Shumani U Itela U Khwinisa Paradiso Ya Lwa Muya
“Fhethu hune milenzhe yanga ya kanda ndi ḓo [h]u khoḓisa.”—YESAYA 60:13.
NYIMBO: 102, 75
1, 2. Kha Maṅwalo a Luheberu, mubulo une wa ri ‘vhukando ha milenzhe’ wo vha u tshi shumiswa u ṱalusa mini?
YEHOVA MUDZIMU o ri: “Ḽiṱaḓulu ndi khuluṋoni yanga; ḽifhasi ndi vhukando ha milenzhe yanga.” (Yesaya 66:1) Mudzimu o vha a tshi khou dovha a amba nga ha “vhukando ha milenzhe” yawe musi a tshi ri: “Fhethu hune milenzhe yanga ya kanda ndi ḓo [h]u khoḓisa.” (Yesaya 60:13) U khoḓisa hani vhukando ha milenzhe yawe kana u vhu ita hani uri vhu nake? Nahone zwenezwi zwi amba mini kha vhane vha dzula kha vhukando ha milenzhe yawe vhune ha vha kha ḽifhasi?
2 Kha Maṅwalo a Luheberu, mubulo une wa ri ‘vhukando ha milenzhe’ u dovha wa shumiswa u ṱalusa thembele ya kale ya Isiraele. (1 Koronika 28:2; Psalme ya 132:7) Thembele yo vha yo nakela Yehova vhukuma ngauri yo vha i fhethu ha vhurabeli ha ngoho. Nahone yo vha i tshi shumiselwa u khoḓa Yehova kha ḽifhasi.
3. Fhethu ha vhurabeli ha ngoho ndi mini ṋamusi, nahone ho thoma u vha hone lini?
3 Ndi ngafhi fhethu ha vhurabeli ha ngoho ṋamusi? A si tshifhaṱo tshine tsha nga thembele. Ndi thembele ya lwa muya, nahone i khoḓisa Yehova u fhira tshifhaṱo naho tshi tshifhio. Thembele ya lwa muya ndi mini? Ndi ndugiselelo ya Mudzimu ine ya ita uri vhathu vha vhe khonani dzawe nahone vha mu gwadamele. Yeneyi ndugiselelo i konadzea fhedzi nga tshirengululi tsha Yesu. Yeneyi ndugiselelo yo thoma nga ṅwaha wa 29 musi Yesu a tshi lovhedzwa na u ḓodzwa sa Tshifhe Muhulu wa thembele ya Yehova ya lwa muya.—Vhaheberu 9:11, 12.
Vhathu vha Yehova vha fanela u mu hulisa henefha nahone zwino
4, 5. (a) Vhagwadameli vha Yehova vha ngoho vha ṱoḓa u ita mini u ya nga Psalme ya 99? (b) Ndi mbudziso ifhio ine ra fanela u ḓivhudzisa yone?
4 Ri a livhuha vhukuma ndugiselelo ya Mudzimu ya vhurabeli ha ngoho. Ri sumbedza u livhuha nga u vhudza vhaṅwe nga ha dzina Yehova na tshifhiwa tshawe tshavhuḓi tsha tshirengululi. Ri a takala vhukuma ngauri hu na Vhakriste vha ngoho vha fhiraho milioni dza malo vhane vha khou hulisa Yehova ḓuvha ḽiṅwe na ḽiṅwe! Ngeno vhathu vhanzhi vha vhurereli vha tshi vha na mahumbulele o khakheaho a uri vha ḓo hulisa Mudzimu ṱaḓulu musi vho no fa, vhathu vha Yehova vha a ḓivha uri ndi zwa ndeme u mu hulisa henefha nahone zwino.
5 Musi ri tshi hulisa Yehova, ri vha ri tshi khou edzisa tsumbo ya vhashumeli vha Mudzimu vha fulufhedzeaho vhe vha ṱaluswa kha Psalme ya 99:1-3, 5. (Vhalani.) Vhanna vha fulufhedzeaho vha ngaho Mushe, Aroni na Samuele vho tikedza nga ho fhelelaho ndugiselelo ya Mudzimu ya vhurabeli ha ngoho tshifhingani tsho fhiraho. (Psalme ya 99:6, 7) Ṋamusi, musi vhaḓodzwa vha kha ḽifhasi vha sa athu u thoma u shuma sa vhotshifhe na Yesu ngei ṱaḓulu, vha shumela Yehova nga u fulufhedzea kha tshipiḓa tsha ḽifhasi tsha thembele ya lwa muya. Dzimilioni dza vha “dziṅwe nngu” vha a vha thusa nga u fulufhedzea. (Yohane 10:16) Zwigwada zwoṱhe zwi gwadamela Yehova nga u fulufhedzea. Naho zwo ralo, ri fanela u ḓivhudzisa mbudziso ya muthu nga eṱhe ine ya ri, ‘Naa ndi khou tikedza nga vhuḓalo ndugiselelo ya Yehova ya vhurabeli ha ngoho?’
