MUSI Anita a tshi vha muṅwe wa Ṱhanzi dza Yehova, munna wawe o vha o sinyuwa vhukuma. * (Sedzani ṱhaluso i re magumoni a siaṱari.) O lingedza u mu thivhela uri a si ye miṱanganoni nahone a mu vhudza uri a songo tsha vhuya a amba dzina ḽa Mudzimu. Zwo vha zwi tshi mu sinyusa vhukuma musi a tshi pfa a tshi amba nga ha dzina Yehova.

Zwiṅwe hafhu, munna wa Anita o vha a sa ṱoḓi a tshi funza vhana vhavho nga ha Yehova kana u ṱuwa navho miṱanganoni. Zwenezwi zwo mu konḓela vhukuma ngauri o vha a tshi fanela u lingedza u thusa vhana vhavho musi munna wawe a sa zwi ḓivhi.

Samusi tshenzhelo ya Anita i tshi zwi sumbedza, muṅwe muṱani wa haṋu a nga lingedza u ni thivhela uri ni si shumele Yehova. Kana ni nga vha ni kha vhuṅwe vhuimo vhu konḓaho. Khamusi ndi kale ni tshi khou lwala. Khamusi ṅwana, munna kana mufumakadzi waṋu o fa. Kana khamusi muraḓo wa muṱa ane na mu funa o laṱa Yehova. Kha honoho vhuimo, ni nga ita mini uri ni dzule ni tshi fulufhedzea kha Yehova?

Muapostola Paulo o amba a ri: “Zwi a ṱoḓea uri ni konḓelele.” (Vhaheberu 10:36) Nga zwenezwo, ndi mini zwine zwa ḓo ni thusa u konḓelela?

Musi ni tshi pfa vhuṱungu, humbulani uri ni fanela u ḓitika nga Yehova uri a ni thuse u konḓelela. Rabelani uri a ni thuse. Ndi zwe Ana a zwi ita musi munna wawe a tshi fa a songo zwi lavhelela. Vho fhedza miṅwaha ya 30 vho vhingana. Ana o ri: “Ho ngo tsha swika hayani musi a tshi bva mushumoni. O vha e na miṅwaha ya 52 fhedzi.”

Mushumo wa Ana wo ita uri a dzule o farakanea, fhedzi a wo ngo ita uri a si tsha pfa vhuṱungu. O ita mini? O amba a ri: “Ndo vhudza Yehova zwi re mbiluni yanga nahone nda mu humbela uri a nthuse.” U a zwi ḓivha uri Yehova o mu thusa ngauri musi o no fhedza u rabela o vha a tshi pfa e na mulalo nahone o dzika. O ri: “A thi timatimi uri Yehova u ḓo vusa munna wanga.”—Vhafilipi 4:6, 7.

Yehova u fulufhedzisa vhashumeli vhawe uri u ḓo pfa thabelo dzavho. (Psalme ya 65:2) Nahone u ḓo vha ṋea zwoṱhe zwine vha zwi ṱoḓa u itela uri vha bvele phanḓa vha tshi mu shumela. Yehova u ḓo ni thusa uri ni fulufhedzee khae na kha zwiimo zwi konḓaho.

Hu na iṅwe nḓila ine Yehova a ri thusa ngayo u konḓelela. O ri ṋea vhahashu vha tshinnani na vha tshisadzini tshivhidzoni. Ri nga guda kha nḓila ye vhahashu vha ngei Thesalonika vha thusana ngayo musi vha tshi tovholwa lwa tshiṱuhu. Nga tshenetsho tshifhinga, vho vha vha tshi fanela u dzula vha tshi ṱuṱuwedzana vhukuma. (1 Vhathesalonika 2:14; 5:11) Vho thusa vhahavho vha tshinnani na vha tshisadzini uri vha dzule vha tshi fulufhedzea kha Yehova nga u ṱangana na u vha na vhukonani ha tsini. Ri nga ita mini uri ri dzule ri tshi fulufhedzea u fana na vhahashu vha ngei Thesalonika?

Ri fanela u vha na vhukonani ha tsini tshivhidzoni na u ṱuṱuwedzana, zwihuluhulu zwifhingani zwi konḓaho. (Vharoma 14:19) Muapostola Paulo o pfa vhuṱungu nga nṱhani ha u tovholwa na dziṅwe thaidzo, fhedzi Yehova o mu ṋea nungo dza u konḓelela. Sa tsumbo, Yehova o ṋea Paulo vhahashu vha tshinnani na vha tshisadzini uri vha mu ṱuṱuwedze. Muapostola o amba zwi tevhelaho nga ha khonani dzawe: “Vho nkhuthadza vhukuma.” (Vhakolosa 4:10, 11) Vhenevho vhahashu vho funa vhukuma Paulo. Nga zwenezwo, musi a tshi ṱoḓa thuso, vho mu khuthadza na u mu ṱuṱuwedza. Khamusi ni nga humbula nga ha zwifhinga zwa musi vhahashu vha tshinnani na vha tshisadzini tshivhidzoni tshaṋu vha tshi amba kana u ita zwithu zwine zwa ni ṱuṱuwedza.

