Vhahulwane, Ni Ḓipfa Hani Nga U Gudisa Vhaṅwe?
“Zwoṱhe zwi na ḓuvha ḽazwo.”—MUHUWELELI 3:1.
1, 2. Vhalavhelesi vha ḽiisela vho ṱhogomela mini kha zwivhidzo zwinzhi?
MULAVHELESI wa ḽiisela o vha e tsini na u fhedza muṱangano wawe na vhahulwane. U lavhelesa vhahashu vha tshinnani nahone a pfa a tshi funa vhukuma vhenevho vhanna vha shumaho nga maanḓa, vhaṅwe vhavho vho vha vhe vhahulwane lune vha nga vha khotsi awe. Naho zwo ralo, ho vha hu na zwiṅwe zwithu zwa ndeme zwe zwa vha zwi tshi mu vhilaedzisa. O vha vhudzisa a ri: “Vhahashu, ndi zwifhio zwe na zwi ita u itela u gudisa vhaṅwe uri vha dzhie vhuḓifhinduleli ho engedzeaho tshivhidzoni?” Vhahashu vho vha vha tshi zwi ḓivha uri mulavhelesi wa ḽiisela o vha ṱuṱuwedza kha lwendo lwawe lwa u fhedza uri vha ḓiṋee tshifhinga tsho engedzeaho tsha u gudisa vhaṅwe. Mafheleloni, muṅwe muhulwane o ri: “Ro ita zwi si gathi.” Vhahulwane vhoṱhe vho tendelana nae.
2 Arali ni muhulwane khamusi ni nga amba zwi fanaho. Vhalavhelesi vha ḽiisela vho ṱhogomela uri vhahulwane vhanzhi vha tea u fhedza tshifhinga tsho engedzeaho vha tshi khou gudisa vhahashu vhaṱuku na vhahulwane u thusa u ṱhogomela tshivhidzo. Naho zwo ralo, zwenezwi zwi nga konḓa vhukuma. Ndi ngani zwo ralo?
3. (a) Bivhili i sumbedza hani uri ndi zwa ndeme u gudisa vhaṅwe, nahone ndi ngani roṱhe ri tshi fanela u vha na dzangalelo kha yeneyo ngudo? (Sedzani ṱhaluso i re magumoni a siaṱari.) (b) Ndi ngani zwi tshi nga konḓela vhaṅwe vhahulwane u gudisa vhaṅwe?
3 Sa muhulwane, ni a zwi ḓivha uri ndi zwa ndeme u fhedza tshifhinga ni tshi khou gudisa vhahashu vha tshinnani. * (Sedzani ṱhaluso i re magumoni a siaṱari.) Ni a zwi ḓivha uri hu na ṱhoḓea ya vhahashu vha tshinnani ya uri vha thuse zwivhidzo uri zwi dzule zwo khwaṱha zwino na u tikedza zwivhidzo zwiswa tshifhingani tshi ḓaho. (Vhalani Yesaya 60:22) Bivhili i amba uri ni fanela u “funza vhaṅwe.” (Vhalani 2 Timotheo 2:2.) Naho zwo ralo, zwi nga konḓa u ḓiṋea tshifhinga tsha u ita nga u ralo. Ni fanela u ṱhogomela ṱhoḓea dza muṱa waṋu na mushumo wa u ḓitshidza. Ni fanela u dovha na ṱhogomela ṱhoḓea dza tshivhidzo na maṅwe mafhungo o ṱavhanyiswaho. Samusi hu na zwinzhi zwine zwa fanela u itwa, kha ri haseledze uri ndi ngani zwi zwa ndeme kha inwi u ḓiṋea tshifhinga tsha u gudisa vhaṅwe.
U GUDISA HO ṰAVHANYISWA
4. Ndi ngani vhahulwane vha tshi lenga u gudisa vhahashu nga zwiṅwe zwifhinga?
4 Ndi ngani zwi tshi nga konḓa u ḓiṋea tshifhinga tsha u gudisa vhahashu vha tshinnani tshivhidzoni? Vhaṅwe vha nga humbula uri: ‘Maṅwe mafhungo a tshivhidzo o ṱavhanyiswa vhukuma nahone a fanela u itwa nga u ṱavhanya. Arali nda sa ṱavhanya u vha gudisa, tshivhidzo tshi nga si kwamee.’ Naa ndi ngoho? Maṅwe mafhungo a nga ṱoḓa uri ni a ṱhogomele nga u ṱavhanya. Naho zwo ralo, arali na nga lenga u gudisa vhahashu, ni nga vha ni tshi khou vhaisa tshivhidzo.
