JULIAN u humbula nḓila ye a ḓipfa ngayo musi hu tshi ḓivhadzwa uri murwa wawe ha tsha vha muṅwe wa Ṱhanzi dza Yehova. O ri: “Ndo pfa u nga shango ḽi khou fhela. Ndi ṅwana wanga wa tanzhe nahone ro vha ri madele mapfani; ro ita zwithu zwinzhi roṱhe.” Julian u ṱalutshedza uri murwa wawe o vha a tshi ḓifara zwavhuḓi tshifhinga tshoṱhe, fhedzi o mbo ḓi shanduka nahone a thoma u ita zwithu zwivhi. Mufumakadzi wa Julian o vha a tshi dzula a tshi lila nahone o vha a sa ḓivhi uri a nga mu khuthadza hani. Julian o ri: “Ro vha ri tshi dzula ri tshi ḓivhudzisa arali riṋe sa vhabebi ro kundelwa.”

Ndi zwiitisi zwifhio zwa u bvisa muthu tshivhidzoni zwine zwa wanala Bivhilini? Samusi zwi tshi pfisa vhuṱungu vhukuma, ndi ngani ri tshi nga amba uri u bviswa tshivhidzoni ndi nḓila ya u sumbedza lufuno?

Arali muṅwe wa Ṱhanzi dza Yehova o lovhedzwaho a ita tshivhi tshihulwane nahone a si rembuluwe, u ḓo bviswa tshivhidzoni.

Yehova ha lavheleli uri ri vhe vho fhelelaho, fhedzi u lavhelela uri vhashumeli vhawe vha thetshelese milayo yawe nahone vha dzule vho kuna. Sa tsumbo, Yehova u laya vhashumeli vhawe uri vha iledze zwivhi zwihulwane zwi nga ho vhupombwe, u gwadamela midzimu ya zwifanyiso, u tswa, vhuvemu, u vhulaha na vhungome.—1 Vhakorinta 6:9, 10; Nzumbululo 21:8.

Zwine Yehova a zwi lavhelela kha riṋe zwi a pfala nahone zwi a ri tsireledza. Sa tsumbo, roṱhe ri ṱoḓa u tshila na vhathu vha re na mulalo, vha ṱhonifheaho na vha fulufhedzeaho, nahone ri ḓipfa nga yeneyo nḓila musi ri vhukati ha vhahashu vha tshinnani na vha tshisadzini vha lwa muya. Ndi ngani vho tou ralo? Ngauri vho ḓiṋekedza kha Yehova nahone vha fulufhedzisa u tshila nga zwine Bivhili ya zwi amba.

Fhedzi hu pfi mini arali Mukriste o lovhedzwaho a ita tshivhi tshihulwane nga nṱhani  ha u sa fhelela? Zwenezwi zwo itea kha vhashumeli vha Yehova vha tshifhingani tsho fhiraho, fhedzi Yehova ho ngo vha laṱa lwa tshoṱhe. Sa tsumbo, naho Khosi Davida o ita vhuṱonḓolo na u vhulaha, muporofita Nathani o vhudza Davida uri Yehova o mu hangwela tshivhi tshawe.—2 Samuele 12:13.

Ndi ngani Yehova o hangwela Davida? Ngauri Yehova o zwi vhona uri Davida o rembuluwa zwa vhukuma. (Psalme ya 32:1-5) U fana na ṋamusi, muthu ane a ita tshivhi u ḓo hangwelwa arali a rembuluwa zwa vhukuma nahone a litsha u ita zwithu zwivhi. (Mishumo 3:19; 26:20) Arali vhahulwane vhane vha vha kha komiti ya khaṱulo vha sa ṱhogomeli uri onoyo muthu o rembuluwa zwa vhukuma, u fanela u bviswa tshivhidzoni.

