1. Ndi ngani u edzisa Yesu zwi tshi nga ri sendedza tsini na Yehova?

KANZHI ri lingedza u edzisa vhathu vhane ra vha takalela. Kha vhathu vhoṱhe vhe vha vhuya vha tshila, Yesu Kristo ndi muthu wa khwine ane ra fanela u mu edzisa. Ndi ngani? Ngauri Yesu o vhuya a ri: “A vhonaho nṋe u vhona na Khotsi.” (Yohane 14:9) Zwenezwi ndi ngauri Yesu u edzisa vhumuthu ha Khotsi awe nga ho fhelelaho. Nga zwenezwo, musi ri tshi guda nga ha Yesu, ri vha ri tshi khou guda nga ha Yehova. Nahone musi ri tshi edzisa Yesu, ri vha ri tshi khou sendela tsini na Yehova, Muthu muhulwane wa fhethu hoṱhe. Zwenezwo ndi ndugelo khulwane lungafhani!

2, 3. (a) Ndi ngani Yehova o ri ṋea zwidodombedzwa zwo engedzeaho nga ha vhutshilo ha Yesu, nahone Mudzimu washu u lavhelela uri ri ite mini? (b) Ri ḓo haseledza mini kha ino thero na i tevhelaho?

² Bivhilini, Yehova o ri ṋea zwidodombedzwa zwo engedzeaho nga ha vhutshilo ha Yesu. Ndi ngani? Ngauri Mudzimu washu u ṱoḓa ri tshi ḓivha Murwa wawe u itela uri ri kone u mu edzisa nga vhuronwane. (Vhalani 1 Petro 2:21.) Bivhilini,  tsumbo ye Yesu a ri vhetshela yone i vhambedzwa na ṋayo. Zwenezwo zwi amba mini? Yehova u ṱoḓa ri tshi tevhedza ṋayo dza Murwa wawe, zwine zwa amba uri ri fanela u edzisa zwoṱhe zwe a zwi ita. Vhukuma, Yesu o vha o fhelela, ngauralo Yehova ha lavheleli uri ri edzise Murwa wawe nga ho fhelelaho. Nṱhani hazwo, Mudzimu u ṱoḓa ri tshi ita zwoṱhe zwine ra nga kona u itela u edzisa Yesu.

³ Kha ri ṱolisise dziṅwe pfaneleo dza Yesu dzavhuḓi. Kha ino thero, ri ḓo haseledza nga ha u ḓiṱukufhadza na vhulenda hawe. Kha i tevhelaho, ri ḓo haseledza nga ha tshivhindi na u ṱalukanya hawe. Ri ḓo fhindula mbudziso tharu nga ha pfaneleo iṅwe na iṅwe: I amba mini? Yesu o sumbedza hani yeneyo pfaneleo? Ri nga mu edzisa hani?

4. Zwi amba mini u ḓiṱukufhadza?

⁴ U ḓiṱukufhadza ndi mini? Vhathu vhanzhi vhane vha ḓihudza vha humbula uri u ḓiṱukufhadza ndi tshiga tsha u shaya nungo kana u sa ḓifulufhela. Fhedzi naa zwenezwi ndi ngoho? Zwi re zwone ndi uri, u itela u ḓiṱukufhadza ri fanela u vha na nungo na tshivhindi. U ḓiṱukufhadza zwo fhambana na u ḓikukumusa kana u ḓihudza. U itela u ḓiṱukufhadza, ri fanela u thoma ra vha na mavhonele avhuḓi nga ha riṋe vhaṋe. Sa tsumbo, iṅwe ṱhalutshedzelo ya Bivhili yo ri: “U ḓiṱukufhadza ndi u ḓivha uri ri vhaṱuku vhukuma phanḓa ha Mudzimu.” Zwiṅwe hafhu, arali ri tshi ḓiṱukufhadza, ri nga si ḓipfe ri vha ndeme u fhira vhaṅwe vhathu. (Vharoma 12:3; Vhafilipi 2:3) A zwo ngo leluwa uri vhathu vha songo fhelelaho vha sumbedze yeneyi pfaneleo. Fhedzi ri nga guda u ḓiṱukufhadza arali ri tshi elekanya nga ha vhuhulwane ha Yehova na u edzisa tsumbo ya Yesu.

5, 6. (a) Mikaele muruṅwa muhulu ndi nnyi? (b) Mikaele o sumbedza hani muya wa u ḓiṱukufhadza?

