1. Ndi vhukoni vhufhio vhune ha nga ri thusa u edzisa Yehova?

YEHOVA o ri sika ri na vhukoni ha u pfesesa nḓila ine vhaṅwe vhathu vha ḓipfa ngayo, naho ri sa athu u vhuya ra vha kha vhuimo havho. (Vhalani Vhaefesa 5:1, 2.) Honovhu vhukoni vhu nga ri thusa hani u edzisa Yehova? Nahone ndi ngani ri tshi fanela u ṱhogomela nḓila ine ra vhu shumisa ngayo?

2. Yehova u ḓipfa hani musi ri tshi shengela?

² Yehova o ri fulufhedzisa vhumatshelo havhuḓi vhu si na tshengelo. Vhaḓodzwa na vha “dziṅwe nngu” vha nga lavhelela vhutshilo vhu sa fheli, hu sa londwi uri ndi ṱaḓulu kana kha ḽifhasi. (Yohane 10:16; 17:3; 1 Vhakorinta 15:53) Fhedzi Yehova u a pfesesa vhuṱungu vhune ra vhu pfa musi zwithu zwi si zwavhuḓi zwi tshi itea kha riṋe ṋamusi. Tshifhingani tsho fhiraho, Yehova o pfa vhuṱungu musi vhathu vhawe vha tshi tambula ngei Egipita. “O pfa a tshi vhaisala.” (Yesaya 63:9) Nga murahu, Yehova o vha a tshi pfesesa nḓila ye vha ḓipfa ngayo musi vhathu vhawe vha tshi fhaṱulula thembele yawe na u ofha maswina avho. O vha vhudza a ri: “A vhaisaho  vho-inwi u a [nkombodza, NW].” (Sakaria 2:12) U fana na mme ane a funa ṅwana wawe, Yehova u funa vhashumeli vhawe nahone u ṱoḓa u vha thusa. (Yesaya 49:15) Ri edzisa lufuno lwa Yehova musi ri tshi lingedza u pfesesa nḓila ine vhaṅwe vha ḓipfa ngayo nga u ḓivhona nga maṱo a muhumbulo ri kha vhuimo havho.—Psalme ya 103:13, 14.

3. Yesu o ḓipfa hani nga vhathu?

³ Yesu o pfesesa nḓila ye vhathu vha ḓipfa ngayo musi vha tshi shengela, naho a songo vhuya a vha kha vhuimo havho. Sa tsumbo, o vha a tshi zwi ḓivha uri vhathu vhanzhi vho vha vha tshi khou konḓelwa nga vhutshilo. Vharangaphanḓa vha vhurereli vho vha zwifhela nahone vha vhea milayo minzhi i sa bvi ha Mudzimu. Vhathu vho vha vha tshi ofha vhenevho vharangaphanḓa. (Mateo 23:4; Marko 7:1-5; Yohane 7:13) Naho Yesu a songo vhuya a vha ofha nahone a si tende mazwifhi avho, o kona u pfesesa nḓila ine vhathu vha ḓipfa ngayo. Zwo vhaisa Yesu vhukuma musi a tshi vhona nḓila i si yavhuḓi ye vha farwa ngayo. Vho vha vhe si na muthusi, “sa nngu dzi si na mulisa.” (Mateo 9:36) Yesu o guda kha Khotsi awe u funa vhathu na u vha na “khathutshelo na tshilidzi.”—Psalme ya 103:8.

4. Yesu o ita mini musi a tshi vhona vhathu vha tshi shengela?

⁴ Musi Yesu a tshi vhona vhathu vha tshi shengela o vha thusa ngauri o vha a tshi vha funa. O vha a tshi fana na Khotsi awe. Sa tsumbo, ḽiṅwe ḓuvha musi Yesu na vhafunziwa vhawe vho tshimbila lwendo lulapfu u itela u huwelela, vho vha vho neta nahone vha tshi ṱoḓa u awela fhethu hu si na phosho. Fhedzi Yesu a vhona vhathu vhanzhi vho mu lindela. O pfesesa uri vha ṱoḓa thuso yawe, naho o vha o neta, a “thoma u vha funza zwithu zwinzhi.”—Marko 6:30, 31, 34.

