1, 2. (a) Ndi ngani ni na vhungoho ha uri Yehova u funa vhathu vhawe? (b) Vhathu vho sikwa vhe na lutamo lufhio?

NDI ngani ni na vhungoho ha uri Yehova u funa vhathu vhawe? Musi ni sa athu u fhindula yeneyo mbudziso, ṱhogomelani tsumbo dzi tevhelaho: Lwa miṅwaha yo vhalaho, wahashu wa tshisadzini ane a pfi Taylene o ṱuṱuwedzwa nga vhahashu nga vhuthu. Vho mu vhudza uri a songo lavhelela u ita zwithu zwine a nga si kone u zwi ita. O ri: “Arali Yehova o vha a sa mpfuni, nyeletshedzo yawe yo vha i sa ḓo dzula i hone.” Brigitte we a alusa vhana vhawe vhavhili e eṱhe musi munna wawe o no fa, o ri: “U alusa vhana kha ano maitele a Sathane ndi khaedu i konḓaho vhukuma, zwihuluhulu arali u mubebi a re eṱhe. Fhedzi ndi na vhungoho ha uri Yehova u a mpfuna ngauri o ndededza kha zwililo na vhuṱungu nahone ho ngo tendela uri ndi tshenzhele zwine nda sa kone u zwi konḓelela.” (1 Vhakorinta 10:13) Sandra u na vhulwadze vhu shushaho vhu sa lafhei. Wahashu wa tshisadzini o sumbedza u dzhiela nṱha Sandra musi vhe buthanoni. Munna wa Sandra o ri: “Naho ro vha ri sa mu ḓivhi, u vha hawe na ndavha zwo ri ḓisela dakalo ḽihulu. Na  zwithu zwiṱuku zwi sumbedzaho lufuno zwi bvaho kha vhahashu, zwi ri sumbedza nḓila ine Yehova a ri funa ngayo zwa vhukuma.”

² Yehova o sika vhathu vhe na lutamo lwa u funa na u ḓipfa vha tshi funwa. Naho zwo ralo, zwo leluwa u nyabwa nga nṱhani ha malwadze kana thaidzo dza zwa dzitshelede kana ngauri a hu na mvelelo vhuḓinḓani hashu. Arali ra thoma u pfa u nga Yehova ha tsha ri funa, ri fanela u humbula uri ri vha ndeme khae na uri u hone, o fara tshanḓa tshashu tsha u ḽa nahone u khou ri thusa. A nga si vhuye a ri hangwa arali ri tshi fulufhedzea khae.—Yesaya 41:13; 49:15.

3. Ndi mini zwine zwa nga ri khwaṱhisedza uri lufuno lwa Yehova ndi lwa tshoṱhe?

³ Ṱhanzi dzo ambiwaho mathomoni dzo vha dzi na vhungoho ha uri Mudzimu o vha e nadzo zwifhingani zwi konḓaho. Ri nga vha na fulufhelo ḽi fanaho ḽa uri u ima na riṋe. (Psalme ya 118:6, 7) Kha ino thero, ri ḓo haseledza nga ha zwifhiwa zwiṋa zwine zwa sumbedza uri Yehova u a ri funa. Zwenezwi ndi (1) tsiko yawe, (2) Bivhili, (3) thabelo na (4) tshirengululi. U elekanya nga ha zwithu zwavhuḓi zwe Yehova a zwi ita zwi nga ri thusa u livhuha lufuno lwawe lwa tshoṱhe.—Vhalani Psalme ya 77:11, 12.

