Lwa miṅwaha minzhi, khandiso dzashu dzo ṱalutshedza uri dzina Gogo kha ḽa Magogo ḽi ambela kha Sathane musi o no pandelwa ṱaḓulu. Ndi ngani? Ngauri bugu ya Nzumbululo i ṱalusa Sathane sa murangaphanḓa wa vha vutsheli vha vhathu vha Mudzimu vha shango ḽoṱhe. (Nzumbululo 12:1-17) Nga zwenezwo, ro vha ri tshi pfesesa uri Gogo ḽi nga vha ḽi ḽiṅwe dzina ḽa Sathane.

Naho zwo ralo, ho vha hu na thaidzo kha yeneyi ṱhalutshedzo. Humbulani zwi tevhelaho: Musi Yehova a tshi amba nga ha u fheliswa ha Gogo, o ri u ḓo kumedza Gogo ḽa “ḽiwa nga maanga na oṱhe maṋoni na nga zwoṱhe zwivhanda zwa shango.” (Hesekiele 39:4) Nga zwenezwo, Yehova a dovha a ri: “Misi iyo Magogo ndi ḓo mu vhulungela kha ḽa Isiraele.” (Hesekiele 39:11 NW) Fhedzi Sathane ane a vha tshivhumbiwa tsha muya tshi sa vhonali, a nga ḽiwa hani nga maṋoni na nga zwivhanda zwa shango? A nga vhulungwa hani kha ḽifhasi? Bivhili i zwi sumbedza zwavhuḓi uri Sathane u ḓo poswa mugodini lwa miṅwaha ya 1 000. A nga si ḽiwe kana u vhulungwa.—Nzumbululo 20:1, 2.

Bivhili i ri mafheloni a miṅwaha ya 1 000, Sathane u ḓo vhofhololwa mugodini nahone “u ḓo bva a ya u xedza tshaka dzi re khuḓani nṋa dza ḽifhasi, Gogo na Magogo, u itela u vha kuvhanganyela nndwani.” (Nzumbululo 20:8) Fhedzi arali Sathane e Gogo, zwenezwi zwi amba uri Sathane u ḓo ḓixedza. Nga zwenezwo, kha bugu ya Hesekiele kana ya Nzumbululo “Gogo” a ḽi ambeli kha Sathane.

Nga zwenezwo, Gogo kha ḽa Magogo ndi nnyi? U itela u fhindula yeneyi mbudziso, ri fanela u ṱolisisa Bivhili u itela u wana uri ndi nnyi ane a vutshela vhathu vha Mudzimu. Bivhili i amba nga ha u vutshela ha “Gogo kha ḽa Mágogo,” u vutshela ha “khosi ya Ḽivhuya,” na u vutshela ha “mahosi a ḽifhasi.” (Hesekiele 38:2, 10-13; Daniele 11:40, 44, 45; Nzumbululo 17:14; 19:19) Naa u vutshela honohu ho fhambana? Zwi vhonala zwi songo ralo. Zwi vhonala u nga Bivhili i khou shumisa madzina o fhambanaho u ṱalusa mvutshelo i fanaho. Ndi ngani ri tshi amba nga u ralo? Ngauri Bivhili i ri vhudza uri tshakha dzoṱhe dza ḽifhasi dzi ḓo vha tshipiḓa tsha mvutshelo yeneyi ya u fhedzisela ine ya ḓo thoma nndwani ya Haramagedo.—Nzumbululo 16:14, 16.

 Musi ri tshi vhambedza enea maṅwalo oṱhe a Bivhili nga ha mvutshelo ya u fhedzisela ya vhathu vha Mudzimu, zwi tou vha khagala uri dzina Gogo kha ḽa Magogo a ḽi ambeli kha Sathane. Nṱhani hazwo, Gogo kha ḽa Magogo ḽi ambela kha tshigwada tsha dzitshaka. Naa “khosi ya Ḽivhuya” i ḓo ranga phanḓa tshenetshi tshigwada? A ri na vhuṱanzi ho fhelelaho. Fhedzi yeneyi ṱhalutshedzo i vhonala i tshi tshimbidzana na zwe Yehova a zwi amba nga ha Gogo musi a tshi ri: “U ḓo ḓa U tshi bva mahayani au a re hangei migumoni ya Ḽivhuya, Ú na tshakha nnzhi, vhanameli vha dzimbiḓi vhoṱhe, magogo manzhi, mmbi khulu.”—Hesekiele 38:6, 15.

