MUSI hu tshi vhambedzwa muri wa muṱaululo wavhuḓi wa ngei Libanoni na muri wa muṱwari wo sombekanaho, ni nga nyadza wa muṱwari. Fhedzi muri wa muṱwari u na vhukoni vhu mangadzaho ha u kona u tshila kha zwiimo zwi konḓaho. Miṅwe yayo i na miṅwaha i ṱoḓaho u vha 1000. Midzi ya muri wa muṱwari i tsela fhasi-fhasi mavuni, nahone u kona u dovha wa simuwa naho tsinde ḽawo ḽo remiwa. Arali midzi yawo ya bvela phanḓa i tshi khou tshila, u nga dovha wa simuwa.

Munna a fulufhedzeaho ane a pfi Yobo o vha e na fulufhelo ḽa uri arali a fa, a nga dovha a tshila. (Yobo 14:13-15) O shumisa tsumbo ya muri, khamusi wa muṱwari, u sumbedza u vha na fulufhelo kha vhukoni ha uri Mudzimu a nga dovha a mu vusa. Yobo o ri: “Muri wone u nga ḓi fulufhela; wá remwa, u nga ḓi vuwa.” Musi mvula i tshi na, nga murahu ha gomelelo, tshiguthe tsha muṱwari wo omaho tshi nga dovha tsha tshila nahone tsha vha na ‘matavhi tsha nga tsho ṱavhiwa.’—Yobo 14:7-9.

U fana na mulimi o lindelaho nga maṱo matswuku u vhona muri wa muṱwari, we wa vha wo remiwa u tshi dovha wa vuwa, Yehova Mudzimu o lindela nga maṱo matswuku u vusa vhashumeli vhawe na vhaṅwe vhanzhi. (Mateo 22:31, 32; Yohane 5:28, 29; Mishumo 24:15) Edzani u humbula dakalo ḽine ra ḓo vha naḽo musi ri tshi ṱanganedza vho faho nahone ri tshi dovha ra vha vhona vha tshi khou tshila!