1. Ndi zwiitea zwifhio zwe zwa itea nga 66.C.E? (Sedzani tshifanyiso tsha u thoma.)

EDZANI u humbula arali no vha ni Mukriste ane a dzula Yerusalema nga 66.C.E. Ho no itea zwithu zwinzhi. Muvhusi wa Roma ane a pfi Florus o tswa talente dza 17 mbulungeloni ya thembele. Nga u ṱavhanya Vhayuda vha sinyuwa. Vha vhulaha maswole manzhi a Vharoma nahone vho vha vha si tsha ṱoḓa u vhuswa nga Vharoma. Fhedzi Vharoma vho dzhia vhukando nga u ṱavhanya. Hu sa athu u fhela miṅwedzi miraru, maswole a 30 000 o rangwaho phanḓa nga Cestius Gallus o tanga Yerusalema. Mashandukwa a Vhayuda o dzumbama thembeleni, fhedzi mafheleloni maswole a Vharoma a ya kha luvhondo lwa thembele nahone a lingedza u pwasha u itela u dzhena. Vhathu vhoṱhe vha wonoyo muḓi vho dzhenwa nga nyofho. No vha ni tshi ḓo ḓipfa hani musi ni tshi vhona zwenezwi zwithu zwoṱhe?

2. Vhakriste vho vha vha tshi fanela u ita mini musi vha tshi vhona maswole a Vharoma a tshi tanga muḓi wavho, nahone zwenezwo zwo konadzea hani?

² Miṅwahani yo fhiraho, Yesu o sevha vhafunziwa vhawe nga ha tshenetsho tshiitea nahone a vha laya a ri: “Musi ni tshi vhona Yerusalema wo tangwa nga dzimmbi, ni ḓivhe uri u fheliswa  hawo hu tsini. Ngauralo, vha re Yudea kha vha thome u shavhela dzithavhani, vha re nga ngomu kha vha bve, nahone vha re nnḓa ha muḓi vha songo dzhena nga ngomu.” (Luka 21:20, 21) Zwo vha zwi tshi ḓo konadzea hani uri vha thetshelese nyeletshedzo ya Yesu ya u ṱuwa Yerusalema musi maswole o tanga wonoyo muḓi? Ho itea zwithu zwi mangadzaho. Nga u ṱavhanya mmbi ya Vharoma yo ṱuwa Yerusalema! Samusi Yesu o amba, u vutshela ho “fhungudzwa.” (Mateo 24:22) Musi mmbi yo no ṱuwa, zwino ho vha hu tshibuli tsha uri Vhakriste vha fulufhedzeaho vha thetshelese Yesu nga u shavhela dzithavhani. * (Sedzani ṱhaluso i re magumoni a siaṱari.) Nga murahu ha 70.C.E, mmbi ntswa ya Vharoma yo humela Yerusalema. Muḓi wo fheliswa nga tshenetsho tshifhinga. Fhedzi muṅwe na muṅwe we a thetshelesa ndaela ya Yesu o tshidzwa.

3. Ndi vhuimo vhufhio vhu fanaho vhune Vhakriste vha ḓo vhu tshenzhela hu si kale, nahone ri ḓo haseledza mini kha yeneyi thero?

³ Tsevho na ndaela ya Yesu zwi dovha zwa shuma musalauno. Hu si kale ri ḓo vha ri kha vhuimo vhu fanaho. Yesu o shumisa zwiitea zwa ḓanani ḽa u thoma ḽa miṅwaha u itela u ṱalutshedza zwine zwa ḓo itea musi “maṱungu mahulu” a tshi thoma nga u ṱavhanya. (Mateo 24:3, 21, 29) Samusi ho vha na Vhakriste vha fulufhedzeaho vhe vha ponyoka u fheliswa ha Yerusalema, hu ḓo vha na “gogo ḽihulu” ḽa vhane vha ḓo ponyoka khombo ya shango ḽoṱhe ine ya khou ḓa. (Vhalani Nzumbululo 7:9, 13, 14.) Ndi zwa ndeme vhukuma u pfesesa zwine Bivhili ya ri vhudza nga ha zwenezwi zwiitea zwa tshifhingani tshi ḓaho. Ndi ngani? Ngauri vhutshilo hashu ho ḓitika ngazwo. Nga zwenezwo, kha ri haseledze uri zwenezwi zwiitea zwi ḓo ri kwama hani sa muthu nga eṱhe.

