1. Ndi mini zwe zwa ita uri zwi konḓe u ita mushumo wa u huwelela?

MUSI vhathu vha Yehova vha tshi thoma u huwelela mafhungo maḓifha miṅwahani ya 130 yo fhiraho, vho sedzana na vhuleme vhunzhi. * (Sedzani ṱhaluso i re magumoni a siaṱari.) U fana na Vhakriste vha ḓanani ḽa u thoma ḽa miṅwaha, vho vha vhe tshigwada tshiṱuku nahone vho huwelela mulaedza we vhathu vhanzhi vha sa u takalele. Vhaṅwe vhathu vho vha vha tshi humbula u nga a vho ngo funzea. Musi Sathane o no poselwa kha ḽifhasi, vho tovholwa. (Nzumbululo 12:12) Nahone u bva nga tshenetsho tshifhinga, vha khou ḓi huwelela kha enea ‘maḓuvha a vhufhelo’ a “konḓaho u sedzana” nao.—2 Timotheo 3:1.

2. Yehova u khou bvela hani phanḓa a tshi ri thusa u huwelela?

² Fhedzi Yehova u khou ḓi bvela phanḓa a tshi thusa vhathu vhawe. U ṱoḓa vha tshi huwelela mafhungo maḓifha ḽifhasini  ḽoṱhe nahone a nga si tendele tshiṅwe tshithu tshi tshi thivhela wonoyo mushumo. O thusa vhathu vhawe uri vha mu gwadamele nga nḓila ine a i takalela nga u vha bvisa kha vhurereli ha mazwifhi. O ita zwi fanaho tshifhingani tsho fhiraho musi a tshi vhofholola Vhaisiraele Babele. (Nzumbululo 18:1-4) Nahone zwine Yehova a ri funza, zwi a ri vhuyedza sa muthu nga eṱhe. U ri thusa uri ri tshile ri na mulalo na vhaṅwe vhathu nahone u ri gudisa uri ri kone u funza vhaṅwe nga hae. (Vhalani Yesaya 48:16-18.) Naho Yehova a tshi livhisa mushumo washu, zwenezwo a zwi ambi uri tshifhinga tshoṱhe u shandula zwiitea zwa shango u itela u ri thusa u huwelela. Ndi ngoho uri zwiṅwe zwithu zwe zwa itea shangoni, zwo ita uri mushumo washu wa u huwelela u leluwe. Fhedzi ri kha ḓi tovholwa nahone ri sedzana na dziṅwe thaidzo dzine dza bva shangoni ḽa Sathane. Ndi nga thuso ya Yehova fhedzi, ine ya ita uri ri kone u huwelela.—Yesaya 41:13; 1 Yohane 5:19.

3. Vhuporofita ha Daniele ho ḓadzea hani?

³ Daniele o porofita uri tshifhingani tsha vhufhelo, vhathu vhanzhi vha ḓo pfesesa ngoho ya Bivhili. (Vhalani Daniele 12:4.) Musi “tshifhinga tsha vhufhelo” tshi tshi thoma, Yehova o thusa vhathu vhawe u pfesesa pfunzo ya Bivhili ya ndeme na uri vha iledze pfunzo dza mazwifhi dza ḽa Vhudzhagane. Ṋamusi, vhathu vhawe vha khou gudisa ngoho ya Bivhili ḽifhasini ḽoṱhe. Zwi tou vha khagala uri vhuporofita ha Daniele ho ḓadzea. Vhathu vha ṱoḓaho u vha milioni dza malo vho guda ngoho nahone vha khou i gudisa vhaṅwe. Nga zwenezwo, ndi zwifhio zwiṅwe zwithu zwe zwa thusa vhathu vha Yehova u huwelela shangoni ḽoṱhe?

4. Nga ṅwaha wa 1900, Bivhili yo ṱalutshedzelwa nga nyambo nngana?

⁴ Ṋamusi vhathu vhanzhi vha na Bivhili nahone zwenezwi zwi ri thusa u vha funza mafhungo maḓifha. Fhedzi zwenezwi zwo vha zwi songo tou ralo. Lwa miṅwaha ya maḓana, vhafunzi vha ḽa Vhudzhagane vho vha vha sa ṱoḓi vhathu vha tshi vhala Bivhili. Vho ita na u tovhola vhe vha i vhala na u vhulaha vhaṅwe vhe vha i ṱalutshedzela. Fhedzi kha miṅwaha ya vhu-1800, maṅwe madzangano o ṱalutshedzela kana u gandisa Bivhili kana zwipiḓa zwayo nga nyambo dzi ṱoḓaho u vha 400. Nga ṅwaha wa 1900, vhathu vhanzhi vho vha vhe na Bivhili. Naho zwo ralo, vho vha vha sa pfesesi zwine ya zwi funza.

