Tshilani U Tendelana Na Thabelo Ya Tsumbo—Tshipiḓa II
“Khotsi aṋu u a ḓivha zwine na ṱoḓa.”—MATEO 6:8.
1-3. Ndi ngani muṅwe wahashu wa tshisadzini a tshi tenda uri Yehova o vha a tshi ḓivha zwine a zwi ṱoḓa?
LANA ane a vha muvulanḓila wa tshifhinga tsho ḓalaho, a nga si vhuye a hangwa zwe zwa itea musi a tshi dala ngei Dzheremane nga 2012. U tenda uri Yehova o fhindula thabelo dzawe mbili. Musi e tshidimelani tsha u ya vhukavhamabufho, o humbela Yehova uri a mu thuse u wana muthu ane a nga huwelela khae. Musi a tshi swika vhukavhamabufho, o wana uri bufho ḽe a vha a tshi khou fanela u ḽi ṋamela ḽo lenga nahone ḽi ḓo vha hone ḓuvha ḽi tevhelaho. Lana o humbela thuso kha Yehova ngauri o vha o no shumisa tshelede ye a vha e nayo nahone o vha a tshi ṱoḓa fhethu hune a ḓo eḓela hone honoho vhusiku.
2 Nga u ṱavhanya Lana o no fhedza u rabela, a pfa muṅwe muthu a tshi ri: “Ndaa Lana, ni khou ṱoḓa mini fhano?” Ho vha hu muṅwe muṱhannga we a dzhena nae tshikolo. O vha a tshi khou onesana na mme na makhulu wawe ngauri o vha a tshi khou ya Afurika Tshipembe. Musi Lana a tshi vha vhudza nga ha vhuimo hawe, mme a onoyo muṱhannga na makhulu wawe vho humbela u ṱuwa na Lana muḓini wavho. Vho mu vhudzisa nga ha lutendo lwawe na nga ha mushumo wawe wa vhuvulanḓila.
3 Nga ḓuvha ḽi tevhelaho nga murahu ha zwiḽiwa zwa nga matsheloni, Lana o fhindula mbudziso dzavho nnzhi nga ha Bivhili. Lana o humbela zwidodombedzwa zwavho uri a kone u humbela muṅwe muthu ane a nga bvela phanḓa a tshi fhindula mbudziso dzavho. Lana o humela hayani o tsireledzea nahone u kha ḓi bvela phanḓa na u vula nḓila. U tenda uri Yehova o pfa thabelo dzawe, o vha a tshi ḓivha zwine a zwi ṱoḓa nahone o mu thusa.—Psalme ya 65:2.
A ro ngo fanela u vhilaela nga ha zwishaiwa zwashu zwa vhumatshelo
4. Ndi mini zwine ra ḓo haseledza nga hazwo?
4 Musi ri na thaidzo, zwo leluwa u humbela Yehova thuso nga thabelo nahone u takalela u pfa thabelo dzashu. (Psalme ya 34:15; Mirero 15:8) Fhedzi thabelo ya Yesu ya tsumbo i ri funza uri hu na zwithu zwa ndeme vhukuma zwine ra fanela u rabela nga hazwo. Kha ino thero, ri ḓo haseledza nḓila ine khumbelo nṋa dza u fhedza dza thabelo ya tsumbo dza nga ri thusa ngayo u fulufhedzea kha Yehova.—Vhalani Mateo 6:11-13.
“U RI ṊEE TSHINKWA TSHASHU TSHA ḒUVHA ḼA ṊAMUSI”
5, 6. Ndi ngani Yesu o ri gudisa u humbela “tshinkwa tshashu” naho ri na zwiḽiwa zwinzhi?
