1, 2. (a) Tshifhingani tsho fhiraho, vhashumeli vha Yehova vho vha vha tshi mu gwadamela ngafhi? (b) Yesu o vha a tshi ḓipfa hani nga ha thembele ya Yehova ngei Yerusalema? (c) Ri ḓo haseledza mini kha ino thero?

VHASHUMELI vha Mudzimu vha tshifhingani tsho fhiraho na musalauno, vho dzula vhe na fhethu hune vha gwadamela hone Mudzimu. Sa tsumbo, musi Abele a tshi ṋekedzela tshiṱhavhelo kha Yehova, a nga vha o fhaṱa aletare. (Genesi 4:3, 4) Noaxe, Abrahamu, Yakobo na Mushe, vhoṱhe vho fhaṱa aletare. (Genesi 8:20; 12:7; 26:25; 35:1; Ekisodo 17:15) Yehova o vhudza Vhaisiraele uri vha fhaṱe nnḓu ya mulanga. (Ekisodo 25:8) Nga murahu, o vha laedza uri vha fhaṱe thembele. (1 Dzikhosi 8:27, 29) Musi vhathu vha Mudzimu vha tshi bva vhuthubwani ngei Babele, kanzhi vho vha vha tshi ṱangana dzisinagogoni. (Marko 6:2; Yohane 18:20; Mishumo 15:21) Nahone Vhakriste vha u thoma vho vha vha tshi ṱanganela nḓuni dzavho. (Mishumo 12:12; 1 Vhakorinta 16:19) Musalauno, vhathu vha Yehova u mona na shango ḽoṱhe, vha ṱangana Holoni dza Muvhuso nnzhi hune vha guda nga ha Yehova na u mu gwadamela.

² Yesu o vha a tshi ṱhonifha vhukuma thembele ya Yehova ngei Yerusalema. U funa ha Yesu thembele zwo humbudza vhafunziwa vhawe maipfi a mupsalme ane a ri: “Ngauri ndo ḽiwa nga vhuhali ndi tshi lwela nnḓu yau.” (Psalme ya 69:9; Yohane 2:17) Holo ya Muvhuso a si “nnḓu ya Yehova” nga nḓila i fanaho na ye  thembele ya Yerusalema ya vha i ngayo. (2 Koronika 5:13; 33:4) Fhedzi ri fanela u ṱhonifha vhukuma fhethu hashu ha vhurabeli. Kha ino thero, ri ḓo haseledza maitele a Bivhili ane a ri gudisa nga ha nḓila ine ra fanela u ḓifara ngayo musi ri Holoni dzashu dza Muvhuso, nḓila ine ra fanela u dzi ṱhogomela ngayo na nḓila ine ra nga thusa ngayo u dzi badela. *—Sedzani ṱhaluso i re magumoni a siaṱari.

3-5. Holo ya Muvhuso ndi mini, nahone ri fanela u ḓipfa hani nga miṱangano yashu?

³ Holo ya Muvhuso ndi fhethu ha ndeme hune vhathu vha ṱangana hone u itela u gwadamela Yehova. Miṱangano ndi tshifhiwa tshi bvaho ha Mudzimu nahone i ri thusa u khwaṱhisa vhushaka hashu nae. Miṱanganoni yashu, ndangulo yawe i ri ṋea ṱhuṱhuwedzo na vhulivhisi zwine ra zwi ṱoḓa. Ndi ndugelo u rambiwa nga Yehova na Murwa wawe u ḽa “ṱafulani ḽa Yehova” vhege iṅwe na iṅwe. (1 Vhakorinta 10:21) Ri songo vhuya ra hangwa ndeme ya yeneyo thambo yo khetheaho.

⁴ Yehova u zwi vhea zwa vha khagala uri u ṱoḓa ri tshi vha hone miṱanganoni u itela u mu gwadamela na u ṱuṱuwedzana. (Vhalani Vhaheberu 10:24, 25.) Ngauri ri ṱhonifha Yehova, a ri nga ḓo dzula u ya miṱanganoni nga nnḓa ha musi hu na zwiitisi zwi pfalaho. Ri sumbedza uri ri livhuha miṱangano yashu musi ri tshi lugiselela na u lavhelela nga maṱo matswuku u shela mulenzhe khayo.—Psalme ya 22:22.

⁵ Nḓila ine ra ḓifara ngayo miṱanganoni na nḓila ine ra ṱhogomela ngayo Holo dzashu dza Muvhuso, zwi sumbedza nḓila ine ra ṱhonifha ngayo Yehova. Ri ṱoḓa vhuḓifari hashu vhu tshi rendisa dzina Yehova, ḽine kanzhi ḽa vha ḽo ṅwalwa kha Holo ya Muvhuso.—Vhambedzani 1 Dzikhosi 8:17.