Arali muṅwe wa muraḓo wa muṱa waṋu kana khonani ya tsini a bviswa tshivhidzoni, zwi nga ni konḓela u ṱanganedza yeneyo phetho nahone ni nga vhona u nga ndi tshiṱuhu. Naho zwo ralo, Ipfi ḽa Yehova ḽi ri sumbedza khagala uri u bviswa tshivhidzoni ndi nḓila ya u sumbedza lufuno.

Yesu o ri: “Vhuṱali vhu vhonala nga mishumo yaho yo lugaho.” (Mateo 11:19) Kha ri ṱhogomele zwiitisi zwiraru zwine zwa sumbedza uri ndi ngani zwi vhuṱali u dzhia phetho ya u bvisa tshivhidzoni muthu ane a si rembuluwe.

U bviswa tshivhidzoni zwi tsireledza dzina Yehova uri ḽi si nyadziwe. Zwine ra zwi ita zwi nga hulisa kana u nyadzisa Yehova ngauri sa Ṱhanzi dzawe, ri vhidzwa nga dzina ḽawe. (Yesaya 43:10) Samusi vhuḓifari ha murwa vhu tshi nga hulisa kana u nyadzisa vhabebi vhawe, vhuḓifari ha vhashumeli vha Yehova vhu nga hulisa kana ha nyadzisa Yehova. Misini ya Hesekiele, vhannḓa vho vha vha tshi ṱumanya Vhayuda na dzina Yehova. (Hesekiele 36:19-23) Nga hu fanaho ṋamusi, vhathu vha ṱumanya Ṱhanzi dza Yehova na dzina Yehova. Ngauralo, arali ra thetshelesa milayo ya Yehova, ri ḓo mu hulisa.

Muapostola Petro o eletshedza Vhakriste a ri: “Sa vhana vha thetshelesaho, litshani u ṱuṱuwedzwa nga nyemulo dze na vha ni nadzo musi ni sa athu ḓivha, fhedzi u tendelana na Mukhethwa we a ni vhidza, ivhani vhakhethwa inwi vhaṋe kha vhuḓifari haṋu hoṱhe, ngauri ho ṅwalwa ha pfi: ‘Ni tea u vha vhakhethwa, ngauri nṋe ndi mukhethwa.’” (1 Petro 1:14-16) Sa tsumbo, arali ra ita vhupombwe, ri ḓo vha ri tshi khou nyadzisa dzina ḽa Mudzimu. Fhedzi musi ri tshi ḓifara nga nḓila yo kunaho, ri vha ri tshi khou hulisa Yehova.

Arali muṅwe wa Ṱhanzi dza Yehova a ita tshivhi, vhathu vhane vha mu ḓivha vha nga kha ḓi ṱhogomela zwithu zwine a khou zwi ita. Musi vha tshi pfa uri ha tsha vha muṅwe wa Ṱhanzi dza Yehova, vha ḓo ṱhogomela uri vhathu vha Yehova vha a thetshelesa zwine Bivhili ya zwi amba nahone vha dzula vha tshi ita uri tshivhidzo tshi dzule tsho kuna. Sa tsumbo, muṅwe munna o ya muṱanganoni ngei Switzerland nahone a amba uri u khou ṱoḓa u vha muraḓo wa tshivhidzo. Khaladzi awe o vha o bviswa tshivhidzoni nga nṱhani ha u ḓifara luvhi nahone ene o vha a tshi ṱoḓa u ṱanganela na ndangulo ine “ya si ṱanganedze vhuḓifari vhu si havhuḓi.”

U bviswa tshivhidzoni zwi ita uri tshivhidzo tsha Vhukriste tshi kune. Muapostola Paulo o sevha Vhakorinta nga ha khombo ya u tendela muitazwivhi a sa rembuluwi a tshi dzula tshivhidzoni. O vhambedza ṱhuṱhuwedzo mmbi ya vhenevho vhavhi na ya mbiliso ine ya ita uri fulauru yo sukwaho i kukumuwe. Paulo o ri: “Mbiliso ṱhukhu i vhilisa fulauru yoṱhe yo sukwaho.” Nga zwenezwo o vha ṋea nyeletshedzo ya uri: “Bvisani muthu muvhi vhukati haṋu.”—1 Vhakorinta 5:6, 11-13.