4. Ri guda mini kha tsiko ya Yehova?

⁴ Musi ri tshi lavhelesa tsiko ya Yehova, ri guda nḓila ine a ri funa ngayo zwa vhukuma. (Vharoma 1:20) Sa tsumbo, Yehova o sika ḽifhasi uri ri ite zwi fhiraho u sokou tshila khaḽo. O ri ṋea zwoṱhe zwine ra zwi shaya uri ri ḓiphine nga vhutshilo. Ri ṱoḓa u ḽa, fhedzi Yehova o ri ṋea mifuda ya zwiḽiwa zwine ra ḓikanzwa ngazwo! (Muhuweleli 9:7) Wahashu wa tshisadzini ane a pfi Catherine u takalela zwine a zwi vhona kha tsiko, zwihuluhulu nga tshimedzi ngei Canada. O ri: “Zwi a takadza vhukuma u vhona zwithu zwi tshi khou tshila—maluvha ane a mela nga tshifhinga tshao na zwiṋoni zwe zwa vha zwo pfuluwa zwi tshi dovha zwa vhuya, u katela na tshiṋoni tshiṱuku tshine tsha pfi hummingbird tshi tshi dovha tsha vhuya hune ra tshi ṋea hone zwiḽiwa tsini na fasiṱere ḽa khishi yanga. Yehova u fanela u vha a tshi ri funa vhukuma nge a ita uri ri takale vhukuma.” Khotsi ashu u funa tsiko yawe nahone u ṱoḓa na riṋe ri tshi ḓiphina ngayo.—Mishumo 14:16, 17.

5. Lufuno lwa Yehova lwo sumbedzwa hani kha nḓila ye vhathu vha sikwa ngayo?

⁵ Yehova o ri sika ri na vhukoni ha u ita mishumo yavhuḓi na u ḓiphina ngayo. (Muhuweleli 2:24) O ṋea vhathu mushumo wa u ḓadza ḽifhasi, u ḽi lima, u ṱhogomela khovhe, zwiṋoni na zwiṅwe zwithu zwi tshilaho khaḽo. (Genesi 1:26-28) Nahone o dovha a ri sika ri na pfaneleo dzavhuḓi uri ri kone u mu edzisa!—Vhaefesa 5:1.

6. Ndi ngani ri tshi fanela u dzhiela nṱha vhukuma Ipfi ḽa Mudzimu?

⁶ Yehova o ri ṋea Bivhili ngauri u a ri  funa vhukuma. I ri vhudza zwine ra fanela u zwi ḓivha nga hae na nḓila ine a ḓipfa ngayo nga ha vhathu. Sa tsumbo, Bivhili i ri vhudza nḓila ye Yehova a ḓipfa ngayo nga ha Vhaisiraele vhe kanzhi vha vha vha sa mu thetshelesi. Psalme ya 78:38 i ri: “Mudzimu Ene ndi wa khathutshelo, u hangwela mulandu, ha laṱi tshoṱhe; u ḓi dovha a dzima mbiti, ha vusi vhuhali hawe hoṱhe.” U elekanya nga ha yeneyi ndimana zwi ḓo ni thusa u vhona nḓila ine Yehova a ni funa ngayo na u vha na ndavha na inwi. Ri nga fulufhela uri Yehova u na ndavha na riṋe zwa vhukuma.—Vhalani 1 Petro 5:6, 7.

7. Ndi ngani Bivhili i tshi fanela u vha ya ndeme kha riṋe?

⁷ Bivhili i fanela u vha ya ndeme vhukuma kha riṋe. Ndi ngani? Ngauri Yehova u davhidzana na riṋe a tshi shumisa  Ipfi ḽawe. Musi mubebi na ṅwana vha tshi vha na nyambedzano, vha khwaṱhisa lufuno lwavho na u fulufhelana. Yehova ndi Khotsi ashu wa lufuno. Naho ri sa athu u vhuya ra mu vhona kana u pfa ipfi ḽawe, musi ri tshi vhala Bivhili zwi nga u khou davhidzana na riṋe nga ho livhaho. Ri fanela u bvela phanḓa ri tshi mu thetshelesa! (Yesaya 30:20, 21) Musi ri tshi vhala Ipfi ḽa Mudzimu, ri thoma u ḓivha na u fulufhela Yehova ane a ri dededza na u ri tsireledza.—Vhalani Psalme ya 19:7-11; Mirero 1:33.