Zwi nga ho zwenezwo, muporofita Daniele, we a tshila misini ya Hesekiele, o amba zwi tevhelaho nga ha khosi ya ḽivhuya: “I ḓo tshenuwa phungo i bvaho Vhubvaḓuvha na Ḽivhuya, ya ḓo bva yó halifha zwihulu ya lozwa vhanzhi ya vha fhedza. Mishasha yayo ya vhuhosi i ḓo i fhaṱa kha ḽi re vhukati ha lwanzhe na thavha-khethwa i funwaho; ndi hone i tshi ḓo ḓelwa nga zwa u fhela hayo, i si vhe na mulamuleli.” (Daniele 11:43, 44) Zwenezwi zwi fana na zwe bugu ya Hesekiele ya zwi amba nga ha zwine zwa ḓo itwa nga Gogo.—Hesekiele 38:8-12, 16.

Hu ḓo itea mini nga murahu ha mvutshelo ya u fhedzisela? Daniele uri vhudza uri: “Misi iyo hu ḓo takuwa Mikaele [Yesu Kristo, nga Haramagedo] ene mukoma muhulwane wa u ima [u bva nga 1914] na lushaka lwa haṋu; tshi ḓo vha tshi tshifhinga tsha maṱhupho [maṱungu mahulu], ane a sathu u vha hone tshee dzitshakha dza vha hone na u swika misi iyo. Misi iyo hu ḓo hanya vha lushaka lwa haṋu, vhoṱhe vhane vha wanala vhó ṅwalwa buguni.” (Daniele 12:1) Ri vhala ṱhaluso i fanaho kha Nzumbululo 19:11-21 nga ha zwine Yesu a ḓo zwi ita.

Fhedzi ndi nnyi “Gogo na Magogo” o ṱaluswaho kha Nzumbululo 20:8? Heḽi dzina ḽi ambela kha vhoṱhe vhane vha shandukela Yehova na vhane vha vutshela vhathu vhawe nga tshifhinga tsha u lingwa ha u fhedza mafheleloni a miṅwaha ya 1 000. Vha ḓo vha na vengo ḽi fanaho na ḽa Gogo kha ḽa Magogo, lushaka lu vutshelaho vhathu vha Mudzimu mafheleloni a maṱungu mahulu. U fana na lwonolwo lushaka lune lwa ḓo fheliswa nga Haramagedo, Gogo na Magogo na ḽone ḽi ḓo fheliswa. (Nzumbululo 19:20, 21; 20:9) Nga zwenezwo, zwi a pfala uri vhoṱhe vhane vha ḓo vha mashandukwa mafheleloni a miṅwaha ya 1 000 vha vhidzwe “Gogo na Magogo.”

Sa vhagudi vha Bivhili vho ḓiimiselaho, ri fhisetshela u wana uri ndi nnyi ane a ḓo vha “khosi ya Ḽivhuya” tshifhingani tshi ḓaho. Fhedzi hu sa londwi uri ndi nnyi ane a ḓo ranga phanḓa lushaka lune lwa ḓo vutshela vhathu vha Mudzimu, ri na fulufhelo ḽa zwithu zwivhili: (1) Gogo kha ḽa Magogo na mmbi yaḽo ḽi ḓo kundwa nahone ḽa fheliswa. (2) Khosi yashu Yesu Kristo, u ḓo tshidza vhathu vha Mudzimu nahone a vha isa shangoni ḽiswa ḽine ḽa vha na mulalo na tsireledzo ya vhukuma.—Nzumbululo 7:14-17.