Onoyo “muthu muvhi” o ita vhupombwe e si na ṱhoni. Vhaṅwe tshivhidzoni tshawe vho  thoma u vhuyafhedza vhuḓifari hawe vhu si havhuḓi. (1 Vhakorinta 5:1, 2) Zwenezwo zwo vha zwi na khombo ngauri vhaṅwe Vhakriste vho vha vha tshi nga kwamiwa nga eneo matshilele mavhi e a vha o ḓowelea kha ḽa Korinta. Nga hu fanaho ṋamusi, arali tshivhidzo tsha sa dzhiela nṱha tshivhi tshihulwane, vhaṅwe vha nga thoma u dzhia zwilinganyo zwa Yehova zwi si zwa ndeme. (Muhuweleli 8:11) Samusi na “matombo a re nga fhasi ha maḓi” a tshi nga pwasha tshikepe, vhaitazwivhi vhane vha si rembuluwe vha nga ita uri vhaṅwe tshivhidzoni vha si vhe na lutendo.—Yuda 4, 12.

U bviswa tshivhidzoni zwi nga thusa muitazwivhi uri a ṱhogomele vhukhakhi hawe. Yesu o shumisa tshifanyiso tsha muṱhannga we a ṱutshela haya ha khotsi awe nahone a ḽa ifa ḽawe ḽoṱhe a tshila nga nḓila ya vhuaḓa. Mafheleloni onoyo muṱhannga o ṱhogomela uri u tshila kule na haya ha khotsi awe a zwi na ndivho. Ngauralo, a rembuluwa nahone a dzhia phetho ya u humela muṱani wa hawe. Khotsi awe vho takala vhukuma musi vha tshi vhona uri murwa wavho o shandula mavhonele awe nahone vha mu ṱanganedza hayani. (Luka 15:11-24) Tshenetshi tshifanyiso tshi ri thusa uri ri pfesese nḓila ine Yehova a ḓipfa ngayo musi muṅwe muthu a tshi rembuluwa. O ri: “Nṋe a thi takaleli lufu lwa mu-ita-zwivhi; tshine nda takalela ndi u huma hawe ó laṱa nḓila mmbi yawe, a hanya.”—Hesekiele 33:11.

Tshivhidzo tsha Vhukriste ndi muṱa washu wa lwa muya. Musi muthu o bviswa tshivhidzoni, ha tsha vha tshipiḓa tsha wonoyo muṱa. Nga murahu ha u tshenzhela masiandoitwa awe a si avhuḓi, a nga ṱhogomela vhukhakhi hawe nahone a humbula nḓila ye a vha o takala ngayo musi a tshi kha ḓi vha na vhushaka havhuḓi na Yehova na tshivhidzo. Zwenezwi zwi nga mu ṱuṱuwedza uri a vhuyelele kha muṱa wawe wa lwa muya.

U itela u thusa muthu o bviswaho uri a vhuyelele tshivhidzoni, ni fanela u mu sumbedza lufuno nga u sa amba nae. Sa tsumbo, edzani u humbula vhaṋameli vhavhili vha thavha vho lindela u thuswa vhuriha. Ngauri hu khou rotholesa, muṅwe muṋameli u pfa o neta vhukuma nahone u ṱoḓa u eḓela. Fhedzi arali a eḓela henefho fhethu hu re na mahaḓa, u ḓo fa. U itela u mu thusa uri a dzule o fhaṱuwa, khonani yawe i nga mu rwa nga mupama. Naho zwenezwo zwi tshi vhavha, zwi nga mu tshidza. Davida o amba nga ha mavhonele a fanaho musi a tshi ri: “Muvhuya nga a nthwe nga vhuthu; nga a nkaidze zwawe.” (Psalme ya 141:5) Davida o ṱhogomela uri naho u kaidzwa zwi tshi vhavha, zwi ḓo mu thusa.