⁵ Yesu o sumbedza hani u ḓiṱukufhadza? Murwa wa Mudzimu o dzula a tshi ḓiṱukufhadza, musi e muruṅwa wa maanḓa ngei ṱaḓulu na musi e munna o fhelelaho kha ḽifhasi. Kha ri vhone tsumbo dzi si gathi.

⁶ Mavhonele awe. Kha bugu ya Bivhili ya Yuda, ri vhala nga ha vhutshilo ha Yesu musi a sa athu u ḓa kha ḽifhasi. (Vhalani Yuda 9.) Sa muruṅwa muhulu Mikaele, Yesu o lwa na Diabolo, nahone o vha a tshi khou “vhangisana” na onoyo muvhi nga ha “tshitumbu tsha Mushe.” Musi Mushe o no fa, Yehova o vhulunga tshitumbu tshawe fhethu hune ha si ḓivhiwe nga muthu. (Doiteronomio 34:5, 6) Khamusi Diabolo o vha a tshi ṱoḓa u linga Vhaisiraele uri vha shumise tshitumbu tsha Mushe u itela vhurabeli ha mazwifhi. Hu sa londwi zwithu zwivhi zwe Diabolo a vha a tshi ṱoḓa u zwi ita, nga tshivhindi Mikaele o mu thivhela. Iṅwe bugu ya ndaedzi i amba uri ipfi u “vhangisana” ḽi nga dovha ḽa ṱaluswa sa u “ṱaṱisana nga lwa mulayo” nahone i sumbedza uri “Mikaele o thivhela Diabolo u dzhia tshitumbu tsha Mushe.” Fhedzi, muruṅwa muhulwane o vha a tshi zwi ḓivha uri maanḓa awe o linganyiselwa. Nga zwenezwo,  o zwi sia zwanḓani zwa Yehova, Muhaṱuli Muhulwane, ane a vha na ndugelo e eṱhe ya u haṱula Sathane. Ndi u ḓiṱukufhadza huhulwane lungafhani he Yesu a hu sumbedza!

7. Yesu o sumbedza hani u ḓiṱukufhadza nga maambele na maitele awe?

⁷ Musi Yesu e kha ḽifhasi, o dovha a sumbedza u ḓiṱukufhadza nga nḓila ye a amba ngayo na nga zwithu zwe a zwi ita. Maambele awe. Yesu o vha a sa ṱoḓi uri vhaṅwe vhathu vha livhise ṱhogomelo khae zwi songo tea. Nṱhani hazwo, o vha a tshi ṱoḓa uri vhugala hoṱhe vhu ye kha Khotsi awe. (Marko 10:17, 18; Yohane 7:16) Yesu ho ngo vhuya a amba na vhafunziwa vhawe nga nḓila ine ya vha ita uri vha ḓipfe vhe matsilu kana vhe vha fhasi. Nṱhani hazwo, o vha a tshi vha ṱhonifha nahone a vha sumbedza uri u a vha fulufhela nga u vha khoḓa nga ha zwithu zwavhuḓi zwe vha zwi ita. (Luka 22:31, 32; Yohane 1:47) Maitele awe. Yesu o khetha u tshila vhutshilo vhu leluwaho vhu si na zwithu zwi vhonalaho. (Mateo 8:20) O vha o ḓiimisela u ita mushumo u nyadzeaho we vhaṅwe vha vha vha songo ḓiimisela u u ita. (Yohane 13:3-15) O dovha a vhea tsumbo yavhuḓi ya u ḓiṱukufhadza nga u thetshelesa hawe. (Vhalani Vhafilipi 2:5-8.) U fhambana na vhathu vha ḓikukumusaho vhane vha sa fune u thetshelesa vhaṅwe, nga u ḓiṱukufhadza Yesu o ita zwoṱhe zwe Yehova a mu vhudza uri a zwi ite, u “swika a tshi fa.” Zwi khagala uri Yesu, Murwa muthu, o vha a tshi “ḓiṱukufhadza mbiluni.”—Mateo 11:29.

8, 9. Ri nga sumbedza hani u ḓiṱukufhadza?

