1, 2. Mukriste muṅwe na muṅwe u na tshipikwa tshifhio? Ṋeani tsumbo.

NDI mini zwine mufumakadzi a zwi sedza musi a tshi khou khetha mitshelo makete? Khamusi u vha a sa khou sedza vhuhulu kana mutengo wa fhasi wa mitshelo. Nṱhani hazwo, u sedza mutshelo u nukhelelaho zwavhuḓi, wo vhibvaho na une wa fanela u ḽiwa. U ṱoḓa mutshelo wo vhibvaho.

² Musi muthu o no guda nga ha Yehova nahone a dzhia phetho ya u lovhedzwa, vhushaka hawe na Mudzimu vhu bvela phanḓa vhu tshi aluwa. Tshipikwa tshawe ndi u vha Mukriste o vhibvaho. Honohu u vhibva a hu ambeli kha u aluwa ha miṅwaha. Zwi ambela kha u aluwa nga lwa muya zwine zwa amba u vha na vhushaka ha tsini-tsini na Yehova. Muapostola Paulo o vha a tshi ṱoḓa Vhakriste vha Efesa vha tshi vhibva. O vha ṱuṱuwedza uri vha vhe vhathihi kha lutendo nahone vha dzule vha tshi guda nga ha Yesu u itela uri vha vhe ‘vhanna vho vhinaho u fana na Kristo.’—Vhaefesa 4:13.

3. Tshivhidzo tsha Efesa tshi vhambedzwa hani na vhathu vha Yehova ṋamusi?

 ³ Tshivhidzo tsha Efesa tsho vha tshi hone lwa miṅwaha yo vhalaho musi Paulo a tshi vha ṅwalela vhurifhi. Vhanzhi kha tshenetsho tshivhidzo, vho vha vhe na tshenzhelo nahone vhe Vhakriste vho vhibvaho. Naho zwo ralo, ho vha hu na vhaṅwe vhe vha vha vha tshi ṱoḓa uri vhushaka havho na Yehova vhu khwaṱhe vhukuma. Nga hu fanaho ṋamusi, vhahashu vhanzhi vho shumela Yehova lwa tshifhinga tshilapfu nahone vho no vha Vhakriste vho vhibvaho. Naho zwo ralo, vhaṅwe tshivhidzoni a vha athu u swikelela kha honoho vhuimo. Sa tsumbo, vhanzhi vha a lovhedzwa ṅwaha muṅwe na muṅwe, nga zwenezwo, vhaṅwe vha kha ḓi fanela u aluwa u itela uri vha vhibve. Hu pfi mini nga inwi?—Vhakolosa 2:6, 7.

4, 5. Vhakriste vho vhibvaho vho fhambana hani, fhedzi ndi mini zwine vhoṱhe vha fana ngazwo? (Sedzani tshifanyiso tsha u thoma.)

⁴ Musi ni tshi sedza mutshelo wo vhibvaho u re makete, ni a kona u zwi vhona uri a u fani kokotolo na miṅwe. Naho zwo ralo, hu na zwiṅwe zwithu zwine ya fana ngazwo zwine zwa i ṱalusa sa yo vhibvaho. Zwo tou ralo na kha Vhakriste vho vhibvaho. A vha fani kokotolo. Vha bva kha mashango na vhubvo ho fhamba-fhambanaho. A vha lingani nga miṅwaha nahone a vha takaleli zwithu zwi fanaho. Naho zwo ralo, Vhakriste vhoṱhe vho vhibvaho vha na pfaneleo dzi fanaho dzine dza vha ṱalusa sa vho vhibvaho. Ndi dzifhio dziṅwe dza dzenedzo pfaneleo?

⁵ Mukriste o vhibvaho u edzisa Yesu na u tevhela “ṋayo dzawe nga vhuronwane.” (1 Petro 2:21) Yesu o amba uri ndi zwa ndeme vhukuma uri muthu a fune Yehova nga mbilu yawe yoṱhe, zwoṱhe zwine a vha zwone, muhumbulo wawe woṱhe na u funa vhahawe vhunga a tshi ḓifuna. (Mateo 22:37-39) Mukriste o vhibvaho u lingedza nga nungo dzoṱhe u thetshelesa yeneyo nyeletshedzo. Nḓila ine a tshila ngayo i sumbedza uri vhushaka hawe na Yehova na u funa hawe vhaṅwe zwi tshi bva mbiluni ndi zwa ndeme vhukuma khae.

6, 7. (a) Ndi dzifhio dziṅwe pfaneleo dzine dza ṱalusa Mukriste o vhibvaho? (b) Ndi mini zwine ra fanela u ḓivhudzisa zwone?

