1. Muapostola Yohane o ri ṱuṱuwedza uri ri humbule nga ha mini, nahone ndi ngani?

MUAPOSTOLA YOHANE o ri ṱuṱuwedza uri ri humbule nga ho dzikaho nga ha nḓila khulwane ine Yehova a ri funa ngayo. Yohane ya u thoma 3:1 i ri: “Vhonani uri Khotsi o ri sumbedza lufuno-ḓe!” Musi ri tshi elekanya nga ha nḓila ine Yehova a ri funa ngayo na nḓila ine a sumbedza ngayo uri u a ri funa, ri sendela tsini nae nahone ri mu funa nga ho engedzeaho.

2. Ndi ngani zwi tshi konḓela vhaṅwe u pfesesa uri Mudzimu u a vha funa?

² Zwi ṱungufhadzaho ndi uri vhaṅwe a vha pfesesi nḓila ine Mudzimu a nga vha funa ngayo. Vha humbula u nga Mudzimu ha na ndavha na vhathu. Vha nga humbula u nga Mudzimu u sokou vhea milayo nahone u pfisa vhuṱungu vhane vha si mu thetshelese. Nga nṱhani ha pfunzo dza mazwifhi, vhaṅwe vha humbula u nga Mudzimu u na tshiṱuhu nahone a zwi konadzei u mu funa. Vhaṅwe vha vhona u nga Mudzimu u funa vhathu vhoṱhe hu sa londwi zwine vha zwi ita. Fhedzi u guda haṋu Bivhili  zwo ni thusa u ḓivha ngoho nga ha Yehova. Ni a zwi ḓivha uri lufuno ndi pfaneleo yawe khulwane nahone o ṋekedza Murwa wawe sa tshirengululi a tshi itela inwi. (Yohane 3:16; 1 Yohane 4:8) Naho zwo ralo, nga nṱhani ha zwe na zwi tshenzhela vhutshiloni haṋu, zwi nga kha ḓi ni konḓela u pfesesa nḓila ine Yehova a ni funa ngayo.

3. Ndi mini zwine zwa ḓo ri thusa u pfesesa nḓila ine Yehova a ri funa ngayo?

³ U itela u ri thusa u pfesesa uri Yehova u a ri funa, ri fanela u thoma ra pfesesa uri Yehova ndi ene we a ri sika. O ri ṋea vhutshilo. (Vhalani Psalme ya 100:3-5.) Ndi ngazwo Bivhili yo ṱalusa muthu wa u thoma sa “murwa wa Mudzimu.” (Luka 3:38) Nahone Yesu o ri gudisa uri ri vhidze Yehova “Khotsi ashu wa ṱaḓulu.” (Mateo 6:9) Nga zwenezwo, Yehova ndi Khotsi ashu nahone u ri funa nga nḓila ine khotsi wavhuḓi a funa ngayo vhana vhawe.

4. (a) Yehova ndi Khotsi wa mufuda-ḓe? (b) Ndi mini zwine ra ḓo zwi haseledza kha ino thero na i tevhelaho?

⁴ Zwi a konḓela vhaṅwe u vhona khotsi sa muthu ane a vha na lufuno. Vha nga vha vha tshi humbula zwithu zwi vhavhaho nga nḓila ye vha aluwa ngayo ngauri vhokhotsi avho vho vha vha tshi vha fara nga tshiṱuhu. Yehova a nga si vhuye a ita zwenezwo kha vhana vhawe. A hu na Khotsi ane a fana nae. (Psalme ya 27:10) U a ri funa vhukuma nahone u a ri ṱhogomela nga nḓila nnzhi. Musi ri tshi pfa uri Yehova u a ri funa, na riṋe ri ḓo mu funa. (Yakobo 4:8) Kha ino thero, ri ḓo haseledza nḓila nṋa dzine dza sumbedza uri Yehova u a ri funa. Nahone kha thero i tevhelaho, ri ḓo haseledza nḓila nṋa dzine ra nga sumbedza ngadzo uri ri a mu funa.

5. Mudzimu u ṋea vhathu vhoṱhe mini?

⁵ Musi muapostola Paulo e ngei Athene kha ḽa Gerika, o ṱhogomela uri ho vha hu na midzimu minzhi isili nahone vhathu vho vha vha tshi tenda uri midzimu yavho ndi yone ye ya vha ṋea vhutshilo. Nga zwenezwo, o vha vhudza nga ha “Mudzimu we a sika shango na zwoṱhe zwi re khaḽo.” O vha vhudza uri Mudzimu u “ṋea vhathu vhoṱhe vhutshilo na muya wa u fema na zwithu zwoṱhe” na uri “ri tshi tshila, ri tshi tshimbila, ri tshi vha hone, ndi nga ene.” (Mishumo 17:24, 25, 28) Yehova u ri ṋea zwithu zwoṱhe zwine ra zwi shaya u itela u tshila na u takalela vhutshilo. Humbulani nga ha zwithu zwe a ri ṋea nga nṱhani ha uri u a ri funa.