⁸ Ri nga edzisa hani u ḓiṱukufhadza ha Yesu? Mavhonele ashu. Musi ri tshi ḓiṱukufhadza, ri a zwi ḓivha uri maanḓa ashu o linganyiselwa. Nga zwenezwo, ri a zwi ḓivha uri a ri na ndugelo ya u haṱula vhaṅwe vhathu. A ri nga vha sasaladzi kana u timatima zwiṱuṱuwedzi zwavho. (Luka 6:37; Yakobo 4:12) U ḓiṱukufhadza zwi ri thusa u iledza u vha “muvhuya wa ṋaṋisa.” Zwenezwi zwi amba uri a ri nga ḓo ḓipfa ri vha khwine u fhira vhane vha si vhe na vhukoni vhu fanaho na hashu kana ndugelo dzine ra vha nadzo. (Muhuweleli 7:16) Vhahulwane vha ḓiṱukufhadzaho a vha humbuli uri vha khwine kha vhahashu vha tshinnani na vha tshisadzini. Nṱhani hazwo, vhenevha vhalisa vhane vha vha na lufuno vha ‘dzhia vhaṅwe vhe vhahulwane khavho,’ nga zwenezwo, vha vhona vhaṅwe vhe vha ndeme u fhirisa vhone vhane.—Vhafilipi 2:3; Luka 9:48. 

⁹ Ṱhogomelani W. J. Thorn, we a shuma sa mulavhelesi a dalelaho u bva nga 1894. Nga murahu ha miṅwaha minzhi, o ṋewa mushumo wa u ṱhogomela khuhu dza Bulasini ya Muvhuso ngei devhula ha New York. Musi a tshi ḓipfa u nga u fanela u ita mushumo wo engedzeaho wa ndeme, Wahashu Thorn o vha a tshi ḓivhudza uri: “Iwe buse. Ndi mini tshine wa ḓikukumusa ngatsho?” (Vhalani Yesaya 40:12-15.) Honoho ndi u ḓiṱukufhadza lungafhani!   

10. Ri nga sumbedza hani u ḓiṱukufhadza nga maambele na maitele ashu?

 ¹⁰ Maambele ashu. Arali ri tshi ḓiṱukufhadza vhukuma, zwi ḓo kwama nḓila ine ra amba na vhaṅwe ngayo. (Luka 6:45) Musi ri tshi amba navho, ri nga si livhise ṱhogomelo kha ndugelo dzashu na zwithu zwe ra zwi ita. (Mirero 27:2) Nṱhani hazwo, ri ḓo khoḓa vhahashu vha tshinnani na vha tshisadzini nga zwithu zwavhuḓi zwe vha zwi ita, nahone ri ḓo livhisa ṱhogomelo kha pfaneleo dzavho dzavhuḓi na vhukoni havho. (Mirero 15:23) Maitele ashu. Vhakriste vha ḓiṱukufhadzaho a vha lingedzi u ḓiitela bvumo kana u vha vha ndeme kha ḽino shango. Nṱhani hazwo, vha khetha u tshila vhutshilo vhu leluwaho u katela na u ita mishumo i nyadzeaho u itela uri vha kone u shumela Yehova nga hune vha nga kona ngaho. (1 Timotheo 6:6, 8) Tsha ndeme vhukuma, ri nga sumbedza u ḓiṱukufhadza nga u thetshelesa. Ri fanela u ḓiṱukufhadza u itela uri ri “thetshelese vhane vha ranga phanḓa” tshivhidzoni, u ṱanganedza na u tevhedza vhulivhisi ha ndangulo ya Yehova.—Vhaheberu 13:17.

11. Vhulenda ndi mini?

¹¹ Vhulenda ndi mini? Ipfi “vhulenda” ḽi ṱalusa mafunda na lufuno. Vhulenda vhu amba u funa nahone zwi fana na u pfela vhuṱungu na u khathutshela. Bivhili i amba nga ha u “pfela vhuṱungu,” “u khathutshela,” na u “funa.” (Luka 1:78; 2 Vhakorinta 1:3; Vhafilipi 1:8) Iṅwe ndaedzi ya Bivhili i amba uri u sumbedza vhulenda zwi fhira u sokou pfela vhuṱungu vhane vha shaya. I amba uri u vha na vhulenda zwi amba uri “ri na ndavha vhukuma nahone ri ṱoḓa u thusa” nga u ita zwithu zwine zwa ḓo shandula vhutshilo ha vhaṅwe uri vhu vhe ha khwine. Vhulenda ndi pfaneleo ine ya ṱuṱuwedza muthu uri a shandule vhutshilo ha vhaṅwe.