5, 6. Ndi mini zwine ra nga zwi guda kha tsumbo ya mureili na nḓila ine a ṱhogomela ngayo goloi yawe? Ri nga vhambedza hani yeneyo ngudo na u gudisa tshivhidzoni?
5 Humbulani nga ha tsumbo i tevhelaho. U itela uri goloi i dzule i kha vhuimo havhuḓi, mureili u a ḓivha uri u fanela u tshintsha oili tshifhinga tshoṱhe. Naho zwo ralo, a nga vhona u nga ndi zwa ndeme vhukuma u shela petirolo ngauri arali zwa sa ralo, goloi i nga si tshimbile. A nga dovha a humbula uri arali o farakanea vhukuma, a nga tshintsha oili tshifhingani tshi ḓaho. Naho zwo ralo, goloi i ḓo bvela phanḓa i tshi tshimbila lwa tshifhinganyana. Fhedzi zwenezwi zwi nga vha na khombo. Arali mureili a sa tshintsha oili musi zwo tea, hu si kale goloi i ḓo tshinyala. Mafheleloni u ḓo fanela uri a fhedze tshifhinga tshinzhi na tshelede u itela u lugisa goloi. Ngudo ndi ifhio?
6 Vhahulwane vha fanela u ṱhogomela mafhungo a ndeme nga u ṱavhanya. Arali vha sa ita nga u ralo, tshivhidzo tshi ḓo pfa vhuṱungu. U fana na mureili ane a fanela u shela petirolo tshifhinga tshoṱhe, vhahulwane vha fanela u “ṱhogomel[a] zwithu zwa ndeme vhukuma.” (Vhafilipi 1:10) Fhedzi vhaṅwe vhahulwane vha nga farakanea vhukuma nga mafhungo a ndeme lune zwa nga ita uri vha si wane tshifhinga tsha u gudisa vhaṅwe. Zwenezwi zwi fana na u sa tshintsha oili goloini. Arali vhahulwane vha lenga u gudisa vhahashu, hu si kale tshivhidzo tshi nga si vhe na vhahashu vho gudiswaho vhane vha nga ṱhogomela ṱhoḓea dzoṱhe dzine dza fanela u itwa.
7. Ri fanela u dzhia hani vhahulwane vhane vha ḓiṋea tshifhinga tsha u gudisa?
7 Ni songo vhuya na humbula uri u gudisa a si zwa ndeme. Vhahulwane vhane vha vha na dzangalelo kha vhumatshelo ha tshivhidzo na vhane vha ḓiṋea tshifhinga tsha u gudisa vhaṅwe, ndi vhashumeli vha vhuṱali na vha ndeme kha vha havho vha tshinnani na vha tshisadzini. (Vhalani 1 Petro 4:10.) Tshivhidzo tshi vhuyelwa hani?
U SHUMISA TSHIFHINGA NGA NḒILA YAVHUḒI
8. (a) Vhahulwane vha na zwiitisi zwifhio zwa u gudisa vhaṅwe? (b) Vhahulwane vhane vha shuma hune ha vha na ṱhoḓea khulwane vha na vhuḓifhinduleli vhufhio ho ṱavhanyiswaho? (Sedzani bogisi “ Mushumo Wo Ṱavhanyiswaho.”)
8 Na vhahulwane vhane vha vha na tshenzhelo vha tea u ḓiṱukufhadza na u pfesesa uri musi vha tshi vha vhalala, vha nga si tsha kona u ita zwo engedzeaho u fana na zwine vha khou zwi ita zwino. (Mixa 6:8) Zwiṅwe hafhu, vhahulwane vha fanela u ḓivha uri “tshifhinga” na zwiitea zwi songo lavhelelwaho zwi nga ita uri zwi vha konḓele u ṱhogomela vhuḓifhinduleli havho. (Muhuweleli 9:11, 12; Yakobo 4:13, 14) Ngauri vhahulwane vha funa na u ṱhogomela vhathu vha Yehova, vha shuma vhukuma u gudisa vhahashu vha tshinnani vhane vha kha ḓi vha vhaswa zwe vha zwi guda miṅwahani minzhi yo fhiraho.—Vhalani Psalme ya 71:17, 18.