4. Maṱungu mahulu a ḓo thoma hani?

⁴ Maṱungu mahulu a ḓo thoma hani? Nga u fheliswa ha vhurereli hoṱhe ha mazwifhi. Bivhilini, vhurereli ha mazwifhi vhu vhidzwa “Babele Ḽihulu, mme a dziphombwe.” (Nzumbululo 17:5-7) Ndi ngani vhurereli ha mazwifhi vhu tshi vhidzwa phombwe? Ngauri vhafunzi vhaho a vho ngo fulufhedzea kha Mudzimu. Nṱhani ha u tikedza Yesu na Muvhuso wawe nga u fulufhedzea, vho tikedza mivhuso ya vhathu nahone vha nyadza pfunzo dza Bivhili u itela uri vha kone u vha na ṱhuṱhuwedzo yo engedzeaho. Vhurabeli havho a vhu fani na vhurabeli ho kunaho ha vhaḓodzwa. (2 Vhakorinta 11:2; Yakobo 1:27; Nzumbululo 14:4) Fhedzi ndi nnyi ane a ḓo fhelisa Babele Ḽihulu? Yehova u ḓo ita uri “ṋanga dza fumi” dza “ḽivhanda ḽitswuku-tswuku” dzi “dzhenis[e] mbiluni dzavho zwine a zwi humbula.” “Ḽivhanda ḽitswuku-tswuku” ḽi imela United Nations, nahone “ṋanga dza fumi” dzi imela maanḓa oṱhe a politiki ane a ḽi tikedza.—Vhalani Nzumbululo 17:3, 16-18.

5, 6. Ndi ngani ri tshi amba uri u fheliswa ha Babele Ḽihulu a zwi ambi u fheliswa ha miraḓo yaḽo yoṱhe?

⁵ Naa miraḓo yoṱhe ya vhurabeli ha mazwifhi i ḓo vhulahwa musi Babele Ḽihulu ḽi tshi fheliswa? Hai. Yehova o hevhedza muporofita Sakaria uri a ṅwale nga ha zwine zwa ḓo itea. Nga tshenetsho tshifhinga, muṅwe muthu we a vha e muraḓo wa vhurabeli ha mazwifhi u ḓo amba a ri: “Nṋe a thi muporofita; nṋe ndi muthu wa mulanda wa u lima, ngauri ndo rengwa nga mugede  ndi tshee mutukana. Vha tshi ḓo ri: Mavhadzi ayo a re kha zwanḓa zwau ndi a mini-ha? u ḓo ri: Ndi he nda huvhala nḓuni ya vhafunwa vhanga.” (Sakaria 13:4-6) Na vharangaphanḓa vha vhurereli vha ḓo ḓiita u nga a vhaho kha vhurereli nahone vha ḓo landula u vha tshipiḓa tsha vhurereli ha mazwifhi.

⁶ Hu ḓo itea mini kha vhathu vha Mudzimu nga tshenetsho tshifhinga? Yesu o ṱalutshedza a ri: “Zwi re zwone ndi uri arali maḓuvha ayo a sa fhungudzwa, a hu na muthu ane a ḓo tshidzwa, fhedzi maḓuvha ayo a ḓo fhungudzwa u itela vho nangiwaho.” (Mateo 24:22) Ḓanani ḽa u thoma ḽa miṅwaha, maṱungu ngei Yerusalema o “fhungudzwa.” Zwenezwi zwo thusa “vho nangiwaho” vhane vha vha Vhakriste vho ḓodzwaho uri vha shavhe. Nga nḓila i fanaho, tshipiḓa tsha u thoma tsha maṱungu mahulu tshi ḓo “fhungudzwa” nga nṱhani ha “vho nangiwaho.” Maanḓa a politiki, “ṋanga dza fumi,” a vha nga tendelwi u fhelisa vhathu vha Mudzimu. Nṱhani hazwo, hu ḓo vha na tshifhinga tshiṱuku tsha u dzika musi u vutshela ha u thoma ho no fhela.

7, 8. Ndi tshibuli tshifhio tshine tsha ḓo vha hone nga murahu ha u fheliswa ha vhurereli ha mazwifhi, nahone vhathu vha Mudzimu vha ḓo vha vho fhambana hani na vhaṅwe nga tshenetsho tshifhinga?