U fana na honoho u rwa khofheni, u bviswa tshivhidzoni ndi zwine muthu a zwi ṱoḓa u itela vhuyelela ha Yehova. Murwa wa Julian we a bulwa mathomoni a yeneyi thero, o shandula vhutshilo hawe nahone a humela tshivhidzoni nga murahu ha miṅwaha ya fumi o bviswa tshivhidzoni. Zwino ndi muhulwane. O ri: “U bviswa tshivhidzoni zwo ita uri ndi sedzane na masiandoitwa a matshilele anga. Ndo vha ndi tshi ṱoḓa u kaidzwa ho raloho.”—Vhaheberu 12:7-11.

Zwi a ṱungufhadza musi muṅwe muthu a tshi bviswa tshivhidzoni. Fhedzi a zwi ambi uri a nga si tsha dovha a humela ha Yehova. Ndi zwa ndeme uri roṱhe ri tendele ndayo i tshi shuma. Zwenezwo ri nga zwi itisa hani?

Vhahulwane vha lingedza u edzisa lufuno lwa Yehova tshifhinga tshoṱhe, zwihuluhulu musi vha tshi fanela u vhudza muthu uri ha tsha vha muṅwe wa Ṱhanzi dza Yehova. Vha ṱalutshedza nga vhuthu na nga nḓila i pfalaho zwine a fanela u zwi ita u itela u vhuyelela ha Yehova na u dovha a vha tshipiḓa tsha tshivhidzo. Arali muthu o bviswaho tshivhidzoni a  sumbedza uri u ṱoḓa u vhuyelela tshivhidzoni, vhahulwane vha nga mu dalela nga zwiṅwe zwifhinga u itela u mu humbudza zwine a fanela u zwi ita u itela u vhuyelela ha Yehova. *—Sedzani ṱhaluso i re magumoni a siaṱari.

Miraḓo ya muṱa i sumbedza uri i funa tshivhidzo na muthu o bviswaho tshivhidzoni nga u tikedza phetho yo dzhiiwaho nga vhahulwane. Julian o ṱalutshedza uri: “O vha a tshi kha ḓi vha murwa wanga, fhedzi matshilele awe o ita uri hu vhe na mukano vhukati hashu.”

Vhathu vhoṱhe tshivhidzoni vha sumbedza lufuno lwa vhukuma kha muthu o bviswaho tshivhidzoni nga u tikedza ndayo ye a ṋewa nga Yehova a tshi shumisa vhahulwane. Zwenezwi zwi amba uri a vho ngo tea u ṱwa nae kana naho hu u amba nae. (1 Vhakorinta 5:11; 2 Yohane 10, 11) Zwiṅwe hafhu, tshivhidzo tshi fanela u sumbedza lufuno lwo engedzeaho na u tikedza muṱa wa muthu o bviswaho tshivhidzoni. Tshenetshi ndi tshifhinga tshi konḓaho vhukuma kha muṱa. A ro ngo fanela u ita uri vha ḓipfe u nga a vha tsha vha tshipiḓa tsha tshivhidzo.—Vharoma 12:13, 15.

Julian o phetha nga uri: “U bviswa tshivhidzoni ndi ndugiselelo ine ra i ṱoḓa, ine ya nga ri thusa u tshila nga zwilinganyo zwa Yehova. Nga u ya ha tshifhinga, hu sa londwi vhuṱungu, zwi ḓisa mvelelo dzavhuḓi. Arali ndi vhe ndo tikedza vhuḓifari vhu si havhuḓi ha murwa wanga, o vha a tshi ḓo vha a songo vhuya a rembuluwa.”