1, 2. Yehova o ri gudisa hani u mu funa?

NḒILA ya khwine ine khotsi a nga gudisa ngayo vhana vhawe ndi nga u vha vhetshela tsumbo. Musi a tshi funa vhana vhawe, u vha a tshi khou vha gudisa u funa. A hu na muthu na muthihi we a vhuya a ri funa u fana na nḓila ine Khotsi ashu, Yehova a ri funa ngayo. Nga zwenezwo, ri guda u funa “ngauri ndi ene o thomaho u ri funa.”—1 Yohane 4:19.

² Yehova o sumbedza uri o ‘thoma u ri funa’ nga nḓila-ḓe? Bivhili i ri: “Musi ri tshi kha ḓi vha vhaitazwivhi, Kristo o ri fela.” (Vharoma 5:8) Khotsi ashu wa lufuno Yehova o ṋekedza Murwa wawe sa tshirengululi u itela u ri vhofholola kha tshivhi na lufu. Tshenetshi tshifhiwa tsha ndeme tsho ita uri zwi konadzee uri ri sendele tsini na Yehova na u mu funa. Yehova o vhea tsumbo nga u ṋekedza tshiṱhavhelo tshihulwane. O ri gudisa uri ri fanela u funa nga nḓila i sumbedzaho uri a ri na tseḓa nahone ri na mafunda.—1 Yohane 4:10.

3, 4. Ri sumbedza hani uri ri funa Mudzimu?

³ Lufuno ndi pfaneleo khulwane ya Yehova. Nga zwenezwo, ri a kona u pfesesa uri ndi ngani Yesu o amba uri ndaela ya ndeme vhukuma ndi ya uri: “U tea u funa Yehova Mudzimu  wau nga mbilu yau yoṱhe, na nga zwoṱhe zwine wa vha zwone, na nga ṱhalukanyo yau yoṱhe, na nga nungo dzau dzoṱhe.” (Marko 12:30) Yehova u ṱoḓa ri tshi mu funa nga ‘mbilu yashu yoṱhe.’ Zwi ḓo pfisa Yehova vhuṱungu arali ri tshi funa muṅwe muthu kana tshiṅwe tshithu u mu fhira. Fhedzi lufuno lwashu a lwo ngo fanela u sokou vha lwa maḓipfele. Yehova u dovha a lavhelela uri ri mu fune nga ‘ṱhalukanyo yashu yoṱhe’ na nga ‘nungo dzashu dzoṱhe.’ Zwenezwi zwi amba uri nḓila ine ra funa ngayo Yehova i katela nḓila ine ra humbula ngayo na zwine ra zwi ita.—Vhalani Mixa 6:8.

⁴ Nga zwenezwo, ri fanela u funa Yehova nga zwoṱhe zwine ra vha zwone na nga zwoṱhe zwine ra vha nazwo. Nga u mu vhea u thoma vhutshiloni hashu, ri sumbedza uri ri a mu funa zwa vhukuma. Kha thero yo fhiraho, ro haseledza nḓila nṋa dzine Yehova a sumbedza ngadzo lufuno lwawe luhulwane kha vhana vhawe. Kha ri vhone nḓila ine ra nga engedza ngayo lufuno lwashu kha Yehova na u mu sumbedza uri ri a mu funa.

5. Musi ri tshi humbula nga ha zwoṱhe zwe Yehova a ri itela zwone, ri ṱoḓa u ita mini?

⁵ Musi muṅwe muthu a tshi ni ṋea tshifhiwa, kanzhi ni sumbedza uri ni a livhuha. Nahone ngauri ni vhona tshenetsho tshifhiwa tshi tsha ndeme, ni a tshi shumisa. Yakobo o ṅwala uri: “Tshifhiwa tshiṅwe na tshiṅwe tshavhuḓi na tsho fhelelaho tshi bva ṱaḓulu, tshi tsa tshi tshi bva ha Khotsi wa tshedza tsha ṱaḓulu a sa shanduki u fana na mirunzi i sudzuluwaho.” (Yakobo 1:17) Ri a livhuha vhukuma uri Yehova u ri ṋea zwoṱhe zwine ra zwi shaya u itela u tshila na uri ri takale. Ri a ṱhogomela nḓila ine a ri funa ngayo nahone na riṋe ri a ṱoḓa u mu sumbedza uri ri a mu funa. Naa yeneyo ndi nḓila ine na ḓipfa ngayo?