9. Ndi zwiitea zwifhio zwa tshifhingani tshi ḓaho zwine zwa ita uri ngudo i vhe ya ndeme?
9 Vhahulwane vhane vha gudisa vhaṅwe na vhone ndi vha ndeme ngauri vhuḓidini havho vhu ḓo thusa u khwaṱhisa tshivhidzo. Honoho vhugudisi vhu ita uri vhahashu vho engedzeaho vha dzule vho lugela u thusa tshivhidzo uri tshi dzule tshi na vhuthihi na u fulufhedzea kha Mudzimu. Zwenezwi ndi zwa ndeme zwino tshifhingani tsha maḓuvha a vhufhelo, nahone zwi ḓo vha zwa ndeme tshifhingani tsha maṱungu mahulu a ḓaho. (Hesekiele 38:10-12; Mixa 5:4, 5) Ngauralo, inwi vhahulwane vha funwaho, ḓiṋeeni tshifhinga tsha u gudisa vhaṅwe u thoma ṋamusi.
10. Muhulwane a nga ita mini uri a vhe na tshifhinga tsha u gudisa vhaṅwe?
10 Ri a pfesesa uri ni na mushumo munzhi ngauri ni khou ṱhogomela maṅwe mafhungo a ndeme a tshivhidzo. Nga zwenezwo, ni nga shumisa tshiṅwe tsha tshifhinga tshine na tshi fhedza ni tshi khou ṱhogomela honoho vhuḓifhinduleli na tshi shumisa u gudisa. (Muhuweleli 3:1) Musi ni tshi ita nga u ralo ni ḓo vha ni tshi khou shumisa tshifhinga tshaṋu zwavhuḓi nahone zwi ḓo vhuyedza tshivhidzo tshifhingani tshi ḓaho.
DZUDZANYANI VHUIMO HO TEAHO
11. (a) Ndi mini zwine zwa takadza vhukuma nga ha nyeletshedzo ya u gudisa ye ya ṋewa nga vhahulwane mashangoni o fhamba-fhambanaho? (b) U ya nga Mirero 15:22, ndi ngani zwi zwa ndeme u haseledza nga ha nyeletshedzo dza vhaṅwe vhahulwane?
11 Zwenezwino, vhaṅwe vhahulwane vhe vha bvelela kha u gudisa vhahashu uri vha ite zwo engedzeaho tshivhidzoni vho vhudziswa nḓila ine vha zwi ita ngayo. * (Sedzani ṱhaluso i re magumoni a siaṱari.) Vhahulwane vhoṱhe vho ṋea nyeletshedzo i fanaho naho vhuimo havho vhu sa fani. Zwenezwi zwi sumbedza mini? Yeneyo ngudo yo thewaho Bivhilini i a shuma kha vhagudiswa “fhethu hoṱhe zwivhidzoni zwoṱhe.” (1 Vhakorinta 4:17) Ngauralo, kha ino thero na i tevhelaho, ri ḓo haseledza nga ha dziṅwe nyeletshedzo dzine vhenevho vhahulwane vha dzi ṋea. (Mirero 15:22) Vhane vha gudisa vha ḓo vhidzwa vhagudisi nahone vhane vha gudiswa vha ḓo vhidzwa vhagudiswa.
12. Mugudisi u fanela u dzudzanya mini, nahone ndi ngani?
12 Tsha u thoma, mugudisi u fanela uri a dzudzanye vhuimo ho teaho. Ndi ngani zwenezwi zwi zwa ndeme? U fana na musi mulimi a tshi fanela u lugisela mavu musi a sa athu u ṱavha mbeu, mugudisi u fanela u lugisela mbilu ya mugudiswa musi a sa athu u mu gudisa vhutsila vhuswa. Nga zwenezwo, mugudisi a nga dzudzanya hani vhuimo ho teaho u itela u gudisa? A nga edzisa tsumbo ya muporofita Samuele we a vha e mugudisi wa vhutsila wa tshifhingani tsho fhiraho.
13-15. (a) Yehova o vhudza Samuele uri a ite mini? (b) Samuele o lugiselela hani Saulo mushumo wawe muswa? (Sedzani tshifanyiso tsha u thoma.) (c) Ndi ngani enea mafhungo a Bivhili a Samuele e a ndeme kha vhahulwane ṋamusi?
