RI KHOU tshila zwifhingani zwi konḓaho vhukuma kha ḓivhazwakale yoṱhe ya vhathu. (2 Tim. 3:1-5) U funa hashu Yehova na u ḓiimisela u tshila nga zwilinganyo zwawe zwo lugaho, zwi lingwa ḓuvha ḽiṅwe na ḽiṅwe. Yesu o vhona hu tshee nga phanḓa tshenetsho tshifhinga tshi konḓaho, nahone a khwaṱhisedza vhatevheli vhawe uri vha ḓo wana ṱhuṱhuwedzo ine vha i ṱoḓa u itela u konḓelela u swikela vhufheloni. (Mat. 24:3, 13; 28:20) U itela u vha khwaṱhisa, o vhea mulanda a fulufhedzeaho u itela u vha ṋea ‘zwiḽiwa zwa muya nga tshifhinga tsho teaho.’—Mat. 24:45, 46.

U bva tshee ha vheiwa mulanda a fulufhedzeaho nga 1919, “vha nnḓu” vha dzimilioni vha nyambo dzoṱhe, vho kuvhanganywa ndanguloni ya Mudzimu nahone vha kanzwa nga zwiḽiwa zwa muya. (Mat. 24:14; Nzumb. 22:17) Naho zwo ralo, dziṅwe khandiso a dzi wanali nga nyambo dzoṱhe, nahone a si vhathu vhoṱhe vhane vha kona u wana khandiso dzashu kha Inthanethe. Sa tsumbo, vhanzhi a vha na dzividio na thero dzine dza wanala fhedzi kha jw.org. Naa zwenezwi zwi amba uri vhaṅwe vha ṱahela u wana zwiḽiwa zwine vha zwi ṱoḓa u itela uri vha dzule vho khwaṱha nga lwa muya? U itela u wana phindulo yo teaho, ṱhogomelani phindulo dza mbudziso nṋa dza ndeme.

Musi Sathane a tshi linga Yesu uri a shandule matombo a vhe tshinkwa, Yesu o fhindula a ri: “Muthu ha tshili nga tshinkwa fhedzi, fhedzi u tshila na nga maipfi oṱhe a bvaho mulomoni wa Yehova.” (Mat. 4:3, 4) Maipfi a Yehova o ṅwalwa Bivhilini. (2 Pet. 1:20, 21) Nga zwenezwo, Bivhili ndi tshishumiswa tsha ndeme kha zwiḽiwa zwashu zwa muya.—2 Tim. 3:16, 17.

Ndangulo ya Yehova yo ita uri hu vhe na New World Translation of the Holy Scriptures ine ya wanala yo fhelela kana i songo fhelela nga nyambo dzi fhiraho 120 nahone hu engedzwa dziṅwe nyambo nnzhi ṅwaha muṅwe na muṅwe. Nga nnḓa ha yeneyo ṱhalutshedzelo, hu na kopi dza bilioni dza dziṅwe ṱhalutshedzelo dza Bivhili dzine dza wanala dzo fhelela kana dzi songo fhelela nga nyambo nnzhi. Wonoyo mushumo u mangadzaho we wa swikelelwa u tendelana na zwine Yehova a zwi funa uri ‘vhathu vha mifuda yoṱhe vha tshidzwe nahone vha vhe na nḓivho yo teaho ya ngoho.’ (1 Tim. 2:3, 4) Ngauri “a hu na tshivhumbwa tsho dzumbamaho phanḓa ha [Yehova],” ri nga vha na vhungoho ha uri u ḓo sendedza vhane vha “ṱhogomela uri vha ṱoḓa u ḓivha Mudzimu” ndanguloni yawe nahone a vha ṋea zwiḽiwa zwa muya.—Vhaheb. 4:13; Mat. 5:3, 6; Yoh. 6:44; 10:14.

