1-3. Ndi ngani Paulo o vha na vhungoho ha uri a nga fulufhela Yehova? (Sedzani tshifanyiso tsha u thoma.)

ARALI no vha ni Mukriste wa ngei Roma ḓanani ḽa u thoma ḽa miṅwaha, no vha ni tshi ḓo vha ni tshi khou tshila tshifhingani tsha khombo. Vhakriste vho tovholwa nga nḓila ya tshiṱuhu nga Vharoma. Vharoma vho vha pomoka uri vho thoma mulilo muhulu ngei Roma nahone vha amba uri vha vhenga vhathu. Vhunzhi ha vhahaṋu vha tshinnani na vha tshisadzini vha Vhakriste vho farwa. Vhaṅwe vho vhulahwa nga zwipuka. U itela uri hu vhe na tshedza vhusiku, vhaṅwe vho ombelwa kha danda nahone vha fhiswa vha tshi kha ḓi tshila. Ḓuvha ḽiṅwe na ḽiṅwe no vha ni tshi zwi ḓivha uri zwenezwi zwithu zwi nga itea kha inwi.

² Kha tshenetshi tshifhinga tshi konḓaho, muapostola Paulo o vha o valelwa dzhele. A nga vha o ḓivhudzisa arali muṅwe wa vhahawe wa Mukriste a tshi nga mu thusa ngauri o humbula nga ha vhuimo he a vha o sedzana naho mathomoni musi hu si na muthu we a mu thusa. Fhedzi Paulo o wana thuso kha Yehova a tshi shumisa Murena Yesu. O ṅwala uri: “Murena o ima  tsini na nṋe a nṋea maanḓa.” Yesu o ṋea Paulo maanḓa e a vha a tshi a ṱoḓa. Paulo o dovha a ṅwala uri o “ponyokiswa mulomoni wa ndau.”—2 Timotheo 4:16, 17. * (Sedzani ṱhaluso i re magumoni a siaṱari.)

³ Paulo o humbula nḓila ye Yehova a mu thusa ngayo tshifhingani tsho fhiraho. Nga zwenezwo, o vha e na vhungoho ha uri Yehova u ḓo mu ṋea maanḓa e a vha a tshi a ṱoḓa u itela u konḓela vhuimo he a vha o sedzana naho zwino, u katela na milingo ya tshifhingani tshi ḓaho. O vha e na vhungoho ho khwaṱhaho ha zwenezwi lwe zwa ita uri a ṅwale uri: “Murena u ḓo mponyokisa kha mishumo mivhi yoṱhe.” (2 Timotheo 4:18) Paulo o guda uri na kha vhuimo he vhahawe vha vha vha sa koni u mu thusa, a nga kona u fulufhela thuso ya Yehova na Yesu. O vha a sa timatimi.

4, 5. (a) Ndi nnyi ane a nga ni ṋea thuso ine na i ṱoḓa? (b) Ni nga khwaṱhisa hani vhushaka haṋu na Yehova?

⁴ Naa no no vhuya na vha na thaidzo khulwane nahone na ḓipfa ni na vhuludu, hu si na ane a nga ni thusa? Khamusi no fhelelwa nga mushumo kana u vha na mutsiko tshikoloni. Khamusi no vha ni tshi khou lwala vhukuma kana no sedzana na muṅwe mulingo u konḓaho. Ni nga vha no humbela vhaṅwe vhathu uri vha ni thuse, fhedzi na pfa no kulea nungo ngauri a vho ngo ni ṋea thuso ine na i ṱoḓa. Vhukuma, vhathu a vha koni u tandulula dziṅwe thaidzo. Nga zwenezwo, ni ḓo ita mini? Bivhili i ri vhudza uri ri ‘fulufhele Yehova.’ (Mirero 3:5, 6) Fhedzi naa ni nga vha na vhungoho ha uri u ḓo ni thusa? Ee! Ri nga vhala nga ha tsumbo nnzhi dzi re Bivhilini dzine dza ita uri ri tende uri Yehova u a thusa vhathu vhawe zwa vhukuma.

⁵ Ni songo sinyuwa musi vhathu vha sa ni ṋei thuso ine na i ṱoḓa. Nṱhani hazwo, u fana na Paulo, dzhiani mulingo sa tshibuli tsha u fulufhela Yehova nga ho fhelelaho. Tshi dovha tsha vha tshibuli tsha u vhona nḓila ine a ni ṱhogomela ngayo vhutshiloni haṋu. U fulufhela haṋu Yehova na vhushaka haṋu nae zwi ḓo khwaṱha.