6. Yehova o ri ṋea haya ha mufuda-ḓe? (Sedzani tshifanyiso tsha u thoma.)

⁶ Sa tsumbo, Yehova o ri lugiselela haya havhuḓi. (Psalme ya 115:15, 16) Kha pulanete dzoṱhe dze a dzi ita, ḽifhasi ḽi vhonala ḽi ḽone ḽo khetheaho. Vhorasaintsi vho ya tshikhalani nahone vha wana hu na pulanete nnzhi, fhedzi a vha koni u wana iṅwe pulanete ine ya vha na tshiṅwe na tshiṅwe tshine vhathu vha tshi shaya u itela u tshila. Yehova ho ngo ri ṋea fhedzi tshiṅwe na tshiṅwe tshine ra tshi shaya u itela u tshila, fhedzi o dovha a ita ḽifhasi ḽo nakaho na fhethu ho tsireledzeaho hune ra ḓiphina nga vhutshilo. (Yesaya 45:18) Musi ri tshi humbula nga ha haya he Khotsi ashu Yehova a ri ṋea hone, ri vhona nḓila ine a ri funa ngayo.—Vhalani Yobo 38:4, 7; Psalme ya 8:3-5.

7. Nḓila ye Yehova a ri sika ngayo, i sumbedza hani uri u a ri funa vhukuma?

⁷ Iṅwe nḓila ye Yehova a sumbedza ngayo uri u a ri funa, ndi nga uri sika nga nḓila  ine ra vha na vhukoni ha u mu edzisa. (Genesi 1:27) Zwenezwi zwi amba uri ri kona u pfa nḓila ine a ri funa ngayo nahone ri kona u mu sumbedza uri ri a mu funa. U a zwi ḓivha uri ndi zwine zwa ri takadza vhukuma. Vhana vha a takala vhukuma musi vha tshi pfa uri vhabebi vhavho vha a vha funa. Nahone humbulani uri Yesu o ri funza uri ri ḓo takala arali ri tsini na Khotsi ashu, Yehova. (Mateo 5:3) O ri ṋea “zwoṱhe zwine ra ḓiphiṋa ngazwo.” Vhukuma, u na mafunda nahone u a ri funa nga maanḓa.—1 Timotheo 6:17; Psalme ya 145:16.

8. Ndi ngani ri tshi ṱoḓa Yehova a tshi ri gudisa?

⁸ Vhokhotsi vha funa vhana vhavho nahone a vha ṱoḓi vha tshi xedzwa kana u fhurwa. Fhedzi vhabebi vhanzhi ṋamusi a vha shumisi zwilinganyo zwa Bivhili zwa u ḓivha zwo lugaho na zwi songo lugaho. Nga zwenezwo, a vha koni u livhisa vhana vhavho zwavhuḓi, zwine kanzhi zwa ita  uri vha si takale na u ḓaḓa. (Mirero 14:12) Naho zwo ralo, Yehova o ṋea vhana vhawe vhulivhisi havhuḓi ngauri ndi ‘Mudzimu a sa laṱedzi.’ (Psalme ya 31:5) U a takalela u ri gudisa ngoho nga hae. U dovha a ri gudisa nḓila ine ra nga mu gwadamela ngayo na u ri sumbedza nḓila ya khwine ya u tshila. (Vhalani Psalme ya 43:3.) Nga zwenezwo, ndi mini zwe Yehova a ri gudisa zwine zwa sumbedza nḓila ine a ri funa ngayo?

9, 10. (a) Ndi ngani Yehova a tshi ri vhudza nga hae? (b) Ndi mini zwine Yehova a ri gudisa zwone nga ha ndivho yawe?

⁹ Tsha u thoma, Yehova u ri vhudza nga hae. U ṱoḓa ri tshi mu ḓivha. (Yakobo 4:8) Nga u ralo, u ri vhudza dzina ḽawe. Zwi re zwone ndi uri Bivhili i amba nga ha dzina ḽawe u fhira dzina naho ḽi ḽifhio. Yehova u dovha a ri vhudza uri u Muthu wa mufuda-ḓe. Musi ri tshi vhona zwithu zwe a zwi sika, ri guda uri u na maanḓa na vhuṱali. (Vharoma 1:20) Nahone musi ri tshi vhala Bivhili, ri guda nḓila ine a humbulela na u ri funa ngayo. Musi ri tshi thoma u ḓivha vhumuthu ha Yehova, ri ḓipfa ri tsini-tsini nae.

