1. Vhafunzi vha ḽa Vhudzhagane vho ita mini tshifhingani tsha dzinndwa?

NAA ndi lufuno lwa Mudzimu uri Vhakriste vha ngoho vha ye nndwani nahone vha vhulahe vhathu vha dziṅwe tshaka? Miṅwahani ya 100 yo fhiraho, zwenezwo zwo itwa lunzhi nga vhunzhi ha vhathu vhane vha ḓivhidza Vhakriste. Mmbi ya vhafunzi vha Katolika yo fhaṱutshedza maswole na zwihali zwavho musi vha tshi lwa na Vhakatolika vha luṅwe lushaka. Na vhafunzi vha Vhaporotesitante vho ita zwi fanaho. Nndwa ya Shango ya Vhuvhili ndi tsumbo khulwane vhukuma ya u vhulahana he ha itiswa nga zwenezwo.

2, 3. Ndi sia ḽifhio ḽe Ṱhanzi dza Yehova dza ḽi dzhia tshifhingani tsha Nndwa ya Shango ya Vhuvhili na nga murahu, nahone ndi ngani?

² Ndi mini zwe Ṱhanzi dza Yehova dza zwi ita nga tshenetsho tshifhinga tsha nndwa? Mafhungo a ḓivhazwakale a sumbedza uri vho hana u dzhia sia nga nṱhani ha uri ndi Vhakriste. Ndi mini zwe zwa ita uri vha ite nga u ralo? Zwe zwa vha ṱuṱuwedza nga maanḓa ndi tsumbo ya Yesu na pfunzo dzawe. Yesu o ri: “Ndi zwine vhathu vhoṱhe vha ḓo ḓivha ngazwo uri ni vhafunziwa vhanga, arali ni tshi funana.” (Yoh. 13:35) Vho dovha vha dzhiela nṱha zwe zwa ṅwalwa nga muapostola Paulo musi a tshi ṅwalela Vhakriste Vhakorinta.—Vhalani 2 Vhakorinta 10:3, 4.

 ³ Nga zwenezwo, Vhakriste vha ngoho vhane vha vha na luvalo lwo gudiswaho nga Bivhili, a vha gudi u lwa kana u dzhenelela kha dzinndwa. Nga ṅwambo wa u sa dzhia sia samusi vhe Vhakriste, Ṱhanzi nnzhi, vhaṱuku na vhahulwane, vhanna na vhafumakadzi, vho tovholwa. Vhanzhi vho tambudzwa gammbani dza tshengedzo na dzhele. Nga tshifhinga tsha Vhunazi ngei Dzheremane, vhaṅwe vho ita na u vhulahwa. Hu sa londwi u tovholwa ha tshiṱuhu he Ṱhanzi dza sedzana naho ngei Yuropa, a dzo ngo hangwa mushumo wadzo wa u huwelela mafhungo maḓifha a Muvhuso wa Yehova. Vho huwelela nga u fulufhedzea—dzhele, gammbani dza tshengedzo na musi vhe kha maṅwe mashango. * Nga murahu, Ṱhanzi a dzo ngo dzhia sia kha nndwa ya u fhelisa lushaka ngei Rwanda nga 1994. Vho dovha vha sa dzhie sia kha u shuluwa ha malofha he ha itea mashangoni a Balkan, nga tshifhinga tsha u fhandekana ha shango ḽe ḽa vha ḽi tshi vhidzwa Yugoslavia.

4. U sa dzhia sia ha Ṱhanzi dza Yehova ho kwama hani vhaṱaleli?

⁴ U sa dzhia sia ha Ṱhanzi dza Yehova ho khwaṱhisedza vhaṱaleli vhanzhi u mona na shango uri Ṱhanzi dzi funa Mudzimu na vhahura zwa vhukuma. Nga maṅwe maipfi, vha sumbedza u vha Vhakriste vha ngoho. Fhedzi hu na zwiṅwe zwithu kha vhurabeli hashu zwe zwa khwaṱhisedza vhathu vhanzhi uri musi vha tshi vhona Ṱhanzi dza Yehova, vha khou vhona Vhakriste vha ngoho.

