Kristo—Maanḓa A Mudzimu
“Kristo ndi maanḓa a Mudzimu.”—1 VHAKORINTA 1:24.
1. Ndi ngani Paulo o amba uri “Kristo ndi maanḓa a Mudzimu”?
YEHOVA o sumbedza maanḓa awe a tshi shumisa Yesu Kristo nga nḓila i akhamadzaho vhukuma. Musi Yesu e kha ḽifhasi, o ita vhuṱolo. Ri nga vhala nga ha vhuṅwe haho Bivhilini, nahone vhu nga khwaṱhisa lutendo lwashu. (Mateo 9:35; Luka 9:11) Vhukuma, Yehova o ṋea Yesu maanḓa mahulwane, nga zwenezwo, muapostola Paulo o amba a ri: “Kristo ndi maanḓa a Mudzimu.” (1 Vhakorinta 1:24) Fhedzi vhuṱolo ha Yesu vhu ri kwama hani?
2. Ri nga guda mini kha vhuṱolo ha Yesu?
2 Muapostola Petro o amba uri Yesu o ita “vhuṱolo.” (Mishumo 2:22) Honoho vhuṱolo vhu ri funza mini? Vhu ri funza nga ha zwine Yesu a ḓo zwi ita Miṅwahani Ya Tshigidi Ya U Vhusa hawe. Nga tshenetsho tshifhinga, u ḓo ita vhuṱolo vhuhulwane vhune ha ḓo vhuyedza vhathu vhoṱhe kha ḽifhasi. Vhuṱolo hawe vhu dovha ha ri thusa uri ri pfesese zwinzhi nga ha pfaneleo dzawe na dza Khotsi awe. Kha ino thero, ri ḓo haseledza vhuṱolo vhuraru ha Yesu nahone ri ḓo guda nḓila ine ha nga ri kwama ngayo ṋamusi na tshifhingani tshi ḓaho.
VHUṰOLO VHUNE HA GUDISA MAFUNDA
3. (a) Ndi ngani Yesu o ita vhuṱolo hawe ha u thoma? (b) Yesu o sumbedza hani mafunda ngei Kana?
3 Yesu o ita vhuṱolo hawe ha u thoma munyanyani ḓoroboni ya ngei Kana. A ri ḓivhi uri ndi ngani, fhedzi ho vha hu si na waini yo eḓanaho vhaeni vhoṱhe vhe vha ḓa. Zwenezwi zwo vha zwi tshi ḓo shonisa vhukuma vhavhingani vhaswa, ngauri ho vha hu vhuḓifhinduleli havho ha u ṱanganedza vhaeni. Maria mme a Yesu, o vha e muṅwe wa vhaeni. Naa o humbela Yesu uri a thuse ngauri o vha a tshi tenda uri o vha e na maanḓa a u ita nga u ralo? Maria a nga vha o elekanya nga ha vhuporofita hoṱhe vhu ambaho nga ha murwa wawe, nahone o vha a tshi zwi ḓivha uri u ḓo vhidzwa “Murwa wa Wa-Ṱaḓulu-ṱaḓulu.” (Luka 1:30-32; 2:52) Zwi tou vha khagala uri Maria na Yesu vho vha vha tshi ṱoḓa u thusa vhavhingani. Nga zwenezwo, Yesu o shandukisa nga vhuṱolo ḽithara dza 380 dza maḓi dza vha “waini yavhuḓi.” (Vhalani Yohane 2:3, 6-11.) Naa Yesu o vha a tshi fanela u ita honoho vhuṱolo? Hai. O vhu ita ngauri u a funa vhathu nahone o vha a tshi ṱoḓa u edzisa Khotsi awe, ane a vha na mafunda.
Yesu o amba uri ri fanela u ‘ḓiḓowedza u ṋea’
4, 5. (a) Vhuṱolo ha Yesu ha u thoma vhu ri gudisa mini? (b) Vhuṱolo ha ngei Kana vhu ri gudisa mini nga ha vhumatshelo?