5, 6. Arali ri tshi ṱoḓa u vha na lufuno u fana na Yehova, ri fanela u ita mini? Ṋeani tsumbo. (Sedzani tshifanyiso tsha u thoma.)

⁵ Arali ri tshi ṱoḓa u vha na lufuno u fana na Yehova, ri fanela u ita mini? Humbulani nga ha vhuimo vhu tevhelaho. Hu na muṅwe wahashu wa tshinnani ane a kha ḓi vha muswa ane a pfi Alan. U khou humbula nga ha muṅwe wahashu wa tshinnani wa mulala a sa koni u tshimbila na u vhona zwavhuḓi. Alan u humbula maipfi a Yesu ane a ri: “Zwine na ṱoḓa vhathu vha tshi ni ita, na inwi ni vha ite zwenezwo.” (Luka 6:31) Ngauralo, Alan u ḓivhudzisa uri: ‘Ndi ṱoḓa vhaṅwe vha tshi ita mini kha nṋe?’ A ri: ‘Ndi ṱoḓa vha tshi tamba na nṋe bola!’ Fhedzi onoyu wahashu ha koni u gidima na u tamba bola. Nga zwenezwo, zwine Alan a fanela u ḓivhudzisa zwone ndi hezwi, ‘Arali ndi vhe ndi onoyo wahashu, ndo vha ndi tshi ḓo ṱoḓa vhathu vha tshi ita mini kha nṋe?’

⁶ Naho Alan a tshee muṱuku, u lingedza u vhona nga maṱo a muhumbulo nḓila ine a nga ḓipfa ngayo arali o vha e mulala. U fhedza tshifhinga na wahashu wa mulala nahone u thetshelesa nga vhuronwane musi a tshi amba. Nga zwenezwo, u thoma u pfesesa uri onoyo wahashu u konḓelwa nga u vhala Bivhili na u tshimbila a tshi ya vhuḓinḓani ha nnḓu nga nnḓu. Alan u vhona nḓila ine a nga mu thusa ngayo nahone u ṱoḓa u ita zwoṱhe zwine a nga kona u itela u mu thusa. Musi ri tshi pfesesa nḓila ine vhaṅwe vhathu vha ḓipfa ngayo  na u vha funa, ri ḓo fana na Yehova.—1 Vhakorinta 12:26.

7. Ri nga pfesesa hani vhuṱungu vhune vhahashu vha khou vhu pfa?

⁷ A zwo ngo leluwa tshifhinga tshoṱhe u pfesesa zwine vhaṅwe vhathu vha khou zwi pfa, zwihuluhulu arali ri sa athu u vhuya ra vha kha vhuimo havho. Sa tsumbo, vhahashu vhanzhi vha khou pfa vhuṱungu ngauri vha khou lwala kana vho huvhala kana ngauri vha khou vha vhalala. Vhaṅwe vha khou shengela vhukuma nga nṱhani ha mutsiko kana mbilaelo dzo kalulaho kana ngauri vho vha vha tshi tambudzwa tshifhingani tsho fhiraho. Vhaṅwe vha khou alusa vhana vhe vhoṱhe kana vha na miraḓo ya muṱa i sa shumeli Yehova. Muṅwe na muṅwe u na thaidzo nahone vhunzhi ha dzenedzo thaidzo a dzi fani na dzashu. Fhedzi ri ṱoḓa u funa vhaṅwe na u vha thusa. Nga zwenezwo, ri nga ita mini? Muthu muṅwe na muṅwe a nga ṱoḓa zwithu zwo fhambanaho. Nga zwenezwo, arali ri tshi thetshelesa nga vhuronwane na u dzula ri tshi pfesesa nḓila ine vhaṅwe vha ḓipfa ngayo, ri ḓo ḓivha nḓila ya khwine ya u vha thusa. Khamusi ri nga mu humbudza nḓila ine Yehova a ḓipfa ngayo nga ha thaidzo ine a vha nayo. Kana ri nga kona u mu thusa nga dziṅwe nḓila. Musi ri tshi ita nga u ralo, ri vha ri tshi khou edzisa Yehova.—Vhalani Vharoma 12:15; 1 Petro 3:8.

