Heyi mbudziso ndi ya ndeme vhukuma, zwihuluhulu kha vhe vha felwa nga vhafunwa vhavho. Vhenevho vhathu vha nga ṱulutshelwa u dovha vha vha na vhafarisi vhavho vho vuswaho shangoni ḽiswa. Muṅwe munna o felwaho o amba uri: “Nṋe na mufumakadzi wanga a ro ngo khetha u fhelisa mbingano yashu nga heyi nḓila. Ro vha ri tshi tama zwi tshi bva mbiluni dzashu u dzula ri vhathihi kha vhurabeli sa munna na mufumakadzi lwa tshoṱhe. Ndi kha ḓi ḓipfa nga yeneyo nḓila.” Naa hu na tshiitisi tshi pfalaho tsha u fulufhela uri vho vuswaho vha ḓo dovha vha vhinga kana u vhingwa? Zwi re zwone ndi uri a ri ḓivhi.

Lwa miṅwaha minzhi, khandiso dzashu dzo amba uri maipfi a Yesu nga ha mvuwo na u vhinga kana u vhingwa, a nga vha a tshi ambela kha mvuwo ya kha ḽifhasi na uri vhane vha vuselwa shangoni ḽiswa zwi vhonala uri a vha nga vhingi kana u vhingwa. * (Mat. 22:29, 30; Marko 12:24, 25; Luka 20:34-36) Naho ri sa ṱoḓi u tou humbulela eneo mafhungo, naa zwi a konadzea uri maipfi a Yesu a ambela kha mvuwo ya ṱaḓulu? Kha ri ṱolisise zwe Yesu a zwi amba.

Ṱhogomelani vhubvo ha eneo mafhungo. (Vhalani Luka 20:27-33.) Vhasadukei vhe vha vha vha sa tendi kha mvuwo, vho lingedza u fasha Yesu nga u mu vhudzisa nga ha mvuwo na u vhingwa nga mukomana kana murathu wa mufu. * Yesu a fhindula a ri: “Vhana vha ano maitele a zwithu vha a vhinga na u vhingwa, fhedzi vhane vha fanelea u tshila kha eneo maitele a zwithu na vhane vha fanelea u vuswa vhafuni a vha vhingi na u vhingwa. A vha tsha ḓo fa, ngauri vha ḓo nga vharuṅwa, vha ḓo vha vhana vha Mudzimu vhe a vha vusa vhafuni.”—Luka 20:34-36.

Ndi ngani khandiso dzashu dzo amba uri khamusi Yesu o vha a tshi khou amba nga ha mvuwo ya kha ḽifhasi? Yeneyo phetho yo thewa kha zwiitisi zwivhili. Tsha u thoma, hu ambiwa uri Vhasadukei vho vha vho humbula nga ha mvuwo ya kha ḽifhasi na uri Yesu o vha fhindula u tendelana na zwe vha zwi vhudzisa. Tsha vhuvhili, Yesu o phetha phindulo yawe nga u ambela kha Abrahamu, Isaka na Yakobo—vhasimulalushaka vha fulufhedzeaho vhane vha ḓo vuselwa u tshila kha ḽifhasi.—Luka 20:37, 38.

Naho zwo ralo, zwi vhonala u nga Yesu o vha a tshi khou humbula nga ha mvuwo ya ṱaḓulu. Ndi ngani ri tshi ralo? Kha ri ṱolisise mibulo mivhili ya ndeme.

“Vhane vha fanelea u tshila. . . [ndi] vhane vha fanelea u vuswa vhafuni.” Vhaḓodzwa vha fulufhedzeaho vha ‘dzhiiwa vha tshi fanelea Muvhusoni wa Mudzimu.’ (2 Vhathes. 1:5, 11) Vha vhidzwa vho lugaho nga nṱhani ha tshirengululi; nga zwenezwo a vha fi u fana na vhaitazwivhi vho vhonwaho mulandu. (Vharoma 5:1, 18; 8:1) Vhenevho vha vhidzwa vho ‘takalaho na vhakhethwa,’ nahone vha fanelea u vuselwa ṱaḓulu. (Nzumb. 20:5, 6) Zwo fhambanaho na zwenezwo, vhane vha ḓo vuselwa u tshila kha ḽifhasi vha katela na “vha songo lugaho.” (Mish. 24:15) Hu nga ambiwa uri vhenevho vha a “fanelea” u vuswa?

 “A vha tsha ḓo fa.” Dziṅwe ṱhalutshedzelo dzi ṱalutshedzela wonoyo mubulo nga uri “a vha tsha langwa nga lufu” nahone “lufu a lu tsheena maanḓa khavho.” Vhaḓodzwa vhe vha ṱhaphudza buḓo ḽavho ḽa kha ḽifhasi vha tshi fulufhedzea, vha vuselwa ṱaḓulu nahone a vha tsha fa—vha wana vhutshilo vhu sa fheli na vhu sa tshinyali. (1 Vhakor. 15:53, 54) Lufu a lu tsheena maanḓa kha vhane vha vuselwa ṱaḓulu. *

U ya nga zwe zwa bulwa afho nṱha, ri nga phetha nga uri mini? Khamusi maipfi a Yesu nga ha u vhinga kana u vhingwa na mvuwo a shuma kha u vuselwa ṱaḓulu. Arali zwo ralo, maipfi awe a ḓo ri vhudza zwinzhi nga ha vhane vha vuselwa ṱaḓulu: A vha tsha vhinga kana u vhingwa, a vha tsha fa nahone vha nga vharuṅwa—zwivhumbiwa zwa muya zwine zwa dzula fhethu ha muya. Naho zwo ralo, u phetha nga yeneyo nḓila zwi takusa mbudziso dzo vhalaho.