4 Yesu o ita waini nnzhi yavhuḓi nga lwa vhuṱolo, ine ya eḓana tshivhalo tshihulwane tsha vhathu. Naa ni a pfesesa zwine honoho vhuṱolo ha ri funza zwone? Vhu ri funza uri Yehova na Yesu a vha na tseḓa, fhedzi vha na mafunda vhukuma. Honovhu vhuṱolo vhu ri khwaṱhisedza uri vha na ndavha vhukuma na nḓila ine vhathu vha ḓipfa ngayo. Vhu dovha ha sumbedza uri Yehova u ḓo shumisa maanḓa awe u ita uri hu vhe na zwiḽiwa zwinzhi shangoni ḽiswa, hu sa londwi hune ra dzula hone kha ḽifhasi.—Vhalani Yesaya 25:6.
5 Humbulani! Hu si kale, Yehova u ḓo ri ṋea zwoṱhe zwine ra zwi shaya vhukuma. Muthu muṅwe na muṅwe u ḓo vha na haya na zwiḽiwa zwavhuḓi. Ri livhuha vhukuma musi ri tshi humbula nga ha zwithu zwoṱhe zwavhuḓi zwine Yehova a ḓo ri ṋea zwone nga mafunda ḽifhasini ḽa Paradiso.
Ri edzisa Yesu musi ri tshi ṋea vhaṅwe tshifhinga tshashu (Sedzani phara 6)
6. Yesu o vha a tshi shumisa hani maanḓa awe tshifhinga tshoṱhe, nahone ri nga mu edzisa hani?
6 Yesu ho ngo vhuya a shumisa maanḓa awe nga zwiitisi zwa tseḓa. Humbulani nga ha zwe zwa itea musi Diabolo a tshi linga Yesu uri a shandukise matombo a vhe tshinkwa. Yesu o hana u shumisa maanḓa awe u itela u ḓivhuyedza. (Mateo 4:2-4) Fhedzi Yesu o vha o ḓiimisela u shumisa maanḓa awe u thusa vhaṅwe. Ri nga edzisa hani mavhonele awe a si a tseḓa? Yesu o amba uri ri fanela u ‘ḓiḓowedza u ṋea.’ (Luka 6:38) Ri nga ita zwenezwo nga u ramba vhaṅwe zwiḽiwani mahayani ashu. Ri nga dovha ra fhedza tshifhinga nga murahu ha miṱangano ri tshi khou thusa muthu, nga u thetshelesa wahashu a tshi khou ita nḓowe-nḓowe ya nyambo yawe. Kana ri nga kona u thusa na u gudisa vhaṅwe vhuḓinḓani. Ri vha ri tshi khou edzisa mafunda a Yesu musi ri tshi thusa vhaṅwe nga u ḓiimisela nga hune ra nga kona ngaho.
“VHOṰHE VHA ḼA VHA FURA”
7. Ndi ifhio thaidzo ine ya ḓo dzula i hone shangoni ḽa Sathane?
7 Ndi kale vhushai vhu hone. Yehova o vhudza Vhaisiraele uri “vhatshinyali vha ḓo ḓi vha hone fhano shangoni.” (Doiteronomio 15:11) Maḓanani a miṅwaha o fhiraho, Yesu o amba a ri: “Vhashai ni ḓo dzula ni navho.” (Mateo 26:11) Naa Yesu o vha a tshi khou amba uri hu ḓo dzula hu na vhashai ḽifhasini? Hai, o vha a tshi khou amba uri hu ḓo dzula hu na vhushai samusi ri tshi kha ḓi tshila shangoni ḽa Sathane. Zwi ḓo vha zwo fhambana vhukuma shangoni ḽiswa! Nga tshenetsho tshifhinga, hu ḓo vha hu si na vhushai. Roṱhe ri ḓo vha na zwiḽiwa zwinzhi nahone ri ḓo fushea!
8, 9. (a) Ndi ngani Yesu o kanzwa vhathu vha zwigidi? (b) Ni ḓipfa hani nga honovhu vhuṱolo?