6. Ndi ngani zwi tshi nga konḓa u fulufhela Yehova musi ro sedzana na thaidzo i konḓaho?

⁶ Ni nga vha ni na thaidzo i konḓaho ine ya ni sinyusa. No ita zwoṱhe zwine na nga kona nga ha honoho vhuimo, nahone no rabela Yehova uri a ni thuse. Naa zwino ni ḓipfa ni khwine ngauri ni fulufhela uri u ḓo ni thusa? Ee, ni nga ḓipfa nga u ralo! (Vhalani Psalme ya 62:8; 1 Petro 5:7.) Arali ni tshi ṱoḓa u vha na vhushaka havhuḓi na Yehova, ndi zwa ndeme uri ni gude u mu fulufhela. Fhedzi u ita zwenezwi a zwo ngo leluwa tshifhinga tshoṱhe. Ndi ngani? Tshiṅwe tshiitisi ndi tsha uri Yehova a nga kha ḓi sa fhindula thabelo yaṋu nga tshenetsho tshifhinga.—Psalme ya 13:1, 2; 74:10; 89:46; 90:13; Habakuku 1:2.

7. Ndi ngani Yehova a sa dzuli a tshi fhindula thabelo dzashu nga tshenetsho tshifhinga?

⁷ Ndi ngani Yehova a sa dzuli a tshi fhindula thabelo dzashu nga tshenetsho tshifhinga? Bivhili i amba uri Yehova ndi  Khotsi ashu nahone riṋe ri vhana vhawe. (Psalme ya 103:13) Khotsi wa ṋama ha sokou u ṋea ṅwana wawe tshithu tshiṅwe na tshiṅwe tshine a tshi humbela kana u mu ṋea tshone nga tshenetsho tshifhinga. Khotsi u a zwi ḓivha uri ṅwana wawe a nga ṱoḓa tshithu nga u ṱavhanya nahone nga murahu a sa tsha tshi ṱoḓa. Khotsi u dovha a ḓivha zwine zwa vha zwa khwine kha ṅwana wawe nahone u a ḓivha nḓila ine zwa nga kwama ngayo vhaṅwe. U a ḓivha zwine ṅwana wawe a zwi ṱoḓa na uri u fanela u zwi wana lini. Arali khotsi a ṋea ṅwana wawe tshithu tshiṅwe na tshiṅwe tshine a tshi humbela nga tshenetsho tshifhinga, zwi nga ita uri khotsi a vhe mushumeli wa ṅwana wawe. Yehova, Khotsi ashu wa ṱaḓulu u a ri funa. Sa Musiki washu wa vhuṱali, u a ḓivha zwine ra zwi ṱoḓa nahone u dzhia phetho ya uri ndi tshifhio tshifhinga tsho teaho tsha u ri ṋea zwine ra zwi ṱoḓa. Ndi zwavhuḓi uri ri lindele nahone ri vhone nḓila ine Yehova a fhindula ngayo thabelo dzashu.—Vhambedzani Yesaya 29:16; 45:9.

8. Yehova u fulufhedzisa mini nga ha zwine ra kona u zwi konḓelela?

⁸ Dovhani ni humbule uri Yehova u a ḓivha zwine muthu muṅwe na muṅwe a nga kona u zwi konḓela na zwine a sa kone u zwi konḓelela. (Psalme ya 103:14) Nga zwenezwo, u ri ṋea nungo dzine ra dzi shaya. Ndi ngoho uri nga zwiṅwe zwifhinga ri nga ḓipfa ri si tsha kona u konḓelela. Fhedzi Yehova u fulufhedzisa uri arali zwi tshi ri konḓela u konḓelela milingo, u ḓo ri “vulela nḓila.” (Vhalani 1 Vhakorinta 10:13.) Zwi a khuthadza u ḓivha uri ri nga fulufhela uri Yehova u a ḓivha zwine ra nga kona u zwi konḓelela.

9. Ri fanela u ita mini arali ra rabela uri Yehova a ri thuse, fhedzi a sa ri fhindule nga tshenetsho tshifhinga?

⁹ Arali ra rabela uri Yehova a ri thuse, fhedzi a si fhindule thabelo yashu nga tshenetsho tshifhinga, ri songo fhela mbilu. Ni humbule uri Yehova o ḓiimisela u ri thusa, fhedzi u lindela a sa fheli mbilu tshifhinga tsho teaho tsha u ri ṋea zwine ra zwi shaya. Bivhili i ri vhudza uri: “Yehova u itiswa nga zwenezwi a tshi konḓelela uri a vhuye a ni ite nga vhuthu; u itiswa nga zwenezwo a tshi takuwa uri a ni khathutshele. Ngauri Yehova ndi Mudzimu a sá ṱaluli; vha mashudu ndi vhane vha lindela Ene.”—Yesaya 30:18.