5. Ndi tshanduko ifhio ye vhatevheli vha Kristo vha u thoma vha sedzana nayo?

⁵ U bva mathomoni a vhuḓinḓa hawe, Yesu o ombedzela ndeme ya u huwelela mafhungo maḓifha a Muvhuso wa Mudzimu. O khetha vhafunziwa vha 12 uri vha thome vhuḓinḓa ha shango ḽoṱhe; nga murahu, a gudisa tshigwada tsha vhafunziwa vha 70. (Luka 6:13; 10:1) Zwenezwo zwo lugiselelwa u itela uri mafhungo maḓifha a ye kha vhaṅwe, vho thoma nga u gudisa Vhayuda. Nga murahu, ha itea zwithu zwi mangadzaho! Vhafunziwa vha Yesu vha huwelela kha tshaka dzi songo fumbaho. Yeneyo i tea u vha yo vha i tshanduko khulwane lungafhani kha vhafunziwa vha Vhayuda vha fhiseaho!—Mish. 1:8.

6. Ndi mini zwe zwa ita uri Petro a ṱhogomele uri Yehova ha ṱaluli?

⁶ Muapostola Petro o rumelwa muḓini wa Koronelio wa Vhannḓa a songo fumbaho. Nga zwenezwo, Petro a zwi ṱhogomela uri Mudzimu ha ṱaluli. Koronelio na vha muṱa wawe vha lovhedzwa. Vhukriste ho vha vhu tshi vho ṱanḓavhutshela kha tsimu ntswa khulwane; vhathu vha tshaka dzoṱhe vho pfa ngoho nahone vha i ṱanganedza. (Mish. 10:9-48) Zwino ngoho ya swika shangoni ḽoṱhe.

7, 8. Ndangulo ya Yehova yo dzhia vhukando vhufhio? (Sedzani tshifanyiso tsha u thoma.)

⁷ Kha ḓivhazwakale ya musalauno ya Ṱhanzi dza Yehova, vhane vha ranga phanḓa vho tikedza nga u fhisea mushumo wa u huwelela na u funza mafhungo maḓifha shangoni ḽoṱhe. Ṋamusi, Ṱhanzi dzi ṱoḓaho u vha milioni dza malo dzi fhiseaho dzi khou ita zwine dza nga kona u itela u phaḓaladza mulaedza wa Kristo nga nyambo dzi fhiraho 600 nahone hu kha ḓi vha na dziṅwe! Ṱhanzi dza Yehova vha ḓivhelwa vhuḓinḓa havho ha nnḓu nga nnḓu na u huwelela zwiṱaraṱani, nahone nga zwiṅwe zwifhinga vha shumisa maṱafula na zwigariki u itela u ṱana khandiso dzavho.

⁸ Vhaṱalutshedzeli vha fhiraho 2900 vho gudiswa nga nḓila yo khetheaho u itela u ṱalutshedzela Bivhili na khandiso dza Bivhili. A vha ṱalutshedzeli nyambo dzine dza dzhiiwa dzi khulwane fhedzi. Vha ṱalutshedzela na nyambo dzi sa ḓivhiwi nga vhathu vhanzhi,  fhedzi dzine dza ambiwa nga vhathu vha dzimilioni. Sa tsumbo, ngei Spain vhathu vha dzimilioni vha ngei Catalonia vha amba Lucatan ḓuvha ḽiṅwe na ḽiṅwe, lune lwa vha luambo lwavho lwa ḓamuni. Zwenezwino, ho no vha na vhathu vhane vha amba Lucatalan ḓoroboni dza Andorra, Alicante, Zwiṱangadzimeni zwa Balearic na Valencia. Zwino Ṱhanzi dza Yehova vha vho gandisa khandiso dza Bivhili nga Lucatalan nahone miṱangano ya Vhukriste i farwa nga luambo lune lwa kwama mbilu dza vhathu vhane vha dzula Catalonia.

9, 10. Ndi mini zwine zwa sumbedza uri ndangulo ya Mudzimu i na dzangalelo kha zwishaiwa zwa muya zwa vhathu vhoṱhe?