⁷ Hu ḓo itea mini musi ho no fheliswa vhurereli ha mazwifhi? Hu ḓo vha hu tshifhinga tsha u sumbedza zwi re mbiluni yashu zwa vhukuma. Nga tshenetsho tshifhinga, vhathu vhanzhi vha ḓo lingedza u ṱoḓa tsireledzo na thuso kha madzangano a vhathu, “nngwani dza dzithavha.” (Nzumbululo 6:15-17) Fhedzi vhathu vha Yehova vha ḓo ṱoḓa u tsireledzwa ngae. Musi u vutshela hu tshi “fhungudzwa” ḓanani ḽa u thoma ḽa miṅwaha, ho vha hu si tshifhinga tsha uri Vhayuda vhoṱhe vha vhe Vhakriste nga u ṱavhanya. Nṱhani hazwo, ho vha hu tshifhinga tsha uri vhoṱhe vhe vha vha vhe Vhakriste vha bve Yerusalema sa zwe Yesu a laya. Nga nḓila i fanaho, tshifhingani tshi ḓaho musi u vutshelwa ha Babele Ḽihulu hu tshi “fhungudzwa,” ri nga si lavhelele uri vhathu vhanzhi vha ḓo vha Vhakriste vha ngoho nga u ṱavhanya. Nṱhani hazwo, hu ḓo vha hu tshibuli tsha uri vhagwadameli vhoṱhe vha ngoho vha sumbedze nḓila ine vha funa ngayo Yehova na u tikedza vhaḓodzwa.—Mateo 25:34-40.

⁸ A ri ḓivhi zwine zwa ḓo itea kokotolo nga tshenetsho tshifhinga tsha u lingwa. Naho zwo ralo, ri lavhelela uri vhutshilo vhu ḓo vha vhu songo leluwa nahone zwi ḓo ṱoḓea uri ri ḓidzime. Ḓanani ḽa u thoma ḽa miṅwaha, Vhakriste vho vha vha tshi fanela u ṱutshela mahaya avho na u konḓelela vhuleme u itela u ponyoka. (Marko 13:15-18) Ri fanela u ḓivhudzisa uri: ‘Naa ndo ḓiimisela u ṱutshela zwithu zwi vhonalaho? Naa ndo ḓiimisela u ita zwoṱhe zwine nda nga kona u itela u dzula ndi tshi fulufhedzea kha Yehova?’ Edzani u humbula! Nga tshenetsho tshifhinga, hu ḓo vha hu riṋe fhedzi vhane vha gwadamela Mudzimu  washu, hu sa londwi zwine zwa itea, sa zwe zwa itwa nga muporofita Daniele.—Daniele 6:11, 12.

9, 10. (a) Ndi mulaedza ufhio une vhathu vha Mudzimu vha ḓo u ḓivhadza tshifhingani tsha maṱungu mahulu? (b) Maswina a vhathu vha Mudzimu a ḓo aravha hani?

⁹ Nga maṱungu mahulu, hu ḓo vha hu si tshifhinga tsha u huwelela “mafhungo maḓifha . . . a Muvhuso.” Tshifhinga tsha u huwelela nga ha wonoyo mulaedza tshi ḓo vha tsho fhira. Tshifhinga tsha “vhufhelo” tshi ḓo vha tsho swika! (Mateo 24:14) Vhathu vha Mudzimu vha ḓo ḓivhadza nga tshivhindi mulaedza u re na maanḓa wa khaṱhulo ine ya ḓo kwama vhathu vhoṱhe. Mulaedza u nga vha wa uri shango ḽivhi ḽa Sathane ḽi tsini na u fheliswa lwa tshoṱhe. Bivhili i vhambedza wonoyu mulaedza na matombo a tshifhango musi i tshi amba uri: “Matombo mahulu a tshifhango, e ḽiṅwe na ḽiṅwe ḽao ḽa vha ḽi tshi ṱoḓa u lingana na talente nga tshileme, a wela vhathu a tshi bva ṱaḓulu, huno vhathu vha sema Mudzimu nga nṱhani ha ṱhamu ya tshifhango, ngauri yo vha i khulwane vhukuma.”—Nzumbululo 16:21.