8 Mupsalme o amba nga ha Yehova a ri: “U putulula tshanḓa tshau, huno zwoṱhe zwi tshilaho U zwi fusha dakalo.” (Psalme ya 145:16) Musi Yesu a tshi kha ḓi vha kha ḽifhasi, o edzisa Khotsi awe nga ho fhelelaho nahone kanzhi o vha a tshi ṱhogomela ṱhoḓea dza vhaṅwe. Ho ngo ita zwenezwi u itela u sumbedza uri u na maanḓa. Yesu o vha a tshi ṱhogomela vhathu zwa vhukuma. Kha ri haseledze Mateo 14:14-21. (Vhalani.) Gogo ḽo tevhela Yesu nga milenzhe u bva miḓini. (Mateo 14:13) Nga madekwana, vhafunziwa vho vha vha tshi khou vhilaela uri vhathu a vha tsheena nungo nahone vha na nḓala. Nga zwenezwo, vho humbela Yesu uri a vhudze gogo uri ḽi ye u ḓirengela zwiḽiwa. Yesu o vha a tshi ḓo ita mini?
9 Yesu o kanzwa vhanna vha ṱoḓaho u vha 5000, u katela na vhafumakadzi na vhana nga zwinkwa zwiṱanu na khovhe mbili. Ndi ngani Yesu o ita honovhu vhuṱolo? Ngauri u a funa vhathu zwi tshi bva mbiluni nahone u na ndavha navho. Nahone Yesu a nga vha o vha ṋea zwiḽiwa zwinzhi, ngauri gogo ḽo ‘ḽa ḽa fura.’ Zwiḽiwa zwe vha ḽa zwo vha zwi tshi ḓo vha ṋea nungo dze vha vha vha tshi dzi ṱoḓa u itela uri vha fare lwendo lulapfu lwa u humela hayani. (Luka 9:10-17) Musi vhoṱhe vho no fura, vhafunziwa vho ḓadza zwirundu zwa 12 nga matshakatshaka o salaho!
10. Hu ḓo itea mini kha vhushai tshifhingani tshi ḓaho?
10 Vhathu vhanzhi vha a shaya nga nṱhani ha vhupangwa na vhutshinyi ha vhavhusi. Na vhaṅwe vhahashu a vha na zwiḽiwa zwo eḓanaho. Fhedzi hu si kale, vhathu vha thetshelesaho Yehova vha ḓo tshila kha shango ḽi si na vhutshinyi na vhushai. Yehova ndi Mudzimu ramaanḓaoṱhe, nahone u na maanḓa na lutamo lwa u ita vhungoho ha uri a fushe zwishaiwa zwa muṅwe na muṅwe. U fulufhedzisa u fhelisa tshengelo yoṱhe hu si kale!—Vhalani Psalme ya 72:16.
Vhuṱolo ha Yesu vhu ri khwaṱhisedza uri u ṱoḓa u shumisa maanḓa awe a tshi itela u ri vhuyedza
11. Ndi ngani ni na vhungoho ha uri hu si kale Kristo u ḓo shumisa maanḓa awe ḽifhasini ḽoṱhe, nahone mafheleloni ni ṱoḓa u ita mini?
11 Musi Yesu e kha ḽifhasi, o ita vhuṱolo fhethu huṱuku lwa miṅwaha miraru na hafu fhedzi. (Mateo 15:24) Fhedzi sa Khosi, Yesu u ḓo thusa vhathu vhoṱhe tshifhingani tsha Miṅwahani Ya Tshigidi Ya U Vhusa hawe. (Psalme ya 72:8) Vhuṱolo ha Yesu vhu ri khwaṱhisedza uri u ṱoḓa u shumisa maanḓa awe a tshi itela u ri vhuyedza. A ri na maanḓa a u ita vhuṱolo, fhedzi ri nga ita mini? Ri nga shumisa tshifhinga na nungo dzashu u vhudza vhaṅwe nga ha vhumatshelo havhuḓi vhune Bivhili ya vhu fulufhedzisa. Honoho ndi vhuḓifhinduleli hashu sa Ṱhanzi dza Yehova. (Vharoma 1:14, 15) Musi ri tshi elekanya nga ha zwine Kristo a ḓo zwi ita hu si kale, ri ḓo ḓiimisela u vhudza vhaṅwe nga hazwo.—Psalme ya 45:1; 49:3.
