Vhaṅwe vhashumeli vha Mudzimu vha si ho mbinganoni vho amba zwi fanaho. Vha a zwi ḓivha uri Yehova u ṱoḓa vhashumeli vhawe vha tshi vhinga kana u vhingwa “Murenani fhedzi,” zwine zwa amba u vhinga kana u vhingwa nga Vhakriste vha ngoho. (1 Vhakorinta 7:39) Nga zwenezwo, ndi ngani vhaṅwe Vhakriste vha tshi amba nga u ralo?

Vhakriste vhane vha amba zwenezwi vha nga vhona u nga vhafumakadzi vha si ho mbinganoni ndi vhanzhi u fhira vhanna. Zwenezwo ndi ngoho mashangoni manzhi. Sa tsumbo, ngei kha ḽa Korea phesenthe ya Vhakriste vha si ho mbinganoni ndi 57 ya vhahashu vha tshisadzini na 43 ya vhahashu vha tshinnani. Ngei Colombia, phesenthe ya Vhakriste ya vhahashu vha tshisadzini vha si ho mbinganoni ndi 66, nahone ya vha tshinnani ndi 34.

Kha maṅwe mashango, vhabebi vhane vha si vhe Dziṱhanzi vha ṱoḓa tshelede nnzhi ya mamalo kana zwiṅwe zwifhiwa zwi no ḓura musi vhananyana vhavho vha tshi vhingwa. Nahone vhaṅwe vhahashu vha tshinnani vha si ho mbinganoni vha nga kha ḓi kundelwa u swikelela zwenezwo zwifhiwa. Nga zwenezwo, vhaṅwe vhahashu vha tshisadzini vha a vhilaela arali vha tshi ḓo wana munna wa Mukriste. *—Sedzani ṱhaluso i re magumoni a siaṱari.

Arali no no vhuya na ḓipfa nga yeneyo nḓila, ni nga vha na vhungoho ha uri Yehova u pfesesa vhuimo haṋu  nahone u a ḓivha zwavhuḓi nḓila ine na ḓipfa ngayo.—2 Koronika 6:29, 30.

Naho zwo ralo, Bivhilini, Yehova u ri ṋea ndaela ya uri ri vhinge kana u vhingwa Murenani fhedzi. Ndi ngani? Ngauri u a ḓivha zwo ri fanelaho nahone u ṱoḓa u ri tsireledza. Ha ṱoḓi ri tshi ita phetho dzi si dzavhuḓi dzine dza ḓo ri pfisa vhuṱungu kana dza ri sia ri songo takala. Misini ya Nehemia, Vhayuda vhanzhi vho vha vha tshi vhinga vhafumakadzi vhe vha vha vha sa shumeli Mudzimu. Nga zwenezwo, Nehemia o amba nga ha tsumbo mmbi ya Salomo. O vha “a tshi funwa nga Mudzimu, Mudzimu a vhuya a mu ita khosi ya vhoṱhe Vha-Isiraele; hone, na ene vhasadzi vha vha-nnḓa vho mu itisa zwivhi.” (Nehemia 13:23-26) Yehova u a zwi ḓivha uri nyeletshedzo dzawe dzi a ri vhuyedza, ndi ngazwo o vhudza Vhakriste uri vha vhinge kana u vhingwa Murenani fhedzi. (Psalme ya 19:7-10; Yesaya 48:17, 18) Zwi a khuthadza vhukuma u ḓivha uri u a ri ṋea nyeletshedzo dza lufuno na dzine ra nga dzi fulufhela. Musi ri tshi thetshelesa Yehova sa Muvhusi washu, zwi sumbedza uri ri tenda uri u na ndugelo ya u ri vhudza zwine ra fanela u zwi ita.—Mirero 1:5.

Vhukuma, a ni ṱoḓi u “ḓikungela dzhogo,” zwine zwa amba u vhinga kana u vhingwa nga muthu a sa funi Yehova. Onoyo muthu a nga ita uri ni litshe u shumela Mudzimu. (2 Vhakorinta 6:14) Nyeletshedzo ya Mudzimu i ya shuma tshifhinga tshoṱhe, nahone Vhakriste vhanzhi ṋamusi vho dzhia phetho ya vhuṱali ya u thetshelesa Yehova. Naho zwo ralo, vhaṅwe vho dzhia phetho yo fhambanaho na yeneyo.