13 Ḽiṅwe ḓuvha, miṅwahani i fhiraho 3000, Yehova o vhudza muporofita Samuele we a vha o no vha mulala a ri: “Matshelo nga tshenetshi tshikhathi ndi ḓo ḓisa munna muṅwe ha iwe, a bvaho kha shango ḽa Benyamini; onoyo U mu ḓodze a vhe muranga-phanḓa wa vhathu vhanga vha Isiraele.” (1 Samuele 9:15, 16) Samuele o vha a tshi pfesesa uri a nga si tsha dovha a ranga phanḓa lushaka lwa Isiraele na uri Yehova o vha a tshi ṱoḓa uri a ḓodze murangaphanḓa wawe muswa. Nga zwenezwo, u itela uri a lugiselele onoyo munna uri a lugele mushumo wawe muswa, Samuele o vhamba maano.
14 Nga ḓuvha ḽi tevhelaho Samuele o ṱangana na Saulo, nahone Yehova a vhudza muporofita a ri: “Ngoyo uḽa munna.” Nga u ṱavhanya, Samuele o ita zwoṱhe zwe a zwi dzudzanya. O dzudzanya tshibuli tshavhuḓi u itela uri a kone u amba na Saulo. Samuele o ramba Saulo na vhashumeli vhawe zwiḽiwani nahone a vha dzudza fhethu havhuḓi na u vha ṋea ṋama yavhuḓi. Samuele o ri: “Dzhia U ḽe, ngauri yo vhetshelwa iwe, uri i vhe yau nga tshenetshi tshikhathi.” Musi ho no ḽiwa, Samuele a ramba Saulo nḓuni yawe. Musi vhe nḓilani ya u ya henefho, vhenevho vhanna vhavhili vho vha na nyambedzano yavhuḓi. Musi vha tshi swika nḓuni ya Samuele, vho ya nṱha ha ṱhanga nahone Samuele “a amba na Saulo a mu hanelela mafhungo vhé nḓuni ya ṱaḓulu” u swika vha tshi ya u eḓela. Nga ḓuvha ḽi tevhelaho, Samuele o ḓodza Saulo a mu kuvhatedza nahone a mu ṋea ndaela dzo engedzeaho. Nga murahu ha zwenezwo, Saulo a ṱuwa, o lugela zwine zwa ḓo itea.—1 Samuele 9:17-27; 10:1.
15 Samuele o ḓodza Saulo uri a vhe murangaphanḓa wa lushaka. Ndi ngoho uri zwenezwi zwo fhambana vhukuma na u gudisa wahashu wa tshinnani uri a vhe muhulwane kana mushumeli tshivhidzoni. Naho zwo ralo, vhahulwane vha nga guda ngudo nnzhi dza ndeme kha nḓila ye Samuele a lugiselela ngayo mbilu ya Saulo. Kha ri haseledze mbili dza dzenedzo.
VHAGUDISI VHO ḒIIMISELAHO NA KHONANI DZAVHUḒI
16. (a) Samuele o ḓipfa hani musi Vhaisiraele vha tshi humbela khosi? (b) Samuele o aravha hani musi Yehova a tshi mu vhudza uri a ḓodze Saulo?
16 Ḓiimiseleni, ni songo timatima. Musi Samuele a tshi thoma u pfa uri Vhaisiraele vha khou ṱoḓa khosi ya muthu, o pfa o kulea nungo nahone o nyadziwa. (1 Samuele 8:4-8) Yehova o vhudza Samuele luraru uri a thetshelese vhathu ngauri o vha a sa ṱoḓi u vha ṋea khosi. (1 Samuele 8:7, 9, 22) Naho Samuele o vha a tshi ḓipfa nga yeneyo nḓila, ho ngo vha na vivho kana u sinyutshela munna we a dzhia vhuimo hawe sa murangaphanḓa. Musi Yehova a tshi vhudza Samuele uri a ḓodze Saulo, ho ngo timatima. O ḓiimisela u thetshelesa, hu si ngauri o vha tshi tea u ita nga u ralo, fhedzi nga nṱhani ha uri o vha a tshi funa Yehova.
Vhagudisi, ḓiṋeeni tshifhinga tsha u vha na mugudiswa naho no farakanea
17. Musalauno, vhahulwane vha edzisa hani Samuele, nahone zwenezwo zwi vha takadza hani?
17 Hu na vhahulwane vhanzhi vhane vha vha na tshenzhelo ṋamusi vhe vha edzisa tsumbo ya Samuele nahone vha gudisa vhaṅwe nga nḓila ya lufuno. (1 Petro 5:2) Vhenevho vhahulwane vho ḓiimisela u gudisa vhaṅwe nahone a vha ofhi u ṋea vhagudiswa dziṅwe dza ndugelo dzine vha vha nadzo tshivhidzoni. Nṱhani hazwo, vha vhona vhenevha vhahashu vhe “vhashumisani” vha ndeme vhane vha ḓo vha thusa u ṱhogomela ṱhoḓea dza tshivhidzo. (2 Vhakorinta 1:24; Vhaheberu 13:16) Nahone vhenevha vhahulwane vha si na tseḓa vha takalela u vhona vhagudiswa vha tshi shumisa vhukoni havho u itela u thusa vhathu vha Yehova.—Mishumo 20:35.