⁹ Enea maitele a u ṱalutshedzela na u gudisa a khou itwa fhethu hunzhi. Mexico ndi shango ḽine ha ambiwa Lupania, fhedzi hu na vhathu vhanzhi vhane vha amba dziṅwe nyambo. Vhaṅwe vhavho ndi Vhamaya. Davhi ḽa Mexico ḽo rumela tshigwada tsha vhaṱalutshedzeli vha Vhamaya uri vha ye u dzula shangoni ḽine vha ḓo amba lwonolwo luambo na u lu pfa ḓuvha ḽiṅwe na ḽiṅwe. Iṅwe tsumbo ndi Lunepali lune lwa ambiwa ngei Nepal, hune ha dzula vhathu vha fhiraho milioni dza 29. Kha ḽeneḽo shango hu ambiwa nyambo dzi ṱoḓaho u vha 120, fhedzi vhathu vha fhiraho milioni dza fumi vha amba Lunepali nahone vhaṅwe vha lu shumisa sa luambo lwavho lwa vhuvhili. Khandiso dzashu dza Bivhili dzi wanala na nga lwonolwo luambo.

¹⁰ Ndangulo ya Yehova i dzhia mushumo wa u huwelela mafhungo maḓifha a Muvhuso shangoni ḽoṱhe u wa ndeme vhukuma, samusi u tshi tikedzwa nga zwigwada zwa vhaṱalutshedzeli shangoni ḽoṱhe. Ho vha na fulo ḽa u tshimbidza zwibammbiri, bugwana na magazini dzi fhiraho milioni shangoni ḽoṱhe kha vhathu nga mahala. Tshinyalelo dzoṱhe dzo badelwa nga miṋeelo ya u ḓifunela ya Ṱhanzi dza Yehova, vhe vha tevhela vhulivhisi ha Yesu musi a tshi ri: “No ṋewa nga mahala, ṋeani nga mahala.”—Mat. 10:8.

11, 12. Mushumo wa u huwelela shangoni ḽoṱhe une wa itwa nga Ṱhanzi dza Yehova wo kwama vhaṅwe nga nḓila-ḓe?

¹¹ Samusi Ṱhanzi dza Yehova vhe vhahuweleli na vhagudisi vha Vhakriste vho ḓiṋekedzaho, vha tenda tshoṱhe uri vho wana ngoho lune vha ḓidzima zwithu zwinzhi u itela u huwelela kha vhathu vha dziṅwe tshaka na mirafho. Vhanzhi vho leludza vhutshilo havho, vha guda luṅwe luambo nahone vha ḓiḓowedza dziṅwe mvelele u itela u ṱanganela kha wonoyu mushumo wa ndeme wa Vhukriste. Wonoyu mushumo wa u huwelela na u funza ndi tshiṅwe tsha zwiitisi  zwine zwa ita uri vhathu vha tende uri Ṱhanzi dza Yehova ndi vhatevheli vha ngoho vha Yesu Kristo.

¹² Ṱhanzi dzi ita zwenezwi zwoṱhe nga nṱhani ha uri dzi tenda uri dzo wana ngoho. Fhedzi ndi zwifhio zwiṅwe zwe zwa ita uri vhathu vha dzimilioni vha tende uri Ṱhanzi dza Yehova dzo wana ngoho?—Vhalani Vharoma 14:17, 18.

13. Ṱhanzi dzo ita hani uri ndangulo i dzule yo kuna?

¹³ Ri nga vhuyelwa nga zwine zwa ambiwa nga Vhakriste vho ḓiṋekedzaho tshifhingani tshashu, vhane vha tenda uri vho wana ngoho. Muṅwe wahashu we a fhedza miṅwaha minzhi a tshi khou shumela Yehova o amba zwi tevhelaho: “Hu itwa vhuḓidini vhuhulwane uri ndangulo ya Yehova i dzule yo kuna siani ḽa matshilele nahone i sa solei, hu sa londwi uri ndi nnyi ane a fanela u ṋewa ndayo kana u kaidzwa.” Zwenezwi zwilinganyo zwa nṱha zwa matshilele zwi swikelelwa hani? Nga u tevhela zwilinganyo zwi re Ipfini ḽa Mudzimu na nḓila ye Yesu na vhafunziwa vhawe vha tshimbila ngayo. Nga zwenezwo, kha ḓivhazwakale ya musalauno ya Ṱhanzi dza Yehova, zwo vha zwi tshi ṱoḓea uri vha si gathi vha bviswe tshivhidzoni tsha Vhukriste nge vha si tevhele zwilinganyo zwa Mudzimu. Vhanzhi—u katela vhaṅwe vhe vha vha vha tshi tshila nga nḓila ine Mudzimu a sa i ṱanganedze, fhedzi vha shanduka—vho dzula vha tshi tshila vhutshilo ho kunaho na u vha tsumbo yavhuḓi.—Vhalani 1 Vhakorinta 6:9-11.