6. Ndi mini zwe vhathu vha zwi amba nga ha Holo dzashu dza Muvhuso na vhane vha vha miṱanganoni? (Sedzani tshifanyiso tsha u thoma.)

⁶ Musi ri tshi sumbedza u ṱhonifha Holo dzashu dza Muvhuso, vhaṅwe vhathu vha a zwi ṱhogomela. Sa tsumbo, muṅwe munna wa ngei Turkey, o ri: “U kuna na u dzudzanyea he nda hu vhona Holoni dza Muvhuso ho ntakadza. Vhathu vha henefho vho vha vho ambara zwavhuḓi, vha tshi khou mwethuwa nahone vha ndumelisa zwavhuḓi nga lufuno. Zwenezwi zwo ntakadza vhukuma.” Onoyo munna o thoma u ḓa miṱanganoni yoṱhe nahone hu si kale a lovhedzwa. Kha iṅwe ḓorobo ngei Indonesia, vhahashu vho ramba vhahura, meyara na vhaṅwe vhashumi vha muvhuso uri vha vhone Holo yavho ya Muvhuso ntswa. Meyara o vha o takadzwa nga tshifhaṱo tshavhuḓi, nḓila ye tsha fhaṱwa ngayo na ngade yatsho yavhuḓi. O ri: “U kuna ha yeneyi holo hu sumbedza lutendo lwa vhoiwe lwa vhukuma.”

7, 8. Ri sumbedza hani uri ri ṱhonifha Yehova musi ri Holoni ya Muvhuso?

⁷ Ndi Yehova ane a ri ramba miṱanganoni nahone u na ndavha na nḓila ine ra sedzea ngayo na vhuḓifari hashu henefho. Nga zwenezwo, ri iledza u kaludza zwithu. Kha ḽiṅwe sia, a ri vhei milayo i konḓaho ngeno ri sa ḓilitsheleli kha nḓila ine ra ḓifara ngayo. Ndi ngoho uri Yehova u ṱoḓa riṋe na vhathu vhane ra vha ramba Holoni ya Muvhuso vha tshi ḓipfa vho vhofholowa henefho. Fhedzi a ri ṱoḓi u sa ṱhonifha miṱangano yashu nga nḓila naho i ifhio. Ndi ngazwo ri sa ambari nga nḓila i songo dzudzanyeaho kana u ambara zwiambaro zwine ra  ṱwa ngazwo hayani, nahone a ri rumelani milaedza, u amba kana u ḽa na u nwa nga tshifhinga tsha miṱangano. Nahone vhabebi vha fanela u gudisa vhana vhavho u sa gidima kana u tamba Holoni ya Muvhuso.—Muhuweleli 3:1.

⁸ Musi Yesu a tshi vhona vhathu vha tshi khou rengisa zwithu thembeleni ya Mudzimu, o sinyuwa nahone a vha pandela. (Yohane 2:13-17) Ri gwadamela Yehova na u guda nga hae Holoni dzashu dza Muvhuso. Nga zwenezwo, zwi ḓo vha zwi songo tea u ita zwa mabindu musi ri henefho.—Vhambedzani Nehemia 13:7, 8.

9, 10. (a) Vhathu vha Yehova vha fhaṱa hani Holo dza Muvhuso, nahone ho vha na mvelelo dzifhio? (b) Ndangulo ya Yehova i thusa hani zwivhidzo zwi sa koni u ḓifhaṱela Holo yadzo ya Muvhuso?

⁹ Vhathu vha Yehova shangoni ḽoṱhe vha shuma vhukuma kha u fhaṱa Holo dza Muvhuso. Vhashumi vha u ḓifunela vha a dzi ola, u dzi fhaṱa na u dzi vusulusa. Nga zwenezwo, miṅwahani ya 15 yo fhiraho, ro fhaṱa Holo dza Muvhuso dzo nakaho dzi fhiraho 28 000 shangoni ḽoṱhe kana hu fhaṱiwa Holo dza Muvhuso dzi fhiraho ṱhanu ḓuvha ḽiṅwe na ḽiṅwe.

¹⁰ Ndangulo ya Yehova i ṋea vhashumi vha u ḓifunela mushumo nahone i shumisa miṋeelo u itela u fhaṱa Holo dza Muvhuso huṅwe na huṅwe hune ha vha na ṱhoḓea. Ri tevhedza maitele a Bivhili a uri vhane vha vha na zwinzhi vha thuse vha si na zwo eḓanaho. (Vhalani 2 Vhakorinta 8:13-15.) Ho vha na mvelelo dzifhio? Ho fhaṱwa Holo dza Muvhuso nnzhi hu tshi itelwa zwivhidzo zwine zwa sa kone u ḓifhaṱela.