8, 9. Ndi mini zwine Yehova a ṱoḓa ri tshi zwi ḓivha? Ṋeani tsumbo i bvaho Bivhilini.

⁸ Yehova u ṱoḓa ri tshi ḓivha uri u a ri funa nahone u ḓivha zwinzhi zwi fhiraho u sa fhelela hashu. U sedza zwivhuya kha riṋe. (2 Koronika 16:9) Kha ri ṱhogomele nḓila ye Yehova a vhona ngayo zwivhuya kha Khosi ya Yuda Yosafati. Yosafati o dzhia phetho i si yavhuḓi ya u ṱanganela na Khosi ya Isiraele Ahaba nahone vha ya u lwa na Vhasiria ngei Ramothe kha ḽa Gileada. Naho vhaporofita vha mazwifhi vha 400 vho vhudza Ahaba muvhi uri u ḓo kunda nndwani, Mika muporofita wa Yehova wa ngoho o vhudza Yosafati na Ahaba uri arali vha lwa vha ḓo kundwa. Nahone zwenezwo ndi zwe zwa itea kokotolo. Ahaba o fela nndwani nahone Yosafati o ponya nga lubuli lwa ṋeleṱe. Nga murahu ha nndwa, Yehova o shumisa Yehu uri a ṋee Yosafati nyeletshedzo kha vhukhakhi hawe. Naho zwo ralo, Yehu o dovha a ri khae: “Hu kha ḓi vha na zwivhuya zwe zwa wanala kha iwe.”—2 Koronika 18:4, 5, 18-22, 33, 34; 19:1-3.

⁹ Miṅwahani yo fhiraho, Yosafati o vhudza vhaḓinḓa, Vhalevi na vhotshifhe uri vha dalele miḓi yoṱhe ya Yuda uri vha gudise vhathu Mulayo wa Yehova. Vho vha vho bvelela vhukuma lwe na vhathu vha dziṅwe dzitshaka vha thoma u ḓivha Yehova. (2 Koronika 17:3-10) Naho nga murahu Yosafati o dzhia phetho i si yavhuḓi, Yehova ho ngo hangwa zwivhuya zwe a zwi ita vhutshiloni tshifhingani tsho fhiraho. Tsumbo yeneyi i a ri khuthadza vhukuma ngauri nga zwiṅwe zwifhinga ri a khakha. Naho zwo ralo, arali ra nga ita zwoṱhe zwine ra nga kona u itela u shumela Yehova, u ḓo bvela phanḓa a tshi ri funa nahone a nga si hangwe zwivhuya zwe ra zwi ita.

10, 11. (a) Ndi ngani thabelo i tshifhiwa tsha ndeme tshi bvaho ha Yehova? (b) Mudzimu a nga fhindula hani thabelo dzashu? (Sedzani tshifanyiso tsha u thoma.)

¹⁰ Khotsi wa lufuno u ḓiṋea tshifhinga tsha u thetshelesa vhana vhawe musi vha tshi ṱoḓa u amba nae. U ṱoḓa u ḓivha nḓila ine vha ḓipfa ngayo ngauri u na ndavha vhukuma navho. Khotsi ashu wa lufuno Yehova u ita zwi fanaho. U a ri thetshelesa musi ri tshi mu rabela. U amba na Khotsi ashu ndi ndugelo yavhuḓi vhukuma!

