MUSI ndi na miṅwaha ya malo, a tho ngo tsha lapfa. Zwino ndi na miṅwaha ya 43, fhedzi ndi mulapfu nga mithara nthihi fhedzi. Musi vhabebi vhanga vha tshi ṱhogomela uri a thi tsha ḓo dovha nda lapfa, vho nṱuṱuwedza uri ndi shumese u itela uri ndi si dzule ndi tshi humbula nga ha vhulapfu hanga. U itela uri ndi dzule ndo farakanea, ndo vha ndi tshi vhea ṱafula ḽa mitshelo phanḓa ha nnḓu ya hashu nahone ḽo vha ḽi tshi dzula ḽo kuna. Zwenezwo zwo vha zwi tshi kunga vharengi vhanzhi.

Vhukuma, u shuma nga nungo dzoṱhe a zwo ngo shandula tshithu. Ndo vha ndi mupfufhi vhukuma, nahone ndo vha ndi tshi konḓelwa u ita zwithu zwi leluwaho vhutshiloni, zwi ngaho u swikelela kha khaunthara ya vhengeleni. Zwithu zwoṱhe zwo vha zwi tshi vhonala u nga zwo itelwa vhathu vhalapfu kha nṋe. Ndo ḓipfela vhuṱungu, fhedzi zwenezwo zwo shanduka musi ndi na miṅwaha ya 14.

Ḽiṅwe ḓuvha vhafumakadzi vhavhili vha Ṱhanzi dza Yehova, vho ḓa u renga mutshelo nahone vha humbela u thoma na nṋe pfunzo ya Bivhili. Nga u ṱavhanya ndo ṱhogomela uri u ḓivha Yehova na ndivho yawe ndi zwa ndeme vhukuma u fhira vhupfufhi hanga. Zwenezwo zwo nthusa vhukuma. Ndo vha ndi tshi funesa luṅwalo lwa Psalme ya 73:28. Tshipiḓa tsha u thoma tsha yeneyo ndimana tshi ri: “Nṋe ndi ḓifhelwa nga u vha tsini na Mudzimu.”

Muṱa wahashu wo pfulutshela Burkina Faso u tshi bva Côte d’Ivoire, nahone vhutshilo hanga ha shanduka vhukuma. Fhethu he nda vha ndi tshi dzula hone, vhathu vho vha vho ḓowela u mmbona ndo ima tsini na ṱafula ḽa mitshelo. Fhedzi he ra pfulutshela hone vhathu vho vha vha sa nnḓivhi nahone ndi songo ḓowelea. Vhathu vho vha vha tshi nzwondolola, nga u ralo, ndo vha ndi tshi dzula ndo ḓivalela nḓuni lwa dzivhege nnzhi. Nga zwenezwo, nda humbula uri ndo vha ndi tshi ḓifhelwa lungafhani nga u sendela tsini na Yehova. Ndo ṅwalela ofisi ya davhi ya Ṱhanzi dza Yehova nahone vha rumela muthu ane a ḓo nthusa. Ho ḓa murumiwa nga tshikuta ane a pfi Nani.

Bada dza muṱavha dza hune nda dzula hone dzo vha dzi tshi dzulela u suvha, nahone nga tshifhinga tsha mvula ho vha hu tshi vha na matope. Tshifhinga tshinzhi Nani o vha a tshi wa nga tshikuta musi o ḓa u guda na nṋe, fhedzi ho ngo laṱela thaula. Ḽiṅwe ḓuvha o humbela u ṱuwa na nṋe miṱanganoni. Ndo ṱhogomela uri zwenezwi zwi amba uri ndi fanela u bva hayani nahone nda sedzana na vhathu vho nzwondololaho. Zwiṅwe hafhu, u dzula hanga murahu ha tshikuta zwo vha zwi tshi ḓo ita uri tshikuta tshi lemelwe nahone tshi konḓelwe u tshimbila. Naho zwo ralo, ndo tenda, ndi tshi humbula  tshipiḓa tsha vhuvhili tsha luṅwalo lune nda lu funesa: “Vhushavhelo hanga ndi ḓivha Iwe Muṋe wanga Yehova.”