11. Vhaṅwe vhahashu vha ri mini nga ha Holo dzavho ntswa dza Muvhuso, nahone zwenezwi zwi ni ita uri ni ḓipfe hani?

¹¹ Muṅwe wahashu wa tshiṅwe tshivhidzo tsha ngei Costa Rica o ṅwala a ri: “Musi ro ima phanḓa ha Holo ya Muvhuso, ri pfa u nga ri khou lora! A zwi tendisei. Holo yashu yavhuḓi yo fhela nga maḓuvha a malo fhedzi! Zwo konadzea nga phaṱhutshedzo ya Yehova, nzudzanyo ye ya itwa nga ndangulo yawe na thikhedzo ya vhahashu. Henefho fhethu ha vhurabeli ndi tshifhiwa tsha ndeme vhukuma, zwithu zwa ndeme vhukuma zwe Yehova a ri ṋea zwone. Ri pfa ro takala vhukuma nga hazwo.” Zwi ri takadza vhukuma musi ri tshi pfa vhahashu vha tshinnani na vha tshisadzini vha tshi livhuha Yehova nga zwe a vha itela zwone. Nahone ri a takala uri vhahashu vha shangoni ḽoṱhe vha na Holo dzavho dza Muvhuso. Zwi tou vha khagala uri Yehova u khou fhaṱutshedza mushumo wa u fhaṱa Holo dza Muvhuso, ngauri musi dzo no fhaṱiwa vhathu vhanzhi vha thoma u ya miṱanganoni u guda nga ha Yehova.—Psalme ya 127:1.

12. Ni nga thusa hani u fhaṱa Holo dza Muvhuso?

¹² Ni nga thusa hani kha u fhaṱa Holo dza Muvhuso? Khamusi ni nga thusa kha wonoyo mushumo nga u ḓifunela. Nahone roṱhe  ri nga ṋeela nga tshelede u itela u badela tshinyalelo dza u fhaṱa Holo dza Muvhuso. Musi ri tshi ita zwoṱhe zwine ra nga kona u itela u tikedza wonoyo mushumo, ri a takala nga u ṋea nahone zwa ndeme vhukuma, ri vha ri tshi khou hulisa Yehova. Ri tevhedza tsumbo ya vhathu vha Mudzimu vha zwifhingani zwa Bivhili vhe vha vha vho ḓiimisela u shela mulenzhe kha u fhaṱa fhethu havho ha vhurabeli.—Ekisodo 25:2; 2 Vhakorinta 9:7.

13, 14. Ndi mini zwine ra zwi guda Bivhilini zwine zwa sumbedza uri ri fanela u ita uri Holo dzashu dza Muvhuso dzi dzule dzo kuna?

¹³ Yehova ndi Mudzimu mukhethwa na o kunaho. Ndi Mudzimu o dzudzanyeaho. Ndi ngazwo ri tshi fanela u ita uri Holo dzashu dza Muvhuso dzi dzule dzo kuna. (Vhalani 1 Vhakorinta 14:33, 40.) U itela u kuna na u vha vhakhethwa u fana na Yehova, a ri iti fhedzi uri hu kune vhurabeli hashu, nḓila ine ra humbula ngayo na zwine ra zwi ita, ri dovha ra ita uri mivhili yashu i dzule yo kuna.—Nzumbululo 19:8.

¹⁴ Musi ri tshi ita uri Holo dzashu dza Muvhuso dzi dzule dzo kuna, ri ḓirwa khana nga u ramba vhathu miṱanganoni yashu. Nahone vhathu vha ḓo vhona uri ri ita zwine ra zwi huwelela nga ha shango ḽiswa ḽo kunaho. Vha ḓo vhona uri ri gwadamela Mudzimu mukhethwa na o kunaho ane a ḓo ita uri ḽifhasi ḽi vhe paradiso yo nakaho.—Yesaya 6:1-3; Nzumbululo 11:18.

15, 16. (a) Ndi ngani zwi songo leluwa u ita uri Holo ya Muvhuso i dzule yo kuna? Ndi ngani ri tshi fanela u ita uri i dzule yo kuna? (b) U kunakiswa ha Holo ya vhoiwe ya Muvhuso ho dzudzanywa hani, nahone muṅwe na muṅwe washu u na ndugelo ifhio?