Ya u thoma, ndi ngani Yesu a tshi nga ambela kha mvuwo ya ṱaḓulu musi a tshi fhindula Vhasadukei, vhe vha vha vha tshi humbula nga ha mvuwo ya kha ḽifhasi? Kanzhi Yesu o vha a sa fhinduli vhapikisi vhawe nga nḓila ye vha vha vha tshi humbula ngayo. Sa tsumbo, kha Vhayuda vhe vha vha vha tshi khou ṱoḓa uri a vha sumbedze vhuṱolo, o ri: “Thuthani heyi thembele, ndi ḓo i vusa nga maḓuvha mararu.” Yesu o vha a tshi zwi ḓivha uri vho vha vha tshi khou humbula nga tshifhaṱo tsha thembele, “fhedzi musi a tshi amba nga ha thembele o vha a tshi khou amba nga ha muvhili wawe.” (Yoh. 2:18-21) Khamusi Yesu o vha a tshi vhona zwi sa ṱoḓei u fhindula Vhasadukei vha sa fulufhedzei, vhe vha vha vha sa tendi kha mvuwo kana nga ha u vha hone ha vharuṅwa. (Mir. 23:9; Mat. 7:6; Mish. 23:8) Nṱhani hazwo, a nga vha o vha a tshi ṱoḓa u dzumbulula ngoho nga ha mvuwo ya ṱaḓulu kha vhafunziwa vhawe vha fulufhedzeaho, vhe vha vha vha tshi ḓo vha kha mutevhe wa vhane vha ḓo tshenzhela mvuwo yo raloho.

Ya vhuvhili, ndi ngani Yesu o phetha nyambedzano yawe nga u amba nga ha u vuswa ha Abrahamu, Isaka na Yakobo kha ḽifhasi? (Vhalani Mateo 22:31, 32.) Ṱhogomelani uri Yesu o thoma u amba nga ha vhenevho vhasimulalushaka nga maipfi ane a ri “malugana na u vuswa ha vhafu.” Wonoyo mubulo u nga sumbedza uri o vha a tshi khou livhisa ṱhogomelo yavho kha maṅwe mafhungo. Nga zwenezwo, kha zwe zwa ṅwalwa nga Mushe, zwe Vhasadukei vha vha vha tshi ita u nga vha a zwi ṱanganedza, Yesu o shumisa maipfi a Yehova musi a tshi amba na Mushe tshiṱakani tshi dugaho u itela u khwaṱhisedza uri mvuwo—ya kha ḽifhasi—ndi ndivho ya Mudzimu zwa vhukuma.—Ek. 3:1-6.

Ya vhuraru, arali maipfi a Yesu nga ha mvuwo na u vhinga kana u vhingwa a tshi ambela kha mvuwo ya ṱaḓulu, naa zwenezwo zwi amba uri vhane vha ḓo vuselwa kha ḽifhasi vha ḓo dovha vha vhinga kana u vhingwa? Ipfi ḽa Mudzimu a ḽi ri ṋei phindulo yo livhaho malugana na yeneyi mbudziso. Arali Yesu o vha a tshi khou ambela kha mvuwo ya ṱaḓulu, nga zwenezwo maipfi awe ha zwi bviseli khagala uri vhane vha ḓo vuselwa kha ḽifhasi vha ḓo vhinga kana u vhingwa shangoni ḽiswa.

Zwa zwino, ri a zwi ḓivha uri Ipfi ḽa Mudzimu ḽi amba uri mbingano i fheliswa nga lufu. Nga zwenezwo, munna kana mufumakadzi o felwaho ho ngo fanela u ḓivhona mulandu musi vha tshi ṱoḓa u vhinga kana u vhingwa. Yeneyo ndi phetho ya muthu nga eṱhe nahone vhenevho vhathu a vho ngo fanela u sasaladzwa musi vha tshi ṱoḓa mufarisi wa mbingano.—Vharoma 7:2, 3; 1 Vhakor. 7:39.

Ndi ngoho uri ri nga vha ri na mbudziso nnzhi nga ha vhutshilo shangoni ḽiswa. Nṱhani ha u sokou humbulela phindulo dza dzenedzo mbudziso, ri fanela u lindela ra vhona zwine zwa ḓo itea. Fhedzi ri nga vha na vhungoho ha uri vhathu vha thetshelesaho vha ḓo takala, Yehova u ḓo fusha zwishaiwa na lutamo lwavho nga nḓila ya khwine u fhira dzoṱhe.—Ps. 145:16.