¹¹ Ri nga rabela Yehova tshifhinga tshiṅwe na tshiṅwe. Ndi Khonani yashu nahone u dzula o ḓiimisela u thetshelesa thabelo dzashu. Taylene we a bulwa mathomoni, o ri: “Ni nga amba nae tshiṅwe na tshiṅwe.” Musi ri tshi vhudza Yehova zwine ra zwi humbula nga ho dzikaho, a nga ri fhindula nga luṅwalo, thero i re kha khandiso dzashu kana ṱhuṱhuwedzo i bvaho kha vhahashu. Yehova u a pfa khumbelo dzashu dzi bvaho mbiluni nahone u a ri pfesesa naho hu si na muthu ane a ri pfesesa. Phindulo dzawe kha thabelo dzashu dzi sumbedza uri lufuno lwawe ndi lwa tshoṱhe.

12. Ndi ngani ri tshi fanela u guda thabelo dzi re Bivhilini? Ṋeani tsumbo.

 ¹² Ri nga guda ngudo dza ndeme kha thabelo dzi wanalaho Bivhilini. Nga zwiṅwe zwifhinga, zwi a thusa u guda dziṅwe dza dzenedzi thabelo kha vhurabeli ha muṱa. Ri ḓo khwinisa nḓila ine ra rabela ngayo musi ri tshi elekanya nga ha thabelo dzi bvaho mbiluni dza vhashumeli vha Mudzimu vha tshifhingani tsho fhiraho. Sa tsumbo, gudani nga ha thabelo ya Yona ya u ḓiṱukufhadza ya musi e thumbuni ya khovhe khulu. (Yona 1:17–2:10) Vusulusani thabelo ya Salomo i bvaho mbiluni, a tshi rabela Yehova musi a tshi ṋekedzela thembele. (1 Dzikhosi 8:22-53) Nahone ni elekanye nga ha thabelo ya Yesu ya tsumbo. (Mateo 6:9-13) Zwa ndeme vhukuma, tshifhinga tshoṱhe “zwoṱhe zwine na zwi ṱoḓa ni humbele Mudzimu.” Nga zwenezwo, “mulalo wa Mudzimu une wa fhira u ṱalukanya hoṱhe u ḓo tsireledza mbilu dzaṋu na maanḓa aṋu a muhumbulo.” U livhuha hashu lufuno lwa Yehova lwa tshoṱhe zwi ḓo bvela phanḓa zwi tshi engedzea.—Vhafilipi 4:6, 7.

13. Ndi tshibuli tshifhio tshine ra vha natsho nga nṱhani ha tshirengululi?

¹³ Yehova o ri ṋea tshifhiwa tsha tshirengululi uri “ri kone u wana vhutshilo.” (1 Yohane 4:9) Musi a tshi ambela kha nḓila ine Mudzimu a sumbedza ngayo lufuno, muapostola Paulo o ṅwala a ri: “Kristo o fela vhathu vha sa ofhi Mudzimu nga tshifhinga tsho vhewaho. A si kanzhi muthu a tshi nga fela muthu o lugaho; khamusi muthu o lugaho a nga ḓiimisela u fela muṅwe muthu. Fhedzi Mudzimu o ri sumbedza lufuno lwawe, ngauri musi ri tshi kha ḓi vha vhaitazwivhi, Kristo o ri fela.” (Vharoma 5:6-8) Tshirengululi ndi tsumbo yavhuḓi ya lufuno lwa Mudzimu nahone tshi ṋea vhathu tshibuli tsha u vha na vhushaka ha tsini nae.

14, 15. Tshirengululi tshi amba mini kha (a) vhaḓodzwa vha Vhakriste? (b) vhane vha vha na tshilavhelelwa tsha u tshila kha ḽifhasi?

¹⁴ Tshigwada tshiṱuku tsha Vhakriste tshi pfa tshi tshi funwa nga Yehova nga nḓila yo khetheaho. (Yohane 1:12, 13; 3:5-7) Mudzimu o ḓodza vhenevho nga muya mukhethwa, nga nṱhani ha zwenezwo, zwino ndi vhana vhawe. (Vharoma 8:15, 16) Samusi vhaṅwe vhavho vha tshi kha ḓi vha kha ḽifhasi, ndi ngani Paulo o amba uri vho dzula “khathihi na Kristo Yesu nahone a ri dzudza nae ṱaḓulu”? (Vhaefesa 2:6) Ndi ngauri Yehova o vha ṋea fulufhelo ḽa u tshila tshoṱhe ngei ṱaḓulu.—Vhaefesa 1:13, 14; Vhakolosa 1:5.

