune ra vho ḓo fanela u sedzana na masiandoitwa a si avhuḓi kha ano maitele a zwithu. Zwi ḓo vha zwavhuḓi lungafhani uri ri sa pambuwe nga u dzhia vhukando nga u ṱavhanya u itela uri ri sa ḓiwane ro dzhena khomboni i si na vhukono!

10, 11. (a) Muthu ane a ḓikukumusa u vhonala nga nḓila-ḓe? (b) Ndi mini zwine ra zwi guda kha buḓo ḽivhi ḽe ḽa dzhiiwa nga Kora, Dathani na Abiramu?

¹⁰ Ri fanela u ṱhogomela uri mbilu yashu i nga ri pambusa. Nḓowelo dzashu dza u ita tshivhi dzi na maanḓa vhukuma! Sa tsumbo, u ḓikukumusa na vhupangwa. Ṱhogomelani nḓila ine zwenezwi zwithu zwa nga thithisa ngayo uri ri si thetshelese ipfi ḽa Yehova na u ri livhisa kha buḓo ḽi re na khombo. Muthu ane a ḓikukumusa u a ḓidzhiela nṱha. A nga vhona u nga u na ndugelo ya u ita tshiṅwe na tshiṅwe tshine a funa nahone a hu na muthu ane a nga mu vhudza zwine a fanela u zwi ita. Ngauralo, a nga vhona u nga ho ngo tea u tevhela vhulivhisi na nyeletshedzo zwa Vhakriste ngae, vhahulwane, kana ndangulo ya Mudzimu. Kha muthu o raloho, ipfi ḽa Yehova ḽi pfalela kule.

¹¹ Musi Vhaisiraele vhe lwendoni lwavho sogani, Kora, Dathani na Abiramu a vho ngo thetshelesa Mushe na Aroni. Nga nṱhani ha u ḓikukumusa, mashandukwa o thoma u gwadamela Yehova nga nḓila yavho. Yehova o aravha hani? O a fhelisa. (Num. 26:8-10) Tshenetshi tshiitea tsha ḓivhazwakale tshi ri gudisa ngudo yavhuḓi lungafhani! U shandukela Yehova zwi wedza khomboni. Ri songo hangwa uri “tshi-tevhela-mazuwo ndi u wa.”—Mir. 16:18; Yes. 13:11.

12, 13. (a) Ṋeani tsumbo ine ya sumbedza uri vhupangwa vhu nga ri dzhenisa khomboni. (b) Ṱalutshedzani nḓila ine vhupangwa ha nga hulela ngayo arali ha sa langwa.

¹² Dovhani ni ṱhogomele mafhungo a vhupangwa. Kanzhi muthu ane a vha na vhupangwa u ita zwithu zwine zwa nga mu dzhenisa khomboni, zwine a si vhe na thendelo ya u zwi ita. Musi Naemani mulangammbi wa Musiria o no fhola mapele, o ṋea muporofita Elisa zwifhiwa, fhedzi a zwi hana. Naho zwo ralo, Gehasi muḓinḓa wa Elisa o tama zwenezwo zwifhiwa. Gehasi o ḓivhudza uri: “Nga vhutshilo ha Yehova, nṋe ndi a gidima nda tevhela [Naemani], nda yo′fhiwa tshithu.” O gidima a tevhela Naemani, Elisa a sa zwi ḓivhi nahone a zwifha u itela u wana ‘talente ya maseṱha na nguvho mbili.’ Ndi mini zwe zwa itea nge Gehasi a ita zwenezwi na u zwifhela muporofita wa Yehova? Mapele a Naemani o mbo ḓi nambatela Gehasi a re na vhupangwa!—2 Dzikh. 5:20-27.

¹³ Vhupangwa vhu nga thoma nga zwiṱuku nga zwiṱuku, fhedzi arali ha sa langwa, vhu nga hulela nga u ṱavhanya nahone ha kunda muthu. Mafhungo a Bivhili a Akani a sumbedza maanḓa a vhupangwa. Edzani u ṱhogomela nḓila ye vhupangwa ha Akani ha hulela ngayo nga u ṱavhanya. O ri: “Kha zwe ra thuba ndo wana hú na nguvho yavhuḓi ya Babele, na sekele dzi na maḓana mavhili dza maseṱha na suku ḽa sekele dzi mahumi maṱanu. Nda tama thundu yeneyo nda i dzhia.” Nṱhani ha u landula lutamo lu songo lugaho, Akani o tswa thundu nahone a i dzumba thumbani yawe. Musi vhukhakhi ha Akani vhu tshi bvela khagala, Yoshua o amba uri Yehova u ḓo mu ḓisela khombo. Akani na muṱa wawe vho kanḓwa nga matombo u swika vha tshi fa nga ḽeneḽo ḓuvha. (Yosh. 7:11, 21, 24, 25) Vhupangwa ndi zwithu zwi re na khombo zwine muṅwe na muṅwe washu a nga vha nazwo. Nga zwenezwo, kha ri “ḓilinde kha vhupangwa hoṱhe.” (Luka 12:15) Naho nga zwiṅwe zwifhinga ri na mahumbulele a si avhuḓi kana u humbula nga ha vhuḓifari vhu songo kunaho, ndi zwa ndeme uri ri lange mahumbulele ashu nahone ri si tendele lutamo lwashu lu tshi hulela lune lwa ita uri ri ite tshivhi.—Vhalani Yakobo 1:14, 15.