5 Yesu o ri funza uri ri humbele “tshinkwa tshashu,” hu si “tshinkwa tshanga.” Victor ane a vha mulavhelesi wa ḽiisela ngei Afurika, o ṱalutshedza uri: “Kanzhi ndi livhuha Yehova zwi tshi bva mbiluni uri nṋe na mufumakadzi wanga a ri vhilaeli nga ho kalulaho nga ha hune ra ḓo wana hone zwiḽiwa zwa ḓuvha ḽi tevhelaho, kana nga ha uri ri ḓo badela nga mini rennde. Vhahashu vha a ri ṱhogomela nga vhuthu ḓuvha ḽiṅwe na ḽiṅwe. Fhedzi ndi rabela uri vhane vha ri thusa vha kone u konḓelela mitsiko ya ikonomi ine vha sedzana nayo.”
6 Ri nga vha ri na zwiḽiwa zwinzhi, fhedzi hu na vhahashu vhane vha shaya. Zwiṅwe hafhu, vhaṅwe vho ṱangana na khombo. A ri sokou vha rabelela fhedzi, fhedzi ri nga ita zwo engedzeaho u itela u vha thusa. Sa tsumbo, ri nga kovhelana navho zwine ra vha nazwo. Ri nga dovha ra dzula ri tshi ṋeela kha mushumo wa shango ḽoṱhe wa vhathu vha Yehova. Ri a zwi ḓivha uri miṋeelo yashu i thusa vhahashu vha shayaho.—1 Yohane 3:17.
7. Yesu o ri gudisa hani uri ri “songo vhilaela zwa matshelo”?
7 Musi Yesu o no gudisa thabelo ya tsumbo, o ri gudisa u sa livhisa ṱhogomelo kha zwithu zwi vhonalaho. O amba uri arali Yehova a tshi ṱhogomela maluvha a ḓaka, “inwi ha nga ni ambadzi u fhira zwenezwo zwimela, inwi vha re na lutendo luṱuku? Nga zwenezwo, ni songo vhuya na vhilaela na ri, . . . ‘Ri ḓo ambara’ni?’” A dovha a ri: “Ni songo vhilaela zwa matshelo.” (Mateo 6:30-34) A ro ngo fanela u vhilaela nga ha zwishaiwa zwashu zwa vhumatshelo. Nṱhani hazwo, ri fanela u fushea nga zwine ra vha nazwo ḓuvha ḽiṅwe na ḽiṅwe. Sa tsumbo, ri nga rabela uri ri wane vhudzulo, mushumo uri ri kone u ṱhogomela muṱa washu, na vhuṱali ha u dzhia phetho dzavhuḓi nga ha mutakalo washu. Fhedzi hu na zwithu zwa ndeme zwine ra fanela u rabela nga hazwo.
8. Maipfi a Yesu nga ha tshinkwa tsha ḓuvha ḽiṅwe na ḽiṅwe a ri humbudza mini? (Sedzani tshifanyiso tsha u thoma.)
8 Maipfi a Yesu nga ha tshinkwa tshashu tsha ḓuvha ḽiṅwe na ḽiṅwe a ri humbudza nga ha zwiṅwe zwithu zwe a zwi amba a ri: “Muthu ha tshili nga tshinkwa fhedzi, fhedzi u tshila na nga maipfi oṱhe a bvaho mulomoni wa Yehova.” (Mateo 4:4) Nga zwenezwo, ri fanela u rabela uri Yehova a dzule a tshi ri gudisa na u ri ṋea zwine ra zwi shaya u itela u dzula ri tsini nae.
“U RI HANGWELE MILANDU YASHU”
9. Ndi ngani zwivhi zwashu zwi tshi nga mulandu?
9 Yesu o ri: “U ri hangwele milandu yashu.” Kha tshiṅwe tshiitea, o ri: “U ri hangwele zwivhi zwashu.” (Mateo 6:12; Luka 11:4) O amba zwenezwi ngauri zwivhi zwashu zwi tou nga milandu. Nga 1951, Tshiingamo (nga Luisimane) tsho ṱalutshedza uri musi ri tshi ita tshivhi, zwi tou nga ri na mulandu kha Yehova. Ri fanela u funa Yehova na u mu thetshelesa. Nga zwenezwo, musi ri tshi khakhela Mudzimu, a ri khou mu ṋea zwo faneleaho. Tshiingamo tsho amba uri arali Yehova o vha a tshi ṱoḓa, o vha a tshi nga fhelisa vhukonani hashu nae. Tsho dovha tsha ri: “U ita tshivhi a si u funa Mudzimu.”—1 Yohane 5:3.