5. Ndi ufhio mushumo we wa itwa nga Ṱhanzi dza Yehova u itela u ṱalutshedzela Bivhili?

⁵ Vhathu vha Yehova vho vha vha tshi zwi ḓivha uri vha fanela u vhudza vhaṅwe nga ha zwine Bivhili ya zwi funza nahone vho ita zwenezwo. Mathomoni vho shumisa Bivhili dze dza vha dzi hone, nahone vha ṋea vhathu dzikopi. U bva nga 1950, vho gandisa New World Translation of the Holy Scriptures, kana zwipiḓa zwayo nga nyambo dzi fhiraho 120. Nga 2013, vho gandisa New World Translation ya Luisimane yo vusuluswaho. Yeneyi Bivhili yo leluwa u i pfesesa na u i ṱalutshedzela. Musi ri tshi shumisa Bivhili ine vhathu vha kona u i pfesesa, zwo leluwa u vha funza ngoho.

6, 7. (a) Ndi nndwa dzifhio dze dza vha hone miṅwahani ya 100 yo fhiraho? (b) Zwifhinga zwa mulalo kha maṅwe mashango zwo ri thusa hani u huwelela?

⁶ Miṅwahani ya 100 yo fhiraho, ho vha na nndwa nnzhi, u katela na nndwa mbili  dza shango. Vhathu vhanzhi vho fa. Nga zwenezwo, mulalo wo vha hone nga nḓila dzifhio nahone wo thusa hani vhathu vha Yehova u huwelela? Nga tshifhinga tsha nndwa ya vhuvhili ya shango, Nathan Knorr o vha a tshi khou ranga phanḓa Ṱhanzi dza Yehova. Buthanoni ḽa 1942, o ṋekedza nyambo i nyanyulaho ine ya vha na tshiṱoho, “Mulalo—Naa U Nga Vha Hone Tshoṱhe?” Wahashu Knorr o ṱalutshedza vhuporofita ha Nzumbululo ndima ya 17 nahone a sumbedza uri Haramagedo yo vha i sa athu u swika. Nga murahu ha nndwa hu ḓo vha na tshifhinga tsha mulalo.—Nzumbululo 17:3, 11.

⁷ Vhukuma, zwenezwo a zwo ngo amba uri nga murahu ha nndwa ho vha na mulalo fhethu hoṱhe. U bva nga nndwa ya vhuvhili ya shango, vhathu vhanzhi vho fa kha dziṅwe nndwa. Fhedzi kha mashango manzhi, ho vha na zwifhinga zwa mulalo zwe zwa ita uri zwi lelutshele vhathu vha Yehova u huwelela. Ho vha na mvelelo dzifhio? Nga tshifhinga tsha nndwa ya vhuvhili ya shango, ho vha hu na Ṱhanzi dza Yehova dzi si gathi dzi sa fhiri 110 000. Fhedzi ṋamusi dzi ṱoḓa u vha milioni dza malo! (Vhalani Yesaya 60:22.) Vhukuma, zwifhingani zwa mulalo ri nga huwelela mafhungo maḓifha kha vhathu vhanzhi.

8, 9. Zwo ḓa hani uri u enda zwi leluwe, nahone zwi ri thusa hani u ita mushumo washu?

⁸ Musi vhathu vha Yehova vha tshi thoma u huwelela ngei United States, zwo vha zwi songo leluwa u enda. Nga 1900, nga murahu ha miṅwaha ya 21 vho thoma u gandisa The Watch Tower, ho vha hu na goloi dzi ṱoḓaho u vha 8000 na bada dzi si gathi dzavhuḓi kha ḽeneḽo shango. Fhedzi ṋamusi hu na goloi dzi ṱoḓaho u vha bilioni nthihi na hafu shangoni ḽoṱhe nahone hu na bada nnzhi dzavhuḓi fhethu hunzhi. Nga zwenezwo, ri nga shumisa dzigoloi na dzibada u itela u huwelela kha vhathu, fhethu hune ha vha kule na dziḓorobo na fhethu hune ha konḓa u hu swikelela. Naho ri tshi dzula fhethu hune zwa sa leluwe u enda na hune ra fanela u tshimbila nḓila ndapfu, ri ita zwoṱhe zwine ra nga kona u itela u huwelela kha vhathu hune vha vha hone.—Mateo 28:19, 20.