6. Vhaisiraele vho vha vha tshi fanela u ita mini arali vha tshi ṱoḓa Yehova a tshi bvela phanḓa a tshi vha fhaṱutshedza?

⁶ Vhaisiraele vho ṱanganedza zwithu zwinzhi zwavhuḓi zwi bvaho ha Yehova. Lwa miṅwaha ya maḓana, o vha livhisa nga milayo yawe nahone a vha ṋea zwiṅwe na zwiṅwe zwe vha vha vha tshi zwi shaya u itela u tshila. (Doiteronomio 4:7, 8) Nahone Vhaisiraele vho vha vha tshi nga sumbedza u livhuha Yehova nga u thetshelesa yeneyo milayo. Sa tsumbo, musi vha tshi ṋekedza zwiṱhavhelo kha Yehova, vho vha vha tshi fanela u mu ṋea “zwa phanḓa zwa zwiranzhe” zwa masimu. (Ekisodo 23:19) Vhaisiraele vho vha vha tshi ḓivha uri Yehova u ḓo bvela phanḓa a tshi vha fhaṱutshedza arali vha mu thetshelesa nahone vha mu ṋea zwa khwine.—Vhalani Doiteronomio 8:7-11.

7. Ri nga shumisa hani “lupfumo” lwashu u sumbedza Yehova uri ri a mu funa?

⁷ Na riṋe ri nga sumbedza uri ri funa Yehova nga u mu ṋea “lupfumo” lwashu. (Mirero 3:9) Ri ita zwenezwi nga u shumisa zwine ra vha nazwo u itela u mu hulisa. Sa tsumbo, ri nga ṋeela u itela u tikedza mushumo wa Muvhuso tshivhidzoni tshashu na wa shango ḽoṱhe. Hu sa londwi uri ro pfuma kana ri a shaya, roṱhe ri nga shumisa zwine ra vha nazwo u sumbedza uri ri funa Yehova. (2 Vhakorinta 8:12) Fhedzi hu na dziṅwe nḓila dzine ra nga sumbedza ngadzo Yehova uri ri a mu funa.

8, 9. Ndi ifhio iṅwe nḓila ine ra nga sumbedza ngayo Yehova uri ri a mu funa? Mike na muṱa wawe vho ita mini?

 ⁸ Yesu o ri gudisa uri ri dzule ri tshi ṱoḓa Muvhuso u thoma nahone ri songo vhilaela nga ha zwiḽiwa na zwiambaro. Khotsi ashu u fulufhedzisa u ri ṋea zwine ra zwi shaya. (Mateo 6:31-33) Ri fulufhela Yehova nahone ri a zwi ḓivha uri u ḓo ḓadzisa ḽeneḽo fulufhedziso. Musi ni tshi funa muthu zwa vhukuma, ni a mu fulufhela. Zwi re zwone ndi uri musi ri tshi fulufhela Yehova nga ho engedzeaho, ri ḓo bvela phanḓa ri tshi sumbedza uri ri a mu funa. (Psalme ya 143:8) Nga zwenezwo, ri nga ḓivhudzisa uri: ‘Naa ndugiselelo dzanga, nḓila ine nda shumisa ngayo tshifhinga tshanga na nungo dzanga zwi sumbedza uri ndi funa Yehova zwa vhukuma? Naa ndi ḓitika nga Yehova ḓuvha ḽiṅwe na ḽiṅwe uri a ṱhogomele zwishaiwa zwanga?’