Yehova o dovha a ni ṋea vhahulwane tshivhidzoni. Vhenevha vhanna vha nga ni ṱuṱuwedza na u ni ṋea nyeletshedzo yavhuḓi i bvaho Bivhilini. Vha fana na “vhu-khu-da-phepho, vhudzumbamo maḓumbuni, milambwana ya maḓi masogani, murunzi wa tombo ḽihulu shangoni ḽi fhisaho.” (Yesaya 32:2) Zwi a ri khuthadza u ḓivha uri vhenevho vhahashu vho ḓiimisela u ri thusa. Nga zwenezwo, musi vhuimo vhu tshi konḓa, humbelani thuso kha vhahulwane. Vha nga ni thusa uri ni dzule ni tshi shumela Yehova.

Ndi ngoho uri vhahulwane vha nga si kone u tandulula thaidzo dzaṋu dzoṱhe. Nahone a vho ngo fhelela u fana na inwi. (Mishumo 14:15) Fhedzi musi ni tshi ya kha muhulwane nahone a rabela Yehova nga ha thaidzo yaṋu ni nga ḓipfa ni khwine. (Yakobo 5:14, 15) Sa tsumbo, vhahulwane vho ṱuṱuwedza wahashu wa ngei Italy we a vha a tshi khou lwala vhukuma lwa miṅwaha minzhi. Nga zwenezwo, o ri: “Lufuno lwa vhahashu na u dzula vha tshi ndalela zwo nthusa u konḓelela.” Arali ni tshi khou pfa vhuṱungu, Yehova u ṱoḓa ni tshi humbela thuso kha vhahulwane.

Musi ri tshi livhisa ṱhogomelo kha u shumela Yehova, ri ḓo vhona nḓila ine Yehova a ri thusa ngayo. Ndi zwe zwa itwa nga John. Musi e na miṅwaha ya 39, o wana uri o farwa nga khentsara i songo ḓoweleaho. O pfa zwi sa pfali uri o vha a tshi khou lwalesa, zwihuluhulu ngauri u tshee muṱuku. Nahone o vha a tshi vhilaela nga ha mufumakadzi na murwa wawe we a vha e na miṅwaha miraru fhedzi. O amba uri: “Mufumakadzi wanga ho ngo ṱhogomela ṅwana washu muṱuku fhedzi, fhedzi o dovha a ṱhogomela na nṋe u katela na u nthusa u ya ha dokotela.” Nga nṱhani ha ngalafho, John o vha a tshi ḓipfa o neta vhukuma nahone o vha e na thaidzo dza dangani. Ho vha hu si zwenezwo fhedzi. John o pfa uri khotsi awe vha khou lwala vhukuma nahone vho vha vha tshi ṱoḓa muthu ane a ḓo vha ṱhogomela.

Ndi mini zwe zwa thusa John na muṱa wawe kha zwenezwo zwifhinga zwi konḓaho? Naho John o vha a tshi dzula o neta, o ita vhungoho ha uri muṱa wawe u dzula wo livhisa ṱhogomelo kha u shumela Yehova. O ri: “Naho zwo vha zwi tshi konḓa, ro ya miṱanganoni yoṱhe, ra ya vhuḓinḓani vhege iṅwe na iṅwe, nahone ra ita vhurabeli ha muṱa tshifhinga tshoṱhe.” John o guda nḓila ye zwa vha zwi zwa ndeme ngayo u ita uri vhushaka hawe na Yehova vhu dzule ho khwaṱha. Naho mathomoni o vha o tshuwa na u vhilaela, o ḓipfa o dzika nga u ṱavhanya. O vha a tshi zwi ḓivha uri Yehova u a mu funa na u mu ṋea nungo dzine a dzi ṱoḓa. Yehova a nga ni thusa nga nḓila i fanaho musi ni tshi vhilaela kana no tshuwa. John o ri: “Yehova a nga ni khwaṱhisa, samusi o zwi ita kha nṋe.”

Musi ni tshi khou pfa vhuṱungu, humbulani maipfi a Paulo ane a ri: “Zwi a ṱoḓea uri ni konḓelele.” Ḓitikeni nga Yehova nga u mu rabela. Dzulani na vhahashu tshivhidzoni, humbelani thuso kha vhahulwane nahone ni livhise ṱhogomelo kha u gwadamela Yehova. U ḓo ni thusa nga thaidzo dziṅwe na dziṅwe dzine na nga sedzana nadzo zwino kana vhuleme vhune ha nga vha hone tshifhingani tshi ḓaho.