Muṅwe wahashu wa tshisadzini wa ngei Australia ane a pfi Maggy o thoma u funana na muthu ane a si vhe Mukriste wa ngoho. * (Sedzani ṱhaluso i re magumoni a siaṱari.) O ri: “Ndo vha ndi si tsha ya miṱanganoni minzhi ngauri ndo vha ndi tshi ṱoḓa u vha ndi nae. Ndo fhola nga lwa muya nga zwiṱuku nga zwiṱuku.” Muṅwe wahashu wa tshisadzini wa ngei India ane a pfi Ratana o funana na muthu ane a dzhena nae kilasini we a thoma u guda Bivhili. Naho zwo ralo, onoyo muṱhannga o thoma u guda Bivhili ngauri o vha a tshi ṱoḓa u funana nae. Mafheleloni, Ratana o litsha u shumela Yehova nahone a ṱanganela kha vhuṅwe vhurereli uri a kone u vhingwa ngae.

Ndenguè wa ngei Cameroon o vha e na miṅwaha ya 19 musi a tshi vhingana na munna we a vha a sa shumeli Yehova. Musi vha sa athu u vhingana, onoyo munna o mu fulufhedzisa uri a nga bvela phanḓa e Ṱhanzi. Naho zwo ralo, musi vhe na vhege mbili vho vhingana, onoyo munna o mu vhudza uri a songo tsha ya miṱanganoni ya tshivhidzo. Ndenguè o ri: “Ndo ḓipfa ndi na vhuludu nahone nda lila. Ndo ṱhogomela uri a thi tsha kona u langa vhutshilo hanga. Ndo ḓisola vhukuma.”

Ndi ngoho uri vhaṅwe Vhakriste vho vhinga kana u vhingwa nga mufarisi ane a sa shumele Yehova, fhedzi ane a vha na vhuthu na u humbulela. Naho mufarisi waṋu ane a vha na vhuthu o vha a sa shumeli Yehova, vhushaka haṋu na Yehova vhu ḓo kwamea hani? No vha ni tshi ḓo ḓipfa hani nga u ḓivha uri a no ngo thetshelesa nyeletshedzo ye a ni ṋea yone ya uri ni takale? Zwa ndeme vhukuma, Yehova u ḓo ḓipfa hani nga zwe na zwi ita?—Mirero 1:33.

Vhahashu vha tshinnani na vha tshisadzini u mona na shango vhe vha thetshelesa nyeletshedzo ya Yehova ya u vhinga kana u vhingwa “Murenani fhedzi,” vha na vhungoho ha uri vho dzhia phetho yavhuḓi vhukuma. Vhahashu vha tshinnani na vha tshisadzini vha si ho mbinganoni vho ḓiimisela u takadza Yehova nga u vhinga kana u vhingwa nga muthu ane a mu shumela. Michiko wa ngei Dzhapani o vha o ḓiimisela u thetshelesa Mudzimu, naho mashaka awe vho lingedza u mu ṱuṱuwedza u vhinga muṅwe muthu ane a sa fune Yehova. Nahone zwo vha zwi tshi mu konḓela u vhona dziṅwe khonani dzawe dzi tshi vhingwa nga Vhakriste vha ngoho, ngeno ene a songo vhingwa. O ri: “Ndo vha ndi tshi dzula ndi tshi ḓivhudza uri samusi Yehova e ‘Mudzimu o takalaho,’ dakalo ḽashu a ḽi ḓitiki ngauri ro no vhingwa kana a ri athu u vhingwa. Ndi dovha nda tenda uri u a ri ṋea zwine mbilu dzashu dza zwi tama. Ngauralo, arali ra sa wana mufarisi naho ri tshi ṱoḓa u vhingwa, ndi zwavhuḓi uri ri dzule ri songo vhingwa lwa tshifhinganyana.” (1 Timotheo 1:11) Nga murahu, Michiko o vhingwa nga wahashu wa tshinnani, nahone o takala ngauri o thetshelesa nyeletshedzo ya Yehova.

Hu dovha ha vha na vhahashu vha tshinnani vhe vha lindela uri vha kone u wana mufarisi wavhuḓi ane vha ḓo mu vhinga. Sa tsumbo, Bill wa ngei Australia o amba uri nga zwiṅwe zwifhinga o vha e na dzangalelo kha vhafumakadzi vhane vha si vhe Dziṱhanzi. Naho zwo ralo, ho ngo vha na vhushaka na muthihi wavho ngauri o vha a sa ṱoḓi u thoma vhushaka vhune ha ḓo mu ita uri a “ḓikungel[e] dzhogo” na vha sa tendiho. Nga murahu ha miṅwaha, o vha e na dzangalelo kha vhahashu vha tshisadzini vha si gathi, fhedzi vho vha vhe si na maḓipfele  a fanaho na awe. Bill o lindela lwa miṅwaha ya 30, u swikela a tshi wana mufumakadzi wa Mukriste ane a vha na zwipikwa zwi fanaho na zwawe. O ri: “A thi ḓisoli. Ndi pfa ndo fhaṱutshedzwa ngauri ri ya vhuḓinḓani roṱhe, ra guda roṱhe nahone ra ita vhurabeli roṱhe. Ndi takalela u ḓivha na u davhidzana na khonani dza mufumakadzi wanga ngauri vhoṱhe ndi vhagwadameli vha Yehova. Ri shumisa maitele a Bivhili mbinganoni yashu.”