Nga zwiṅwe zwifhinga nṋe na Nani ro vha ri tshi wela matopeni, fhedzi ngauri ro vha ri tshi funa miṱangano, ro vha ri si na ndavha. Ho vha hu na phambano vhukuma kha vhathu vhe vha vha vhe Holoni ya Muvhuso na vhathu vhe vha vha vha tshi nzwondolola musi ndi nnḓa! Nga murahu ha miṅwedzi ya malo, nda lovhedzwa.

Tshipiḓa tsha vhuraru tsha luṅwalo lune nda lu funesa tshi ri: “Kha ndi vhe wa u ḓivhadza zwoṱhe zwiné wa zwi shuma.” Ndo vha ndi tshi zwi ḓivha uri u ya vhuḓinḓani zwi ḓo vha khaedu khulwane vhukuma kha nṋe. Ndi kha ḓi humbula musi ndi tshi huwelela nnḓu nga nnḓu lwa u tou thoma. Vhana na vhathu vhahulwane vho vha vha tshi nzwondolola, vha tshi ntsala murahu nahone vha tshi nkolela nga nḓila ine nda tshimbila ngayo. Zwenezwo zwo mpfisa vhuṱungu vhukuma, fhedzi musi ndi tshi ḓihumbudza uri vha ṱoḓa Paradiso u fana na nṋe, ndo kona u konḓelela.

U itela u leludza zwithu, ndo wana baisigira ya malinga mararu ine ya tshoviwa nga zwanḓa. Muthu we nda vha ndi tshi tshimbila nae tsimuni o vha a tshi phusha baisigira musi ri tshi gonya tshivhanga nahone o vha a tshi ṋamela na nṋe musi i tshi tsa. Naho mathomoni u ya vhuḓinḓani zwo vha zwi khaedu, nga u ṱavhanya zwo ita uri ndi takale vhukuma, zwe zwa ita uri nga 1998 ndi vhe muvulanḓila wa tshifhinga tshoṱhe.

Ndo fara pfunzo nnzhi dza Bivhili, nahone vhaṋa vha vhenevho vha lovhedzwa. Zwiṅwe hafhu, muṅwe wa vhana vhahashu vha vhasidzana o ṱanganedza ngoho! Kanzhi u pfa uri vhaṅwe vha khou ita mvelaphanḓa ya lwa muya zwi a nṱuṱuwedza musi ndi tshi kulea nungo. Ḽiṅwe ḓuvha musi ndo farwa nga malaria, ndo wana vhurifhi vhu bvaho Côte d’Ivoire. Ndo vha ndo thoma pfunzo ya Bivhili na mutshudeni ane a dzhena yunivesithi ngei Burkina Faso nahone nda humbela wahashu wa tshinnani uri a gude nae. Nga murahu onoyo mutshudeni o pfulutshela Côte d’Ivoire. Ndo takala musi ndi tshi pfa uri o no vha muhuweleli a songo lovhedzwaho!

Ndi ḓitshidza nga nḓila-ḓe? Dzangano ḽine ḽa thusa vhathu vho holefhalaho ḽo ngudisa u runga. Muṅwe mugudisi o ṱhogomela nḓila ine nda shuma ngayo nahone a ri: “Ri fanela u ni gudisa u ita tshisibe.” Vho ngudisa. Zwino ndi ita zwisibe zwa u kuvha na zwa u kunakisa nnḓu. Vhathu vha takalela zwisibe zwanga nahone vha vhudza vhaṅwe nga hazwo. Ndi zwi isa kha vhathu nga tshavhukoma ndi tshi shumisa tshikuta tsha malinga mararu.

Zwi nṱungufhadzaho ndi uri nga 2004, ndo litsha vhuvulanḓila nga nṱhani ha tshiṱhavhi muṱanani wanga. Fhedzi ndi kha ḓi ya vhuḓinḓani tshifhinga tshoṱhe.

Vhathu vha amba uri vha nḓivhela u mwethuwa. Ndi na tshiitisi tsha u dzula ndo takala ngauri ndi ḓifhelwa nga u vha tsini na Mudzimu.—Muanetsheli ndi Sarah Maiga.