U itela uri muthu a vhe na lutendo lwo khwaṱhaho, ho ngo fanela u sokou vhala Bivhili fhedzi. U fanela u pfesesa zwine a zwi vhala nahone a shumise zwine a zwi guda. (Yak. 1:22-25) Munna wa Muetiopia wa ḓanani ḽa u thoma ḽa miṅwaha o dzhiela nṱha yeneyo mbuno. O vha a tshi khou vhala Ipfi ḽa Mudzimu musi muevangeli Filipo a tshi mu vhudzisa uri: “Naa u a pfesesa zwine wa khou zwi vhala zwa vhukuma?” Onoyo munna o fhindula a ri: “Ndi nga zwi pfesesa hani arali hu si na muthu ane a nga mpfunza?” (Mish. 8:26-31) Filipo o thusa onoyo munna uri a vhe na nḓivho yo teaho ya Ipfi ḽa Mudzimu. Munna onoyo o takalela vhukuma zwe a zwi guda nahone a lovhedzwa. (Mish. 8:32-38) Zwi fanaho na zwenezwo, khandiso dzashu dzo thewaho Bivhilini dzo ri thusa u vha na nḓivho yo teaho ya ngoho. Dzo ri kwama maḓipfele nahone dza ri ṱuṱuwedza u shumisa zwe ra zwi guda.—Vhakol. 1:9, 10.

Kha khandiso, vhashumeli vha Yehova vha ṋewa zwithu zwinzhi zwa muya zwa u ḽa na u nwa. (Yes. 65:13) Sa tsumbo, Tshiingamo tshi wanala nga nyambo dzi fhiraho 210, tshi ṱalutshedza vhuporofita ha Bivhili, tshi ita uri ri pfesese nga ho engedzeaho ngoho ya lwa muya nahone tshi ri ṱuṱuwedza u tshila nga maitele a Bivhili. Magazini wa Awake! u wanala nga nyambo dzi fhiraho 100, u ita uri ri pfesese nga ho engedzeaho mishumo ya tsiko ya Yehova nahone u ri sumbedza nḓila ya u shumisa nyeletshedzo dzi shumaho dza Bivhili. (Mir. 3:21-23; Vharoma 1:20) Mulanda a fulufhedzeaho u ri ṋea khandiso dzo thewaho Bivhilini nga nyambo dzi fhiraho 680! Naa ni ḓivhetshela tshifhinga tsha u vhala Bivhili ḓuvha ḽiṅwe na ḽiṅwe? Naa ni vhala magazini muṅwe na muṅwe na khandiso ntswa dzine dza bviswa nga luambo lwaṋu ṅwaha muṅwe na muṅwe?

Nga nnḓa ha u gandisa khandiso, ndangulo ya Yehova i ri lugiselela nyambo dzo thewaho Bivhilini dzine dza ṋekedzwa miṱanganoni yashu, maguvhanganoni na mabuthanoni. Naa ni takalela dzenedzo nyambo, matambwa, misumbedzo na nyambedzano dzine dza ṋekedzwa kha eneo maguvhangano? Vhukuma, Yehova u ri ṋea tshimima tsha zwiḽiwa zwa muya!—Yes. 25:6.

Phindulo ndi hai. Nahone a zwo ngo fanela u ri mangadza uri vhaṅwe vhashumeli vha Yehova nga zwiṅwe zwifhinga vha nga wana zwiḽiwa zwa muya u fhira vhaṅwe. Ndi ngani? Ṱhogomelani vhaapostola. Vho wana nyeletshedzo nnzhi u fhira vhaṅwe vhafunziwa ḓanani ḽa u thoma ḽa miṅwaha. (Marko 4:10; 9:35-37) Naho zwo ralo, vhaṅwe vhafunziwa a vho ngo sika nga nḓala ya lwa muya; vho wana zwe vha vha vha tshi zwi ṱoḓa.—Vhaef. 4:20-24; 1 Pet. 1:8.

Ndi zwa ndeme u ṱhogomela uri vhunzhi ha zwe Yesu a zwi amba na zwe a zwi ita musi e kha ḽifhasi a zwo ngo ṅwalwa kha mafhungo a Evangeli. Muapostola Yohane o ṅwala uri: “Hu na zwiṅwe zwithu zwinzhi zwe Yesu a zwi ita, zwine arali zwi vhe zwo ṅwalwa nga vhuḓalo, ndi vhona u nga mipombo yazwo yo vha i tshi ḓo ḓadza shango ya ḓi sala.” (Yoh. 21:25) Naho vhatevheli vha Yesu vha ḓanani ḽa u thoma ḽa miṅwaha vho vha vha tshi ḓivha zwinzhi nga ha munna o fhelelaho Yesu u fhira riṋe, fhedzi a ri na nḓala ya lwa muya. Yehova o ita uri ri ḓivhe zwo engedzeaho nga ha Yesu u itela u tevhela ṋayo dzawe.—1 Pet. 2:21.