10-12. (a) Ndi mini zwine zwa nga ita uri zwi konḓe u ṱhogomela muraḓo wa muṱa ane a khou lwala? (b) Musi ni tshi fulufhela Yehova zwifhingani zwi konḓaho, zwenezwi zwi ḓo kwama hani vhushaka haṋu nae? Ṋeani tsumbo.

¹⁰ Vhuimo haṋu vhu nga ni konḓela vhukuma lune na nga ḓipfa u fana na Paulo nahone na ṱoḓa u ponyokiswa “mulomoni wa ndau.” (2 Timotheo 4:17) Kha vhuimo ho raloho, ndi zwa ndeme vhukuma uri ni fulufhele Yehova. Sa tsumbo, ni nga vha ni tshi khou ṱhogomela muraḓo wa muṱa ane a khou lwala. No rabela Yehova uri a ni thuse uri ni dzhie phetho dzavhuḓi na u ni khwaṱhisa. * (Sedzani ṱhaluso i re magumoni a siaṱari.) Zwino ni nga ḓipfa ni na  mulalo musi ni tshi humbula uri Yehova u a vhona, u a ni pfesesa na u pfesesa vhuimo haṋu. U ḓo ni thusa u konḓelela na u fulufhedzea khae.—Psalme ya 32:8.

¹¹ Nga zwiṅwe zwifhinga, zwi nga vhonala u nga Yehova ha khou ni thusa. Khamusi madokotela ha tendelani kha zwine zwa fanela u itwa. Kana no vha ni tshi fulufhela uri mashaka aṋu a ḓo ni khuthadza, fhedzi vha ṋaṋisa mafhungo. Dzulani ni tshi ḓitika nga Yehova uri a ni ṋee nungo. Dzulani ni tshi sendela tsini nae. (Vhalani 1 Samuele 30:3, 6.) Musi ni tshi ṱhogomela nḓila ye Yehova a ni thusa ngayo, vhushaka haṋu nae vhu ḓo khwaṱha.

¹² Linda o ḓipfa nga yeneyo nḓila. * (Sedzani ṱhaluso i re magumoni a siaṱari.) O vha a tshi khou ṱhogomela vhabebi vhawe vhe vha vha vha tshi khou lwala lwa tshifhinga tshilapfu musi vha sa athu u fa. O amba uri: “Musi ri kha honoho vhuimo, nṋe, munna wanga na khaladzi anga, kanzhi ro vha ri sa ḓivhi zwine ra nga ita. Nga zwiṅwe zwifhinga, ro vha ri tshi kulea nungo. Naho zwo ralo, musi ri tshi humbula zwa murahu, ro vhona nḓila ye Yehova a ri tikedza ngayo. O ri khwaṱhisa na u ri ṋea zwe ra vha ri tshi zwi shaya, naho zwo vha zwi tshi vhonala u nga a ri tsheena thandululo.”

13. U fulufhela Yehova zwo thusa hani Rhonda u konḓelela makhaulambilu e a ḓa nga u tevhekana?

¹³ U fulufhela hashu Yehova nga ho fhelelaho zwi ḓo ri thusa u konḓelela makhaulambilu. Zwenezwi ndi zwe Rhonda a zwi tshenzhela. Munna wawe, we a vha e si Ṱhanzi ya Yehova o vha a tshi khou mu ṱala. Nga tshenetshi tshifhinga, khaladzi awe o wana uri o farwa nga vhulwadze vhune ha vhidzwa lupus. Nga murahu ha miṅwedzi i si gathi, mufumakadzi wa khaladzi awe a fa. Musi Rhonda a tshi thoma u vha khwine kha zwe zwa itea, o thoma vhuvulanḓila ha tshifhinga tshoṱhe. Fhedzi mme awe vha fa. Rhonda o kona hani u konḓelela enea makhaulambilu? O ri: “Ndo davhidzana na Yehova ḓuvha ḽiṅwe na ḽiṅwe, naho hu malugana na phetho ṱhukhu. U ita ngauralo zwo ita uri Yehova a vhe wa vhukuma kha nṋe. Zwo ngudisa uri ndi ḓitike ngae nṱhani ha u ḓitika nga nṋe muṋe kana vhaṅwe vhathu. Nahone thuso ye a nṋea yone yo vha i ya vhukuma—ṱhoḓea dzanga dzoṱhe dzo ṱhogomelwa. Nga zwenezwo, ndo tshenzhela u shumisana na Yehova.”