⁹ Mike na muṱa wawe vho fulufhela Yehova. Musi Mike a tshee muswa, o vha a tshi ṱoḓa u huwelela kha ḽiṅwe shango. Na musi o no vhinga nahone e na vhana vhavhili, o vha a tshi kha ḓi vha na ḽeneḽo dzangalelo. Musi Mike na muṱa wawe vha tshi vhala nga ha vhahashu vhe vha shuma hune ha vha na ṱhoḓea khulwane, vho dzhia phetho ya u leludza vhutshilo havho. Vho rengisa nnḓu yavho nahone vha pfulutshela kha nnḓu ṱhukhu. Mike o dovha a fhungudza vhashumi kha bindu ḽawe ḽa u kunakisa nahone a wana iṅwe nḓila ine a nga langa ngayo bindu ḽawe e kha ḽiṅwe shango a tshi shumisa Inthanethe. Nga zwenezwo, Mike na muṱa wawe vho kona u pfulutshela kha ḽiṅwe shango nahone vho takalela vhukuma vhuḓinḓa havho henengei. Mike o ri: “Ro vhona u ḓadzea ha maipfi a Yesu o ṅwalwaho kha Mateo 6:33.”

10. Ndi ngani zwi zwavhuḓi u elekanya nga ha zwine ra zwi guda nga ha Yehova u fana na Khosi Davida?

¹⁰ Khosi Davida o vhuya a ṅwala uri: “Ḽiṱaḓulu ḽi amba vhurena ha Mudzimu; lutombo lu bula mishumo ya zwanḓa zwawe.” O dovha a ri: “Milayo ya Yehova yo luga i rudza muya wanga. Vhuṱanzi ha Yehova a vhu khakhi, vhu ṱalifhisa o vuḓaho.” Musi Davida a tshi elekanya nga ha milayo ya Yehova ya vhuṱali na tsiko, o sendela tsini-tsini na Yehova nahone o vha a tshi ṱoḓa u mu sumbedza uri u a mu funa. Davida o ri: “Takalela-ha fhungo ḽa mulomo wanga, na zwiné mbilu yanga ya zwi elekanya phanḓa hau; Yehova, Dzhavhelo ḽanga, [Mulamuleli wanga]!”—Psalme ya 19:1, 7, 14.

11. Ri nga shumisa hani nḓivho ine Yehova a ri ṋea yone u itela u sumbedza uri ri a mu funa? (Sedzani tshifanyiso tsha u thoma.)

¹¹ Ṋamusi, Yehova u ri gudisa zwinzhi nga ha ene muṋe, ndivho yawe, tsiko yawe na Ipfi ḽawe. Shango ḽi ṱuṱuwedza vhathu u guda, fhedzi kanzhi pfunzo ya nṱha i ita uri vha si tsha funa Mudzimu. Zwo fhambanaho na zwenezwo, Yehova ha ṱoḓi uri ri sokou u vha na nḓivho, fhedzi u dovha a ri thusa uri ri ṱalifhe. U ṱoḓa ri tshi shumisa zwine ra zwi guda u itela u ḓivhuyedza na u thusa vhaṅwe. (Mirero 4:5-7)  Sa tsumbo, u ṱoḓa ri tshi vhudza vhaṅwe “nḓivho yo teaho ya ngoho” na u vha thusa uri vha tshidzwe. (1 Timotheo 2:4) Ri sumbedza uri ri funa Yehova na vhathu nga u gudisa vhanzhi nga hune ra nga kona ngaho nga ha Muvhuso wa Mudzimu na zwine wa ḓo itela zwone vhathu.—Vhalani Psalme ya 66:16, 17.

12. Muṅwe muswa o ri mini nga ha tshifhiwa tshi bvaho ha Yehova?

¹² Na vhaswa vha nga elekanya nga ha zwoṱhe zwe Yehova a vha ṋea na u vha gudisa zwone. Shannon u kha ḓi humbula nḓila ye a ḓipfa ngayo buthanoni ḽe a ya khaḽo musi e na miṅwaha ya 11 nahone murathu wawe e na miṅwaha ya 10. Nga tshifhinga tsha Buthano ḽa Tshiṱiriki ḽine ḽa vha na tshiṱoho tshine tsha ri “U Ofha Mudzimu,” vhaswa vhoṱhe u katela na Shannon na murathu wawe, vho humbelwa uri vha dzule fhethu huthihi. Mathomoni o vha o tshuwa. Fhedzi nga murahu, o mangala musi muswa muṅwe na muṅwe a tshi ṋewa bugu Mbudziso Dzine Vhaswa Vha Dzi Vhudzisa—Phindulo Dzi Shumaho. Tshenetsho tshifhiwa tshavhuḓi tsho ita uri a ḓipfe hani nga ha Yehova? O ri: “Ndo thoma u ṱhogomela uri Yehova ndi wa vhukuma nahone u a mpfuna vhukuma. Ro takala lungafhani uri Yehova Mudzimu washu u ri ṋea zwifhiwa zwavhuḓi!”