8. Ndi mini zwo thusaho Yesu u vha na vhulenda?

⁸ Yehova u na vhulenda kha vhathu vhoṱhe. (Luka 6:35) Nahone Yesu u fana na Khotsi awe. Ndi mini zwe zwa thusa Yesu u vha na vhulenda musi e kha ḽifhasi? O vhona nga maṱo a muhumbulo nḓila ine vha ḓo ḓipfa ngayo nga zwine a nga zwi amba kana u zwi ita. Sa tsumbo, mufumakadzi we a vha o ita zwivhi zwinzhi o ḓa ha Yesu. O vha a tshi khou lila vhukuma lwe miṱodzi yawe ya wela milenzheni ya Yesu. Yesu o kona u vhona uri u khou ḓisola vhukuma nga ha zwithu zwivhi zwe a zwi ita nahone o rembuluwa. O zwi ṱhogomela uri arali a mu fara nga nḓila i si ya vhulenda, u ḓo pfa vhuṱungu ho engedzeaho. Nga zwenezwo, o mu khoḓa nga nṱhani ha zwithu zwavhuḓi zwe a zwi ita nahone a mu hangwela. Yesu o amba nga vhulenda na Mufarisei we a vha a sa tendelani na zwe a zwi itela onoyu mufumakadzi.—Luka 7:36-48.

9. Ndi mini zwine zwa nga ri thusa u vha na vhulenda u fana na Yehova? Ṋeani tsumbo.

⁹ Ri nga vha hani na vhulenda u fana na Yehova? Ri fanela u thoma ra humbula ri sa athu u amba kana u ita tshithu u itela uri ri fare vhaṅwe nga vhulenda nahone ri  si vhaise maḓipfele avho. Paulo o ṅwala uri Mukriste “ho ngo fanela u lwa, u fanela u vha na vhulenda kha vhoṱhe.” (2 Timotheo 2:24) Sa tsumbo, humbulani nḓila ine na nga vha na vhulenda ngayo kha vhuimo vhu tevhelaho: Arali mutholi waṋu a sa iti mushumo wawe zwavhuḓi, ni nga ita mini? Arali wahashu o ḓa miṱanganoni nga murahu ha u fhedza miṅwedzi minzhi a sa lu vhei Holoni ya Muvhuso, ni ḓo ri mini khae? Arali ni tshi khou huwelela nahone muṅwe muthu a amba uri o farakanea u amba na inwi, ni nga vha hani na vhulenda khae? Arali mufumakadzi waṋu a ni vhudzisa uri ndi ngani ni songo mu vhudza nga ha nzudzanyo dze na dzi ita, naa ni nga amba nae nga vhulenda? Ri fanela u vhona nga maṱo a muhumbulo nḓila ine vhaṅwe vha ḓipfa ngayo na uri maipfi ashu a vha kwama hani. Nahone ri ḓo ḓivha zwine ra fanela u zwi amba na u zwi ita u itela u vha na vhulenda u fana na Yehova.—Vhalani Mirero 15:28.

10, 11. Ri nga guda hani kha Yehova nahone ra ṱalifha? Ṋeani tsumbo.

¹⁰ Yehova o ṱalifha nga nḓila i akhamadzaho vhukuma, nahone a nga khetha u vhona zwine zwa ḓo itea tshifhingani tshi ḓaho. Naho ri sa ḓivhi ḽa matshelo, na riṋe ri nga ṱalifha. Nga nḓila-ḓe? Musi ri sa athu u dzhia phetho, ri nga vhona nga maṱo a muhumbulo nḓila ine yeneyo phetho ya nga ri kwama ngayo kana vhaṅwe. A ro ngo fanela u fana na Vhaisiraele. A vho ngo humbula nga ha zwine zwa ḓo itea khavho arali vha sa thetshelesa Yehova. A vho ngo humbula nga ha vhushaka havho nae na zwoṱhe zwe a vha itela zwone. Ngauri Mushe o ṱhogomela zwenezwi, o vha a tshi zwi ḓivha uri Vhaisiraele vha ḓo ita zwithu zwi si zwavhuḓi. O ri: “Ndi vhathu, vha langana khombo; A hu na vhuṱali kha vhone. Ngavhe vhó thanya ndi misi vhó vhona, Vhó ḓivha hune zwa ḓo guma.”—Doiteronomio 31:29, 30; 32:28, 29.