U ṰALULA VHANE VHA SHUMA THEMBELENI YA MUDZIMU YA LWA MUYA
6, 7. Ndi thaidzo ifhio ye ya vha hone tshivhidzoni tsha Vhukriste tsha u thoma nahone ho itea mini nga ṅwaha wa 1919?
6 Nga murahu ha miṅwaha i sa fhiri 100 musi tshivhidzo tsha Vhukriste tsho no thomiwa, ho thoma vhugunei samusi zwo dzula zwo ambiwa. (Mishumo 20:28-30; 2 Vhathesalonika 2:3, 4) Nga murahu ha tshenetsho tshifhinga, zwo konḓa vhukuma u ṱalula vhagwadameli vha ngoho vha Mudzimu. Ho fhela miṅwaha minzhi musi Yehova a sa athu u shumisa Yesu u ṱalula vhe vha vha vha tshi khou shumela Mudzimu thembeleni yawe ya lwa muya.
7 Nga ṅwaha wa 1919, vhe vha ṱanganedzwa nga Mudzimu na vhane vha shuma thembeleni yawe ya lwa muya vho ṱalulwa. Vho ita tshanduko u itela uri vhurabeli havho vhu ṱanganedzee kha Yehova. (Yesaya 4:2, 3; Maleaxi 3:1-4) Nga zwenezwo, bono ḽe muapostola Paulo a ḽi vhona mathomoni a miṅwaha ya ḓana, ḽo thoma u ḓadzea.
8, 9. Ndi ‘paradiso’ ifhio ye Paulo a i vhona kha bono?
8 Bono ḽa Paulo ḽo bulwa kha 2 Vhakorinta 12:1-4. (Vhalani.) Kha ḽeneḽo bono, Yehova o sumbedza Paulo zwiṅwe zwithu zwe zwa vha zwi tshi ḓo itea tshifhingani tshi ḓaho. ‘Paradiso’ ye Paulo a i vhona ndi mini? Tsha u thoma, i nga ambela kha Paradiso ya vhukuma ine ya ḓo swika kha ḽifhasi hu si kale. (Luka 23:43) Tsha vhuvhili, i nga ambela kha paradiso ya lwa muya yo fhelelaho i re shangoni ḽiswa. Tsha vhuraru, i nga ambela kha zwiimo zwavhuḓi zwa ṱaḓulu zwa “paradisoni ya Mudzimu.”—Nzumbululo 2:7.
9 Nga zwenezwo, ndi ngani Paulo o amba uri o “pfa maipfi ane a si kone u ambiwa na ane a si tendelwe uri muthu a a ambe”? Ngauri ho vha hu si tshifhinga tsha uri a ṱalutshedze nga vhuḓalo zwithu zwavhuḓi zwe a zwi vhona kha bono. Fhedzi ṋamusi Yehova u a ri tendela uri ri vhudze vhaṅwe nga ha phaṱhutshedzo dzine vhathu vhawe vha ḓiphina ngadzo zwino!
10. Ndi ngani paradiso ya lwa muya na thembele ya lwa muya zwi sa fani?
10 Ri anzela u amba nga ha paradiso ya lwa muya, fhedzi ndi mini? Ndi fhethu ho khetheaho ha mulalo hune Mudzimu a hu ṋea vhathu vhawe. Nga zwenezwo, paradiso ya lwa muya na thembele ya lwa muya a zwi fani. Thembele ya lwa muya ndi ndugiselelo ya Mudzimu ya vhurabeli ha ngoho. Paradiso ya lwa muya i ṱalusa zwavhuḓi vhane vha ṱanganedzwa nga Mudzimu na vhane vha mu gwadamela thembeleni yawe ya lwa muya.—Maleaxi 3:18.