14. Vhanzhi vho bviswaho tshivhidzoni vho ita mini, nahone ha vha na mvelelo dzifhio?

¹⁴ Hu pfi mini nga vhe zwa tea uri vha bviswe tshivhidzoni nga nṱhani ha u sa tevhela vhulivhisi ha Maṅwalo? Vhanzhi vho rembuluwa vha ṱutshela maitele avho a si a Vhukriste nahone vha dovha vha ṱanganedzwa tshivhidzoni. (Vhalani 2 Vhakorinta 2:6-8.) U tshila nga vhuḓifari havhuḓi ha Bivhili zwo ita uri tshivhidzo tsha Vhukriste tshi kune, zwa ita uri vhathu vha vhe na fulufhelo khatsho. Ngauri Ṱhanzi dza Yehova vha tshila nga zwilinganyo zwa Mudzimu—naho kereke nnzhi dzi tshi tendela miraḓo yadzo i tshi ita zwiṅwe na zwiṅwe zwine ya funa—zwo ita uri vhanzhi vha tende uri ndi vhathu vhane vha tshila u tendelana na ngoho.

15. Ndi mini zwe zwa ita uri muṅwe wahashu a tende uri o wana ngoho?

¹⁵ Ndi ngani dziṅwe Ṱhanzi dzi re na tshenzhelo dzo tenda uri dzo wana ngoho? Muṅwe wahashu wa tshinnani a re miṅwahani ya vhu-50 o ri: “U bva ndi tshee muswa ndo vha ndi tshi tenda uri lutendo lwanga lwo thewa kha zwithu zwiraru zwa ndeme: (1) uri Mudzimu u hone; (2) uri o hevhedza Bivhili; na (3) uri u khou shumisa na u fhaṱutshedza tshivhidzo tsha Vhukriste tsha Ṱhanzi dza Yehova ṋamusi. Samusi ndo zwi guda miṅwahani yo fhiraho, ndo dzula ndi tshi lingedza u vhona arali zwenezwo zwithu zwi ngoho nahone nda ḓivhudzisa arali zwi zwa vhukuma. Ndo vhona vhungoho ha zwenezwo zwithu ṅwaha muṅwe na muṅwe,  zwa khwaṱhisa lutendo lwanga nahone zwa ita uri ndi tende uri zwa vhukuma ndo wana ngoho.”

16. Muṅwe wahashu wa tshisadzini o takadzwa hani nga ngoho?

¹⁶ Muṅwe wahashu wa tshisadzini o vhingwaho ane a shuma ofisini khulwane ya shango ḽoṱhe ngei New York o amba zwi tevhelaho nga ha ndangulo ya Yehova: “Ndi yone i yoṱhe ine ya huwelela dzina Yehova. Zwenezwo zwi pfala lungafhani musi ri tshi humbula uri dzina ḽa Mudzimu ḽi bvelela lu ṱoḓaho u vha 7000 Bivhilini! Ndi dzhiela nṱha ṱhuṱhuwedzo ine nda i wana kha 2 Koronika 16:9 ine ya ri: ‘Yehova maṱo awe a sedza shango ḽoṱhe, uri a vhonadze maanḓa awe kha ane a mu nambatela nga mbilu yoṱhe.’” O dovha a ri: “Ngoho yo ntsumbedza uri ndi nga nambatela Yehova nga mbilu yoṱhe u itela uri a nkhwaṱhise. Vhushaka hanga na Yehova ndi ha ndeme vhukuma. Nahone ndi dzhiela nṱha mushumo wa Yesu nge a nṋea nḓivho ya Mudzimu ine ya nkhwaṱhisa.”