12. Ndi mini zwi sumbedzaho uri Yesu o pfela vhaṅwe vhuṱungu, nahone vhulenda hawe ho mu ṱuṱuwedza uri a ite mini?

¹² Yesu o sumbedza hani vhulenda? Vhulenda hawe na maitele awe. Yesu o vha a tshi pfela vhaṅwe vhuṱungu. Musi Yesu a tshi vhona khonani yawe Maria na vhaṅwe vha tshi khou lilela Lazaro nge a fa, na ene o lila navho. (Vhalani Yohane 11:32-35.) Nga zwenezwo, u pfela vhuṱungu hu fanaho he ha mu ita uri a ṱoḓe u vusa murwa wa tshilikadzi ho mu ṱuṱuwedza u vusa Lazaro. (Luka 7:11-15; Yohane 11:38-44) Honoho u pfela vhuṱungu hu nga vha ho ṋea Lazaro tshibuli tsha u tshila ṱaḓulu. Mathomoni, Yesu o “pfela vhuṱungu” gogo ḽe ḽa ḓa khae. U pfela vhuṱungu hawe ho mu ṱuṱuwedza “u vha funza zwithu zwinzhi.” (Marko 6:34) Yeneyi tshenzhelo yo shandula vhutshilo ha vhe vha tevhedza pfunzo dzawe! Vhulenda ha Yesu ho vha vhu tshi fhira u sokou amba. Vhulenda hawe ho dovha ha mu ṱuṱuwedza u thusa vhathu vha shayaho.—Mateo 15:32-38; 20:29-34; Marko 1:40-42.

13. Yesu o amba hani na vhaṅwe nga vhulenda? (Sedzani tshifanyiso tsha u thoma.)

¹³ Maipfi awe a vhulenda. U pfela vhuṱungu ha Yesu zwo mu ṱuṱuwedza u amba na vhaṅwe nga vhulenda, zwihuluhulu kha vho tsikeledzeaho. Muapostola Mateo o redza maipfi a Yesaya nga ha Yesu. Yesaya o ri: “Luṱanga lwo piḓeaho ha nga lu vunḓi; luvhone lu kha ḓi nyengaho ha nga lu dzimi.” (Yesaya 42:3; Mateo 12:20) Zwenezwo zwi amba mini? Yesu ho ngo tambudza kana u sa fara vhathu zwavhuḓi.  Nṱhani hazwo, o amba nga nḓila i vha homolosaho. O huwelela mulaedza wa fulufhelo kha vha “dzimbilu dzo pwashakanywaho.” (Yesaya 61:1) O ramba vhathu vhe vha vha vho ‘neta na u lemelwa’ uri vha ḓe khae vha kone u “homoloswa.” (Mateo 11:28-30) O fulufhedzisa vhafunziwa vhawe uri Mudzimu u na ndavha na mugwadameli muṅwe na muṅwe wawe u katela na “vhana,” kana vhane shango ḽa vha dzhia vhe si vha ndeme.—Mateo 18:12-14; Luka 12:6, 7.

14. Ri nga sumbedza hani vhaṅwe vhulenda?

¹⁴ Ri nga edzisa hani vhulenda ha Yesu? Vhulenda hashu. Bivhili i ri vhudza uri ri fanela u lwela u sumbedza “u pfela vhuṱungu,” naho zwenezwo zwi sa ḓi nga lwa nzulele kha riṋe. Enea maḓipfele ndi tshipiḓa tsha “vhumuthu vhuswa” vhune Yehova a lavhelela Vhakriste vhoṱhe uri vha vhu ambare. (Vhalani Vhakolosa 3:9, 10, 12.) Ni nga sumbedza hani vhulenda? Bivhili i ri: “Ni ṱanḓavhudze lufuno lu re mbiluni dzaṋu.” (2 Vhakorinta 6:11-13) Thetshelesani nga vhuronwane musi muṅwe a tshi ni vhudza nḓila ine a ḓipfa ngayo na zwine zwa mu vhilaedzisa. (Yakobo 1:19) Humbulisisani nga hazwo nahone ni ḓivhudzise uri: ‘Arali ndo vha ndi kha vhuimo hawe, ndo vha ndi tshi ḓo ḓipfa hani? Ndi ḓo ṱoḓa mini?’—1 Petro 3:8.