11. Ndi ndugelo ifhio ine ra vha nayo ṋamusi?
11 Zwi a takadza u ḓivha uri u bva nga 1919, Yehova o tendela vhathu vha songo fhelelaho uri vha ṱahulele, u khwaṱhisa na u engedza paradiso ya lwa muya. Naa ni khou shela mulenzhe kha u ita wonoyo mushumo wavhuḓi? Naa ni a dzhiela nṱha ndugelo ya u shuma na Yehova u itela u mu khoḓisa kha ḽifhasi?
YEHOVA U KHOU ITA URI NDANGULO YAWE I ṊAṊE U NAKA
12. Ri zwi ḓivha hani uri Yesaya 60:17 yo ḓadzea? (Sedzani tshifanyiso tsha u thoma.)
12 Muporofita Yesaya o dzula o amba uri tshanduko nnzhi dzavhuḓi dzi ḓo itea kha tshipiḓa tsha ḽifhasi tsha ndangulo ya Mudzimu. (Vhalani Yesaya 60:17.) Vhakriste vhane vha kha ḓi vha vhaswa kana vhaswa ngohoni vho no vhala kana u pfa fhedzi nga ha dzenedzo tshanduko. Fhedzi hu na vhahashu vha tshinnani na vha tshisadzini vhanzhi vhe vha vha na ndugelo ya u tshenzhela dzenedzo tshanduko dzavhuḓi! Vhenevho vhashumeli vha fulufhedzeaho vha na vhungoho ha uri Mudzimu u khou shumisa Khosi yashu Yesu u dededza na u livhisa ndangulo yawe! Musi ri tshi thetshelesa tshenzhelo dza vhenevho Vhakriste vha funwaho, lutendo na fulufhelo zwashu kha Yehova zwi ḓo khwaṱha.
Paradiso ya lwa muya i ṱalusa fhethu ho khetheaho ha mulalo kha Vhakriste vha ngoho ṋamusi
13. U ya nga Psalme ya 48:12-14, ri fanela u ita mini?
13 Vhakriste vhoṱhe vha ngoho vha fanela u vhudza vhaṅwe nga ha ndangulo ya Yehova. Zwi a mangadza uri naho ri tshi khou tshila shangoni ḽivhi ḽa Sathane, ri na mulalo na vhuthihi ha vhushaka ha vhurathu na vhukomana! Ri fanela u vhudza “vhaḓuhulu” nga dakalo nga ha ndangulo ya Yehova na nga ha paradiso ya lwa muya!—Vhalani Psalme ya 48:12-14.
14, 15. Ndi tshanduko dzifhio dze dza itwa nga murahu ha 1970, nahone ndangulo yo vhuyelwa hani?
14 Vhunzhi ha vhalala zwivhidzoni zwashu, vho no tshenzhela dzenedzo tshanduko dze dza ita uri tshipiḓa tsha ḽifhasi tsha ndangulo ya Yehova tshi ṋaṋe u naka. Vha humbula musi zwivhidzo zwi tshi vha na mushumeli wa tshivhidzo nṱhani ha u vha na tshigwada tsha vhahulwane, musi mashango a tshi vha na mushumeli wa davhi nṱhani ha u vha na Komiti ya Davhi kana musi muphuresidennde wa Watch Tower Society a tshi ṋea vhulivhisi nṱhani ha Tshigwada tshi Langaho tsha Ṱhanzi dza Yehova. Naho vhenevho vhahashu vhoṱhe vho vha vhe na vhathusi vha fulufhedzeaho, muthu muthihi o vha e na vhuḓifhinduleli ha u dzhia phetho zwivhidzoni, ofisini dza davhi na ofisini khulwane dza shango ḽoṱhe. Nga murahu ha 1970, ho itwa tshanduko u itela uri zwigwada zwa vhahulwane zwi vhe na vhuḓifhinduleli ha u dzhia phetho nṱhani ha muthu muthihi.
15 Ndi ngani dzenedzo tshanduko dzo vhuyedza ndangulo? Ngauri dzo vha dzo thewa kha nḓila ya khwine ya u pfesesa Maṅwalo. Nṱhani ha u vha na muthu muthihi ane a dzhia phetho dzoṱhe, ndangulo yo vhuyelwa nga pfaneleo dzavhuḓi dza vhahulwane vhoṱhe kana “zwifhiwa zwine zwa vha vhathu,” vhe ra ṋewa nga Yehova.—Vhaefesa 4:8; Mirero 24:6.