Ri fanela u dzula ri tshi livhuha Yehova nge a ri ṋea tshenetshi tshifhiwa tshavhuḓi tsha tshirengululi
10. Ndi ngani Yehova a tshi ri hangwela zwivhi zwashu, nahone ri fanela u ḓipfa hani nga ha zwenezwo?
10 Ri livhuha lungafhani uri Yehova o ri ṋea Yesu sa tshiṱhavhelo tshi rengululaho uri ri hangwelwe zwivhi! Ri ṱoḓa u hangwelwa nga Yehova ḓuvha ḽiṅwe na ḽiṅwe. Yesu o ri fela miṅwahani i ṱoḓaho u vha 2 000 yo fhiraho, naho zwo ralo, ri kha ḓi vhuyelwa nga tshirengululi ṋamusi. Ri fanela u dzula ri tshi livhuha Yehova nge a ri ṋea tshenetshi tshifhiwa tshavhuḓi. A hu na na muthihi washu we a vha a tshi nga kona u badela tshirengululi tshe tsha vha tshi tshi ṱoḓeaho uri a ri vhofholole kha tshivhi na lufu. (Vhalani Psalme ya 49:7-9; 1 Petro 1:18, 19.) Maipfi ane a vha kha thabelo ya tsumbo ane a ri “u ri hangwele zwivhi zwashu” a ri humbudza uri vhahashu vha tshinnani na vha tshisadzini vha a ṱoḓa tshirengululi samusi na riṋe ri tshi tshi ṱoḓa. Yehova u ṱoḓa ri tshi dovha ra humbula nga havho na nga vhushaka havho nae. Zwenezwi zwi katela u ṱavhanya u vha hangwela musi vha tshi ri khakhela. Kanzhi hu vha hu vhukhakhi vhuṱuku, fhedzi musi ri tshi hangwela vhahashu ri sumbedza uri ri a vha funa. Ri dovha ra sumbedza uri ri a livhuha uri Yehova u a ri hangwela.—Vhakolosa 3:13.
11. Ndi ngani zwi zwa ndeme u hangwela vhaṅwe?
11 Nga zwiṅwe zwifhinga, zwi nga ri konḓela u hangwela vhe vha ri khakhela ngauri a ro ngo fhelela. (Levitiko 19:18) Arali ra thoma u amba nga ha zwe ra khakhelwa ngazwo, vhaṅwe tshivhidzoni vha nga dzhenelela nahone zwenezwo zwi nga thithisa vhuthihi tshivhidzoni. Arali ra tendela zwenezwi zwi tshi bvela phanḓa, zwi ḓo sumbedza uri a ri dzhieli nṱha tshifhiwa tsha Mudzimu tsha tshirengululi nahone ri nga si vhuyelwe ngatsho. (Mateo 18:35) Musi ri sa hangweli vhaṅwe, na Yehova ha nga ri hangweli. (Vhalani Mateo 6:14, 15.) Zwiṅwe hafhu, arali ri tshi ṱoḓa Yehova a tshi ri hangwela, a ro ngo fanela u bvela phanḓa ri tshi ita zwithu zwine a zwi vhenga.—1 Yohane 3:4, 6.
Arali ni tshi ṱoḓa u hangwelwa nga Mudzimu, ni fanela u hangwela vhaṅwe (Sedzani phara 11)
“U SI RI ISE MULINGONI”
12, 13. (a) Ho itea mini kha Yesu musi o no lovhedzwa? (b) Ndi ngani ri songo fanela u pomoka vhaṅwe arali ra dzhena mulingoni? (c) Yesu o sumbedza mini nga u dzula a tshi fulufhedzea u swika a tshi fa?