YEHOVA NA YESU VHA LANGA MAANḒA A MUPO
12. Ndi ngani ri tshi nga vha na vhungoho ha uri Yesu u a pfesesa mupo wa ḽifhasi?
12 Musi Mudzimu a tshi sika ḽifhasi na zwoṱhe zwine zwa vha khaḽo, Yesu o vha e ‘nae e muḓinḓa wawe.’ (Mirero 8:22, 30, 31; Vhakolosa 1:15-17) Nga zwenezwo, Yesu u a pfesesa nga ho fhelelaho mupo wa ḽifhasi. U a ḓivha nḓila ya u shumisa na u langa zwithu zwoṱhe zwa mupo.
Ndi mini zwine zwa ni takadza nga nḓila ye Yesu a shumisa ngayo maanḓa awe a vhuṱolo? (Sedzani dziphara 13, 14)
13, 14. Ṋeani tsumbo ya nḓila ine Kristo a nga langa ngayo maanḓa a mupo.
13 Musi Yesu e kha ḽifhasi, o sumbedza uri u na maanḓa a Mudzimu nga u langa maanḓa a mupo. Humbulani nga ha tsumbo ya nḓila ye Yesu a langa ngayo ḓumbu. (Vhalani Marko 4:37-39.) Muṅwe mugudi wa Bivhili o ṱalutshedza uri ipfi ḽa Lugerika ḽine ḽa ri “ḓumbu ḽihulu” ḽi re kha bugu ya Marko ḽi shumiswa u ṱalusa ḓumbu ḽi re na maanḓa kana ḓumbumazwikule. Ḽi ambela kha ḓumbu ḽine ḽa ḓa na gole ḽitswu, muya muhulu, mibvumo na mvula ya mukumbela. Musi zwo no fhela, zwoṱhe zwi a tshinyala. Muapostola Mateo o ṱalusa ḽeneḽi ḓumbu sa “ḓumbu ḽihulu.”—Mateo 8:24.
14 Edzani u humbula tshiitea tshi tevhelaho: Magabelo a tshi khou rwa tshikepe, a tshi dzhenisa maḓi khatsho lunzhi-lunzhi. Hu sa londwi phosho ya ḓumbu na tshikepe tshi no khou ya ngei na ngei, Yesu o vha o eḓela ngauri o vha o neta. Fhedzi vhafunziwa vho vha vho dzhenwa nga nyofho, nga zwenezwo, vha vusa Yesu nahone vha ri: “Ri khou fa!” (Mateo 8:25) Yesu o aravha hani? A vuwa a amba na ḓumbu na lwanzhe a ri: “Fhumula u ri tshete!” (Marko 4:39) Ḓumbu ḽi ofhisaho ḽa fhumula nahone “ha vha na u dzika huhulu.” Ndi tsumbo yavhuḓi lungafhani ya maanḓa a Yesu a u langa mupo!
15. Yehova o sumbedza hani uri u a kona u langa maanḓa a mupo?
15 Maanḓa a Kristo a bva kha Yehova, nga zwenezwo, ri a zwi ḓivha uri Mudzimu Ramaanḓaoṱhe a nga kona u langa maanḓa a mupo. Sa tsumbo, musi Maḓi Mahulu a sa athu u thoma, Yehova o ri: “Hu tshee hó sala maḓuvha maṱanu-na-mavhili ndi hone fhano shangoni ndi tshi ḓo nisa mvula ya maḓuvha a mahumi maṋa na vhusiku hao.” (Genesi 7:4) Zwiṅwe hafhu, kha luṅwalo lwa Ekisodo 14:21 ri vhala uri: “Yehova a ṱuwisa maḓi a lwanzhe nga muya u bvaho Vhubvaḓuvha.” Nahone kha Yona 1:4 ri vhala uri: “Yehova a mbo vusa muya muhulu lwanzheni, ḽa mbo vha ḓumbu ḽihulu kha lwanzhe, gungwa ḽa vhó ṱoḓa u pwashea.” Ndi zwavhuḓi vhukuma u ḓivha uri shangoni ḽiswa, Yehova u ḓo dzula a tshi langa zwithu zwoṱhe.
