Vhushaka Haṋu Na Yehova Ndi Ha Vhukuma Lungafhani?
“Sendelani tsini ha Mudzimu, na ene u ḓo sendela tsini haṋu.”—YAKOBO 4:8.
1. Ndi ngani ri tshi fanela u ita uri vhushaka hashu na Yehova vhu dzule ho khwaṱha?
ARALI ni Ṱhanzi ya Yehova yo lovhedzwaho, ni na tshithu tsha ndeme vhukuma. Ni na vhushaka havhuḓi na Yehova. Fhedzi honoho vhushaka vhu khou thithiswa nga shango ḽa Sathane nahone vhu nga dovha ha si khwaṱhe nga u sa fhelela hashu. Ndi ngazwo roṱhe ri tshi fanela u ita uri vhushaka hashu na Yehova vhu dzule ho khwaṱha nga hune zwa nga konadzea ngaho.
2. (a) Vhushaka ndi mini? (Sedzani ṱhaluso i re magumoni a siaṱari.) (b) Ri nga itani hani uri vhushaka hashu na Yehova vhu khwaṱhe?
2 Naa Yehova ndi wa vhukuma kha inwi? Naa ni vhona u nga ndi Khonani yaṋu? Naa ni nga takalela uri vhushaka haṋu nae vhu vhe ho khwaṱhaho vhukuma? Yakobo 4:8 i ni vhudza zwine na fanela u zwi ita: “Sendelani tsini ha Mudzimu, na ene u ḓo sendela tsini haṋu.” Vhushaka haṋu na Yehova vhu katela inwi na Yehova. * (Sedzani ṱhaluso i re magumoni a siaṱari.) Arali na dzhia vhukando ha u sendela tsini na Yehova, na ene u ḓo dzhia vhukando ha u sendela tsini haṋu. Arali na dzula ni tshi ita zwenezwi u ḓo vha wa vhukuma kha inwi nga ho engedzeaho, vhushaka haṋu nae vhu ḓo khwaṱha nahone ni ḓo ḓipfa nga nḓila ye Yesu a ḓipfa ngayo musi a tshi ri: “We a nthuma ndi wa vhukuma,” nahone “nṋe ndi a mu ḓivha.” (Yohane 7:28, 29) Fhedzi ndi zwifhio zwiṅwe zwithu zwine na nga zwi ita u itela u sendela tsini na Yehova?
Ni nga davhidzana hani na Mudzimu? (Sedzani phara 3)
3. Ri nga davhidzana hani na Yehova?
3 Arali ni tshi ṱoḓa u sendela tsini na Yehova, ndi zwa ndeme vhukuma uri ni davhidzane na Yehova tshifhinga tshoṱhe. Fhedzi zwenezwo zwi konadzea hani? Vhukuma, humbulani nga ha nḓila ine inwi na khonani yaṋu ane a dzula kule na nga davhidzana ngayo. Ni nga ṅwalelana marifhi tshifhinga tshoṱhe na u amba nga luṱingo. Ni amba na Yehova musi ni tshi mu rabela tshifhinga tshoṱhe. (Vhalani Psalme ya 142:2.) Fhedzi ni nga tendela hani Yehova a tshi amba na inwi? Ni ita zwenezwi musi ni tshi vhala ipfi ḽawe Bivhili na u elekanya nga haḽo tshifhinga tshoṱhe. (Vhalani Yesaya 30:20, 21.) Kha ri vhone nḓila ine honoho u davhidzana ha nga khwaṱhisa ngayo vhushaka haṋu na Yehova nahone ha ita uri a vhe Khonani ya vhukuma kha inwi.
TENDELANI YEHOVA A TSHI AMBA NA INWI MUSI NI TSHI GUDA BIVHILI
4, 5. Yehova u amba hani na inwi musi ni tshi guda Bivhili? Ṋeani tsumbo.
4 Ri a zwi ḓivha uri Bivhili ndi mulaedza wa Mudzimu u ya ho kha vhathu vhoṱhe. Fhedzi, naa Bivhili i nga ni thusa uri ni sendele tsini na Yehova? Ee! Musi ni tshi khou bvela phanḓa na u vhala na u guda Bivhili, livhisani ṱhogomelo kha nḓila ine na ḓipfa ngayo nga ha zwine na khou zwi vhala. Nahone ni humbule nḓila ine na nga shumisa ngayo zwe na zwi guda. Musi ni tshi ita nga u ralo, ni vha ni tshi khou tendela Yehova a tshi amba na inwi. U vha Khonani yaṋu ya tsini ine ya ni thusa nahone ni sendela tsini nae.—Vhaheberu 4:12; Yakobo 1:23-25.