12 Maipfi a thabelo ya tsumbo ane a ri “u si ri ise mulingoni” a ri humbudza zwe zwa itea kha Yesu nga u ṱavhanya musi a tshi lovhedzwa. Muya wa Mudzimu wo mu livhisa sogani “uri a lingwe nga Diabolo.” (Mateo 4:1; 6:13) Ndi ngani Yehova o tendela zwenezwi zwi tshi itea? Yehova o rumela Yesu kha ḽifhasi uri a tandulule mafhungo e a thoma musi Adamu na Eva vha tshi landula vhuvhusi ha Yehova. Vhushandukwa havho ho ita uri hu vhudziswe mbudziso dzine dza ṱoḓa tshifhinga uri dzi fhindulwe. Sa tsumbo, naa ho vha hu na zwithu zwo khakheaho kha nḓila ye Yehova a sika ngayo vhathu? Naa muthu a songo fhelelaho a nga dzula a tshi fulufhedzea kha Yehova musi a tshi lingwa nga “muvhi”? Nahone naa zwi ḓo vha khwine uri vhathu vha ḓivhuse? (Genesi 3:4, 5) Tshifhingani tshi ḓaho, musi Yehova o no fushea uri dzenedzo mbudziso dzoṱhe dzo fhindulea, vhathu vhoṱhe ṱaḓulu na kha ḽifhasi vha ḓo ḓivha uri nḓila ya Yehova ya u vhusa ndi yone ya khwine.
Ri nga fulufhedzea kha Yehova naho ro sedzana na zwiimo zwi konḓaho vhukuma
13 Yehova ndi mukhethwa, nga zwenezwo, ha lingi vhathu nga vhuvhi. Ndi Sathane ane a vha “Mulingi.” (Mateo 4:3) Sathane u lingedza u ri linga nga nḓila nnzhi. Fhedzi ri a kona u ḓikhethela. Muṅwe na muṅwe washu a nga dzhia phetho ya u iledza milingo kana u sa i iledza. (Vhalani Yakobo 1:13-15.) Musi Yesu a tshi lingwa nga Sathane, o ṱavhanya a mu landula nga u redza Ipfi ḽa Mudzimu. Yesu o vha a tshi fulufhedzea kha Mudzimu. Naho zwo ralo, Sathane ho ngo laṱela thaula. O lindela “tshiṅwe tshifhinga tsho teaho” tsha u linga Yesu. (Luka 4:13) Fhedzi hu sa londwi zwe zwa itwa nga Sathane, Yesu o thetshelesa Mudzimu sa Muvhusi wawe. O sumbedza uri muthu o fhelelaho a nga fulufhedzea kha Yehova naho o sedzana na zwiimo zwi konḓaho vhukuma. Naho zwo ralo, Sathane u lingedza u linga vhatevheli vha Yesu, u katela na inwi uri ni si thetshelese Yehova.
Yehova u fulufhela uri ri ḓo fulufhedzea khae nahone u ṱoḓa u ri thusa
14. Ri fanela u ita mini u itela u lwisana na mulingo?
14 Mbudziso dzo vhudziswaho nga ha vhuvhusi ha Yehova dzi kha ḓi fanela u fhindulwa. Nga zwenezwo, zwazwino Yehova o tendela Sathane a tshi ri linga. Yehova ha ri ‘isi mulingoni.’ Zwi re zwone ndi uri u fulufhela uri ri ḓo fulufhedzea khae nahone u ṱoḓa u ri thusa. Fhedzi ha vhuyi a ri kombetshedza u ita zwo lugaho. U a ṱhonifha mbofholowo yashu ya u ḓikhethela. Nga zwenezwo, u ri tendela uri ri ḓidzhiele phetho ya uri ri ḓo fulufhedzea kana hai. U iledza uri ri si dzhene mulingoni, ri fanela u ita zwithu zwivhili: dzulani tsini na Yehova nahone ni dzule ni tshi humbela thuso yawe nga thabelo. Yehova u fhindula hani thabelo dzashu dza u lwisana na mulingo?
Dzulani tsini na Yehova nahone ni fhisetshele vhuḓinḓa (Sedzani phara 15)
15, 16. (a) Ndi ifhio miṅwe milingo ine ra nga lwisana nayo? (b) Ndi nnyi ane a fanela u pomokwa musi ri tshi wela mulingoni?