¹¹ Sa tsumbo, arali ni tshi khou funana, humbulani uri musi ni na dzangalelo kha muṅwe muthu, zwi a konḓa u langa maḓipfele aṋu na lutamo lwa zwa vhudzekani. Nga zwenezwo, ni songo ita tshithu naho tshi tshifhio tshine tsha nga tshinya vhushaka haṋu havhuḓi na Yehova! Nṱhani hazwo, ṱalifhani nahone ni iledze khombo. Thetshelesani nyeletshedzo ya Yehova ya vhuṱali: “Muthanyi u vhona muvhango a khuda; matsilu a fhira a welwa.”—Mirero 22:3.

12. Zwine ra zwi humbula zwi nga ri vhaisa hani?

¹² Muṱali u langa zwine a zwi humbula. Mihumbulo yashu i nga ri thusa kana u ri vhaisa, u fana na mulilo une wa nga ri thusa kana u ri vhaisa. Musi ri tshi shumisa mulilo nga vhulondi, ri nga u shumisa u bika zwiḽiwa. Fhedzi arali ri sa ṱhogomeli, mulilo u nga fhisa nnḓu yashu na u ri vhulaha. Zwi fana na zwine ra zwi humbula. Ndi zwavhuḓi u humbula nga ha zwithu  zwe ra zwi guda kha Yehova. Fhedzi arali ra dzula ri tshi humbula nga u ḓifara luvhi nga zwa vhudzekani na u ḓivhona ri tshi khou ita zwithu zwi si zwavhuḓi, ri ḓo tama zwenezwo zwithu vhukuma lune ra ḓo fhedzisela ro zwi ita. Zwenezwo zwi nga fhelisa vhushaka hashu na Yehova.—Vhalani Yakobo 1:14, 15.

13. Eva o vhona hani vhutshilo hawe nga maṱo a muhumbulo?

¹³ Ri nga guda kha tsumbo ya mufumakadzi wa u thoma, Eva. Yehova o ṋea Adamu na Eva ndaela ya u sa ḽa mutshelo wa “muri wa u ṱalukanya vhuḓi na vhuvhi.” (Genesi 2:16, 17) Fhedzi Sathane o vhudza Eva a ri: “A ni nga fi. Mudzimu a tshi ralo u ḓivha zwauri musi nó ḽa wone, maṱo aṋu a ḓo bonyolowa, na ḓo nga Mudzimu, na ḓo ḓivha vhuḓi na vhuvhi.” Eva o vhona nga maṱo a muhumbulo nḓila ine vhutshilo hawe ha ḓo vha khwine ngayo arali a ḓikhethela zwo lugaho na zwi songo lugaho. O dzula a tshi humbula nga ha zwenezwo nahone a “lavhelesa muri a wana wó naka, wó fanela u ḽiwa, u tshi takadza maṱo.” Ho itea mini? “A mbo fula mutshelo wawo, a ḽa, a ṋea na munna wawe, na ene a ḽa.” (Genesi 3:1-6) Nga zwenezwo, “tshivhi tsho dzhena shangoni nga muthu muthihi.” (Vharoma 5:12) Eva o vha a songo fanela u dzula a tshi humbula nga ha u ita zwo khakheaho!

14. Ndi tsevho dzifhio dzine Bivhili ya dzi ṋea nga ha u ḓifara luvhi nga zwa vhudzekani?

¹⁴ Ndi ngoho uri tshivhi tsha Eva a tsho ngo katela u ḓifara luvhi nga zwa vhudzekani. Fhedzi Bivhili i a ri sevha zwavhuḓi uri ri songo dzula ri tshi ḓivhona nga maṱo a muhumbulo ri tshi khou ḓifara luvhi nga zwa vhudzekani. Yesu o ri: “Muṅwe na muṅwe ane a dzulela u lavhelesa mufumakadzi nga u mu emula, o no ita vhuṱonḓolo nae mbiluni yawe.” (Mateo 5:28) Zwiṅwe hafhu, Paulo o sevha a ri: “Ni songo dzula no dzudzanya uri ni fushe nyemulo dza ṋama.”—Vharoma 13:14.