⁶ Lufuno ndi iṅwe ya pfaneleo nnzhi ine Mukriste o vhibvaho a vha nayo. (Vhagalata 5:22, 23) U dovha a sumbedza u vuḓa, u ḓifara na u sa fhela mbilu. Dzenedzi pfaneleo dzi nga mu thusa u konḓelela vhuimo  vhu konḓaho a sa sinyuwi na u konḓelela u nyabwa a sa fulufhuwi. Kha pfunzo yawe ya muthu nga eṱhe, Mukriste o vhibvaho u bvela phanḓa a tshi ṱoḓa maitele a Bivhili ane a mu thusa u ḓivha zwo lugaho na zwi songo lugaho. Nga zwenezwo, musi a tshi shumisa luvalo lwawe lwo gudiswaho nga Bivhili, u ḓo kona u dzhia phetho dza vhuṱali. Mukriste o vhibvaho u a ḓiṱukufhadza, ngauralo, u tenda uri vhulivhisi na zwilinganyo zwa Yehova zwi khwine kha zwawe. * (Sedzani ṱhaluso i re magumoni a siaṱari.) U huwelela mafhungo maḓifha nga u fhisea nahone u ita zwoṱhe zwine a nga kona u itela u thusa tshivhidzo uri tshi dzule tshi na vhuthihi.

⁷ Hu sa londwi uri ri na miṅwaha mingana ri tshi khou shumela Yehova, muṅwe na muṅwe washu a nga ḓivhudzisa uri: ‘Naa hu na tshanduko dzine nda nga dzi ita u itela u edzisa Yesu nga vhuronwane? Naa hu na hune nda nga khwinisa hone?’

8. Yesu o vha a tshi ḓivha na u pfesesa Bivhili lungafhani?

⁸ Yesu Kristo o vha a tshi ḓivha na u pfesesa zwavhuḓi Maṅwalo. Na musi e na miṅwaha ya 12, o shumisa Maṅwalo musi  a tshi amba na vhagudisi thembeleni. “Vhoṱhe vhe vha vha vho mu thetshelesa, tshifhinga tshoṱhe vho vha vha tshi mangadzwa nga nḓila ine a pfesesa ngayo na nga phindulo dzawe.” (Luka 2:46, 47) Musi a tshi khou huwelela, o shumisa Ipfi ḽa Mudzimu nga vhuṱali u itela u fhumudza maswina awe.—Mateo 22:41-46.

9. (a) Ndi mbekanyo ifhio ya u guda ine Mukriste o vhibvaho a vha nayo? (b) Ndi ngani ri tshi guda Bivhili?

⁹ Muthu ane a ṱoḓa u vha Mukriste o vhibvaho, u edzisa tsumbo ya Yesu nahone u ṱoḓa u pfesesa Bivhili nga hune a nga kona ngaho. U ṱoḓa ngoho yo dzikaho Maṅwaloni tshifhinga tshoṱhe ngauri u a zwi ḓivha uri “zwiḽiwa zwo dziaho ndi zwa vhathu vho vhibvaho.” (Vhaheberu 5:14) Mukriste o vhibvaho u ṱoḓa u vha na “nḓivho yo teaho” ya Bivhili. (Vhaefesa 4:13) Nga zwenezwo, ḓivhudziseni uri: ‘Naa ndi vhala Bivhili ḓuvha ḽiṅwe na ḽiṅwe? Naa ndi na mbekanyo ya pfunzo ya muthu nga eṱhe? Naa ndi a vha na vhurabeli ha muṱa vhege iṅwe na iṅwe?’ Musi ni tshi guda Bivhili, ṱoḓani maitele ane a nga ni thusa u ḓivha nḓila ine Yehova a humbula na u ḓipfa ngayo. Nga zwenezwo, shumisani enea maitele musi ni tshi dzhia phetho. Zwenezwo zwi ḓo ni thusa uri ni sendele tsini-tsini na Yehova.

10. Mukriste o vhibvaho u ḓipfa hani nga ha nyeletshedzo na maitele a Mudzimu?

¹⁰ Mukriste o vhibvaho u fanela u ita zwo engedzeaho u fhira u sokou ḓivha zwine Bivhili ya zwi amba. U fanela u funa nyeletshedzo na maitele a Mudzimu. Nga zwenezwo, u sumbedza lwonolwu lufuno nga lutamo lwawe lwa u ita zwine Yehova a zwi funa nṱhani ha zwine ene muṋe a zwi funa. U dovha a shandula matshilele awe, mahumbulele na zwine a zwi ita. Sa tsumbo, u edzisa Yesu nahone u vha na vhumuthu vhuswa, “he ha sikwa u ya nga zwine Mudzimu a zwi funa, zwi tshi bva kha u luga ha ngoho na u fulufhedzea.” (Vhalani Vhaefesa 4:22-24.) Ndi zwa ndeme u humbula uri Mudzimu o shumisa muya wawe mukhethwa u dededza vhaṅwali vha Bivhili. Ngauralo, musi Mukriste a tshi guda Bivhili, muya mukhethwa wa Mudzimu u mu thusa uri a vhe na nḓivho yo engedzeaho, lufuno lwo engedzeaho na u vha na vhushaka ho khwaṱhaho na Yehova.