¹⁵ Vhathu vha na mavhonele o fhamba-fhambanaho nga ha u kunakisa. Ndi ngani? Khamusi ndi nga nṱhani ha nḓila ye vha aluwa ngayo. Zwiṅwe hafhu, vhaṅwe vha dzula fhethu hune ha vha na buse kana hune ha vha na bada dzo tswukaho na dzine dza vha na matope. Vhaṅwe a vha na maḓi o eḓanaho kana zwishumiswa zwa u kunakisa. Fhedzi huṅwe na huṅwe hune ra dzula hone, hu sa londwi uri vhathu vha hune ra dzula hone vha ḓipfa hani nga u kunakisa, ri fanela u ita uri Holo dzashu dza Muvhuso dzi  dzule dzo kuna. Ndi fhethu hune ra gwadamela hone Yehova.—Doiteronomio 23:14.

¹⁶ Arali ri tshi ṱoḓa uri Holo dzashu dza Muvhuso dzi kune nga hune zwa nga konadzea ngaho, ri fanela u dzudzanyea. Vhahulwane vha ṅwala fhasi zwithu zwa tshivhidzo nahone vha ita vhungoho ha uri hu na zwishumiswa zwo eḓanaho zwa u kunakisa. Vhahulwane vha dovha vha dzudzanya mushumo u itela uri u itwe. Zwiṅwe zwithu zwi fanela u kunakiswa nga murahu ha miṱangano miṅwe na miṅwe, fhedzi zwiṅwe a zwi kunakiswi tshifhinga tshoṱhe. Roṱhe ri na ndugelo ya u shela mulenzhe kha u kunakisa Holo dzashu dza Muvhuso.

17, 18. (a) Ri nga guda mini kha nḓila ye vhathu vha Yehova vha tshifhingani tsho fhiraho vha ṱhogomela ngayo thembele? (b) Ndi ngani ri tshi fanela u ṱhogomela Holo dzashu dza Muvhuso?

¹⁷ Ri dovha ra ita uri Holo yashu ya Muvhuso i dzule i kha vhuimo havhuḓi nga u i vusulusa musi zwo tea. Vhashumeli vha Yehova vho ita zwi fanaho tshifhingani tsho fhiraho. Sa tsumbo, nga tshifhinga tsha vhuvhusi ha Khosi Yehoashi wa ngei Yuda, vhathu vho vha vha tshi ṋeela nga tshelede thembeleni. Khosi yo laedza vhotshifhe uri vha shumise yeneyo tshelede u itela u lugisa thembele huṅwe na huṅwe hune vha wana ho tshinyala. (2 Dzikhosi 12:4, 5) Nga murahu ha miṅwaha ya 200, Khosi Yosia o dovha a shumisa muṋeelo wa thembele u itela u i vusulusa.—Vhalani 2 Koronika 34:9-11.

¹⁸ Dziṅwe Komiti dza Davhi dzo ṱhogomela uri vhathu mashangoni a havho a vho ngo ḓowela u ita uri zwifhaṱo na thundu zwi dzule zwi kha vhuimo havhuḓi. Zwi nga vha zwi tshi itiswa nga uri vhathu vha si gathi kha eneo mashango vha a ḓivha u ita mushumo. Kana vha nga vha vhe si na tshelede yo eḓanaho ya u badela tshinyalelo. Fhedzi arali ra sa lugisa Holo yashu ya Muvhuso musi zwi tshi ṱoḓea, i ḓo thoma u sa vha kha tshiimo tshavhuḓi nahone vhathu vha ḓo zwi ṱhogomela. Dzi nga si ṱanziele zwavhuḓi. Nṱhani hazwo, musi ri tshi ita zwoṱhe zwine ra nga kona u itela u ṱhogomela Holo yashu ya Muvhuso, ri vha ri tshi khou renda Yehova nahone a ri tambisi tshelede ye vhahashu vha ṋeela ngayo.

19. Ni ḓo ita mini u itela u sumbedza uri ni ṱhonifha fhethu hune na gwadamela hone Yehova?

¹⁹ Holo ya Muvhuso ndi tshifhaṱo tsho ṋekedzelwaho kha Yehova. A si tsha muthu kana tshivhidzo. Samusi ro zwi haseledza kha ino thero, maitele a Bivhili a ḓo ri thusa u vha na mavhonele avhuḓi nga ha fhethu hune ra gwadamela hone Mudzimu. Ngauri ri ṱhonifha Yehova, ri sumbedza u ṱhonifha miṱangano u katela na Holo dzashu dza Muvhuso. Ri a takalela u ṋeela nga tshelede u itela u fhaṱa Holo dza Muvhuso nahone ri shuma nga nungo dzoṱhe u itela u dzi ṱhogomela na u ita uri dzi dzule dzo kuna. U fana na Yesu, ri fhisetshela na u ṱhonifha fhethu hune ra gwadamela hone Yehova.—Yohane 2:17.