¹⁰ Maswina ashu a ḓo pfa wonoyu mulaedza u re na maanḓa. Yehova o hevhedza muporofita Hesekiele uri a ṱalutshedze nḓila ine tshigwada tsha dzitshaka tshine Bivhilini tsha vhidzwa Gogo kha ḽa Magogo tsha ḓo aravha ngayo: “Muṋe wa vhoṱhe Yehova u ri: Musi uyo mbiluni yau hu ḓo vuwa mafhungo, wa elekanya ngelekanyo mmbi. U ḓo ri: Kha ndi die heḽi shango ḽo aṱamaho; ndi dzhene kha vhenevho vha sí na nndwa, vho dzulaho vhó takala; vhoṱhe vho dzula vha si na mitsheṱo na tswinga na mafhoro! U ḓo ralo U tshi ri U thube, U ṱangule, U ise tshanḓa kha vhe vha vhuyelela marubini, kha vhathu vhe vha kuvhanganywa thungo dzoṱhe kha vha-nnḓa, vha fuwa vha pfuma, vha dzula vhukati ha mashango.” (Hesekiele 38:10-12) Vhathu vha Mudzimu vha ḓo vha vho fhambana na vhaṅwe, zwa tou nga vha khou tshila “vhukati ha mashango.” Tshaka dzi nga si tsha kona u ḓilanga. Dzi ḓo vha dzo ḓiimisela u vutshela vhaḓodzwa vha Yehova na vhane vha vha tikedza.

11. (a) Ndi mini zwine ra fanela u zwi humbula nga ha mutevhe wa zwiitea zwa tshifhingani tsha maṱungu mahulu? (b) Vhathu vha ḓo aravha hani musi vha tshi vhona zwiga?

¹¹ Hu ḓo itea mini? Bivhili a i ri vhudzi kokotolo mutevhe wa zwiitea, fhedzi zwiṅwe zwiitea zwi nga itea nga tshifhinga tshithihi. Kha vhuporofita hawe nga ha vhufhelo ha ano maitele a zwithu, Yesu o ri: “Hu ḓo vha na maṱula kha ḓuvha, ṅwedzi, na ṋaledzi nahone tshaka dza kha ḽifhasi dzi ḓo pfa vhuṱungu, dzi sa ḓivhi uri dzi ite mini nga nṱhani ha u unga ha lwanzhe na u halifha halwo, vhathu vha ḓo ṋoka nga nyofho na u lindela zwithu zwine zwa ḓo itea kha ḽifhasi, ngauri na maanḓa a maṱaḓulu a ḓo dzinginyea. Ndi hone vha tshi ḓo vhona Murwa-muthu a tshi ḓa e kha gole e na maanḓa na vhugala vhuhulu.” (Luka 21:25-27; vhalani Marko 13:24-26.) Naa u ḓadzea ha honoho vhuporofita hu ḓo katela zwiga zwi ofhisaho na zwiitea zwa lutomboni? Ri fanela u lindela uri ri kone u vhona. Naho zwo ralo, ri a zwi ḓivha uri musi maswina a Mudzimu a tshi vhona zwiga, a ḓo ofha vhukuma.

12, 13. (a) Hu ḓo itea mini musi Yesu a tshi ḓa e na “maanḓa na vhugala vhuhulu”? (b) Vhashumeli vha Mudzimu vha ḓo aravha hani nga tshenetsho tshifhinga?

 ¹² Hu ḓo itea mini musi Yesu a tshi ḓa e na “maanḓa na vhugala vhuhulu”? U ḓo lambedza vhane vha fulufhedzea nahone a ṱarafa vha sa fulufhedzei. (Mateo 24:46, 47, 50, 51; 25:19, 28-30) Yesu o shumisa tshifanyiso u itela u ṱalutshedza zwenezwi nga vhuḓalo. O ri: “Musi Murwa-muthu a tshi ḓa e kha vhugala hawe e na vharuṅwa vhoṱhe, ndi hone a tshi ḓo dzula kha khuluṋoni yawe ya vhugala. Tshaka dzoṱhe dzi ḓo kuvhanganywa phanḓa hawe, nahone u ḓo khethekanya vhathu, vhunga mulisa a tshi khetha nngu kha mbudzi. Nngu u ḓo dzi vhea thungo ya tshanḓa tsha u ḽa nahone mbudzi a dzi vhea thungo ya tsha monde.” (Mateo 25:31-33) Hu ḓo itea mini kha nngu na mbudzi? Dzi ḓo haṱulwa. Mbudzi kana vha sa fulufhedzei, “vha ḓo fheliswa tshoṱhe.” Fhedzi nngu kana vhane vha fulufhedzea, vha ḓo wana vhutshilo vhu sa fheli.—Mateo 25:46.