Yehova u khou ṋea vhathu shangoni ḽoṱhe vhulivhisi vhune vha vhu ṱoḓa vhutshiloni (Sedzani dziphara 16, 17)
16, 17. Ndi tshanduko dzifhio dza zwenezwino dze dza ni takadza, nahone ndi ngani?
16 Humbulani nga ha dziṅwe tshanduko dza zwenezwino dze dza itwa kha khandiso dzashu. Ri takalela u tshimbidza khandiso dzi thusaho na dzi kungaho vhuḓinḓani hashu. Dovhani ni humbule nga ha nḓila ine ra shumisa ngayo thekinolodzhi ntswa u itela u huwelela mafhungo maḓifha. Sa tsumbo, website ya jw.org i swikelela vhathu vhanzhi vho engedzeaho u itela uri vha wane thuso ine vha i ṱoḓa vhukuma. Kha dzenedzo tshanduko dzoṱhe, ri vhona nḓila ine Yehova a vha ngayo na dzangalelo vhukuma kha vhathu na nḓila ine a vha funa ngayo.
Ri livhuha zwine ra gudiswa zwikoloni zwashu zwinzhi zwa Bivhili
17 Ri dovha ra dzhiela nṱha tshanduko dze dza itwa miṱanganoni yashu u itela uri ri kone u vha na tshifhinga tsha vhurabeli ha muṱa kana pfunzo ya muthu nga eṱhe. Nahone ri dzhiela nṱha tshanduko dze dza itwa kha mbekanyamushumo dza guvhangano na buthano ḽashu. Dzi vhonala dzi tshi khou vha khwine ṅwaha muṅwe na muṅwe! Ri dovha ra livhuha zwine ra gudiswa zwikoloni zwashu zwinzhi zwa Bivhili. Kha dzenedzo tshanduko dzoṱhe, zwi tou vha khagala uri Yehova u khou livhisa ndangulo yawe nahone u bvela phanḓa a tshi nakisa paradiso ya lwa muya!
NḒILA INE RA THUSA NGAYO URI PARADISO YA LWA MUYA I ṊAṊE U NAKA
18, 19. Ri nga thusa hani uri paradiso ya lwa muya i ṋaṋe u naka?
18 Yehova o ri ṋea ndugelo ya u thusa u ita uri paradiso ya lwa muya i ṋaṋe u naka. Fhedzi zwenezwo ri zwi itisa hani? Nga u huwelela mafhungo maḓifha a Muvhuso nga u fhisea na u ita vhafunziwa vho engedzeaho. Tshifhinga tshoṱhe musi ri tshi thusa muthu uri a vhe mushumeli wa Mudzimu, ri vha ri tshi khou thusa uri paradiso ya lwa muya i titime.—Yesaya 26:15; 54:2.
19 Ri dovha ra thusa kha u nakisa paradiso ya lwa muya musi ri tshi shuma vhukuma u itela u khwinisa vhumuthu hashu ha Vhukriste. Zwenezwi zwi thusa uri paradiso ya lwa muya i kunge vhaṅwe nga ho engedzeaho. Kanzhi, a i sokou vha nḓivho yashu ya Bivhili ine ya kunga vhathu, fhedzi ndi u kuna hashu na vhuḓifari hashu ha mulalo zwine zwa kungela vhathu ndanguloni u thoma na kha Yehova na Yesu.
Ni nga thusa uri paradiso ya lwa muya i titime (Sedzani dziphara 18, 19)
20. U ya nga Mirero 14:35, ri fanela u vha na dzangalelo kha mini?
20 Yehova na Yesu vha nga vha vha tshi takala vhukuma musi vha tshi vhona paradiso yashu ya lwa muya yo nakaho ṋamusi. Dakalo ḽine ra vha naḽo ṋamusi ḽa u ita uri i nake ḽi sokou vha tsumbo ya dakalo ḽine ra ḓo vha naḽo musi ri tshi shuma u itela uri ḽifhasi ḽi vhe paradiso ya vhukuma. Ri fanela u dzula ri tshi humbula Mirero 14:35 ine ya ri: “Khosi i takadzwa nga mulanda wa u thanya.” Kha ri ṱalifhe musi ri tshi shuma vhukuma u itela u nakisa paradiso yashu ya lwa muya!