Ndi mini zwine na nga zwi ita musi ni tshi fulufhela nyeletshedzo ya Yehova na u lindela munna kana mufumakadzi ane a mu shumela? Ni nga humbula uri ndi ngani ni si ho mbinganoni. Arali ni tshi vhona u nga ndi nga nṱhani ha uri ni khou ṱoḓa u thetshelesa ndaela ya Yehova, nga zwenezwo ni nga vha na vhungoho ha uri zwenezwi zwi ḓo takadza Yehova. (1 Samuele 15:22; Mirero 27:11) Zwiṅwe hafhu, bvelani phanḓa ni tshi rabela Yehova tshifhinga tshoṱhe nahone ni mu vhudze nḓila ine na ḓipfa ngayo. (Psalme ya 62:8) Samusi ni tshi khou ita vhuḓidini ha u lwisana na mulingo na u lwisana na nyemulo mmbi, vhushaka haṋu na Yehova vhu ḓo khwaṱha ḓuvha ḽiṅwe na ḽiṅwe. Ni nga vha na vhungoho ha uri Yehova u a ṱhogomela zwine na zwi tama na zwine na zwi ṱoḓa ngauri ni wa ndeme khae. Ha fulufhedzisi muthu munna kana mufumakadzi. Fhedzi arali u vha mbinganoni hu zwithu zwine na zwi ṱoḓa vhukuma, Yehova u ḓivha nḓila ya khwine ine ya nga fusha ṱhoḓea dzaṋu.—Psalme ya 145:16; Mateo 6:32.

Nga zwiṅwe zwifhinga ni nga ḓipfa u fana na Davida we a ri: “U songo tsha lenga u mpfa, Yehova; muya wanga wo fhela maanḓa. U songo ndzumbela tshifhaṱuwo tshau.” (Psalme ya 143:5-7, 10) Ni songo ḽaṱela thaula. Ṋeani Yehova tshifhinga tsha u ni sumbedza zwine a ṱoḓa ni tshi ita zwone. Thetshelesani Yehova nga u vhala Bivhili na u elekanya nga ho dzikaho nga ha zwe na zwi vhala. Zwenezwi zwi ḓo ni thusa u ḓivha zwine Yehova a zwi ṱoḓa kha inwi na nḓila ye a thusa ngayo vhashumeli vhawe vha tshifhingani tsho fhiraho. Nga u mu thetshelesa, ni ḓo vha na fulufhelo ḽa u dzula ni tshi ita zwine a funa.

Ndi mini zwine na nga dovha na zwi ita u itela u dzula no takala na u farekanea musi ni songo vhingwa kana u vhinga? Ni nga shumela kha u khwaṱhisa vhushaka haṋu na Yehova na u ḓiitela bvumo ḽavhuḓi. Ni nga dovha na guda u vha na mafunda, u shuma nga maanḓa, u dzhenea na u thetshelesa Yehova. Dzenedzi pfaneleo ndi dza ndeme uri mbingano i vhe yo takalaho. (Genesi 24:16-21; Ruthe 1:16, 17; 2:6, 7, 11; Mirero 31:10-27) Ṱoḓani Muvhuso u thoma nga u dzula no farakanea vhuḓinḓani na tshivhidzoni tshaṋu. Zwenezwi zwithu zwi ḓo ni tsireledza uri ni si dzhie phetho dzi si dza vhuṱali. Bill o amba nga ha miṅwaha ya musi a sathu u vha mbinganoni, o ri: “Yo fhira nga u ṱavhanya! Ndo shumisa tshifhinga tshumeloni ya Yehova sa muvulanḓila.”

Ndaela ya Yehova ya u vhinga kana u vhingwa “Murenani fhedzi” a si ya kale kana u fhelelwa nga tshifhinga. Musi ri tshi khetha u vhinga kana u vhingwa nga Mukriste wa ngoho, ri vha ri tshi khou hulisa Yehova nahone ri ḓo takala. Bivhili i ri: “Wa mashudu ndi uyo munna ané a ofha Yehova, ané milayo yawe a tou i takalela zwihulu. Nḓuni yawe hu ḓo vha na mashudu na lupfumo, u luga hawe a hu shanduki lini na lini.” (Psalme ya 112:1, 3) Nga zwenezwo, ḓiimiseleni u thetshelesa ndaela ya Mudzimu ya u vhinga kana u vhingwa “Murenani fhedzi.”