18, 19. Muhulwane a nga lugiselela hani mbilu ya mugudiswa uri a mu gudise, nahone ndi ngani zwi zwa ndeme?
18 Ivhani khonani, hu si mugudisi fhedzi. Musi Samuele a tshi ṱangana na Saulo, muporofita o vha a tshi ḓo mu ḓodza nga u ṱavhanya sa khosi nga u dzhia oili nahone a i shela kha ṱhoho yawe. Khosi ntswa yo vha i tshi ḓo vha yo ḓodzwa, fhedzi yo vha i tshi ḓo vha i songo ḓilugisela u ranga phanḓa vhathu vha Mudzimu. Nṱhani hazwo, Samuele o ḓiṋea tshifhinga tsha u lugisela mbilu ya Saulo u itela mushumo wawe muswa. Musi a sa athu u ḓodza Saulo, vho ḽa vhoṱhe, vha onyolosa milenzhe, vha fhedza tshifhinga tshilapfu vha tshi khou amba, na u awela vhoṱhe. Samuele o lindela tshifhinga tsho teaho u itela u ḓodza khosi ntswa.
U gudisa vhaṅwe zwi thoma nga u vha khonani dzavho (Sedzani dziphara 18, 19)
19 Zwenezwo ndi ngoho na ṋamusi. Musi muhulwane a sa athu u thoma u gudisa wahashu, u fanela u ita vhuḓidini ha u vha khonani ya mugudiswa. Zwine muhulwane a zwi ita u itela uri mugudiswa a ḓipfe o vhofholowa zwi ḓo fhambana u ya nga vhuimo na mvelelo yawe. Naho zwo ralo, hu sa londwi hune na dzula hone, arali na ḓiṋea tshifhinga tsha u vha na mugudiswa hu sa londwi uri no farakanea hani, u ḓo zwi ḓivha uri u wa ndeme kha inwi. (Vhalani Vharoma 12:10.) Ndi ngoho uri mugudiswa u ḓo livhuha vhukuma musi ni tshi mu ṱhogomela nga lufuno.
20, 21. (a) Ni nga ṱalusa hani mugudisi a bvelelaho? (b) Ri ḓo haseledza mini kha thero i tevhelaho?
20 Ndi ngoho uri mugudisi a bvelelaho u a funa u gudisa vhaṅwe. Fhedzi mugudisi a bvelelaho u fanela u dovha a funa muthu ane a khou mu gudisa. (Vhambedzani Yohane 5:20.) Ndi ngani zwenezwo zwi zwa ndeme? Ngauri arali mugudiswa a vhona uri ni a mu ṱhogomela vhukuma, u ḓo ḓiimisela u guda kha inwi. Ngauralo, zwi nga vha zwavhuḓi arali vhahulwane vha nga ita vhuḓidini ha u sa gudisa fhedzi, fhedzi vha dovhe vha vhe khonani dzavhuḓi.—Mirero 17:17; Yohane 15:15.
21 Musi muhulwane o no lugisa mbilu ya mugudiswa, a nga thoma u mu gudisa. Vhahulwane vha nga shumisa maitele afhio? Zwenezwo ri ḓo zwi haseledza theroni i tevhelaho.
^ par. 3 Ino thero na i tevhelaho dzo ṅwalelwa zwihuluhulu vhahulwane. Fhedzi muṅwe na muṅwe u fanela u vha na dzangalelo kha enea mafhungo. Ndi ngani? A ḓo thusa vhahashu vha tshinnani vhoṱhe u pfesesa uri vha fanela u gudiswa u itela u ita zwo engedzeaho tshivhidzoni. Musi hu na vhahashu vhanzhi vho gudiswaho u itela u thusa tshivhidzoni, muṅwe na muṅwe u ḓo vhuyelwa.
^ par. 11 Vhenevho vhahulwane vha dzula Australia, Bangladesh, Belgium, Brazil, Fura, French Guiana, Dzhapani, Korea, Mexico, Namibia, Nigeria, Réunion, Russia, Afurika Tshipembe na United States.