⁹ Ri dovha ra shumisa miṅwe mifuda ya vhuendedzi. Ri rumela Bivhili na dziṅwe khandiso nga maṱiraka, zwikepe na zwidimela. Zwenezwi zwi amba uri nga vhege dzi si gathi ri nga kona u rumela khandiso kha vhahashu vha tshinnani na vha tshisadzini, fhethu hu konḓaho u swikelelea. Vhalavhelesi vha ḽiisela, miraḓo ya Komiti ya Davhi, vharumiwa na vhaṅwe vha shumisa mabupho u ya u ṋekedza nyambo mabuthanoni na u thusa zwivhidzo. Miraḓo ya Tshigwada tshi Langaho na vhaṅwe vhahashu vha bvaho ofisini khulwane dza shango ḽoṱhe na vhone vha shumisa mabupho u ya kha maṅwe mashango u itela u ṱuṱuwedza na u gudisa vhahavho vha tshinnani na vha tshisadzini. Zwenezwi zwoṱhe zwi thusa vhathu vha Yehova uri vha vhe vhathihi.—Psalme ya 133:1-3.

10. Luisimane lu shumiswa hani shangoni ḽoṱhe?

¹⁰ Ḓanani ḽa u thoma ḽa miṅwaha, vhathu vhanzhi Muvhusoni wa Roma vho vha vha tshi amba Lugerika. Ṋamusi, Luisimane lu ambiwa nga vhathu vhanzhi shangoni ḽoṱhe. Zwi re zwone ndi uri bugu English as a Global Language i amba uri kotara nthihi ya vhathu shangoni i amba na u pfesesa Luisimane. Vhathu vhanzhi vha guda Luisimane ngauri lu shumiswa shangoni ḽoṱhe kha mabindu, politiki, saintsi na thekinolodzhi.

11. Luisimane lwo kwama hani mushumo wa vhathu vha Yehova?

¹¹ U shumiswa ha Luisimane fhethu hoṱhe zwo thusa u phaḓaladza ngoho. Tshifhingani tsho fhiraho, khandiso dzashu dzo vha dzi tshi wanala nga Luisimane fhedzi. Vhathu vhanzhi vho vha vha tshi kona u dzi vhala ngauri Luisimane lwo vha lu tshi ambiwa shangoni ḽoṱhe. Luisimane lu dovha lwa shumiswa ofisini khulwane dza shango ḽoṱhe. Nahone vhahashu vha tshinnani na vha tshisadzini vhane vha bva mashangoni o fhamba-fhambanaho vha pfesesaho Luisimane vha gudiswa zwikoloni zwashu zwa ngei Patterson kha ḽa New York.

12. Ro ṱalutshedzela khandiso dzashu nga nyambo nngana, nahone phurogireme dza khomphyutha dzo ita uri zwi konadzee nga nḓila-ḓe?

¹² Ri na vhuḓifhinduleli ha u huwelela mafhungo maḓifha kha vhathu shangoni ḽoṱhe. Ndi ngazwo ri tshi ṱalutshedzela khandiso dzashu nga nyambo dzi fhiraho 700. Zwenezwi zwi konadzea hani? Dzikhomphyutha na phurogireme dza khomphyutha dzi ngaho MEPS, dzo ri thusa u ita mushumo wa u ṱalutshedzela. Nga zwenezwo, Ṱhanzi dza Yehova shangoni ḽoṱhe dzi nga pfesesa luambo lwo “ṱambaho” lwa ngoho ya Bivhili nahone vha vha na vhuthihi.—Vhalani Tsefanya 3:9.

13, 14. Milayo na phetho dza khothe zwo ri thusa hani?

¹³ Mulayo wa Vharoma wo thusa Vhakriste vha ḓanani ḽa u thoma ḽa miṅwaha u huwelela nga nḓila nnzhi. Na ṋamusi mulayo mashangoni manzhi u a ri thusa samusi ri tshi khou ita mushumo wa u huwelela. Sa tsumbo, milayo ya United States i ṋea vhathu ndugelo ya u ḓikhethela  vhurereli, u amba nga ha zwine vha zwi tenda na u ṱangana vhoṱhe. Zwenezwi zwi amba uri ri na mbofholowo ya u vha na miṱangano yashu na u huwelela kha ḽeneḽo shango. Ri dovha ra vha na mbofholowo ya u dzudzanya mushumo wa u huwelela shangoni ḽoṱhe u bvaho ofisini khulwane dza shango ḽoṱhe ngei United States. Vhukuma, hu na zwifhinga zwe ra vha ri tshi fanela u ya khothe u itela u imela ndugelo yashu ya u huwelela mafhungo maḓifha. (Vhafilipi 1:7) Nahone musi vhahaṱuli na vhadzhuri vha tshi lingedza u dzhia ndugelo yashu ya u huwelela, ro ya khothe khulwane he kanzhi ra vha ri tshi kunda.