16. Ndi ngani zwi tshi khuthadza u ḓivha uri Yehova na Yesu vha na maanḓa a u langa maanḓa a mupo?
16 Zwi a khuthadza u ḓivha uri Yehova na Yesu vha na maanḓa a u langa mupo. Tshifhingani tsha Miṅwaha Ya Tshigidi Ya U Vhusa ha Kristo, muṅwe na muṅwe ane a khou tshila kha ḽifhasi u ḓo vha o tsireledzea. A hu na ane a ḓo huvhadzwa kana u vhulahwa nga khombo dza mupo dzi nga ho ḓumbumazwikule, tsunami, thavhandubi kana midzinginyo. Ri nga si ofhe khombo iṅwe na iṅwe ngauri “nnḓu ya mulanga ya Mudzimu” i ḓo vha i vhukati ha vhathu! (Nzumbululo 21:3, 4) Ri nga vha na vhungoho ha uri Yehova u ḓo ṋea Yesu maanḓa a u langa maanḓa a mupo tshifhingani tsha Miṅwaha Ya Tshigidi Ya U Vhusa hawe.
EDZISANI MUDZIMU NA KRISTO ZWINO
17. Ndi ifhio nḓila nthihi ine ra nga edzisa ngayo Mudzimu na Kristo zwino?
17 Vhukuma, ri nga si kone u thivhela khombo dza mupo. Ndi Yehova na Yesu fhedzi vhane vha nga kona u ita zwenezwo. Fhedzi hu na zwine ra nga ita. Ri nga shumisa zwo ṅwalwaho kha Mirero 3:27. (Vhalani.) Musi vhahashu vha tshi shengela, ri nga thusa nga u ṱhogomela zwishaiwa zwavho zwa lwa ṋama na zwa lwa muya nahone ri nga vha khuthadza. (Mirero 17:17) Sa tsumbo, ri nga vha thusa musi ho itea khombo dza mupo. Iṅwe tshilikadzi ye haya hayo ha tshinyadzwa nga ḓumbumazwikule, yo ri: “Ndi a livhuha zwi tshi bva mbiluni u vha ndanguloni ya Yehova, hu si u thuswa nga lwa ṋama fhedzi, fhedzi na u thuswa na nga lwa muya.” Muṅwe wahashu wa tshisadzini a siho mbinganoni o pfa a si na fulufhelo musi haya hawe hu tshi tshinyadzwa nga ḓumbu. Musi vhahashu vho no mu thusa u i vusulusa, o ri: “A zwi ṱalutshedzei! A thi koni u sumbedza nḓila ine nda ḓipfa ngayo nga ho fhelelaho.” O dovha a ri: “Ndi a livhuha Yehova!” Ri a livhuha uri vhahashu vha tshinnani na vha tshisadzini vha na ndavha vhukuma na zwishaiwa zwa vhaṅwe. Zwi fhiraho zwenezwo, ri a livhuha uri Yehova na Yesu Kristo vha na ndavha na riṋe.
18. Ndi mini zwine zwa ni takadza nga ha tshiitisi tshe tsha ita uri Yesu a ite vhuṱolo?
18 Tshifhingani tsha vhuḓinḓa hawe, Yesu o sumbedza uri u “maanḓa a Mudzimu.” Fhedzi ho ngo vhuya a shumisa maanḓa awe u itela u takadza vhaṅwe kana u ḓivhuyedza. Nṱhani hazwo, Yesu o shumisa maanḓa awe u ita vhuṱolo ngauri u funa vhathu zwi tshi bva mbiluni. Ri ḓo guda zwo engedzeaho nga ha zwenezwo kha thero i tevhelaho.