¹⁰ Yehova u dovha a ri gudisa zwine ndivho yawe ya vha zwone. U ri vhudza uri ri tshipiḓa tsha muṱa wawe. U dovha a ri ṱalutshedza zwine a zwi lavhelela kha riṋe u itela uri ri shume nga vhuthihi na nga mulalo na vhathu vhoṱhe muṱani wawe. Bivhili i zwi sumbedza khagala uri Mudzimu ho ngo ri sika ri na ndugelo ya u ḓikhethela zwo lugaho na zwi songo lugaho. (Yeremia 10:23) Yehova u ḓivha zwa khwine kha riṋe. Nahone musi ri tshi ṱanganedza vhulivhisi hawe na u mu thetshelesa, ri ḓo vha na vhutshilo vhu re na mulalo na vhu fushaho. Yehova o ri funza yeneyi ngoho ya ndeme ngauri u a ri funa.

11. Khotsi ashu a re na lufuno o ri vhudza mini nga ha vhumatshelo?

¹¹ Khotsi a re na lufuno u humbula nga ho dzikaho nga ha vhumatshelo ha vhana vhawe. U ṱoḓa vha tshi vha na vhutshilo havhuḓi. Zwi ṱungufhadzaho ndi uri vhathu vhanzhi ṋamusi vha a vhilaela nga ha vhumatshelo nahone vhanzhi vha ḓifhedzela tshifhinga vha tshi khou shumela zwithu zwi sa vhuyedzi. (Psalme ya 90:10) Ri a livhuha vhukuma ngauri Khotsi ashu Yehova ho ngo ri gudisa fhedzi nḓila ine ra nga tshila vhutshilo vhu vhuyedzaho zwino, fhedzi o ri fulufhedzisa vhumatshelo havhuḓi!

12. Yehova o lingedza hani u thusa Kaini na Baruki?

¹² Musi Yehova a tshi vhona uri Kaini u khomboni ya u ita zwithu zwo vhifhaho, o lingedza u thusa Kaini nga u mu vhudzisa uri: “Kaini, wo sinyutshela’ni? Tshifhaṱuwo tshau tsho sinyalala nga’ni? Nandi? Wá ita zwivhuya, a si hone khofheni hu tshi ḓo tshá naa?” (Genesi 4:6, 7) Kaini o hana u thuswa nga Yehova nahone o sedzana na masiandoitwa a si avhuḓi. (Genesi 4:11-13) Nga tshiṅwe tshifhinga, Yehova o ṱhogomela uri mavhonele a Baruki o khakheaho o vha a tshi khou mu ita uri a nete na u kulea nungo. Nga zwenezwo, Yehova  o vhudza Baruki uri mahumbulele awe o vha o khakhea nahone u fanela u shanduka. Baruki o thetshelesa nyeletshedzo ya Yehova nahone zwenezwo zwo tshidza vhutshilo hawe.—Yeremia 45:2-5.

13. Ndi mini zwe vhashumeli vha Yehova vha fulufhedzeaho vha zwi guda kha milingo?

¹³ Yehova u a ri livhisa na u ri kaidza ngauri u a ri funa. Ha ri kaidzi musi zwi tshi ṱoḓea fhedzi, fhedzi u dovha a ri gudisa. (Vhaheberu 12:6) Bivhilini, ri vhala nga ha vhashumeli vha Yehova vha fulufhedzeaho, vhe vha gudiswa u vha vhathu vha khwine. Sa tsumbo, Yosefa, Mushe na Davida vho sedzana na zwifhinga zwi konḓaho vhukuma. Musi vho sedzana na milingo, Yehova o vha e navho. Nahone zwithu zwe vha zwi guda musi vho sedzana na yeneyo milingo, zwo vha thusa musi Yehova a tshi vha ṋea vhuḓifhinduleli vhuhulwane. Samusi ri tshi vhala Bivhilini nḓila ye Yehova a tikedza na u gudisa ngayo vhathu vhawe, ri vhona nḓila ine Yehova a ri funa ngayo zwa vhukuma.—Vhalani Mirero 3:11, 12.

14. Arali ri tshi ita zwithu zwo khakheaho, Yehova u ri sumbedza hani uri u a ri funa?

¹⁴ Naho ri tshi ita zwithu zwo khakheaho, Yehova u bvela phanḓa a tshi ri funa. Musi ri tshi thetshelesa ndayo yawe na u rembuluwa u ḓo ri hangwela ‘zwihulu.’ (Yesaya 55:7) Zwenezwo zwi amba mini? Maipfi a Davida a sumbedza nḓila ine Yehova Khotsi ashu a hangwela ngayo: “Ndi Ene a U hangwelaho milandu yau yoṱhe, a fhodzaho malwadze au oṱhe. Ndi Ene a lamulelaho vhutshilo hau lufuni, a U ambadzaho dzánga ḽa vhuthu na khathutshelo. Vhutshinyi hashu o vhu laṱa kule, vhunga Vhubvaḓuvha hú kule na Vhukovhela.” (Psalme ya 103:3, 4, 12) Yehova u ri kaidza na u ri livhisa nga nḓila dzo fhamba-fhambanaho. Naa ni a ṱavhanya u ita tshanduko? Dzulani ni tshi humbula uri Yehova u a ri kaidza ngauri u a ri funa.—Psalme ya 30:5.