¹⁴ Na kha maṅwe mashango, ro ya khothe u itela u imela mbofholowo yashu ya u gwadamela Yehova na u huwelela. Musi ri tshi kundwa, ro ya khothe dza shango ḽoṱhe. Sa tsumbo, kanzhi ro ya Khothe ya Yuropa ya Ndugelo dza Vhathu. Nga June 2014, ro vha ro no kunda milandu ya 57 kha yeneyo Khothe, nahone phetho ya yeneyo Khothe i fanela u thetsheleswa kha mashango manzhi a Yuropa. Naho ri tshi “vhengwa nga tshaka dzoṱhe,” milayo ya mashango manzhi yo ri tendela uri ri gwadamele Yehova ro vhofholowa.—Mateo 24:9.

15. Mushumo wa u gandisa wo khwiniswa hani, nahone zwenezwo zwi ri thusa hani?

¹⁵ Nḓila ntswa ya u gandisa yo ri thusa u huwelela mafhungo maḓifha kha vhathu vhanzhi. Lwa miṅwaha ya maḓana, vhathu vhanzhi vho shumisa nḓila ya u gandisa ye ya thomiwa nga Johannes Gutenberg nga vho 1450. Fhedzi lwa miṅwaha ya 200 yo fhiraho u gandisa ho khwiniswa nga nḓila nnzhi. Ho thomiwa  maitele a u gandisa nga inki; nga murahu, zwo mbo ḓi leluwa nahone mushumo wa khwiniswa. Zwiṅwe hafhu, a zwo ngo tsha ḓura u ita mabammbiri na u ṱanganyisa dzibugu. Dzenedzi tshanduko dzo kwama hani khandiso dzashu? Nga 1879, ho gandiswa Watch Tower ya u thoma nga Luisimane fhedzi. Yo vha i si na zwifanyiso nahone ha gandiswa kopi dza 6 000. Ṋamusi, Tshiingamo tshi gandiswa nga nyambo dzi fhiraho 200. Tshi na zwifanyiso zwavhuḓi na zwa mivhala nahone hu gandiswa kopi dzi fhiraho 50 000 000 dza thero iṅwe na iṅwe.

16. Ndi zwifhio zwithu zwiswa zwe zwa ri thusa u huwelela shangoni ḽoṱhe? (Sedzani tshifanyiso tsha u thoma.)

¹⁶ Miṅwahani ya 200 yo fhiraho, zwithu zwinzhi zwiswa zwo thusa vhathu vha Yehova u huwelela mafhungo maḓifha. Ro no ḓi bula zwidimela, dzigoloi na mabufho. Fhedzi hu dovha ha vha na dzibaisigira, mitshini ya u thaipha, dzi-Braille, thelegiramu, thelefoni, khamera, rekhodo dza u thetshelesa, rekhodo dza vidio, radio, thelevishini, mimuvi, dzikhomphyutha na Inthanethe. Naho vhathu vha Yehova vha songo ita zwenezwi zwithu, vha zwi shumisa u ita Bivhili na dziṅwe khandiso nga nyambo nnzhi na u huwelela shangoni ḽoṱhe. Nga yeneyi nḓila, vha “mama ḓamu ḽa dzitshakha,” samusi zwo porofitiwa Bivhilini.—Vhalani Yesaya 60:16.

17. (a) Ndi mini zwine zwa vha khagala nga ha mushumo wa u huwelela? (b) Ndi ngani Yehova a tshi ṱoḓa ri tshi shuma nae?

¹⁷ Zwi tou vha khagala uri Yehova u khou livhisa mushumo washu wa u huwelela. Yehova o ri ṋea wonoyu mushumo, hu si nga nṱhani ha uri ha koni u u ita arali ri sa mu thusi, fhedzi nga nṱhani ha uri u a ri funa nahone u ṱoḓa ri tshi shuma nae. Musi ri tshi huwelela ri sumbedza uri ri a mu funa na u funa vhaṅwe vhathu. (Marko 12:28-31; 1 Vhakorinta 3:9) Ri livhuha vhukuma Yehova nga uri u a ri thusa u huwelela ḽifhasini ḽoṱhe. Nga zwenezwo, u nga ri ri nga shumisa tshibuli tshiṅwe na tshiṅwe tsha u huwelela nga ha Yehova na Muvhuso wawe!