13, 14. Ri fanela u ita mini musi Yehova a tshi ri kaidza, nahone ndi ngani?

¹³ Bivhili i ri humbudza uri: “Yehova u rwa uyo ane a mu funa; u nga khotsi ane a rwa ṅwana uyo ane a mu takalela.” (Mirero  3:12) Musi ri tshi tenda u kaidzwa nga Yehova na u gudiswa ngae, zwi ri thusa u ita zwo lugaho nahone ri vha na mulalo. Ndi ngoho uri “a hu na ndayo ine ya takadza musi i tshi ṋewa nga tshenetsho tshifhinga, fhedzi i a vhavha.” (Vhaheberu 12:11) Naho zwo ralo, ri fanela u ita mini musi Yehova a tshi ri kaidza? Ri songo vhuya ra nyadza nyeletshedzo ya Yehova kana u bvela phanḓa ro sinyuwa arali ri sa i takaleli. Ri funa Yehova, nga zwenezwo, ri a mu thetshelesa nahone ri ita tshanduko dzi ṱoḓeaho.

¹⁴ Misini ya Maleaxi, Vhayuda vhanzhi vho vha vha sa thetshelesi Yehova. Vho vha vhe si na ndavha na uri u dzhia hani zwiṱhavhelo zwavho. Nga zwenezwo, Yehova o vha kaidza. (Vhalani Maleaxi 1:12, 13.) Yehova o vha kaidza lunzhi-lunzhi, fhedzi a vho ngo thetshelesa. Ngauralo, o vha vhudza uri: “Ndi ḓo ni rumela ḽa ma-ṱula-khombo; dziphaṱhutshedzo dzaṋu ndi ḓo dzi ita ma-ṱula-khombo.” (Maleaxi 2:1, 2) Zwi tou vha khagala uri arali ra dzula ri sa thetshelesi nyeletshedzo ya Yehova kana ra vhona i si ya ndeme, ri ḓo xelelwa nga vhushaka hashu nae.

15. Ndi mini zwine ra fanela u zwi iledza?

¹⁵ Shango ḽa Sathane ḽi ṱuṱuwedza vhathu uri vha ḓikukumuse na u vha na tseḓa. Vhanzhi a vha ṱoḓi u khakhululwa kana u vhudzwa zwine vha fanela u ita. Vhaṅwe vha thetshelesa nyeletshedzo u itela u bva mulanduni. A ro ngo fanela u ita nga u ralo. Bivhili i ri vhudza uri ri “songo edzisa nḓila dza ano maitele a zwithu.” Nṱhani hazwo, ri fanela u pfesesa zwine Yehova a zwi lavhelela kha riṋe na u ita zwine zwa mu takadza. (Vharoma 12:2) Yehova u shumisa ndangulo yawe u itela u ri ṋea nyeletshedzo nga tshifhinga tsho teaho. Sa tsumbo, ri a humbudzwa nga ha nḓila ine vhathu vha tshinnani na vha tshisadzini vha fanela u ḓifara ngayo musi vhe vhoṱhe. Ri dovha ra humbudzwa nga ha nḓila ya u khetha khonani dzashu na nḓila ine ra nga khetha ngayo zwine ra zwi ita musi ro awela na u ḓimvumvusa. Musi ri tshi tenda u kaidzwa nga Yehova nahone ra ita tshanduko u itela u  mu takadza, ri sumbedza uri ri livhuha vhulivhisi hawe nahone ri a mu funa zwa vhukuma.—Yohane 14:31; Vharoma 6:17.