¹³ Mbudzi dzi ḓo aravha hani musi dzi tshi ṱhogomela uri dzi ḓo fheliswa? Dzi ḓo “lila dzo ṱungufhala.” (Mateo 24:30) Fhedzi vhaḓodzwa na vhane vha vha tikedza vha ḓo aravha hani? Vha ḓo ita zwe Yesu a zwi amba: “Musi zwenezwi zwithu zwi tshi thoma u itea, ivhani na maanḓa na tshivhindi, ngauri u vhofhololwa haṋu hu tsini.”—Luka 21:28.

14, 15. Ndi mushumo ufhio wa u kuvhanganya une wa ḓo vha hone musi Gogo kha ḽa Magogo ḽo no thoma u vutshela, nahone zwenezwi zwi ḓo itea hani?

¹⁴ Hu ḓo itea mini musi Gogo kha ḽa Magogo ḽi tshi thoma u vutshela vhathu vha  Mudzimu? Bivhili i amba uri Murwa muthu “u ḓo ruma vharuṅwa nahone vha ḓo kuvhanganya vhanangiwa vhawe vha tshi bva thungo nṋa, u bva magumoni a ḽifhasi u swika magumoni a ḽiṱaḓulu.” (Marko 13:27; Mateo 24:31) Wonoyu mushumo wa u kuvhanganya a u ambeli kha tshifhinga tsha musi Vhakriste vho ḓodzwaho vha tshi thoma u nangwa. Nahone a u ambeli kha u swaiwa ha u fhedza ha vhaḓodzwa vhane vha kha ḓi vha kha ḽifhasi. (Mateo 13:37, 38) Honoho u swaiwa hu ḓo itea musi maṱungu mahulu a sa athu u thoma. (Nzumbululo 7:1-4) Nga zwenezwo, mushumo wa u kuvhanganya ndi mini? Ndi tshifhinga tshine vhaḓodzwa vhane vha kha ḓi vha kha ḽifhasi vha ḓo ṱanganedza ngatsho malamba avho nahone vha ya ṱaḓulu. (1 Vhathesalonika 4:15-17; Nzumbululo 14:1) Tshenetshi tshiitea tshi ḓo itea musi Gogo kha ḽa Magogo ḽi tshi thoma u vutshela. (Hesekiele 38:11) Sa zwe Yesu a zwi amba musi a tshi ri, “vho lugaho vha ḓo penya vhunga ḓuvha Muvhusoni wa Khotsi avho.”—Mateo 13:43. * (Sedzani ṱhaluso i re magumoni a siaṱari.)

¹⁵ Naa zwenezwi zwi amba uri vhaḓodzwa vha ḓo “takulelwa ṱaḓulu nga u ṱavhanya”? Vhathu vhanzhi vha ḽa Vhudzhagane vha tenda uri Vhakriste vha ḓo takulelwa ṱaḓulu nga muvhili wa ṋama. Vha dovha vha tenda uri vha ḓo vhona Yesu nga maṱo a tshi vhuya u itela u vhusa ḽifhasi. Naho zwo ralo, Bivhili i zwi vhea khagala uri u vhuya ha Yesu a hu nga vhonwi nga maṱo musi i tshi amba uri: “Tshiga tsha u vha hone ha Murwa-muthu tshi ḓo vhonala ṱaḓulu,” nahone Yesu u ḓo ḓa e kha “makole a ṱaḓulu.” (Mateo 24:30) Bivhili i dovha ya amba uri “ṋama na malofha zwi nga si ḽe ifa ḽa muvhuso wa Mudzimu.” Nga zwenezwo, vhane vha ḓo takulelwa ṱaḓulu vha fanela u thoma vha “shandukiswa, nga tshifhinganyana, nga u poidza ha ḽiṱo, musi hu tshi lila phalaphala ya u fhedza.” * (Sedzani ṱhaluso i re magumoni a siaṱari.) (Vhalani 1 Vhakorinta 15:50-53.) Hafha a ri shumisi mubulo une wa ri “u takulelwa ṱaḓulu nga u ṱavhanya” u itela u ṱalusa tshenetshi tshiitea ngauri u tshimbidzana na pfunzo ya mazwifhi a ḽa Vhudzhagane. Naho zwo ralo, vhaḓodzwa vha fulufhedzeaho vhane vha kha ḓi vha kha ḽifhasi vha ḓo kuvhanganywa vhoṱhe nga u ṱavhanya.

16, 17. Hu fanela u itea mini musi mbingano ya Ngwana i sa athu u thoma?