5 Sa tsumbo, ni ḓipfa hani musi ni tshi vhala maipfi a Yesu ane a ri: “Litsha u ḓikuvhanganyela lupfumo fhano kha ḽifhasi”? Arali ni tshi khou ita zwoṱhe zwine na nga kona u itela u vhea Yehova u thoma vhutshiloni haṋu, ni ḓo zwi vhona uri u a ni takalela. Fhedzi ni nga vhala maipfi a Yesu nahone na ṱhogomela uri ni fanela u leludza vhutshilo haṋu na u livhisa ṱhogomelo yo engedzaho kha u shumela Mudzimu. Arali zwo ralo, Yehova u khou ni thusa u pfesesa zwine na nga zwi ita u itela u sendela tsini nae.—Mateo 6:19, 20.
6, 7. (a) Musi ri tshi guda Bivhili, zwi ḓo kwama hani nḓila ine ra funa ngayo Yehova na nḓila ine a ri funa ngayo? (b) Tshipikwa tshashu tshi fanela u vha tshifhio musi ri tshi guda Bivhili?
6 Ndi ngoho uri musi ri tshi guda Bivhili, ri guda nga ha tshanduko dzine ra nga dzi ita u itela u shumela Yehova khwine. Fhedzi ri dovha ra guda nga ha zwithu zwavhuḓi zwine a zwi ita na vhumuthu hawe havhuḓi, zwine zwa ita uri ri mu fune nga ho engedzeaho. Musi ri tshi mu funa nga ho engedzeaho, lufuno lwawe kha rine lu a engedzea nahone vhushaka hashu nae vhu a khwaṱha nga ho engedzeaho.—Vhalani 1 Vhakorinta 8:3.
7 Arali ri tshi ṱoḓa u sendela tsini na Yehova, ndi zwa ndeme uri ri gude Bivhili ri na tshiitisi tshi pfalaho. Yesu o ri: “Uri vha wane vhutshilo vhu sa fheli, vha fanela uri vha ḓivhe iwe Mudzimu wa ngoho u woṱhe, vha ḓivhe na Yesu Kristo we wa mu ruma.” (Yohane 17:3) Ri nga guda zwithu zwinzhi zwiswa na zwi takadzaho musi ri tshi guda Bivhili, fhedzi tshipikwa tshashu tshihulwane tshi fanela u vha u ḓivha Yehova khwine sa Muthu.—Vhalani Ekisodo 33:13; Psalme ya 25:4.
8. (a) Ndi mini zwine vhaṅwe vha zwi humbula nga ha nḓila ye Yehova a fara ngayo Khosi Asaria? (b) Arali ni tshi ḓivha Yehova ni ḓo ḓipfa hani nga zwine a zwi ita?
8 Musi ri tshi ḓivha Yehova sa Khonani ya tsini, ri nga si vhilaele musi Bivhili i sa ṱalutshedzi tshifhinga tshoṱhe zwiitisi zwa zwe a zwi ita. Sa tsumbo, musi Asaria e khosi ya Yuda, vhathu vho vha vha tshi gwadamela midzimu ya mazwifhi. Asaria ho ngo ṱanganela navho. “O ita zwe zwa takadza Yehova.” (2 Dzikhosi 15:1-5) Fhedzi Yehova o rwa Asaria nga mapele. Ndi ngani? Enea mafhungo ha ri vhudzi. Nga zwenezwo, ni ḓipfa hani nga zwe Yehova a zwi ita? Naa zwi a ni vhilaedzisa nahone zwa ni ita uri ni vhone u nga Yehova ha na khaṱulokwayo ngauri o haṱula Asaria hu si na tshiitisi tshi pfalaho? Hai. Arali ni tshi ḓivha Yehova zwavhuḓi, ni a zwi ḓivha uri ndayo yawe i dzula yo luga. U dzula a tshi laya ‘zwo eḓanaho.’ (Yeremia 30:11) Nga zwenezwo, naho ni sa ḓivhi zwo itaho uri Yehova a ṱarafe Asaria, ni nga vha na vhungoho ha uri Yehova o ita zwo teaho.