16, 17. (a) Ndi ngani ri tshi fanela u ḓivha zwine Yehova a zwi funa ri sa athu u dzhia phetho? (b) Nṱhani ha u fulufhela Yehova Vhaisiraele vho ita mini?

¹⁶ Vhana vha ḓitika nga vhabebi vhavho uri vha vha thuse na u vha tsireledza. Na vhathu vhahulwane vha nga humbela vhabebi vhavho uri vha vha thuse. Naho vha tshi nga kona u ḓidzhiela phetho, vha ṱhogomela uri vhabebi vhavho vha nga vha ṋea nyeletshedzo yavhuḓi. Khotsi ashu Yehova u a ri tendela ri tshi ḓidzhiela phetho. Fhedzi ngauri ri a mu fulufhela vhukuma na u mu funa, ri dzula ri tshi humbela thuso yawe na u ita zwoṱhe zwine ra nga kona u itela u ḓivha zwine a zwi funa ri sa athu u dzhia phetho. Arali ra ḓitika nga Yehova, u ḓo ri ṋea muya wawe mukhethwa u itela u ri thusa u ita zwo lugaho.—Vhafilipi 2:13.

¹⁷ Misini ya Samuele, Vhaisiraele vho kundwa musi vha tshi lwa na Vhafilisita. Nṱhani ha u vhudzisa Yehova zwine vha fanela u zwi ita, vho ri: “Nga ri yo’ dzhia mbulungelo ya mulanga wa Yehova hangei Silo; ndi hone a tshi ḓo vha vhukati hashu a ri lamulela zwanḓani zwa maswina ashu.” Yeneyo phetho yo ita uri hu vhe na mvelelo ifhio? “Bulayo ḽone ḽa vha ḽihulu lwa u vhifha; ho vhulahwa maḓana a ná maḓana mararu a tshi vhaliwa kaḓana a vhanna vha tshimbilaho nga milenzhe. Na mbulungelo ya Mudzimu ya thubiwa.” (1 Samuele 4:2-4, 10, 11) Vhaisiraele vho vha vha tshi humbula u nga u dzhia Mbulungelo zwi ḓo ita uri Yehova a vha thuse na u vha tsireledza. Fhedzi a vho ngo humbela thuso kha Yehova kana u lingedza u ḓivha zwine a zwi funa. Nṱhani hazwo, vho ita zwe vha vhona zwo fanela nahone vho kaṋa zwe vha zwala.—Vhalani Mirero 14:12.

18. Bivhili i ni gudisa mini nga ha u fulufhela Yehova?

¹⁸ Mupsalme we a vha a tshi funa Yehova na u ḓitika ngae, o ṅwala uri: “Lindela Mudzimu; ngauri ndi kha ḓi ḓo mu livhuha ó ntshidza nga tshifhaṱuwo tshawe. Mudzimu wanga! Mbilu yanga yo ṱungufhala ngomu hanga; ndi zwiné nda U elelwa.” (Psalme ya 42:5, 6) Naa ni ḓipfa nga yeneyo nḓila nga ha Yehova? Naa ni ḓipfa ni tsini nae na u mu fulufhela? Ni nga kona u guda u mu fulufhela nga ho engedzeaho. Bivhili i ri: “Fulufhedza Mudzimu nga mbilu yau yoṱhe; U songo ḓi-tika nga u ri: Ndi a ṱalukanya. Dzinḓilani dzau dzoṱhe ḓivha Ene, u ḓo U lugisela hune wa tshimbila.”—Mirero 3:5, 6.

19. Ni nga sumbedza hani Yehova uri ni a mu funa?

¹⁹ Yehova o ri gudisa nḓila ya u mu funa nga u ri funa u thoma. Kha ri dzule ri tshi humbula nga ha zwe a ri itela zwone na nḓila ine a ri funa ngayo. Nahone ri sumbedze uri ri a mu funa nga mbilu yashu yoṱhe, zwoṱhe zwine ra vha zwone, ṱhalukanyo yashu yoṱhe na nga nungo dzashu dzoṱhe.—Marko 12:30.