17. Muṅwe we a vha a sa tendi uri Mudzimu u hone o ṱuṱuwedzwa nga mini, nahone ndi ngani?

¹⁷ Muṅwe we a vha a sa tendi uri Mudzimu u hone o amba a ri: “Tsiko yo ita uri ndi tende uri Mudzimu u ṱoḓa uri vhathu vha ḓiphine nga vhutshilo nahone ha nga tendi tshengelo i tshi bvela phanḓa nga hu sa fheli. Zwiṅwe hafhu, musi shango ḽi tshi bvela phanḓa ḽi tshi ita zwivhi, vhathu vha Yehova vha bvela phanḓa vhe na lutendo, u fhisea na lufuno. Ndi muya wa Yehova fhedzi une wa nga ita uri hu vhe na zwenezwi zwithu zwi mangadzaho ṋamusi.”—Vhalani 1 Petro 4:1-4.

18. Ni ḓipfa hani nga zwe zwa ambiwa nga vhaṅwe vhahashu vhavhili?

¹⁸ Muṅwe washu we a fhedza miṅwaha minzhi e Ṱhanzi o ṋea zwiitisi zwi tevhelaho zwa u tenda ngoho ine ra i huwelela: “Zwe nda zwi guda miṅwahani yo fhiraho zwo ita uri ndi tende uri Ṱhanzi dzo ita vhuḓidini vhuhulwane u itela u tevhela tsumbo ya Vhakriste vha ḓanani ḽa u thoma ḽa miṅwaha. Musi ndi tshi dalela maṅwe mashango, ndo vhona vhuthihi vhune ha vha hone kha Ṱhanzi dza Yehova shangoni ḽoṱhe. Ngoho i bvaho Bivhilini yo ita uri ndi fushee na u takala.” Musi muṅwe wahashu wa tshinnani ane a vha na miṅwaha i fhiraho 60 a tshi vhudziswa uri ndi ngani a tshi tenda uri o wana ngoho, o livhisa ṱhogomelo kha Yesu Kristo, a ri: “Ro guda nga vhuronwane vhutshilo na vhuḓinḓa ha Yesu nahone ra dzhiela nṱha tsumbo yawe. Ro ita tshanduko vhutshiloni hashu u itela u sendela tsini na Mudzimu nga kha Kristo Yesu. Ro ṱanganedza tshiṱhavhelo tshi rengululaho tsha Kristo sa mutheo wa u tshidzwa. Nahone ri a zwi ḓivha uri o vuswa vhafuni. Ri na vhuṱanzi ha vhathu vhe vha vhona zwenezwo.”—Vhalani 1 Vhakorinta 15:3-8.

19, 20. (a) Ndi vhuḓifhinduleli vhufhio he Paulo a vhu ombedzela tshivhidzoni tsha Roma? (b) Samusi ri Vhakriste vho ḓiṋekedzaho, ndi ifhio ndugelo ine ra vha nayo?

¹⁹ Samusi ri Vhakriste vhane ra funa vhaṅwe vhathu, ri nga si litshe u vhudza vhaṅwe ngoho yo khetheaho ine ra i ḓivha. Paulo o amba na vhahawe tshivhidzoni tsha ngei Roma a ri: “Arali u tshi ḓivhadza khagala ḽeneḽo ‘ipfi ḽi re mulomoni wau,’ uri Yesu ndi Murena, na u vha na lutendo lu bvaho mbiluni uri Mudzimu o mu vusa vhafuni, u ḓo tshidzwa. Ngauri muthu u tenda nga mbilu a ḓo kona u itwa o lugaho, fhedzi muthu u ḓivhadza khagala nga mulomo a kona u ḓo tshidzwa.”—Vharoma 10:9, 10.

²⁰ Samusi ri Ṱhanzi dza Yehova dzo ḓiṋekedzaho, ri a tenda uri ro wana ngoho nahone ri a ḓivha nga ha ndugelo yashu ya u funza vhaṅwe mafhungo maḓifha a vhuvhusi ha Muvhuso wa Mudzimu. Musi ri tshi bvela phanḓa na mushumo washu wa u huwelela, u nga ri vhaṅwe vha nga ṱuṱuwedzea nga zwine ra zwi funza zwine zwa bva Bivhilini na nga u tenda hashu.