¹⁵ Vhoṱhe vha songo ḓodzwaho vha nga vha khonani dza Mudzimu arali vha sumbedza u vha na lutendo kha tshirengululi. Na vhone vha na tshilavhelelwa tsha u vha vhana vha Mudzimu na u tshila tshoṱhe kha ḽifhasi ḽa paradiso. Tshirengululi tshi dzumbulula nḓila ine Yehova a funa ngayo vhathu vhoṱhe. (Yohane 3:16)  Zwi takadza lungafhani u ḓivha uri arali ri tshi shumela Mudzimu nga u fulufhedzea, u ḓo ri ṋea vhutshilo ha khwine vhukuma shangoni ḽiswa! Nga zwenezwo, kha ri sumbedze uri ri dzhiela nṱha tshirengululi tshine tsha vha vhuṱanzi vhuhulwane ha uri Mudzimu u a ri funa lwa tshoṱhe.

16. Ri ḓo ita mini musi ro no elekanya nga ha lufuno lwa Mudzimu?

¹⁶ A zwi konadzei u vhalela zwithu zwinzhi zwe Yehova a ri sumbedza ngazwo uri u a ri funa. Khosi Davida o imba a ri: “Huno nṋe, zwi re mbiluni yau, Iwe Mudzimu, zwi a nkunda; a si u anda zwi tshi vhaliwa! Nda ri ndi a zwi vhala—zwi ḓala vhunga muṱavha.” (Psalme ya 139:17, 18) U elekanya nga ha nḓila nnzhi dzine Yehova a ri funa ngadzo, zwi ḓo ri ṱuṱuwedza uri na riṋe ri mu fune na u mu ṋea zwa khwinesa.

17, 18. Ndi dzifhio dziṅwe nḓila dzine ra nga sumbedza ngadzo uri ri funa Mudzimu?

¹⁷ Hu na nḓila nnzhi dzine ra nga sumbedza ngadzo Yehova uri ri a mu funa. Sa tsumbo, ri nga sumbedza uri ri funa Yehova nga u huwelela mafhungo maḓifha a Muvhuso kha vhaṅwe nga u fhisea. (Mateo 24:14; 28:19, 20) Ri nga dovha ra sumbedza u funa Mudzimu nga u konḓelela milingo ine ya linga lutendo lwashu nga u fulufhedzea. (Vhalani Psalme ya 84:11; Yakobo 1:2-5.) Naho milingo yashu i mihulwane, ri nga vha na vhungoho ha uri Yehova u a vhona vhuṱungu hashu nahone u ḓo ri thusa ngauri ri vha ndeme khae.—Psalme ya 56:8.

¹⁸ U funa hashu Yehova zwi ri ṱuṱuwedza u elekanya nga ha zwithu zwoṱhe zwavhuḓi zwe a zwi sika. Ri sumbedza uri ri funa Yehova na Ipfi ḽawe nga u vha vhagudi vhavhuḓi vha Bivhili. Ri rabela Yehova tshifhinga tshoṱhe ngauri ri a mu funa nahone ri ṱoḓa u khwaṱhisa vhushaka hashu nae. Nahone musi ri tshi elekanya nga ha tshifhiwa tshawe tsha ndeme tsha tshirengululi, u mu funa hashu hu ḓo engedzea vhukuma. (1 Yohane 2:1, 2) Zwenezwi zwi sokou vha dziṅwe dza nḓila nnzhi dzine ra sumbedza ngadzo uri ri dzhiela nṱha lufuno lwa Yehova lwa tshoṱhe.