¹⁶ Musi vhaḓodzwa vhoṱhe vha 144 000 vho no vha ṱaḓulu, hu ḓo thoma ndugiselelo ya u fhedza ya mbingano ya Ngwana. (Nzumbululo 19:9) Fhedzi hu fanela u itea zwiṅwe zwithu musi tshenetsho tshiitea tshi sa athu u thoma. Humbulani uri Gogo ḽi ḓo vutshela vhathu vha Mudzimu musi vhaḓodzwa vha tshi kha ḓi vha kha ḽifhasi. (Hesekiele 38:16) Vhathu vha Mudzimu vha ḓo aravha hani? Vha ḓo thetshelesa ndaela i tevhelaho: “U lwa navho’ henefho a si mushumo waṋu; sendelani ni ime ni lavhelese, ni vhone Yehova a tshi lamulela inwi. . . . Ni songo ofha na timatima.” (2 Koronika 20:17) Nga tshiṅwe tshifhinga musi Gogo ḽo no thoma u vutshela, vhaḓodzwa vhoṱhe vhane vha kha ḓi vha kha ḽifhasi vha ḓo takulelwa ṱaḓulu. Nga zwenezwo, Nzumbululo 17:14 i ri vhudza nga ha  zwine zwa ḓo itea ṱaḓulu musi Gogo ḽi tshi vutshelwa. Maswina a vhathu vha Mudzimu “a ḓo lwa na Ngwana, fhedzi ngauri i Murena wa marena na Khosi ya mahosi, Ngwana i ḓo a kunda. Zwiṅwe hafhu, na vha re nayo vho vhidzwaho na vho nangwaho na vha fulufhedzeaho vha ḓo kunda.” Nga zwenezwo, Yesu na mahosi awe o ḓodzwaho a 144 000 ngei ṱaḓulu, vha ḓo vhofholola vhathu vha Mudzimu fhano kha ḽifhasi.

¹⁷ Honoho u vhofhololwa hu ḓo ita uri hu thome nndwa ya Haramagedo, ine ya ḓo ḓisela vhugala dzina Yehova ḽine ḽa vha ḽikhethwa. (Nzumbululo 16:16) Vhoṱhe vhane vha ḓo haṱulwa sa mbudzi kana sa vha sa fulufhedzei vha ḓo fheliswa. A hu tsha ḓo vha na vhuvhi kha ḽifhasi, nahone “gogo ḽihulu” ḽi ḓo ponyoka Haramagedo. Mafheleloni, magumo a takadzaho a bugu ya Nzumbululo a ḓo ḓadzea, mbinganoni ya Ngwana! (Nzumbululo 21:1-4) * (Sedzani ṱhaluso i re magumoni a siaṱari.) Vhoṱhe vhane vha ḓo ponyoka kha ḽifhasi vha ḓo ḓiphina nga u takalelwa nga Mudzimu nahone vha ḓo tshenzhela lufuno lwawe luhulwane na mafunda. Ro lavhelela tshenetsho tshifhinga nga maṱo matswuku. Vhu ḓo vha vhuṱambo havhuḓi lungafhani ha mbingano!—Vhalani 2 Petro 3:13.

18. Samusi ho dzula ho ambiwa nga ha zwiitea zwi takadzaho zwine zwa khou ḓa, ri fanela u ḓiimisela u ita mini?

¹⁸ Samusi zwenezwi zwiitea zwi takadzaho zwi tshi khou ḓa hu si kale, muṅwe na muṅwe washu u fanela u vha a tshi khou ita mini zwino? Yehova o hevhedza muapostola Petro uri a ṅwale uri: “Samusi zwenezwi zwithu zwoṱhe zwi tshi ḓo ṋokiswa nga yeneyi nḓila, ni humbule uri ni ṱoḓa u vha vhathu vha mufuda-ḓe kha mishumo mikhethwa ya vhuḓifari na kha mishumo ya u ḓikumedza kha Mudzimu, vhunga no lindela na u dzula ni tshi humbula u vha hone ha ḓuvha ḽa Yehova . . . Ngauralo vhafunwa, samusi no lindela zwenezwi zwithu, itani zwine na nga kona uri mafheleloni ni wanwe ni si na madondo ni sa solei nahone ni na mulalo.” (2 Petro 3:11, 12, 14) Nga zwenezwo, kha ri ḓiimisele u ita uri vhurabeli hashu vhu dzule ho kuna, vhu si na vhuḽedzani na vhurereli ha mazwifhi, nahone ri tikedze Khosi ya Mulalo, Yesu Kristo.