14. Yehova a nga ni thusa hani arali muraḓo wa muṱa o bviswa tshivhidzoni?

¹⁴ Humbulani nga ha vhuṅwe vhuimo vhu konḓaho. Khamusi muṱani wa haṋu hu na muṅwe o bviswaho tshivhidzoni. Ni a ḓivha zwine Bivhili ya zwi amba nga ha nḓila ine ra fanela u fara ngayo vhe vha bviswa tshivhidzoni. (1 Vhakorinta 5:11; 2 Yohane 10) Fhedzi nga nṱhani ha uri ni funa onoyo muthu, ni nga pfa u nga zwi a konḓa kana a zwi konadzei u thetshelesa ndaela i re Bivhilini. Naa ni ḓo fulufhela uri Khotsi aṋu wa ṱaḓulu u ḓo ni ṋea nungo dza u mu thetshelesa nga u fulufhedzea? Naa ni ḓo dzhia honoho vhuimo sa tshibuli tsha u sendela tsini na Yehova?

15. Ndi ngani Adamu a songo thetshelesa Yehova?

 ¹⁵ Zwenezwi zwi nga vhambedzwa hani na vhuimo ha munna wa u thoma, Adamu? Naa o tenda uri a nga litsha u thetshelesa Yehova nahone a bvela phanḓa na u tshila? Hai, Adamu “ho ngo fhurwa.” (1 Timotheo 2:14) Nga zwenezwo, ndi ngani a songo thetshelesa Yehova? Adamu o ḽa mutshelo we mufumakadzi wawe a mu ṋea ngauri o vha a tshi funa mufumakadzi wawe u fhira Yehova. O thetshelesa mufumakadzi wawe nṱhani ha u thetshelesa ndaela ya Yehova.—Genesi 3:6, 17.

16. Ri fanela u funesa nnyi, nahone ndi ngani?

¹⁶ Phetho ya Adamu i ri gudisa uri ri fanela u funa Yehova u fhira muthu naho e ufhio. (Vhalani Mateo 22:37, 38.) Musi u funa hashu Yehova ho no khwaṱha, ri nga kona u thusa mashaka ashu nga nḓila ya khwine, hu sa londwi uri vha shumela Yehova kana hai. Nga zwenezwo, dzulani ni tshi khwaṱhisa lufuno lune na vha nalwo kha Yehova na u mu fulufhela. Arali ni tshi khou vhilaedziswa nga ha muraḓo wa muṱa o bviswaho tshivhidzoni, rabelani Yehova nahone ni mu vhudze nḓila ine na ḓipfa ngayo. * (Sedzani ṱhaluso i re magumoni a siaṱari.) (Vharoma 12:12; Vhafilipi 4:6, 7) Naho ni tshi khou pfa vhuṱungu vhuhulwane, dzhiani honoho vhuimo sa tshibuli tsha u ita uri vhushaka haṋu na Yehova vhu khwaṱhe vhukuma. Nga zwenezwo, ni ḓo kona u mu fulufhela na u ḓivha uri u mu thetshelesa zwi ḓo ni ḓisela mvelelo dzavhuḓi vhukuma.

17. Arali ra dzula ro farakanea kha mushumo wa u huwelela, ri nga fulufhela uri Yehova u ḓo ita mini?

¹⁷ Ndi ngani Yehova o ponyokisa Paulo “mulomoni wa ndau”? Paulo o ri: “Uri a ntshumise uri ndi huwelele nga vhuḓalo.” (2 Timotheo 4:17) Yehova o dovha a ri ṋea mushumo wa u huwelela “mafhungo maḓifha,” nahone u ri vhidza “vhashumisani” nae. (1 Vhathesalonika 2:4; 1 Vhakorinta 3:9) Arali ra dzula ro farakanea nga hune ra nga kona ngaho kha wonoyu mushumo, ri nga fulufhela uri Yehova u ḓo ri ṋea zwoṱhe zwine ra zwi shaya. (Mateo 6:33) Nahone zwi ḓo ri lelutshela u lindela Yehova a tshi fhindula thabelo dzashu.

18. Ni nga ita hani uri ni vhe na fulufhelo kha Yehova na u khwaṱhisa vhushaka haṋu nae?

¹⁸ Nga zwenezwo, khwaṱhisani vhushaka haṋu na Yehova, ḓuvha ḽiṅwe na ḽiṅwe. Musi ni tshi sedzana na milingo nahone na thoma u vhilaela, shumisani zwenezwi sa tshibuli tsha u sendela tsini na Yehova. Vhalani, gudani na u elekanya nga ha Ipfi ḽa Mudzimu, Bivhili. Dzulani ni tshi rabela Yehova nahone ni dzule no farakanea nga u mu shumela. Arali na ita zwenezwi, ni nga fulufhela uri Yehova u ḓo ni thusa u konḓela milingo yoṱhe zwino na ine ya nga ḓa tshifhingani tshi ḓaho.