15 Yehova u ri ṋea maanḓa a muya wawe mukhethwa u itela u ri thusa u lwisana na milingo ya Sathane. Yehova o dovha a ri ṋea Bivhili na tshivhidzo u itela u ri sevha kha khombo. Sa tsumbo, u ri sevha uri ri si shumise tshifhinga tshashu tshinzhi, tshelede na nungo dzashu kha zwithu zwine ri si zwi ṱoḓe. Espen na Janne vha dzula shangoni ḽo pfumaho ḽa ngei Yuropa. Lwa miṅwaha minzhi, vho vha vhe vhavulanḓila vha tshifhinga tsho ḓalaho shangoni ḽe ḽa vha ḽi na ṱhoḓea ya vhahuweleli. Musi vha tshi vha na ṅwana, vho kombetshedzea u litsha u vula nḓila nahone zwino vha na vhana vhavhili. Espen o ri: “Kanzhi ri rabela Yehova uri ri si wele mulingoni samusi zwino ri si tsha kona u fhedza tshifhinga kha mishumo ya lwa ṱaḓulu u fana na tshifhingani tsho fhiraho. Ri humbela Yehova uri a ri thuse uri ri dzule ri vhathu vha muya na u fhisea vhuḓinḓani.”
16 Muṅwe mulingo une ra fanela u lwisana nawo ndi u iledza u sedza zwifanyiso zwi karusaho maḓipfele a zwa vhudzekani. Arali ra wela kha wonoyu mulingo, ri nga si pomoke Sathane. Ndi ngani? Ngauri Sathane na shango ḽawe a vha koni u ri kombetshedza u ita zwithu zwo khakheaho. Vhaṅwe vha ṱalela zwifanyiso zwi karusaho maḓipfele a zwa vhudzekani ngauri a vha iledzi mihumbulo yo khakheaho. Fhedzi vhunzhi ha vhahashu vha tshinnani na vha tshisadzini vho iledza wonoyu mulingo nahone na riṋe ri nga zwi kona.—1 Vhakorinta 10:12, 13.
“U RI PHULUSE KHA MUVHI”
17. (a) Ri nga sumbedza hani uri ri ṱoḓa Yehova a tshi ri ‘phulusa kha muvhi’? (b) Ndi mini zwine zwa ḓo itea hu si kale?
17 Ri nga sumbedza hani uri ri ṱoḓa Yehova a tshi ri ‘phulusa kha muvhi’? A ro ngo fanela u vha “tshipiḓa tsha shango” na u “funa shango kana zwithu zwi re khaḽo.” (Yohane 15:19; 1 Yohane 2:15-17) Zwi ḓo vha zwavhuḓi vhukuma musi Yehova a tshi fhelisa Sathane na ḽino shango ḽivhi! Fhedzi u swikela zwenezwo, ri fanela u humbula uri Sathane u na “mbiti khulu, a tshi ḓivha uri o salelwa nga tshifhinga tshiṱuku.” U ḓo ita zwoṱhe zwine a nga kona u itela u ri kaṱudza kha u shumela Yehova. Nga zwenezwo, ri fanela u dzula ri tshi rabela Yehova uri a ri tsireledze kha Sathane.—Nzumbululo 12:12, 17.
18. Arali ri tshi ṱoḓa u ponyoka vhufhelo ha shango ḽa Sathane, ri fanela u ita mini?
18 Naa ni a ṱoḓa u tshila shangoni ḽi si na Sathane? Nga zwenezwo, dzulani ni tshi rabela uri Muvhuso wa Mudzimu u ḓe, uri dzina ḽa Mudzimu ḽi itwe ḽikhethwa na uri zwine a zwi funa zwi itwe kha ḽifhasi. Dzulani ni tshi ḓitika nga Yehova uri a ni ṱhogomele na uri a ni ṋee zwoṱhe zwine na zwi ṱoḓa u itela uri ni dzule ni tshi fulufhedzea khae. Vhukuma, itani zwoṱhe zwine na nga kona u itela u tshila u tendelana na thabelo ya tsumbo.