Dovhani ni humbule nga ha marifhi e a rumelwa nga vhaapostola vha ḓanani ḽa u thoma ḽa miṅwaha zwivhidzoni. Hu na vhurifhi vhuthihi fhedzi ho ṅwalwaho nga Paulo vhu siho Bivhilini. (Vhakol. 4:16) Naa zwiḽiwa zwashu zwa muya a zwo ngo eḓana ngauri a ri na honoho vhurifhi? Hai. Yehova u ḓivha zwine ra zwi shaya nahone o ri ṋea zwo eḓanaho u itela uri ri dzule ro khwaṱha nga lwa muya.—Mat. 6:8.

Ṋamusi, zwiṅwe zwigwada zwa vhashumeli vha Yehova zwi na zwiḽiwa zwinzhi zwa muya u fhira zwiṅwe. Naa ni amba luambo lune lwa vha na khandiso dzi si gathi? Arali zwo ralo, ḓivhani uri Yehova u a ni ṱhogomela. Gudani khandiso dzine na vha nadzo, arali zwi tshi konadzea iyani miṱanganoni ya luambo lune na lu pfesesa. Ivhani na vhungoho ha uri Yehova u ḓo ita uri ni dzule no khwaṱha nga lwa muya.—Ps. 1:2; Vhaheb. 10:24, 25.

Kha Web site yashu, hu na kopi dza magazini dzashu na dziṅwe khandiso dza u guda Bivhili. Web site i dovha ya vha na mafhungo ane a thusa vhavhingani, vhaswa na vhane vha vha na vhana vhaṱuku. Miṱa i vhuyelwa nga u vhala enea mafhungo musi yo fara Vhurabeli ha Muṱa. Zwiṅwe hafhu, Web site yashu i vhiga nga ha mbekanyamushumo dzo khetheaho, dzi ngaho u rwelwa ṱari ha Vhagudiswa vha Gilead na miṱangano ya ṅwaha muṅwe na muṅwe, nahone i ḓivhadza vhahashu nga ha khombo dza mupo na nga ha zwine zwa khou itea kha sia ḽa mulayo zwi kwamaho vhathu vha Yehova. (1 Pet. 5:8, 9) Web site yashu i dovha ya vha tshishumiswa tshi hulwane tsha u huwelela, i ita uri mafhungo maḓifha a wanale mashangoni ane mushumo washu wa vha wo thivhelwa.

Naho zwo ralo, ni nga dzula no khwaṱha muyani hu sa londwi uri ni kona u dzhena kha Web site yashu kana hai. Mulanda o shuma vhukuma kha u ri ṋea khandiso dzo gandiswaho u itela uri muṅwe na muṅwe wa nnḓu a kanzwe nga lwa muya. Nga zwenezwo, a no ngo fanela u ḓipfa no vhofhea uri ni renge tshishumiswa tsha Inthanethe u itela u dzhena kha jw.org. Vhaṅwe vha nga ḓiitela nzudzanyo ya u gandisa zwithu zwi si gathi kha Web site dzashu nahone vha zwi ṋea vhathu vha si na Inthanethe, fhedzi a si tshikolokolo uri zwivhidzo zwi ite nga u ralo.

Ri livhuha Yesu nge a ita zwe a fulufhedzisa, nga u ṱhogomela zwishaiwa zwashu zwa lwa muya. Samusi zwenezwi zwifhinga zwi konḓaho zwa maḓuvha a vhufhelo zwi tsini na u fhela, ri nga vha na vhungoho ha uri Yehova u ḓo bvela phanḓa a tshi ri ṋea ‘zwiḽiwa nga tshifhinga tsho teaho.’