11. Yesu o tshenzhela mini musi a tshi kha ḓi vha kha ḽifhasi?

¹¹ Yesu o vha e munna o fhelelaho. Naho zwo ralo, musi a tshi kha ḓi vha kha ḽifhasi, Yesu o vha o tangwa nga vhathu vha songo fhelelaho. Vhabebi vhawe, vharathu vhawe na khaladzi dzawe vhoṱhe vho vha vha songo fhelela. Na vhatevheli vha Yesu vha tsini-tsini vho sumbedza pfaneleo dzi ngaho u ḓikukumusa na tseḓa. Sa tsumbo, vhusiku ha musi a sa athu u fa, vhafunziwa vhawe vho vusa khani “ya uri ndi nnyi we a vha a tshi vhonala e muhulwane khavho.” (Luka 22:24) Hu sa londwi mahumbulele avho a songo fhelelaho, Yesu o vha a tshi zwi ḓivha uri hu si kale vhatevheli vhawe vha ḓo vha Vhakriste vho vhibvaho nahone vha ḓo vha tshivhidzo tshi re na vhuthihi. Nga honoho vhusiku, Yesu o vha rabelela uri vha vhe na vhuthihi. O humbela Khotsi awe wa ṱaḓulu uri vhoṱhe vha vhe vhathihi, a ri: “Samusi iwe Khotsi u na vhuthihi na nṋe, na nṋe ndi na vhuthihi na iwe.” O dovha a ri: “Uri vha vhe na vhuthihi samusi na riṋe ri na vhuthihi.”—Yohane 17:21, 22.

12, 13. (a) Ndi tshifhio tshipikwa tshashu sa Vhakriste? (b) Wahashu o guda hani u ṱuṱuwedza vhuthihi?

 ¹² Mukriste o vhibvaho u ṱuṱuwedza vhuthihi tshivhidzoni. (Vhalani Vhaefesa 4:1-6, 15, 16.) Sa Vhakriste, tshipikwa tshashu ndi u vha na ‘vhuthihi na muṅwe na muṅwe,’ zwine zwa amba u shumisana nga vhuthihi. U itela u vha na vhuthihi ho raloho, Mukriste u fanela u ḓiṱukufhadza. Naho a tshi kwamea nga u sa fhelela ha vhaṅwe, Mukriste o vhibvaho u shuma nga maanḓa u itela uri tshivhidzoni hu dzule hu na vhuthihi ho khwaṱhaho. Nga zwenezwo, ḓivhudziseni uri: ‘Ndi aravha hani musi wahashu a tshi ita vhukhakhi? Ndi ḓipfa hani musi ndi tshi vhaiswa nga muṅwe muthu? Naa kanzhi ndi a litsha u amba na onoyo muthu? Kana naa ndi lingedza u vusulusa vhukonani?’ Mukriste o vhibvaho u ṱoḓa u kunda thaidzo nṱhani ha u vha thaidzo kha vhaṅwe.

¹³ Ṱhogomelani tsumbo ya Uwe. Tshifhingani tsho fhiraho, o vha a tshi tendela vhukhakhi ha vhahashu vhu tshi mu sinyusa. Nga zwenezwo, o dzhia phetho ya u shumisa Bivhili na Insight on the Scriptures u guda nga ha vhutshilo ha Davida. Ndi ngani o khetha Davida? Ngauri Davida o vhuya a vha na thaidzo na vhaṅwe vhashumeli vha Mudzimu. Sa tsumbo, Khosi Saulo o lingedza u vhulaha Davida, vhaṅwe vha lingedza u mu kanḓa nga matombo, nahone o seiwa na nga mufumakadzi wawe. (1 Samuele 19:9-11; 30:1-6; 2 Samuele 6:14-22) Fhedzi hu sa londwi zwe vhaṅwe vha mu ita, Davida o funa na u fulufhela Yehova. Davida o dovha a sumbedza khathutshelo. Uwe o tenda uri o vha a tshi fanela u ita zwi fanaho. Musi a tshi khou guda Bivhili, o guda uri u fanela u shandula nḓila ine a ḓipfa ngayo nga vhahawe vha songo fhelelaho. O vha a tshi fanela uri a litshe u humbula vhukhakhi havho nahone a ṱuṱuwedze vhuthihi tshivhidzoni. Naa ndi tshipikwa tshaṋu u ita nga u ralo?