9. Ndi zwidodombedzwa zwifhio zwi ri thusaho u pfesesa uri ndi ngani Yehova o ṱarafa Asaria nga mapele?
9 Bivhili i a ri vhudza zwidodombedzwa zwo engedzeaho nga ha vhutshilo ha Khosi Asaria, we a vha a tshi ḓivhiwa sa Khosi Usia. (2 Dzikhosi 15:7, 32) Mafhungo oṱhe ane a vha kha 2 Koronika 26:3-5, 16-21 o amba uri “o ita zwe zwa takadza Yehova.” A dovha a amba uri nga murahu “mbilu yawe ya ḓi-hudza ya mu tshinyisa.” Khosi yo lingedza u ita zwithu zwe zwa vha zwo tendelwa u itwa nga vho tshifhe fhedzi. Vhotshifhe vha 81 vho mu vhudza uri u khou khakha nahone vha lingedza u mu thivhela. O aravha hani? O vha a tshi ḓikukumusa nahone a vha sinyutshela! Zwenezwo zwidodombedzwa zwo engedzeaho zwi ri thusa u pfesesa uri ndi ngani Yehova o ṱarafa khosi nga mapele.
Musi ni tshi bvela phanḓa ni tshi ḓivha Yehova, ni ḓo fulufhela nga ho engedzeaho uri zwine a zwi ita zwo luga tshifhinga tshoṱhe
10. Ndi ngani ri songo fanela u ḓivha zwiitisi zwoṱhe zwa zwine Yehova a zwi ita? Ri nga vha hani na fulufhelo ḽo engedzeaho ḽa uri Yehova u dzula a tshi ita zwo lugaho?
10 Ndi ngudo ifhio ya ndeme ine ra i guda? Kha mafhungo a Khosi Asaria, ri na zwidodombedzwa zwo eḓanaho u itela u ri thusa u pfesesa zwo itaho uri Yehova a mu ṱarafe. Fhedzi ni ḓo ita mini arali Bivhili i sa ṋei zwidodombedzwa zwoṱhe? Naa ni ḓo ḓivhudzisa uri Yehova o ita zwo lugaho? Kana naa ni vhona u nga Bivhili i na zwidodombedzwa zwo eḓanaho zwine zwa ita uri ni fulufhele uri Mudzimu u dzula a tshi ita zwo lugaho? (Doiteronomio 32:4) Musi ni tshi bvela phanḓa ni tshi ḓivha Yehova sa Muthu, ni ḓo mu funa na u mu fulufhela nga ho engedzeaho. Nahone ni nga si vhe na tshiitisi tsha u ṱoḓa u ḓivha zwiitisi zwa zwiṅwe na zwiṅwe zwine a zwi ita. Samusi ni tshi khou vhala Bivhili, Yehova u ḓo vha wa vhukuma nga ho engedzeaho kha inwi nahone ni ḓo sendela tsini nae.—Psalme ya 77:12, 13.
NI AMBA NA YEHOVA MUSI NI TSHI RABELA
11-13. Ni zwi ḓivha hani uri Yehova u a thetshelesa thabelo? (Sedzani tshifanyiso tsha u thoma.)
11 Musi ri tshi rabela, ri sendela tsini na Yehova. Ri a mu renda, u mu livhuha na u mu humbela thuso. (Psalme ya 32:8) Fhedzi arali ni tshi ṱoḓa u vha na vhushaka ha tsini na Yehova, ni fanela u tenda uri u a thetshelesa thabelo.
12 Vhaṅwe vhathu vha amba uri Mudzimu ha thetshelesi thabelo nahone u rabela zwi sokou vha zwithu zwine zwa ni ita uri ni ḓipfe ni khwine. Vha tenda uri thabelo i ni thusa u humbula nga ho dzikaho nga ha thaidzo dzaṋu na u ḓiwanela phindulo. Ndi ngoho uri thabelo i nga ni thusa nga dzenedzo nḓila. Fhedzi musi ni tshi amba na Yehova nga thabelo, u a ni thetshelesa zwa vhukuma. Ni nga vha hani na vhungoho?
Ni nga vha na vhungoho ha uri Yehova u thetshelesa thabelo dzaṋu
13 Humbula nga ha hezwi: Musi Yesu a sa athu u ḓa kha ḽifhasi o vhona Yehova a tshi fhindula thabelo dza vhashumeli vhawe vha vhathu. Musi Yesu e kha ḽifhasi, o vhudza Khotsi awe wa ṱaḓulu nga thabelo zwe a vha a tshi khou zwi humbula na nḓila ye a vha a tshi ḓipfa ngayo. Nga tshiṅwe tshifhinga, o dovha a rabela vhusiku hoṱhe. (Luka 6:12; 22:40-46) Naa Yesu o vha a tshi nga vha o ita zwenezwo arali o vha a tshi vhona u nga Yehova ha khou thetshelesa zwa vhukuma? Yesu o dovha a gudisa vhatevheli vhawe nḓila ya u rabela Yehova. Naa o vha a tshi ḓo vha o ita nga u ralo arali o vha a tshi vhona u nga Yehova ha thetshelesi thabelo? Vhukuma, Yesu o vha a tshi zwi ḓivha uri Yehova u a thetshelesa thabelo zwa vhukuma. O dovha a amba a ri: “Khotsi, ndi a u livhuha nge wa mpfa. Ndi a zwi ḓivha uri u ḓi dzula u tshi mpfa.” Na rine ri nga vha na vhungoho ha uri Yehova u a thetshelesa thabelo dzashu.—Yohane 11:41, 42; Psalme ya 65:2.