15. Ri fanela u livhisa ṱhogomelo kha lupfumo lufhio, nahone ndi ngani?

¹⁵ Bivhili i dovha ya amba uri ri fanela u livhisa ṱhogomelo kha u takadza Yehova nahone ri songo dzula ri tshi humbula nga ha u pfuma. Naho muthu o pfuma, tshelede yawe i nga si mu tsireledze na luthihi. (Mirero 18:11) Yesu o ri muthu ndi tsilu arali a tshi ḓikuvhanganyela lupfumo lunzhi nahone a si vhee Yehova u thoma vhutshilo hawe. Ho ngo “pfuma Mudzimuni.” (Luka 12:16-21) Musi ri tshi kuvhanganya “lupfumo ngei ṱaḓulu” nga u ita zwithu zwine zwa takadza Yehova, ri ita uri a takale nahone na riṋe ri a takala. (Mateo 6:20; Mirero 27:11) U vha na vhushaka havhuḓi na Yehova ndi zwa ndeme u fhira zwithu zwoṱhe.

16. Ndi mini zwine zwa nga ri thusa musi ri tshi vhilaela?

¹⁶ Arali ra lingedza u pfuma kha ḽino shango, zwi ḓo ri ḓisela mbilaelo nnzhi. (Mateo 6:19) Yesu o amba uri vhane vha dzula vha tshi vhilaela nga tshelede zwi ḓo vha konḓela u vhea Muvhuso wa Mudzimu u thoma vhutshiloni havho. (Mateo 13:18, 19, 22) Zwiṅwe hafhu, vhaṅwe vhathu vha dzula vha tshi vhilaela nga ha zwithu zwi si zwavhuḓi zwine zwa nga itea khavho. Fhedzi arali ra dzula ri tshi vhilaela, ri nga lwala kana ra si tsha vha na lutendo kha Yehova. Nṱhani hazwo, ri fanela u fulufhela uri Yehova u ḓo ri thusa. Bivhili i amba uri “ma-ḽa-mbilu ma-tsika-muthu; i takadzwa nga ḽa vhuthu.” (Mirero 12:25) Nga zwenezwo, arali hu na  zwine zwa ni vhilaedzisa, ambani na muṅwe muthu ane a shumela Yehova na ane a ni ḓivha khwine. Mubebi, munna kana mufumakadzi waṋu, kana khonani yavhuḓi vha nga ni ṱuṱuwedza u fulufhela Yehova na u ni thusa uri ni si vhilaele nga ho kalulaho.

17. Yehova a nga ri thusa hani musi ri tshi vhilaela?

¹⁷ Yehova u a pfesesa nḓila ine ra ḓipfa ngayo u fhira muthu naho e ufhio nahone a nga ri thusa u ḓipfa ri khwine musi ri tshi vhilaela. Paulo o ṅwala a ri: “Ni songo vhilaela nga tshithu na tshithihi, fhedzi zwoṱhe zwine na zwi ṱoḓa ni humbele Mudzimu nga thabelo khathihi na u livhuha; nahone mulalo wa Mudzimu une wa fhira u ṱalukanya hoṱhe u ḓo tsireledza mbilu dzaṋu na maanḓa aṋu a muhumbulo nga Kristo Yesu.” (Vhafilipi 4:6, 7) Nga zwenezwo, musi ni tshi vhilaela, humbulani nga ha thuso ine Yehova a ni ṋea yone u itela u khwaṱhisa vhushaka haṋu nae, i ngaho thuso i bvaho kha vhahaṋu vha tshinnani na vha tshisadzini, vhahulwane, mulanda a fulufhedzeaho, vharuṅwa na Yesu.

18. Vhukoni hashu ha u vhona zwithu nga maṱo a muhumbulo vhu nga ri thusa hani?

¹⁸ Samusi ro zwi guda, ri edzisa Yehova musi ri tshi shumisa vhukoni hashu, u itela u pfesesa nḓila ine vhaṅwe vha ḓipfa ngayo. (1 Timotheo 1:11; 1 Yohane 4:8) Ri ḓo takala musi ri tshi funa na u vha na vhulenda kha vhaṅwe, ri tshi humbula nga ha mbuyelo dza zwine ra zwi ita na musi ri tshi iledza u dzula ri tshi vhilaela. Kha ri vhone nga maṱo a muhumbulo nḓila ine vhutshilo ha ḓo vha ngayo nga fhasi ha vhuvhusi ha Muvhuso na u ita zwoṱhe zwine ra nga kona u edzisa Yehova.—Vharoma 12:12.