15. Ndi ifhio iṅwe nḓila ine ya sumbedza uri Yehova u a ri funa?

¹⁵ Khotsi wa lufuno u tsireledza muṱa wawe kha khombo. Ndi zwine Khotsi ashu Yehova a ri itela zwone. Mupsalme o amba zwi tevhelaho nga ha Yehova: “U ḓo tshidza mimuya ya vhavhuya vhawe zwanḓani zwa vhavhi.” (Psalme ya 97:10) Humbulani nga ha zwi tevhelaho: U fana na musi ni tshi ṱavhanya u tsireledza maṱo aṋu ngauri ndi a ndeme kha iṅwi, Yehova u a ṱavhanya u tsireledza vhathu vhawe ngauri ndi vha ndeme khae.—Vhalani Sakaria 2:12.

16, 17. Yehova o tsireledza hani vhathu vhawe tshifhingani tsho fhiraho na musalauno?

¹⁶ Iṅwe nḓila ye Yehova a tsireledza vhathu vhawe ngayo tshifhingani tsho fhiraho na musalauno ndi nga u shumisa vharuṅwa. (Psalme ya 91:11) Muruṅwa muthihi o vhulaha maswole a 185 000 a Vhaasuri nga vhusiku vhuthihi nahone a tshidza vhathu vha Mudzimu. (2 Dzikhosi 19:35) Ḓanani ḽa u thoma ḽa miṅwaha,  vharuṅwa vho tshidza Petro, Paulo na vhaṅwe dzhele. (Mishumo 5:18-20; 12:6-11) Zwenezwino, ho vha na nndwa khulu kha ḽiṅwe shango ḽa Afurika. Shangoni ḽeneḽo ho vha hu na dzipfudzungule nga nṱhani ha dzinndwa, u tswa, u tzhipa na u vhulaha. Naho hu songo fa na muthihi kha vhahashu, vhanzhi vho xelelwa nga zwithu zwe vha vha vhe nazwo. Fhedzi vhoṱhe vho vhona lufuno lwa Yehova nahone vho vha vha tshi zwi ḓivha uri u a vha ṱhogomela. Hu sa londwi mitsiko yoṱhe ye vha sedzana nayo, vho vha vha tshi kha ḓi vha vho takala. Musi muimeleli wa ofisi khulwane ya Ṱhanzi dza Yehova a tshi dalela vhahashu nahone a vha vhudzisa uri vho vuwa hani, vho fhindula vha ri, “Zwoṱhe zwo luga, ri livhuha Yehova!”

¹⁷ Vhukuma, vhaṅwe vhashumeli vha Yehova vha nga ho mufunziwa Stefano na vhaṅwe vhane vha nga ene, vho fa ngauri vho vha vha tshi fulufhedzea. Yehova ha dzuli a tshi thivhela zwenezwi uri zwi songo itea. Fhedzi u tsireledza vhathu vhawe nga u angaredza nga u vha tsivhudza nga ha nḓila dzo fhamba-fhambanaho dzine Sathane a lingedza u vha fhura ngadzo. (Vhaefesa 6:10-12) Ri wana dzenedzo tsevho Bivhilini na kha khandiso dzi bvaho ndanguloni ya Yehova. Sa tsumbo, ri guda nga ha khombo dzi re kha Inthanethe na u funesa tshelede. Ri dovha ra guda nga ha khombo dza muvi, dzibugu kana mitambo zwine zwa vha na u ḓifara luvhi na vhuvemu. Vhukuma, Yehova u a ri funa nahone u ṱoḓa u ri tsireledza.

18. Ni ḓipfa hani nga u funwa nga Yehova?

¹⁸ Musi Mushe a tshi humbula nga ha miṅwaha yoṱhe ye a shumela Yehova, o vha e na vhungoho ha uri Yehova u a mu funa. Mushe o ri: “U ri fushe matsheloni nga tshilidzi tshau, uri ri fhululedze ri takale vhutshiloni hashu hoṱhe.” (Psalme ya 90:14) Ro fhaṱutshedzwa ngauri ri kona u pfesesa na u vhona nḓila ine Yehova a ri funa ngayo. Ndi ndugelo khulwane vhukuma u funwa nga Yehova! Ri ḓipfa u fana na muapostola Yohane, we a ri: “Vhonani uri Khotsi o ri sumbedza lufuno-ḓe.”—1 Yohane 3:1.