15. Ri nga ita mini u itela u thusa vho felwaho kana vha shengelaho?

¹⁵ Maitele ashu a vhulenda. Vhulenda vhu ḓo ri ṱuṱuwedza uri ri thuse vhaṅwe, zwihuluhulu vhe vha felwa kana vha shengelaho. Ri nga vha thusa hani? Vharoma 12:15 i ri: “Ni lile na vhane vha lila.” Kanzhi vhathu vha ṱoḓa u khuthadzwa u fhira u ṋewa thandululo. Vha ṱoḓa khonani ine ya vha na dzangalelo khavho na ine ya vha thetshelesa. Muṅwe wahashu wa tshisadzini we a khuthadzwa nga vhahashu vha tshinnani na vha tshisadzini musi ṅwananyana wawe a tshi fa, o ri: “Ndo zwi takalela vhukuma musi khonani dzi tshi ḓa nahone dza lila na nṋe.” Ri nga dovha ra sumbedza vhulenda nga u thusa vhaṅwe nga zwiṅwe zwithu. Khamusi hu na tshilikadzi ine ya ṱoḓa thuso ya u lugiselwa zwithu muḓini wayo. Kana khamusi hu na Mukriste o no aluwaho ane a ṱoḓa thuso ya u iswa miṱanganoni, vhuḓinḓani  kana ha dokotela. Na zwithu zwiṱuku zwi sumbedzaho vhuthu zwi nga ita tshanduko khulwane vhutshiloni ha muthu. (1 Yohane 3:17, 18) Tsha ndeme vhukuma, ri nga sumbedza vhulenda kha vhaṅwe nga u huwelela mafhungo maḓifha nga hune ra nga kona ngaho. Yeneyi ndi nḓila ya khwine lungafhani ine ra nga ita ngayo tshanduko vhutshiloni ha vhathu vha mbilu dzavhuḓi!

16. Ndi mini zwine ra nga vhudza vho tsikeledzeaho u itela u vha ṱuṱuwedza?

¹⁶ Maipfi ashu a vhulenda. Vhulenda vhu ḓo ri ṱuṱuwedza u ‘ṱuṱuwedza vho tsikeledzeaho.’ (1 Vhathesalonika 5:14) Ndi mini zwine ra nga vha vhudza u itela u vha ṱuṱuwedza? Ri nga vha vhudza nḓila ine ra vha funa ngayo. Ri nga vha khoḓa na u vha thusa u vhona pfaneleo na vhukoni havho havhuḓi. Ri nga vha humbudza uri Yehova o vha thusa u wana ngoho, nga zwenezwo ndi vha ndeme khae. (Yohane 6:44) Ri nga vha khwaṱhisedza uri Yehova u funa vhukuma vhashumeli vhawe “vha dzimbilu dzo vunḓekanaho” kana “vha mimuya yo huvhalaho.” (Psalme ya 34:18) Maipfi ashu a vhulenda a nga homolosa vhukuma vhane vha ṱoḓa u khuthadzwa.—Mirero 16:24.

17, 18. (a) Yehova u lavhelela uri vhahulwane vha fare hani nngu dzawe? (b) Ri ḓo haseledza mini kha thero i tevhelaho?

¹⁷ Vhahulwane, Yehova u lavhelela uri ni fare nngu dzawe nga vhulenda. (Mishumo 20:28, 29) Ni humbule uri ndi vhuḓifhinduleli haṋu u gudisa, u ṱuṱuwedza na u homolosa nngu dzawe. (Yesaya 32:1, 2; 1 Petro 5:2-4) Nga zwenezwo, muhulwane ane a pfela vhuṱungu a nga si lingedze u langa vhahawe, zwine zwa vha u vha vhetshela milayo kana u vha tsikeledza uri vha ite zwithu zwine vha sa kone u zwi ita. Nṱhani hazwo, muhulwane u ṱoḓa vhahawe vha tshinnani na vha tshisadzini vha tshi takala zwa vhukuma, nahone u fulufhela uri u funa havho Yehova zwi ḓo vha ṱuṱuwedza u ṋea Mudzimu zwa khwine.—Mateo 22:37.

¹⁸ Samusi ri tshi khou elekanya nga ha u ḓiṱukufhadza na vhulenda ha Yesu, ri ḓo ṱuṱuwedzea u mu edzisa. Kha thero i tevhelaho, ri ḓo haseledza nḓila ine ra nga edzisa ngayo tshivhindi na ṱhalukanyo zwa Yesu.