14. Yesu o khetha hani khonani dzawe?

¹⁴ Yesu Kristo o vha a tshi dzhenea. Vhanna na vhafumakadzi, vhaswa na vhaaluwa, u katela na vhana, vho pfa vho vhofholowa musi vhe na Yesu. Fhedzi o khetha khonani dzawe dza tsini nga vhuronwane. O vhudza vhaapostola vhawe a ri: “Inwi ni khonani dzanga arali ni tshi ita zwine nda ni laya.” (Yohane 15:14) Yesu o khetha khonani dzawe dza tsini kha vhe vha mu tevhela nga u fulufhedzea, vhe vha vha vha tshi mu funa na u shumela Yehova. Naa ni khetha khonani dzine dza funa Yehova zwi tshi bva mbiluni? Ndi ngani zwenezwi zwi zwa ndeme?

15. Vhaswa vha nga vhuyelwa hani nga u vhumba vhukonani na Vhakriste vho vhibvaho?

¹⁵ Mitshelo minzhi i vhibva zwavhuḓi musi hu tshi fhisa. Nga nḓila i fanaho, lufuno lwa vhahashu lu nga ni thusa uri ni vhe Mukriste o vhibvaho. Naa ni tshee muswa nahone ni khou lingedza u dzhia phetho ya zwine na ṱoḓa u zwi ita nga vhutshilo haṋu? Arali zwo ralo, ndi vhuṱali u khetha khonani dzine dza vha na tshifhinga  tshilapfu dzi tshi khou shumela Yehova na dzine dza ṱuṱuwedza vhuthihi tshivhidzoni. Vha nga vha vho vhuya vha sedzana na thaidzo vhutshiloni havho nahone vha konḓelela vhuleme vha tshi khou shumela Yehova. Vha nga ni thusa u khetha vhutshilo ha khwinesa. Musi ni tshi fhedza tshifhinga navho, vha nga ni thusa uri ni dzhie phetho dza vhuṱali na u aluwa sa Mukriste.—Vhalani Vhaheberu 5:14.

16. Vhahashu vho vhibvaho tshivhidzoni vho ṱuṱuwedza hani wahashu musi a tshee muswa?

¹⁶ Helga u humbula musi a tshi kha ḓi dzhena tshikolo, vhunzhi ha vhe a dzhena navho kilasini vho vha vha tshi amba nga ha zwipikwa zwavho zwa vhumatshelo. Vhunzhi havho vho vha vha tshi ṱoḓa u ya yunivesithi u itela u bvelela. Naho zwo ralo, Helga o amba na Vhakriste vho vhibvaho tshivhidzoni. O ri: “Vhunzhi havho vho vha vhe vhathu vhahulwane kha nṋe, nahone vho nthusa vhukuma. Vho nṱuṱuwedza uri ndi dzhenele tshumelo ya tshifhinga tsho ḓalaho. Nga murahu, ndo kona u fhedza miṅwaha miṱanu ndi tshumeloni ya vhuvulanḓila. Zwino, nga murahu ha miṅwaha, ndo takala ngauri ndo livhisa ṱhogomelo yanga tshumeloni ya Yehova ndi tshee muswa. A thina tshiitisi tsha u ḓisola nga phetho yanga.” 

17, 18. Ri nga shumela hani Yehova nga nḓila ya khwine?

¹⁷ Musi ri tshi edzisa Yesu, ri ḓo aluwa nahone ra vha Vhakriste vho vhibvaho. Ri ḓo sendela tsini na Yehova nahone lutamo lwashu lwa u mu shumela lu ḓo engedzea. Muthu o vhibvaho u shumela Yehova khwine. Yesu o ṱuṱuwedza vhatevheli vhawe a ri: “Na tshaṋu tshedza kha tshi vhonetshele vhathu, uri vha vhone mishumo yaṋu mivhuya nahone vha ṋee Khotsi aṋu wa ṱaḓulu vhugala.”—Mateo 5:16.

¹⁸ Ro guda nḓila ine Mukriste o vhibvaho a nga tikedza ngayo tshivhidzo. Mukriste u dovha a sumbedza uri o vhibva nga nḓila ine a shumisa ngayo luvalo lwawe. Luvalo lwashu lu nga ri thusa hani u dzhia phetho dza vhuṱali? Nahone ri nga ṱhonifha hani luvalo lwa vhaṅwe? Ri ḓo fhindula dzenedzi mbudziso kha thero i tevhelaho.