14. Ri fanela u ita mini arali ra ṱhogomela uri ri khou sendamela kha u ḓikukumusa na vhupangwa?

¹⁴ U ḓikukumusa na vhupangwa zwi nga ri  dzhenisa khomboni. U elekanya nga ha masiandoitwa a u ita zwithu zwo khakheaho zwi ḓo ri thusa u sa tendela dzenedzo nḓowelo dzi tshi ri ita uri ri si thetshelese ipfi ḽa Yehova. (Doit. 32:29) Bivhilini, Mudzimu wa ngoho ha ri vhudzi nga ha nḓila yo lugaho fhedzi, u dovha a ri ṱalutshedza mbuyelo dza u tshimbila khayo, u katela na masiandoitwa a u tshimbila kha nḓila i songo lugaho. Arali mbilu dzashu dza ri ṱuṱuwedzela u humbula nga ha zwithu zwi ṱuṱuwedzwaho nga u ḓikukumusa kana vhupangwa, zwi ḓo vha vhuṱali lungafhani u humbula nga ha masiandoitwa! Ri fanela u ṱhogomela uri u ita zwithu zwo khakheaho zwi nga ri kwama hani, vhane ra vha funa, zwihuluhulu vhushaka hashu na Yehova.

15. Ndi mini zwine ra zwi guda nga ha vhudavhidzano kha tsumbo ya Yesu?

¹⁵ Yehova u ri ṱoḓela zwa khwine. (Ps. 1:1-3) U ri ṋea vhulivhisi ho teaho musi ri tshi vhu ṱoḓa. (Vhalani Vhaheberu 4:16.) Naho Yesu o vha o fhelela, o vha a tshi ḓitika nga u davhidzana na Yehova tshifhinga tshoṱhe, nahone o vha a tshi dzula a tshi rabela. Yehova o tikedza na u livhisa Yesu nga nḓila dzi mangadzaho. O ruma vharuṅwa uri vha mu shumele, a mu ṋea muya mukhethwa uri u mu thuse na u mu livhisa musi a tshi khetha vhaapostola vha 12. Ipfi ḽa Yehova ḽo pfala ḽi tshi bva ṱaḓulu, ḽi tshi sumbedza u mu tikedza na u ṱanganedza Yesu. (Mat. 3:17; 17:5; Marko 1:12, 13; Luka 6:12, 13; Yoh. 12:28) U fana na Yesu, ri fanela u tevhulela mbilu dzashu kha Mudzimu nga thabelo. (Ps. 62:7, 8; Vhaheb. 5:7) Nga thabelo, ri nga dzula ri tshi davhidzana na Yehova nahone ra tshila nga nḓila ine ya sumbedza uri ri mu ṋea vhugala.

16. Ri nga wana hani thuso ya Yehova u itela u vha na vhukoni ha u thetshelesa ipfi ḽawe?

¹⁶ Naho Yehova o ita uri ri wane nyeletshedzo yawe nga hu leluwaho tshifhinga tshoṱhe, ha kombetshedzi muthu uri a i tevhele. Ri fanela u humbela muya mukhethwa wawe nahone u ḓo ri ṋea nga mafunda. (Vhalani Luka 11:10-13.) Ndi zwa ndeme uri ri ‘ṱhogomele nḓila ine ra thetshelesa ngayo.’ (Luka 8:18) Sa tsumbo, zwi ḓo vha zwi muhoyo u humbela thuso kha Yehova uri ri kunde nḓowelo ya vhuḓifari vhu songo kunaho ngeno ri tshi khou bvela phanḓa ri tshi vhona zwifanyiso zwi karusaho maḓipfele a zwa vhudzekani kana filimu dza vhuaḓa. Ri fanela u ḓivhea fhethu kana kha vhuimo vhune ha vha na muya wa Yehova. Ri a zwi ḓivha uri muya wawe u miṱanganoni ya tshivhidzo. Vhashumeli vhanzhi vha Yehova vho iledza khombo nga u thetshelesa Yehova musi vhe miṱanganoni yashu. Nga zwenezwo, vho zwi ṱhogomela musi lutamo lu si lwavhuḓi lu tshi thoma mbiluni dzavho nahone vha khakhulula nḓila dzavho.—Ps. 73:12-17; 143:10.

17. Ndi ngani zwi na khombo u ḓitika nga riṋe vhaṋe?

¹⁷ Ṱhogomelani Khosi Davida wa Isiraele ḽa kale. Musi a tshee muṱuku, o kunda Goliata wa Mufilisita wa muswonḓa. Davida o vha sole, khosi, mutsireledzi na mutshei wa fhungo wa lushaka. Fhedzi musi Davida a tshi ḓitika nga ene muṋe, mbilu yawe yo mu fhura nahone a ita tshivhi tshihulwane na Batseba, a dovha a dzudzanya uri hu vhulahwe Uria, munna wa onoyo mufumakadzi. Musi a tshi kaidzwa, Davida o tenda vhukhakhi hawe nga u ḓiṱukufhadza nahone a vusulusa vhushaka hawe na Yehova.—Ps. 51:4, 6, 10, 11.

18. Ndi mini zwine zwa nga ri thusa uri ri dzule ri tshi thetshelesa ipfi ḽa Yehova?

¹⁸ Kha ri thetshelese nyeletshedzo i wanalaho kha 1 Vhakorinta 10:12 nahone ri si ḓifulufhelese. Samusi ri sa koni u ‘ḓivhusa,’ mafheleloni ri tea u khetha uri ri ḓo thetshelesa ipfi ḽa Yehova kana ipfi ḽa Swina ḽawe. (Yer. 10:23) U nga ri ri nga dzula ri tshi rabela tshifhinga tshoṱhe, ri tevhele vhulivhisi ha muya mukhethwa, na u dzula ri tshi thetshelesa ipfi ḽa Yehova.