14, 15. (a) Ri vhuyelwa hani musi ri tshi humbela zwithu nga ho livhaho kha thabelo dzashu? (b) Thabelo ya Kathy yo mu thusa hani u sendela tsini na Yehova?
14 Phindulo dza thabelo dzaṋu dzi nga si fhindulwe nga ho livhaho tshifhinga tshoṱhe. Fhedzi musi ni tshi humbela zwithu nga ho livhaho kha thabelo dzaṋu, ni ḓo kona u vhona Yehova a tshi ni fhindula nga ho livhaho, nahone u ḓo vha wa vhukuma kha inwi. Arali na vhudza Yehova zwi tshi bva mbiluni nga ha zwoṱhe zwine zwa ni vhilaedzisa, u ḓo sendela tsini haṋu.
15 Sa tsumbo, Kathy o vha a tshi anzela u ya vhuḓinḓani ha tsimu, fhedzi a sa ḓiphini ngaho. * (Sedzani ṱhaluso i re magumoni a siaṱari.) O ri: “Ndo vha ndi sa takaleli tshumelo ya tsimu. Zwa vhukuma ndo vha ndi sa i takaleli.” Musi a tshi litsha mushumo, muhulwane o mu ṱuṱuwedza uri a vhe muvulanḓila wa tshifhinga tshoṱhe. O ri: “O nṋea fomo ya vhuvulanḓila. Ndo dzhia phetho ya u vula nḓila, fhedzi nda thoma u rabela ḓuvha ḽiṅwe na ḽiṅwe kha Yehova uri a ite uri ndi takalele tshumelo ya tsimu.” Naa Yehova o fhindula thabelo dzawe? Nga murahu ha u vula nḓila lwa miṅwaha miraru, zwino u amba uri: “Ngauri ndi fhedza tshifhinga tshilapfu vhuḓinḓani na u guda kha vhaṅwe vhahashu vha tshisadzini, ndo ita mvelaphanḓa nga zwiṱuku nga zwiṱuku kha vhukoni hanga ha u huwelela. Ṋamusi, a thi tou takalela tshumelo ya tsimu—ndi tou i funa. Zwiṅwe hafhu, vhushaka hanga na Yehova ho khwaṱha vhukuma u fhira nḓila ye ha vha vhu ngayo.” Thabelo dza Kathy dzo mu thusa vhukuma u sendela tsini na Yehova.
Dzulani ni tshi sendela tsini na Yehova (Sedzani dziphara 16, 17)
ITANI TSHIPIḒA TSHAṊU
16, 17. (a) Ri fanela u ita mini u itela u dzula ri tshi khwaṱhisa vhushaka hashu na Yehova? (b) Ri ḓo haseledza mini kha thero i tevhela?
16 Ri nga dzula ri tshi sendela tsini na Yehova nga hu sa fheli. Nga zwenezwo, kha ri bvele phanḓa ri tshi mu thetshelesa nga u guda Bivhili tshifhinga tshoṱhe, nahone ri dzule ri tshi amba nae nga thabelo. Arali ri tshi ita nga u ralo, vhushaka hashu na Yehova vhu ḓo khwaṱha vhukuma nahone ri ḓo kona u konḓelela milingo nga thuso yawe.
Ri nga dzula ri tshi sendela tsini na Yehova nga hu sa fheli
17 Fhedzi nga zwiṅwe zwifhinga ri lwisana na thaidzo dza muthu nga eṱhe, naho ri tshi bvela phanḓa ri tshi rabela kha Yehova. Nga zwenezwo zwifhinga, ri nga thoma u sa fulufhela Yehova. Ri nga vhona u nga Yehova ha thetshelesi thabelo dzashu nahone ri nga ḓivhudzisa arali ri khonani dzawe zwa vhukuma. Arali ni tshi khou thoma u ḓipfa nga yeneyo nḓila, ni nga ita mini? Thero i tevhelaho i ḓo ni thusa.
